Nahinumdom Ka Ba?

Giapresyar mo ba ang pagbasa sa dili pa dugayng mga isyu sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

▫ Nganong ang unang mga Kristohanon wala magsaulog sa adlawng natawhan ni Jesus? Sumala sa The World Book Encyclopedia, “ang Unang mga Kristohanon wala magsaulog sa pagkatawo [ni Jesus] tungod kay sila nagtuo nga ang pagsaulog sa pagkatawo ni bisan kinsa maoy usa ka paganong kustombre.”​—12/15, panid 4.

▫ Angay bang ang mga pag-ampo idirekta kang Jesus? Dili, tungod kay ang mga pag-ampo maoy usa ka porma sa pagsimba nga iya lamang gayod sa Labing Gamhanang Diyos. Pinaagi sa pagtumong sa tanan natong mga pag-ampo ngadto kang Jehova nga Diyos, ginapaila nato nga atong gibutang sa kasingkasing ang gitudlo ni Jesus nga paagi sa pag-ampo: “Amahan namo sa mga langit.” (Mateo 6:9)​—12/15, panid 25.

▫ Nganong lainlain man ang paghukom nga gipahamtang sa seryosong sala ni Haring David kon itandi sa mga sala ni Ananias ug Sapira? (2 Samuel 11:2-24; 12:1-14; Buhat 5:1-11) Ang sala ni Haring David maoy tungod sa unodnong kahuyangan. Sa dihang gihusay tungod sa iyang nahimo, siya mihinulsol, ug gipasaylo siya ni Jehova​—bisan pa angay niyang antoson ang mga resulta sa iyang sala. Si Ananias ug Sapira nakasala sa paagi nga sila sa kasalingkapaw namakak, nga misulay sa paglimbong sa Kristohanong kongregasyon ug sa ingon ‘namakak sa balaang espiritu ug sa Diyos.’ (Buhat 5:3, 4) Kana nagpamatuod ingong ebidensiya sa tuman-kadaotang kasingkasing, busa mas grabe sila nga gihukman.​—1/1, panid 27, 28.

▫ Unsay makatabang kanato sa pag-alagad kang Jehova uban ang kangaya sa kasingkasing? Kinahanglang ugmaron nato ang usa ka positibo ug mapabilhong panglantaw sa atong mga panalangin ug sa hinatag-sa-Diyos nga mga pribilehiyo sa pag-alagad, ug dili angay natong hikalimtan nga pinaagi sa pagsunod sa Pulong sa Diyos, kita nagapahimuot kaniya.​—1/15, panid 16, 17.

▫ Unsang duha ka butang ang kinahanglang atong ibutang sa hunahuna aron kita makahatag ug epektibong pagdasig? Una, hunahunaa kon unsay isulti aron espisipiko ang imong pagdasig. Ikaduha, pangitag higayon nga maduol ang tawo nga angayan sa komendasyon o kinsa nagkinahanglang mapalig-on.​—1/15, panid 23.

▫ Nganong ang “dakong panon” adunay “mga palwa sa palma diha sa ilang mga kamot”? (Pinadayag 7:9) Ang pagwarawara sa mga palwa sa palma nagpakita nga ang “dakong panon” sa kangaya nagdayeg sa Gingharian ni Jehova ug sa iyang dinihogang Hari, si Jesu-Kristo. (Tan-awa ang Levitico 23:39, 40.)​—2/1, panid 17.

▫ Unsang bililhong mga leksiyon ang makaplagan sa basahon ni Job? Ang basahon ni Job nagpakita kanato kon unsaon pagdumala sa mga suliran. Kini nagtaganag talagsaong mga pananglitan kon sa unsang paagi ang usa nga nag-atubang sa mga pagsulay angayan​—ug dili angayan​—pagatambagan. Dugang pa, ang kaagi ni Job mahimong makatabang kanato sa pagsanong sa timbang nga paagi sa dihang makaplagan nato ang atong kaugalingon nga makmakan sa malisod nga mga kahimtang.​—2/15, panid 27.

▫ Unsay ginatudlo kanato sa mga milagro ni Jesus? Ang mga milagro ni Jesus naghimaya sa Diyos, nga nagpakita ug panig-ingnan alang sa mga Kristohanon sa paghimaya sa Diyos. (Roma 15:6) Sila gidasig sa paghimo ug maayo, sa pagpakita ug kamanggihatagon, ug sa pagpasundayag ug pagkamabination.​—3/1, panid 8.

▫ Unsang katuyoan ang ginaalagaran sa pagrepaso sa mga ansiano sa preparadong mga pangutana uban sa bag-ong mga nagpahinungod? Kini magtino nga ang matag kandidato bug-os nga nakasabot sa pangunang mga pagtulon-an sa Bibliya ug nahibalo kon unsay nalangkit sa pagkahimong Saksi ni Jehova.​—3/1, panid 13.

▫ Sa unsang paagi ang Biblikanhong mga pag-ampo makabenepisyo kanato? Pinaagi sa maayong pagsusi sa mga pag-ampo sa Kasulatan, mailhan nato kadtong gibungat ubos sa mga kahimtang nga susama sa atoa. Ang pagkakaplag, pagbasa, ug pagpalandong sa maong mga pag-ampo makatabang kanato sa pagpalambo sa atong kaugalingong komunikasyon kang Jehova.​—3/15, panid 3, 4.

▫ Unsa ang diyosnong kahadlok? Ang diyosnong kahadlok maoy pagkataha kang Jehova, usa ka halalom nga pagtahod kaniya, inubanan sa maayong pagkahadlok nga makapasuko kaniya. (Salmo 89:7)​—3/15, panid 10.

▫ Unsang tulo ka paagi nga ang Bibliya nagtudlo nga kita bililhon sa panglantaw sa Diyos? Ang Bibliya nagtudlo nga ang matag usa kanato bililhon sa panglantaw sa Diyos (Lucas 12:6, 7); kini nagpatin-aw kon unsay gipabilhan ni Jehova kanato (Malakias 3:16); ug kini nag-asoy kon unsay gibuhat ni Jehova aron ipasundayag ang iyang gugma alang kanato. (Juan 3:16)​—4/1, mga panid 11, 12, 14.

▫ Nganong ang Hebreohanon 10:24, 25 mas labaw kay sa sugo lamang nga ang tanang Kristohanon magkatigom? Kining mga pulonga ni Pablo naghatag ug dinasig sa Diyos nga sukdanan alang sa tanang Kristohanong mga tigom​—sa pagkatinuod, alang sa bisan unsang okasyon sa dihang ang mga Kristohanon magkauban.​—4/1, panid 16.