Mga Kaayohan sa Pagkahadlok sa Matuod nga Diyos
“Ako, si Jehova, mao ang imong Diyos, ang Usa nga nagtudlo kanimo aron makabaton ka ug kaayohan, ang Usa nga nagmando kanimo sa dalan nga imong pagalaktan.”—ISAIAS 48:17.
1. Unsang mga katalagman ang masanta unta sa diyosnong kahadlok?
KON naugmad pa ni Adan ang diyosnong kahadlok, nakapugong unta kini kaniya gikan sa sala nga misangpot sa iya mismong walay kataposang kamatayon ug sa libolibong mga tuig sa kaguol alang sa iyang mga anak. Kon ang karaang nasod sa Israel namati pa sa tambag ni Jehova sa pagkahadlok kaniya ug sa paghigugma kaniya, kadtong nasora dili unta mabihag ngadto sa Babilonya, ug dili unta nila isalikway ang Anak sa Diyos ug mahimong sad-an sa pag-ula sa iyang dugo. Kon ang kalibotan karon may kahadlok pa sa Diyos, wala untay korapsiyon sa kagamhanan o sa negosyo, walay krimen, walay gubat.—Proverbio 3:7.
2. Bisan pa sa mga kahimtang sa kalibotan sa palibot kanato, nganong atong ugmaron ang pagkahadlok kang Jehova?
2 Apan, bisag unsa pay buhaton sa kalibotan sa palibot kanato, kita ingong mga indibiduwal, ingong mga pamilya, ug ingong mga kongregasyon sa mga alagad ni Jehova makabaton ug kaayohan sa pag-ugmad sa pagkahadlok sa matuod nga Diyos. Kini nahiuyon sa pahinumdom nga gihatag ni Moises ngadto sa nasod sa Israel: “Unsay gikinahanglan ni Jehova nga inyong Diyos kaninyo kondili ang pagkahadlok kang Jehova nga inyong Diyos, ang paglakaw sa tanan niyang mga dalan ug ang paghigugma kaniya ug ang pag-alagad kang Jehova nga inyong Diyos uban sa bug-os ninyong kasingkasing ug sa bug-os ninyong kalag; ang pagbantay sa mga sugo ni Jehova . . . alang sa inyong kaayohan?” (Deuteronomio 10:12, 13) Unsa ang pipila ka mga kaayohang moabot kanato kon kita may kahadlok kang Jehova, ang matuod nga Diyos?
Kaalam—Labaw Pang Bililhon Kay sa Bulawan
3. (a) Unsa ang labing dakong kaayohan nga mahimo natong madawat? (b) Unsay kahulogan sa Salmo 111:10?
3 Ang labing dakong kaayohan mao ang matuod nga kaalam. Ang Salmo 111:10 nag-ingon: “Ang pagkahadlok kang Jehova mao ang sinugdanan sa kaalam.” Unsay kahulogan niana? Ang kaalam mao ang katakos sa paggamit sa kahibalo nga malamposon sa pagsulbad sa mga problema, sa pagsanta sa kapeligrohan, ug sa pagkab-ot sa pipila ka mga tumong. Nalangkit niini ang maayong paghukom. Ang sinugdanan, ang unang bahin, ang pundasyon sa maong kaalam, mao ang pagkahadlok kang Jehova. Ngano? Tungod kay ang tanang kalalangan maoy mga buhat sa iyang mga kamot. Kini nagadepende kaniya. Iyang gihatagan ang katawhan ug kagawasan sa pagpili apan dili sa katakos sa malamposong pagtul-id sa ilang kaugalingong mga lakang nga walay iyang pagtultol. (Josue 24:15; Jeremias 10:23) Gawas lamang kon atong pabilhan ang maong pasukaranang mga kamatuoran bahin sa kinabuhi ug magkinabuhi sumala niana nga atong maangkon ang dumalayong kalamposan. Kon ang atong kahibalo bahin kang Jehova mohatag kanato ug dili-matarog nga pagtuo nga ang kabubut-on sa Diyos segurado gayod nga molampos ug nga ang iyang saad ug katakos sa pagganti sa pagkamatinumanon piho, nan ang diyosnong kahadlok motukmod kanato sa paglihok nga maalamon.—Proverbio 3:21-26; Hebreohanon 11:6.
