Sa Dili Madugay, Wala Nay Kabos!

“AYAW kahadlok, tungod kay, tan-awa! ako nagapahayag kaninyo sa maayong balita sa dakong kasaya nga mabatonan sa tanang tawo.” (Lucas 2:10) Kining makapalipayng mga pulong nadunggan sa natingalang mga magbalantay sa duol sa Betlehem sa gabiing natawo si Jesus. Nahiuyon nianang pahayaga, si Jesus nagpasiugda pag-ayo sa “maayong balita” panahon sa iyang yutan-ong ministeryo. Karong adlawa, sa dihang dako kaayo ang atong pagdepende sa salapi aron maatiman ang atong mga panginahanglan, sa unsang paagi makahatag kanatog kaayohan ang maayong balita mahitungod kang Jesus?

Si Jesu-Kristo nagpahayag sa “maayong balita ngadto sa mga kabos.” (Lucas 4:18) Sumala sa Mateo 9:35, “migikan si Jesus sa usa ka paglibot sa tanang siyudad ug mga balangay, nga nanudlo diha sa ilang mga sinagoga ug nagawali sa maayong balita sa gingharian.” Ang iyang mensahe nakapadasig ilabina sa mga nag-antos sa kakabos. “Sa nakita ang mga panon sa katawhan mibati siya ug kaluoy kanila, tungod kay sila pinanitan ug natibulaag samag mga karnero nga walay magbalantay.” (Mateo 9:36) Tinuod, si Jesus miingon, “Anaa kanunay kaninyo ang mga kabos,” apan dili angay kitang mohinapos gikan niining mga pulonga nga wala ing paglaom ang mga kabos. (Juan 12:8) Samtang naglungtad kining tuman-kadaotang sistema, adunay kabos nga mga tawo, walay sapayan kon unsa tingali ing hinungdan sa ilang kahimtang. Ang Pulong sa Diyos dili kay wala magtagad sa kamatuoran sa kakabos, apan kini wala maghisgot sa negatibong mga bahin. Hinunoa, kini nagtanyag sa mga kabos ug tabang sa pagsagubang sa mga kabalaka sa kinabuhi.

Tabang Alang sa mga Kabos

Mamatikdan, kini gikaingon: “Walay labaw nga kabug-at ang mapas-an sa usa ka indibiduwal kay sa pagkasayod nga walay mausang may pagtagad o nakasabot.” Ugaling, bisan pa sa kakulang ug kaluoy sa bahin sa kinabag-an, aduna gihapoy maayong balita alang sa mga kabos​—alang sa presente ug sa umaabot.

Ikasubo, daghan ang walay interes sa pagtabang sa mga kabos. Sumala sa The World Book Encyclopedia, ang pipila nagtuo nga “ang mga tawo sa katilingban nagpakig-indig aron mabuhi ug . . . ang superyor nga mga indibiduwal mahimong gamhanan ug dato.” Kadtong nagtuo sa maong teoriya, nga gitawag ug social Darwinism, tingali mag-isip sa mga kabos ingon nga mga tawong tapolan lamang o mga gastador. Bisan pa niana, ang mga obrero sa kabanikanhan, mga trabahanteng emigrante, ug uban pa, bisan pag gamayg mga suweldo, kasagaran nagkugi pag-ayo aron mapakaon ang ilang mga pamilya.

