Mga Saksi ni Jehova sa Tibuok Kalibotan—Sweden

ANG Sweden nag-okupar sa sidlakang bahin sa peninsula sa Scandinavia ug nagaabot sa ibabaw sa Arctic Circle. Nabantog sa tibuok kalibotan tungod sa iyang labong nga kalasangan sa kahoyng pino ingon man usab sa mga lanaw ug kabukiran niini, ang Sweden maoy usa sa labing nihit ug populasyong mga nasod sa Uropa. Bisan pa niana, ang mga Saksi ni Jehova nagmalamposon sa pagkaplag sa mga mahigugmaon sa kamatuoran didto sukad sa hinapos sa katuigang 1800. Tagda ang dili pa dugayng pananglitan.

Usa ka babaye nagtuon sa Bibliya uban sa mga Saksi, apan ang iyang bana supak niini. Gisultihan niya ang iyang asawa sa paghunong sa pagtuon, ug siya mihunong. Kining tawhana nagtrabaho sa usa ka bodega sa mga produkto sa serbesa. Usa ka adlaw usa ka drayber sa trak ang miabot sa bodega uban sa iyang dyes-anyos nga apong lalaki. Ang apohan nga lalaki naghangyo sa tawo sa pagbantay sa batang lalaki samtang gikargahan niya ang iyang trak. Aron lang makasugod ug kabildohay, gipangutana sa tawo ang bata kon unsang mga regalo ang nadawat niya sa iyang dili pa dugayng adlawng-natawhan. Sa kahibulong sa tawo, gisultihan siya sa batang lalaki nga siya ug ang iyang pamilya wala magsaulog ug mga adlawng-natawhan tungod kay sila mga Saksi ni Jehova. Gisultihan usab siya sa batang lalaki nga siya nakadawat ug mga regalo sa ubang mga panahon sa tuig ug dili gayod hinikawan sa bisan unsa, sanglit siya adunay mabination kaayo ug mahigugmaong pamilya. Walay mga regalo ang molabaw pa niana, siya midugang.

Ang batang lalaki mibalik uban sa iyang apohan nga lalaki sa daghang higayon. Sa matag higayon, ang tawo mangutana sa batang lalaki ug daghang mga pangutana, ug siya nakadayeg gayod sa paagi sa paghatag sa batang lalaki ug matinud-anon, prangkang mga tubag nga walay pagpanuko. Natandog usab siya sa apresasyon sa batang lalaki sa maayong mga pamatasan. Usa ka gabii human ang tawo nakakita ug programa sa telebisyon nga nagpakita sa miserableng mga kahimtang sa kalibotan, naamgohan niya nga angay niyang susihon ang espirituwal nga mga butang nga mas seryoso. Iyang giteleponohan ang Saksi nga nagtuon sa iyang asawa ug naghangyo kaniya nga mobalik. Wala magdugay ang tawo gitun-an sa usa ka Saksi ug kusog nga miuswag. Siya nabawtismohan niadtong Abril 10, 1994. Ang iyang asawa karon bawtismado na usab.

Pas-uswag Nagkinahanglag Tinukod

Ang Sweden maoy pinuy-anan sa daghang mga kagiw gikan sa ubang kayutaan, ug ang mga Saksi nga taga-Sweden may maayong mga resulta sa pagsangyaw kanila. Sa katibuk-an dako kaayong kalamposan ang nahimo sa buluhaton nga tungod niana gikinahanglan ang bag-ong mga Kingdom Hall aron mapaigo ang pag-uswag. Gikan sa 1986 ngadto sa 1993, 37 ka Kingdom Hall ang natukod pinaagi sa dinaliang paagi sa pagtukod, samtang 8 ka tigomanan ang gipadako ug gibag-o. Sa 1994 lamang, pito ka dugang nga mga Kingdom Hall ang natukod, ug tulo ang gibag-o.

Sa pagkakaron, adunay 65 ka kongregasyon ang nagpaabot ug tabang aron makatukod ug bag-ong Kingdom Hall o aron magpadako ug magbag-o sa ilang presenteng Kingdom Hall. Mga 2,500 ka boluntaryo ang mitabang sa maong mga proyekto sa pagtukod, ug ang mga kongregasyon nagpabili ug dako sa ilang mahigugmaong tabang.

Ang amihanang bahin sa Sweden, nga nagaabot saylo pa sa ibabaw sa Arctic Circle, usahay gitawag nga ang yuta nga may adlaw sa tungang-gabii. Tungod kini kay sa panahon sa bahin sa ting-init ang adlaw dili gayod mosalop didto. Sa tibuok Sweden, hinunoa, ang kahayag sa kamatuoran nagpadayon usab sa pagdan-ag nga masanag. Uban sa panalangin ni Jehova, kana nga espirituwal nga kahayag dili gayod mongitngit kondili magpadayon sa pagdan-ag nga mas masanag ug mas masanag pa.

[Kahon sa panid 8]

LARAWAN SA NASOD

1994 Tuig sa Pag-alagad

KINATAS-ANG GIDAGHANONG NAGSANGYAW: 24,246

PROPORSIYON: 1 ka Saksi sa 362

TUMATAMBONG SA MEMORYAL: 40,372

ABERIDS NGA PAYUNIR NGA MGA MAGMAMANTALA: 2,509

ABERIDS NGA MGA PAGTUON SA BIBLIYA: 11,306

GIDAGHANON SA NABAWTISMOHAN: 850

GIDAGHANON SA MGA KONGREGASYON: 358

SANGANG BUHATAN: ARBOGA

[Hulagway sa panid 9]

Ang sangang buhatan ug Puy-anang Bethel sa Arboga

[Hulagway sa panid 9]

Ang unang mga Saksi sa Hjo migamit niining minibus sa pagkobre sa usa ka teritoryo nga duolan sa 5,000 ka kilometro kuwadrado