4, 5. (a) Nganong ang edukasyon sa unibersidad sa usa ka batan-ong lalaki wala makahatag kaniya ug matuod nga kaalam? (b) Sa unsang paagi kining tawhana ug ang iyang asawa nakabaton ug matuod nga kaalam sa ulahi, ug sa unsang paagi nabag-o niini ang ilang mga kinabuhi?
4 Tagda ang usa ka pananglitan. Sa pipila ka mga dekadang milabay, usa ka batan-ong lalaki mitungha sa University of Saskatchewan, sa Canada. Lakip sa kurikulum mao ang biolohiya, ug siya gitudloan ug ebolusyon. Human migraduwar, iyang dugang gitun-an ang atomic physics, nga nahimong eskolar aron makapadayon sa iyang mga pagtuon sa University of Toronto. Samtang siya nagtuon, iyang nakita ang katingalahang ebidensiya sa pagkahusay ug desinyo sa mga gambalay sa atomo. Apan walay tubag ang nahatag sa mga pangutana: Kinsay nagdesinyo niining tanan? Kanus-a? Ug ngano? Kon wala kining mga tubaga, posible ba niyang magamit ang iyang kahibalo sa maalamong paagi diha sa usa ka kalibotan nga niadtong panahona naggubatay? Unsay mogiya kaniya? Nasyonalismo ba? Usa ka tinguha alang sa materyalistikong mga bentaha? Sa pagkatinuod, siya ba nakabaton ug matuod nga kaalam?
5 Wala magdugay human siya migraduwar, kadtong batan-ong lalaki ug ang iyang asawa misugod sa pagtuon sa Bibliya uban sa mga Saksi ni Jehova. Gikan sa Pulong sa Diyos mismo, sila misugod sa pagkabaton sa mga tubag nga wala matubag kanila kaniadto. Sila nakadangat sa pagkaila sa Maglalalang, si Jehova nga Diyos. Samtang nagtuon sila bahin kang Moises diha sa Pulang Dagat ug bahin kang Daniel ug sa iyang mga kauban sa Babilonya, ilang nakat-onan ang bili sa pagkahadlok dili sa tawo kondili sa Diyos. (Exodo 14:10-31; Daniel 3:8-30) Ang maong diyosnong kahadlok inubanan sa tinuod nga gugma kang Jehova misugod sa pagpalihok kanila. Wala magdugay ang tibuok lakaw sa ilang mga kinabuhi nabag-o. Nakat-onan sa batan-ong lalaki sa kataposan ang Usa kansang mga buhat iyang natun-an sa biolohiya. Siya nagsugod sa pagkasabot sa katuyoan sa Usa kansang kaalam iyang nakitang napabanaag diha sa iyang pagtuon sa pisika. Imbes gamiton ang iyang kahibalo sa paghimog mga instrumento nga molaglag sa iyang isigkatawo, siya ug ang iyang asawa buot motabang sa uban sa paghigugma sa Diyos ug sa paghigugma sa ilang mga silingan. Sila nagpalista sa bug-os panahong pag-alagad ingong mga magwawali sa Gingharian sa Diyos. Sa ulahi, sila mitambong sa Watchtower Bible School of Gilead ug gipadala ingong mga misyonaryo.
6. Kon kita adunay kaalam nga nakagamot diha sa pagkahadlok kang Jehova, unsang mubog-panan-aw nga mga tinguha ang atong pagalikayan, ug unsa hinuoy atong buhaton?