Sa daghang kayutaan ang kakabos maoy kasagaran. Busa, ang mga kabos​—ang kinabag-an—​wala pabatia nga sila pakyas. Bisan pa niana, sa maong kayutaan adunay mga tawong nagakinabuhing maluho kaayo taliwala sa kakabos. Ang hamugaway, daghag-pagkaon nga mga balay naglungtad tapad sa guot, dili-makapahimsog nga mga payag. Ang dagkog-suweldong mga lalaki nagmaneho sa ilang mahalong mga kotse ubay sa mga kalyeng naghuot sa mga kabos ug mga walay-trabaho. Sa maong kayutaan ang mga kabos sa masakit nakaamgo sa ilang kahimtang. Sa pagkatinuod, “ang mga kabos nag-antos dili lamang gumikan sa kakulang sa sustansiya, dili-maayong balay, ug kulang medikal nga pag-atiman, kondili gumikan usab sa kanunayng kabalaka bahin sa ilang kahimtang,” matud sa The World Book Encyclopedia. “Kay dili makabaton ug padayong makahupot ug maayong mga trabaho, mawad-an sila sa tanang pagbati sa kaligdong ug pagtahod-sa-kaugalingon.” Nan, sa unsang paagi gisagubang sa pipila sa mga kabos kaayo ang ilang kahimtang? Ikapadapat ba ang maayong balita bahin kang Jesus sa pagsagubang niana?

Nahauna, hinumdoming ang kakabos tingali mapagrabe pinaagig dili-maalamong mga batasan. Tagda ang pipila ka pananglitan. Si Valdecir miangkon nga samtang ang iyang asawa ug mga bata may diyutayng pagkaon, siya nag-usik ug salapi sa pagpadayon sa imoral nga estilo sa pagkinabuhi. Siya miingon: “Bisan pag may trabaho, ako walay salapi alang sa pamilya apan kanunay may lainlaing mga tiket sa loteriya sa akong bulsa.” Si Milton, tungod sa hinobrang pag-inom ug pagsigarilyo, nawad-an sa usa ka negosyo nga may 23 ka empliyado. Siya miingon: “Gigugol ko ang mga gabii sa kalye, nga dili makapauli, ug nag-antos pag-ayo ang akong pamilya tungod nako.”

Si João usab nag-usik sa iyang suweldo diha sa mga bisyo. “Gigugol ko ang mga gabii nga layo sa balay. Ang tanan kong suweldo dili igo alang sa akong mga bisyo ug mga pamabaye. Ang kahimtang nahimong dili na maantos, ug gusto sa akong asawa nga makigbulag.” Dugang sa iyang problemang pinansiyal ug sa kaminyoon, may uban pa. Matud niya: “Ako mipahinabog mga problema batok sa mga paryente ug mga silingan, ug ako may mga problema ilabina sa trabaho. Ingong resulta, ako kanunay nga walay trabaho.” Si Júlio maoy giyanon sa droga. Bisan pa niana, siya misaysay: “Sanglit ang akong suweldo dili gayod igo sa pagsuportar sa akong bisyo sa droga, ako misugod pagbaligyag narkotiko aron dili na kinahanglang mopalit ug mga droga.”

Kay nagdako sa usa ka kabos nga pamilya nga walo ug anak, buot ni José nga may mabatonan alang sa iyang kaugalingon. Kay naghunahunang walay mawala kaniya, kauban sa ubang mga batan-on siya misugod pagpangawat sa mga tawo. Sa kawalay-paglaom, ang laing batan-on nahimong membro sa usa ka gang nga ginganlag mga Tigpingkig Ulo. Misaysay siya: “Sanglit kadaghanan kanamo kabos kaayo, kami nakakaplag ug katagbawan sa pagpamuak ug mga butang ug pagdagmal sa mga tawo.”

Hinunoa, karong adlawa kining mga tawhana ug ang ilang mga pamilya wala na mobati ug dulot nga kawalad-on o sa mga pagbati sa pagdumot ug kayugot. Sila dili na walay-mahimo o walay-paglaom. Nganong dili na man? Tungod kay mituon sila sa maayong balita nga giwali ni Jesus. Gipadapat nila ang tambag sa Bibliya ug nakig-uban sa mga tawong samag hunahuna diha sa mga kongregasyon sa mga Saksi ni Jehova. Ug nakat-onan nila ang pila ka hinungdanon kaayong mga butang bahin sa kabahandianon ug kakabos.

