Mga Pangutana Gikan sa mga Magbabasa

Unsang tinamdan ang angayng ipakita panahon sa Kristohanong mga bawtismo?

Makaiikag kana nga pangutana, kay bisan tuod daghan sa atong mga magbabasa nabawtismohan na, sila nalangkit, sama niadtong magpabawtismo pa. Komentohan una nato kadtong magpabawtismo, nga mopailalom sa bug-os nga paglusbog. Unsay angayng tinamdan nila?

Sa Mateo 28:19, 20, giingnan ni Jesus ang iyang mga sumusunod nga manglakaw ug maghimog tinun-an sa mga katawhan, nga magatudlo ug magabawtismo kanila. Wala niya ipresentar ang bawtismo ingong emosyonal kaayong kasinatian, usa ka buhat nga mitungha gumikan sa daklit nga kahinam. Kini usa ka seryosong tikang, sumala sa atong makita gikan sa panig-ingnan ni Jesus. Ang Lucas 3:21 nag-ingon: “Si Jesus usab gibawtismohan ug, samtang siya nag-ampo, ang langit nabuksan.” Oo, ang atong Panig-ingnan nag-isip sa bawtismo nga ugdang, mainampoon. Dili nato siya mahanduraw, nga human mohaw-as gikan sa tubig, mohimog senyas sa kadaogan, nga mosinggit, o magwarawara sa iyang mga bukton, bisan tuod di pa dugay ang pipila mihimog sama niana. Wala, nga si Juan nga Tigbawtismo lamang ang presente, si Jesus midangop sa iyang Amahan diha sa pag-ampo.

Apan, ang Bibliya wala magsugyot nga ang bawtismo maoy usa ka masulob-ong hitabo, nga nanginahanglan ug linaing mga postura o pag-asoy, sama sa gikinahanglan sa pipila ka iglesya sa Kakristiyanohan karon. Aw, hunahunaa lang ang adlaw sa Pentekostes, sa dihang linibong Hudiyo ug mga kinabig ang nagpailalom sa Kristohanong bawtismo. Natun-an na nila ang Kasugoan sa Diyos ug nahidangat sa usa ka relasyon uban kaniya. Busa sila nanginahanglan na lamang nga mokat-on ug modawat sa Mesiyas, si Jesus. Sa dihang gibuhat nila kana, sila nabawtismohan.

Ang Buhat 2:41 nagtaho: “Kadtong mga misagop sa iyang pulong nga kinasingkasing nabawtismohan.” Ang hubad sa Bibliya ni Weymouth mabasa: “Busa, kadtong kinsa mangayaong midawat sa iyang pulong nabawtismohan.” Sila nakakaplag ug kangaya sa kulbahinam nga balita bahin sa Mesiyas, ug tino nga kanang kinasingkasing nga kangaya mikaylap hangtod mismo sa bawtismo, usa ka bawtismo atubangan sa gatosan ug gatosang malipayong mga tumatan-aw. Bisan ang mga manulonda sa langit nanan-aw ug nanagmaya. Hinumdomi ang mga pulong ni Jesus: “Ako magasulti kaninyo, motugbaw ang kalipay taliwala sa mga anghel sa Diyos tungod sa usa ka makasasala nga maghinulsol.”​—Lucas 15:10.

Adunay lainlaing mga paagi diin ang matag usa kanato makabanaag ug kaugdang ug kangaya sa bawtismo. Sa pila ka iglesya kadtong bawtismohanan magsul-ob ug puti o itom nga mga biste. Wala gayod ing Kasulatanhong pagpaluyo sa maong kinahanglanon. Sa gihapon, ang seksi ra kaayo nga mga sapot nga pangkaligo dili angay, sa mga lalaki man o mga babaye. Ug sumala sa gipahayag na, sa paghaw-as gikan sa tubig, ang bag-ong Kristohanon dili angay mohimog linaing mga senyas o molihok nga daw siya nakaangkon ug dakong kadaogan. Ang uban sa Kristohanong mga igsoon nalipay nga ang bag-ohan nabawtismohan. Angay niyang sabton nga kining maong kapasundayagan sa pagtuo maoy sinugdanan lamang sa usa ka taas nga dalan sa integridad sa pagbaton sa pag-uyon sa Diyos.​—Mateo 16:24.

Kita, ingong mga tumatan-aw panahon sa publikong bawtismo, nakig-ambit sa kangaya sa okasyon, ilabina kon ang magpabawtismo usa ka paryente o usa ka tawo nga atong gitun-an sa Bibliya. Apan, aron makapakig-ambit sa bug-os kinahanglang maminaw kita sa enterong pakigpulong uban sa mga kandidato, paminawon sila nga sa publiko motubag sa mga pangutana nga gisukna kanila, ug moduyog sa pag-ampo. Ang pagbuhat sa ingon motabang kanato sa pagbaton sa hustong panglantaw sa bawtismo; mabatonan nato ang panglantaw sa Diyos niana. Tapos sa bawtismo, ang atong kangaya wala magkinahanglan ug selebrasyon, usa ka pungpong sa mga bulak, o usa ka salosalo nga nagpasidungog sa gibawtismohan. Apan mahimo kitang moduol sa atong bag-ong igsoong lalaki o babaye sa pagpahayag ug kalipay sa dalayegong tikang nga gihimo ug sa pagpaabot sa usa ka mainiton kaayong pag-abiabi ngadto sa atong Kristohanong panag-igsoonay.

Nan, sa pagsuma kitang tanan, lakip kadtong magpabawtismo, kinahanglang mag-isip sa bawtismo uban ang tukmang kaugdang. Dili kini panahon sa lanog emosyonal nga mga pahayag, sa salosalo, o sa hudyaka. Apan dili usab kini usa ka magul-anong panahon. Sa tukma malipay kita nga ang mga bag-ohan miduyog kanato diha sa dalan sa walay-kataposang kinabuhi. Ug kita mangayaong makaabiabi sa atong bag-ong mga igsoong lalaki ug babaye.

[Tibuok-panid nga hulagway sa panid 31]