6 Siyempre, dili tanan mahimong mga misyonaryo. Apan kitang tanan makapahimulos sa kaalam nga nakagamot diha sa pagkahadlok kang Jehova. Kon atong ugmaron kana nga kaalam, dili kita maikagong modawat sa mga pilosopiya sa mga tawo nga sa pagkatinuod nanaghap lamang kon bahin sa unsa ang kinabuhi. Magkugi gayod kita sa pagtuon sa Bibliya, nga dinasig sa Tuboran sa kinabuhi, si Jehova nga Diyos, ang usa nga makahatag kanato ug kinabuhing walay kataposan. (Salmo 36:9; Colosas 2:8) Imbes magpaulipon sa komersiyal nga sistema nga hapit nang mahugno mismo, patalinghogan nato ang tambag ni Jehova nga magmakontento na nga adunay makaon ug sapot, samtang ginahimo ang atong relasyon sa Diyos nga panguna sa atong kinabuhi. (1 Timoteo 6:8-12) Imbes molihok nga daw ang atong umaabot nagadepende sa pagkahimong sapian niining kalibotana, kita motuo sa Pulong ni Jehova sa dihang sultihan kita niini nga ang kalibotan lumalabay ug ang kailibgon niini, apan siya nga nagabuhat sa kabubut-on sa Diyos magpabilin sa walay kataposan.—1 Juan 2:17.
7. (a) Sa unsang paagi ang Proverbio 16:16 nagtabang kanato sa pagbaton ug timbang nga salabotan sa mga sukdanan? (b) Unsang mga ganti ang modangat gikan sa paghimo sa kabubut-on sa Diyos nga maoy sentro sa atong mga kinabuhi?
7 Ang Proverbio 16:16 nagdasig kanato pinaagi sa pagsulti nga matinud-anon: “Pagkalabing maayo ang pagbaton sa kaalam [ang kaalam nga nagsugod sa pagkahadlok kang Jehova] kay sa bulawan! Ug ang pagbaton sa salabotan mas maayo pa kay sa salapi.” Ang maong kaalam ug salabotan mopalihok kanato sa pagbuhat sa kabubut-on sa Diyos nga maoy sentro sa atong mga kinabuhi. Ug unsang buluhatona ang gisalig sa Diyos ngadto sa iyang mga Saksi alang niining yugtoa sa tawhanong kasaysayan? Ang pagsangyaw bahin sa iyang Gingharian ug sa pagtabang sa mga tawong matinud-anon ug kasingkasing aron mahimong tinuod nga mga tinun-an ni Jesu-Kristo. (Mateo 24:14; 28:19, 20) Kini maoy buluhaton nga mobungag mga ganti sa matuod nga katagbawan ug dako nga kalipay. Nan, may maayong katarongan nga ang Bibliya nag-ingon: “Malipayon ang tawo nga makakaplag sa kaalam.”—Proverbio 3:13.
Pagbantay Batok sa Pagbuhat ug Daotan
8. (a) Nganli ang ikaduhang kaayohan nga mosangpot gikan sa pagkahadlok sa Diyos. (b) Batok sa unsang daotan nga kita mapanalipdan? (c) Sa unsang paagi ang diyosnong kahadlok mahimong gamhanang puwersa nga nagapalihok?