Tabang sa Pagsagubang sa Kakabos

Nahauna, ilang nakat-onan nga kon ipadapat ang mga prinsipyo sa Bibliya, mapagaan ang daotang mga epekto sa kakabos. Ang Bibliya nagsaway sa imoralidad, paghuboghubog, pagsugal, ug pag-abusar sa droga. (1 Corinto 6:9, 10) Kanang mga butanga gastoso kaayo. Kana makapahimong kabos sa tawong dato, ug sa tawong kabos nga mas kabos pa. Ang pagbiya niining mga bisyoha ug sa ubang sama niana dakog mahimo sa pagpauswag sa ekonomikanhong kahimtang sa usa ka pamilya.

Ikaduha, ilang nakaplagang adunay mas hinungdanong mga butang sa kinabuhi kay sa bahandi. Ang usa ka timbang nga hunahuna gipahayag niining dinasig nga mga pulong: “Ang kaalam maoy usa ka panalipod maingon nga ang salapi maoy usa ka panalipod; apan ang kaayohan sa kahibalo mao nga ang kaalam mismo nagtipig nga buhi sa mga tag-iya niini.” (Ecclesiastes 7:12) Oo, ang salapi kinahanglanon. Apan ang binase-sa-Bibliya nga kaalam ug kahibalo sa mga katuyoan sa Diyos labi pang mapuslanon. Sa pagkatinuod, sa usang kulang ug kaalam, ang pagbaton ug daghan kaayong salapi mahimong usa ka kabug-at sama ra sa pagbaton ug diyutay kaayo. Ang magsusulat sa Bibliya maalamong miampo: “Ayaw akog hatagig kakabos ni bahandi. Itugot nga ako mokaon sa pagkaon nga gisugyot alang kanako, aron ako dili mabusog ug sa pagkamatuod ako magalimod kanimo ug magaingon: ‘Kinsa ba si Jehova?’ ug aron ako dili modangat sa kakabos ug ako mangawat gayod ug magpasipala sa ngalan sa akong Diyos.”​—Proverbio 30:8, 9.

Ikatulo, ilang nasayran nga kon ang usa ka tawo magkinabuhi sumala sa maayong balita nga giwali ni Jesus, dili gayod kinahanglang mobati siyang biniyaan. Ang maayong balita naglangkit sa Gingharian sa Diyos. Ang mensahe gitawag ang “maayong balita sa gingharian,” ug sa atong adlaw kini ginawali sa tibuok gipuy-ang yuta. (Mateo 24:14) Gisultihan kita ni Jesus nga kita pagasuportahan kon atong ibutang ang atong paglaom sa maong Gingharian. Siya miingon: “Nan, padayong pangitaa nga una ang gingharian ug ang pagkamatarong [sa Diyos], ug kining tanang ubang mga butang idugang kaninyo.” (Mateo 6:33) Ang Diyos wala mosaad ug maartihong mga kotse o maluhong mga balay. Si Jesus naghisgot sa mga kinahanglanon sa kinabuhi, mga butang nga sama sa pagkaon ug panapot. (Mateo 6:31) Apan milyonmilyon karong adlawa makapamatuod nga kasaligan ang saad ni Jesus. Ang usa ka indibiduwal, bisan kabos kaayong indibiduwal, dili sa bug-os biyaan kon iyang ibutang pag-una ang Gingharian.

Ikaupat, ilang nasayrang ang usang nagbutang pag-una sa Gingharian sa Diyos dili mayugot tungod sa ekonomikanhong kalisod. Oo, ang usa ka tawong kabos kinahanglang maghago sa pagtrabaho. Apan kon siya nag-alagad sa Diyos, siya adunay bulahang relasyon uban sa iyang Maglalalang, nga bahin kaniya ang Bibliya nag-ingon: “Siya wala magtamay ni magdumot sa kasakit sa usang sinakit; ug siya wala magtago sa iyang nawong gikan kaniya, ug sa dihang siya mituwaw ngadto kaniya alang sa panabang siya nagpatalinghog.” (Salmo 22:24) Dugang pa, ang usa ka tawong kabos may tabang sa pagsagubang sa mga suliran sa kinabuhi. Gipahimuslan niya ang mainitong panag-uban sa kaubang mga Kristohanon ug may kahibalo ug pagsalig sa gipadayag nga kabubut-on ni Jehova. Ang mga butang nga sama niini “labi pang tilinguhaon kay sa bulawan, oo, kay sa linunsay kaayong bulawan.”​—Salmo 19:10.