8 Ang ikaduhang kaayohang makuha sa pagkahadlok sa Diyos mao nga kita mapanalipdan batok sa pagbuhat ug daotan. Kadtong may dulot nga pagtahod sa Diyos dili modesider sa ilang kaugalingon kon unsa ang maayo ug kon unsa ang daotan. Dili nila lantawon ingong daotan ang giingon sa Diyos nga maayo, ni ilang isipon ang mga butang nga giingon sa Diyos nga daotan nga maayo. (Salmo 37:1, 27; Isaias 5:20, 21) Dugang pa, ang tawo nga napalihok sa diyosnong kahadlok dili mohunong sa pagkahibalo lamang kon unsay giingon ni Jehova nga maayo ug kon unsay iyang giingon nga daotan. Kining matanga sa tawo nahigugma kon unsa ang gihigugma ni Jehova ug nagadumot sa kon unsa ang gidumtan ni Jehova. Tungod niini, siya molihok sumala sa mga sukdanan sa Diyos. Busa, ingon sa gipamulong sa Proverbio 16:6, “tungod sa pagkahadlok kang Jehova ang tawo mobiya gikan sa daotan.” Ang maong diyosnong kahadlok mahimong gamhanang puwersa nga nagapalihok sa usa ka tawo sa pagkab-ot sa dili niya makab-ot sa iyang kaugalingong kusog.
9. Sa unsang paagi ang kusganong tinguha nga dili pasuk-on ang Diyos nakaimpluwensiya sa desisyon sa usa ka babaye sa Mexico, ug unsa ang resulta?
9 Bisag mao pay pagsugod pag-ugmad sa diyosnong kahadlok diha sa usa ka tawo, kini mahimong molig-on kaniya sa paglikay sa pagbuhat ug usa ka butang nga iyang basolan sa tibuok niyang kinabuhi. Pananglitan, usa ka babayeng mabdos sa Mexico nangutana sa usa sa mga Saksi ni Jehova bahin sa aborsiyon. Gibasahan sa Saksi ang babaye ug daghang teksto ug unya nangatarongan: “Alang sa Maglalalang, ang kinabuhi bililhon kaayo, bisan ang kinabuhi niadtong wala pa mangatawo.” (Exodo 21:22, 23; Salmo 139:13-16) Ang pagsusi sa klinika nagpakita nga ang iyang gisabak may purohan nga abnormal. Apan karon, kay napalihok sumala sa iyang nakita diha sa Pulong sa Diyos, ang babaye mihukom nga ipakatawo ang iyang anak. Ang iyang doktor mibalibad sa pagpakigkita kaniya pag-usab, ug ang iyang bana mihulga nga biyaan siya, apan siya malig-on. Sa kadugayan, nanganak siya ug usa ka batang babaye—normal, mahimsog, ug guwapa. Natandog tungod sa dakong utang-kabubut-on, gipangita niya ang mga Saksi, ug ilang gisugdan siya sa pagtuon sa Pulong sa Diyos. Sulod sa usa ka tuig siya ug ang iyang bana nabawtismohan. Diha sa usa ka distritong kombensiyon sa milabay ang pipila ka tuig, nalipay sila nga nagkita pag-usab sa unang Saksi ug gipailaila siya ngadto sa ilang guwapang kuwatro-anyos nga anak nga babaye. Ang tukmang pagtahod sa Diyos ug ang kusganong tinguha nga dili siya pasuk-on mahimo gayod nga gamhanang impluwensiya sa kinabuhi sa tawo.
10. Ang diyosnong kahadlok makapalig-on sa mga tawo sa pagbulag gikan sa unsang mga matanga sa buhat nga daotan?
10 Ang diyosnong kahadlok molig-on kanato batok sa nagkalainlaing buhat nga daotan. (2 Corinto 7:1) Kon hustong pagkaugmad, kini makatabang sa tawo sa paghunong sa tagong mga sala, nga siya lamang ug si Jehova ang nahibalo. Makatabang kini kaniya sa paglingkawas gikan sa pagkaulipon sa pag-abuso sa maisog nga mga ilimnon ug sa pag-abuso sa droga. Usa ka giyanon sa droga kanhi sa Habagatang Aprika miingon: “Samtang nagkuha ako ug kahibalo bahin sa Diyos, naugmad ko usab ang kahadlok sa pagpasakit o pagpasuko kaniya. Nahibalo ako nga siya nagtan-aw, ug nangandoy ako nga kahimut-an ako sa iyang panan-aw. Nagpalihok kini kanako sa pagdispatsar sa mga droga nga akong nabatonan pinaagi sa pagpataban niini sa tubig diha sa inidoro.” Ang diyosnong kahadlok nakatabang sa linibo pa sa samang mga paagi.—Proverbio 5:21; 15:3.
Panalipod Batok sa Pagkahadlok sa Tawo
11. Batok sa unsang komon nga lit-ag nga makapanalipod kanato ang maayong pagkahadlok kang Jehova?
11 Ang maayong pagkahadlok sa Diyos manalipod usab kanato batok sa pagkahadlok sa tawo. Ang kadaghanang mga tawo gihampak sa kahadlok sa tawo sa dako o sa gamay nga sukod. Bisan ang mga apostoles ni Jesu-Kristo mitalikod kaniya ug mikalagiw sa dihang gidakop siya sa mga sundalo sa tanaman sa Getsemane. Sa ulahi, diha sa sawang sa hataas nga saserdote, nawad-ag panimbang ug giabot ug kahadlok, si Pedro milimod nga usa siya sa mga tinun-an ni Jesus ug nga siya gani wala makaila kaniya. (Marcos 14:48-50, 66-72; Juan 18:15-27) Apan ang mga apostoles natabangan sa pagkabaton pag-usab sa ilang espirituwal nga pagkatimbang. Sa laing bahin, sa mga adlaw ni Haring Jehoiakim, si Urias nga anak ni Semei nadaog sa kahadlok nga tungod niana iyang gitalikdan ang iyang pag-alagad ingong manalagna ni Jehova ug milayas sa nasod, nga gidakop ug gipatay lamang hinuon.—Jeremias 26:20-23.
12. (a) Sa unsang panalipod batok sa pagkahadlok sa tawo ang gipunting sa Proverbio 29:25? (b) Sa unsang paagi maugmad ang pagsalig sa Diyos?
12 Unsay makatabang sa tawo sa pagbuntog sa pagkahadlok sa tawo? Human nagpasidaan nga ang “pagkahadlok sa mga tawo nagadala ug usa ka lit-ag,” ang Proverbio 29:25 midugang: “Siya nga may pagsalig kang Jehova panalipdan.” Ang pagsalig kang Jehova mao ang yawi. Ang maong pagsalig gipasukad sa kahibalo ug kasinatian. Pinaagi sa pagtuon sa iyang Pulong, atong makita ang ebidensiya sa pagkamatarong sa mga dalan ni Jehova. Atong masinati ang mga hitabo nga nagapasundayag sa iyang pagkakasaligan, sa pagkatinuod sa iyang mga saad (lakip nianang sa pagkabanhaw), sa iyang gugma ug dakong gahom. Unya kon molihok kita sumala niana nga kahibalo, nga magabuhat sa mga butang nga gisugo ni Jehova ug hugot nga isalikway ang mga butang nga iyang gipasidaan, kita mosugod sa pagtagamtam mismo sa iyang mahigugmaong pagtagad ug sa iyang pagkakasaligan. Personal natong makita ang ebidensiya nga ang iyang gahom molihok aron matuman ang iyang kabubut-on. Ang atong pagsalig kaniya modako ug, uban niana, ang atong gugma kaniya ug ang atong tim-os nga tinguha sa dili pagpasuko kaniya motubo. Ang maong pagsalig natukod diha sa malig-ong pundasyon. Kini nagsilbing kuta batok sa pagkahadlok sa tawo.