Sa Kataposan, Wala Nay Kakabos!

Sa kataposan, ang mga indibiduwal nga mamati sa maayong balita mahibalo nga si Jehova nga Diyos may katuyoan sa pagsulbad sa suliran sa kakabos hangtod sa hangtod pinaagi sa iyang Gingharian. Ang Bibliya nagsaad: “Ang kabos dili hikalimtan sa tanang panahon, ni mahanaw gayod ang paglaom sa mga maaghop.” (Salmo 9:18) Ang Gingharian maoy usa ka tinuod nga gobyerno, nga natukod sa mga langit uban kang Jesu-Kristo ingong Magmamando. Sa dili madugay, ang maong Gingharian mopuli sa tawhanong mga kagamhanan sa pagdumala sa tawhanong mga kahikayan. (Daniel 2:44) Unya, ingong naentronong Hari, si Jesus “maluoy sa usang timawa ug sa usang kabos, ug ang mga kalag sa mga kabos iyang pagaluwason. Iyang pagalukaton ang ilang kalag gikan sa pagdaogdaog ug gikan sa kabangisan, ug ang ilang dugo mahimong bililhon sa iyang mga mata.”​—Salmo 72:13, 14.

Sa paglantaw sa maong panahon, ang Miqueas 4:3, 4 nag-ingon: “Sila magalingkod gayod, ang matag usa ilalom sa iyang parras ug ilalom sa iyang kahoy nga igos, ug walay magapakurog kanila; kay ang baba mismo ni Jehova sa mga panon namulong niini.” Kinsay gihisgotan dinhi? Aw, ang tanang magpasakop sa Gingharian sa Diyos. Ang maong Gingharian magsulbad sa tanang suliran nga nagsakit sa katawhan​—bisan ang suliran sa sakit ug kamatayon. “Iya gayong pagalamyon ang kamatayon sa walay kataposan, ug ang Soberanong Ginoo nga si Jehova magapahid sa mga luha gikan sa tanang nawong.” (Isaias 25:8; 33:24) Pagkalahi unya ang maong kalibotan! Ug hinumdomi, kita makatuo niining mga saara tungod kay kana sila giinspirar sa Diyos mismo. Siya nag-ingon: “Ang akong katawhan magapuyo sa malinawong malungtarong dapit ug sa mga pinuy-anan sa bug-os nga pagsalig ug sa wala-masamok nga mga dapit-pahulayan.”​—Isaias 32:18.

Ang pagsalig sa Gingharian sa Diyos magbuntog sa kakulang sa pagtahod-sa-kaugalingon nga sagad ipahinabo sa kakabos. Ang usa ka kabos nga Kristohanon nasayod nga siya importante sa mga mata sa Diyos sama ra sa usa ka Kristohanon nga dato. Ang Diyos samang nahigugma sa duha, ug ang duha adunay samang paglaom. Ang duha maikagong naglantaw sa panahon sa dihang, ubos sa Gingharian sa Diyos, ang kakabos mahimong usa ka butang sa kagahapon. Pagkamahimayaon unya kanang panahona! Sa kataposan, wala nay kabos!

[Hulaway sa panid 5]

Nganong usikan ang kahinguhaan diha sa sugal, pagsigarilyo, hinobrang pag-inom, pag-abuso sa droga, o imoral nga estilo sa kinabuhi?

[Hulagway sa panid 7]

Sulbaron ni Jehova nga Diyos ang mga suliran sa tawhanong kakabos pinaagi sa iyang Gingharian