13. Sa unsang paagi ang diyosnong kahadlok makatabang kanato sa atong sekular nga trabaho, sa balay, ug sa eskuylahan?
13 Ang atong pagsalig kang Jehova, inubanan sa diyosnong kahadlok, magpalig-on kanato alang sa matarong kon hulgaon kita sa usa ka amo nga mawad-an sa atong trabaho tungod sa pagdumili sa pagpakigbahin sa linimbong nga mga palakaw sa negosyo. (Itandi ang Miqueas 6:11, 12.) Kini nga diyosnong kahadlok magpaarang sa daghang libolibong mga Kristohanon sa paglahutay sa matuod nga pagsimba atubangan sa pagsupak gikan sa dili-magtutuong mga membro sa pamilya. Kini mohatag usab sa mga batan-ong nagtungha ug kaisog sa pagpaila sa ilang kaugalingon ingong mga Saksi ni Jehova, ug kini molig-on kanila sa pag-atubang sa pagyubit sa mga kauban sa klase nga mobiaybiay sa mga sukdanan sa Bibliya. Busa, usa ka tin-edyer nga Saksi miingon: “Dili importante kon unsay ilang hunahunaon. Ang hunahunaon ni Jehova mao ang hinungdanon.”
14. Sa unsang paagi ang mga alagad ni Jehova nakagawas nga madaogon bisan pag nameligro ang ilang mga kinabuhi?
14 Ang ingon niana nga pagtuo mopalig-on sa matuod nga mga Kristohanon nga malig-ong magpabilin diha sa mga dalan ni Jehova bisan pag mameligro ang ilang mga kinabuhi. Sila nahibalo nga kinahanglang dahomon nila ang paglutos gikan sa kalibotan. Sila nasayod nga ang mga apostoles gilatigo ug nga si Jesu-Kristo mismo gibunalan ug gipatay sa mga tawong daotan. (Marcos 14:65; 15:15-39; Buhat 5:40; itandi ang Daniel 3:16-18.) Apan ang mga alagad ni Jehova bug-os may pagsalig nga siya makalig-on kanila sa paglahutay; nga pinaagi sa tabang sa Diyos sila mogawas nga madaogon; nga sa walay pagkapakyas gantihan ni Jehova kadtong mga matinumanon—kon gikinahanglan bisan sa pagkabanhaw sa kinabuhi diha sa iyang bag-ong kalibotan. Ang ilang gugma sa Diyos inubanan sa diyosnong kahadlok kusganong nagpadasig kanila sa paglikay sa pagbuhat ug bisan unsa nga magpasuko kaniya.
15. Unsay nagpaarang sa mga Saksi ni Jehova sa paghupot sa ilang integridad diha sa mga kampong konsentrasyon sa Nazi?
15 Kini nga pagpadasig nagpaarang sa mga Saksi ni Jehova sa pag-atubang sa mga kalisang diha sa mga kampong konsentrasyon sa Nazi sa mga tuig sa 1930 ug 1940. Sila namati sa tambag ni Jesus nga makita diha sa Lucas 12:4, 5: “Ako magaingon kaninyo, mga higala ko, Ayawg kahadlok niadtong magpatay sa lawas ug human niini dili na makahimo sa pagbuhat ug bisan unsa pa. Apan akong ipaila kaninyo kon kinsay kahadlokan: Kahadloki siya kinsa human sa pagpatay may awtoridad sa pagtambog ngadto sa Gehenna. Oo, sultihan ko kamo, kahadloki kini nga Usa.” Busa, si Gustav Auschner, usa ka Saksi nga didto sa kampong konsentrasyon sa Sachsenhausen, sa ulahi misulat: ‘Giposil sa SS si August Dickmann ug nanghulga nga posilon ang nahibilin kanamo kon dili kami mopirma sa usa ka dokumento nga nagsalikway sa among pagtuo. Walay usa kanamo ang mipirma. Mas dako ang among kahadlok sa pagpasuko kang Jehova kay sa ilang mga bala.’ Ang pagkahadlok sa tawo mosangpot sa pagkompromiso, apan ang pagkahadlok sa Diyos molig-on sa usa alang sa matarong.
Ang Pagkaluwas sa Kinabuhi
16. Unsay nagpaarang kang Noe sa pagpabilin diha sa hustong dalan sa daghang dekada hangtod sa Lunop, ug unsay misangpot kaniya ug sa iyang panimalay?
16 Si Noe nabuhi sa kataposang mga adlaw sa wala pa ang lunop sa kalibotan. Si Jehova nakahukom sa paglaglag sa daotang kalibotan niadtong panahona tungod sa pagkadaotan sa tawo. Apan, si Noe anaa niadtong kalibotana nga napuno sa kabangisan, grabeng imoralidad, ug pagkawalay-pagtagad sa kabubut-on sa Diyos. Bisan pa sa pagsangyaw ni Noe sa pagkamatarong, “wala sila manumbaling hangtod nga ang baha miabot ug mibanlas kanilang tanan.” (Mateo 24:39) Bisan pa si Noe wala magpabalda sa buluhaton nga gihatag sa Diyos sa iyang atubangan. Iyang gibuhat ang “tanan sumala sa gisugo sa Diyos kaniya. Iyang gibuhat kini.” (Genesis 6:22) Unsay nagpaarang kang Noe sa pagpabilin diha sa hustong dalan sa daghang katuigan hangtod sa Lunop? Ang Hebreohanon 11:7 nagtubag: “Tungod sa pagtuo si Noe, human mahatagi ug pasidaang iya-sa-Diyos labot sa mga butang nga wala pa makita, mipakitag diyosnong kahadlok.” Tungod niana, siya ug ang iyang asawa ug ang iyang mga anak nga lalaki ug ang ilang mga asawa naluwas sa Lunop.
17. (a) Bisag unsa pay buhaton sa ubang mga tawo, unsa ang angay natong buhaton? (b) Nganong kadtong may kahadlok kang Jehova tinuod gayod nga malipayong katawhan?
17 Kita nagkinabuhi sa panahon nga sa daghang bahin nahisama sa mga adlaw ni Noe. (Lucas 17:26, 27) Sa makausa pa usa ka pasidaan ang gihatag. Ang Pinadayag 14:6, 7 nagtug-an bahin sa usa ka manulonda nga naglupad sa tunga sa kalangitan nga nag-awhag sa mga tawo sa tanang nasod ug tribo ug pinulongan sa “pagkahadlok sa Diyos ug sa paghatag kaniya ug himaya.” Bisag unsa pay himoon sa kalibotan sa palibot nimo, patalinghogi kadtong mga pulonga, ug unya ipaabot ang imbitasyon ngadto sa uban. Sama kang Noe, lihok diha sa pagtuo ug pagpakitag diyosnong kahadlok. Ang imong pagbuhat niini mosangpot sa kaluwasan sa imong kinabuhi ug sa mga kinabuhi sa daghan pang uban. Samtang palandongon nato ang mga kaayohan nga ginatagamtam niadtong may kahadlok sa matuod nga Diyos, kita makauyon sa dinasig nga salmista kinsa miawit: “Malipayon ang tawo nga may kahadlok kang Jehova, nga diha sa iyang mga sugo nagakalipay sa hilabihan gayod.”—Salmo 112:1.
Unsaon Nimo Pagtubag?
◻ Unsa ang pipila ka talagsaong mga kaayohan ang makuha gikan sa pagkahadlok sa matuod nga Diyos?
◻ Sa unsang paagi ang kaalam nga nakagamot diha sa diyosnong kahadlok magapanalipod kanato?
◻ Nganong ang diyosnong kahadlok magpahilayo kanato gikan sa daotan?
◻ Sa unsang paagi ang diyosnong kahadlok mopanalipod kanato batok sa pagkahadlok sa tawo?
◻ Unsay kalabotan sa diyosnong kahadlok diha sa atong mga palaaboton sa umaabot?
[Mga hulagway sa panid 16, 17]
“Malipayon ang tawo nga may kahadlok kang Jehova, nga diha sa iyang mga sugo nagakalipay sa hilabihan gayod.”—Salmo 112:1