Ang Gisaad nga Kalibotan nga Walay Korapsiyon

ANG korapsiyon nakatuhop sa tanang ang-ang sa katilingban. Kon kaha diha ba sa gobyerno, siyensiya, isports, relihiyon, o negosyo, morag dili na makontrolar ang korapsiyon.

Sa sunodsunod nga mga nasod, ang makapasubong balita bahin sa mga eskandalo sa korapsiyon mipatim-aw sa media. Ang daghan nga misaad sa pag-alagad sa intereses sa katawhan ginayagyag ingon nga nagaalagad sa ilang kaugalingong intereses pinaagi sa pagdawat ug mga suborno ug mga kikbak. Naghitak ang gitawag ug krimeng white-collar. Dugang ug dugang nga mga tawo sa taas nga ang-ang sa katilingban o maayog kahimtang sa panginabuhi maoy sad-an sa grabeng panggawi ug kriminal nga kalapasan labot sa ilang regular nga mga trabaho.

Anaa ang nagakadako nga kabalaka bahin sa gibatbat sa usa ka Uropanhong magasin nga “‘hamiling korapsiyon’​—ang batasan diin ang senyor nga opisyales, mga ministro sa gobyerno ug, subsob kaayo, mga pangulo sa gobyerno mangayog mga suborno ug kikbak sa dili pa aprobahan ang dagkong mga pinalit ug mga proyekto.” Sa usa ka nasod gipadayag sa usa ka surbi nga “ang duha-ka-tuig nga pag-imbestigar sa kapolisan ug ang halos inadlaw nga mga pagdakop sa gihapon wala makapugong sa dili-matabang nga korap nga mga tawo,” mipahayag ang Britanikong magasin nga The Economist.

Tungod nianang kaylap nga korapsiyon, karong adlawa gibati sa daghan nga sila wala nay masaligan. Ilang gipalanog usab ang mga pagbati sa magsusulat sa Bibliya nga si David sa miingon siya: “Silang tanan mitipas, silang tanan samang daot; walay usang nagabuhat ug maayo, walay bisan usa.”​—Salmo 14:3.

Sa unsang paagi gisagubang nimo ang katinuoran sa kaylap nga korapsiyon? Wala lang kini tagda sa kadaghanang tawo karong adlawa. Apan bisan pag wala nimo tagda ang korapsiyon, makadaot gihapon kini kanimo. Sa unsang paagi?

Apektado Ka sa Korapsiyon

Ang samang dinagko ug ginagmay nga korapsiyon makapamahal sa mga kinahanglanon sa pagkinabuhi, magpaus-os sa kalidad sa mga produkto, ug moresulta sa menos nga mga trabaho ug mugbong mga suweldo. Pananglitan, gikalkulo nga ang mga krimeng sama sa pagdispalko ug panikas labing menos mokostar ug napulo ka pilo kay sa bili sa panglungkab, panulis, ug pangawat. Ang The New Encyclopædia Britannica (1992) nag-ingon nga “ang bili sa krimen labot sa dagkong mga negosyo o mga kompaniya sa Tinipong Bansa gikalkulo nga $200,000,000,000 sa usa ka tuig​—tulo ka pilo sa bili sa organisadong krimen.” Ang maong basahon nagpatin-aw nga bisan pag ang mga epekto dili dayon himatikdan, “ang maong mga krimen dako kaayog epekto diha sa pagkaluwas sa mga obrero, mga tigkonsumo, ug sa kalikopan.”

Ang mapait nga sangpotanan sa korapsiyon magpahinumdom kanato sa mga pulong ni Haring Solomon: “Ako mismo mibalik aron akong makita ang tanang buhat sa pagdaogdaog nga ginabuhat sa silong sa adlaw, ug, tan-awa! ang mga luha niadtong ginadaogdaog, apan sila walay maglilipay; ug sa bahin sa ilang mga tigdaogdaog diha ang gahom, mao nga sila walay maglilipay.”​—Ecclesiastes 4:1.

Nan, dawaton ba lamang nato ang korapsiyon? Dili ba gayod kini kalikayan? Imposible ba ang kalibotan nga walay korapsiyon? Ikalipay, ang tubag maoy dili! Ang Bibliya nagtudlo kanato nga ang inhustisya ug kalapasan duol nang wagtangon.

Kon Unsay Ginasugid Kanato sa Bibliya

Ginasugid kanato sa Bibliya nga ang korapsiyon misugod sa dihang ang usa ka gamhanang manulonda mirebelde batok sa Diyos ug mihaylo sa unang magtiayon sa pagduyog kaniya. (Genesis 3:1-6) Walay maayong butang nga misangpot gikan sa ilang makasasalang dalan. Hinunoa, sukad sa adlaw nga si Adan ug Eva nakasala kang Jehova nga Diyos, nagsugod sila pag-antos sa daotang sangpotanan sa korapsiyon. Ang ilang mga lawas nag-anam sa pagkadaot, nga misangpot sa dili-kalikayang kamatayon. (Genesis 3:16-19) Sukad niadto, ang kasaysayan napunog mga panig-ingnan sa suborno, panglimbong, ug panikas. Ugaling, ang kadaghanang mamumuhat morag nakalingkawas sa angay nga hudisyal nga silot.

Lahi sa ordinaryong mga kriminal, ang korap nga mga ehekutibo ug mga politiko talagsa rang mapriso o magpasig-uli sa tinikas nilang salapi. Tungod sa pagkasekreto sa mga hiphip, mga kikbak, ug mga suborno, kasagarang lisod iyagyag ang korapsiyon sa mga tawong tag-as ug katungdanan. Apan wala kini magpasabot nga imposible ang kalibotan nga walay korapsiyon.

Ang kaluwasan gikan sa korapsiyon magagikan sa Maglalalang sa tawo, si Jehova nga Diyos. Ang balaang pagsalga mao ang bugtong solusyon. Ngano? Tungod kay ang dili-makitang kaaway sa katawhan, si Satanas nga Yawa, nagpadayon sa paglimbong sa katawhan. Sumala sa atong mabasa sa 1 Juan 5:19, “ang tibuok kalibotan nahimutang diha sa gahom sa tuman-kadaotang usa.” Unsa pay makapatin-aw sa pagdagsang sa korapsiyon​—nga kadaghanan niana gibuhat nga wala masiloti?

Walay bisan unsang gidak-on sa paningkamot sa tawo ang makapukan kang Satanas ug sa iyang mga demonyo. Balaang pagsalga lamang ang makagarantiya sa masinugtanong katawhan sa “mahimayaong kagawasan sa mga anak sa Diyos.” (Roma 8:21) Si Jehova nagsaad nga si Satanas sa dili na madugay pig-otan mao nga dili na siya makalimbong pa sa katawhan. (Pinadayag 20:3) Kasamtangan, kon gusto natong mopuyo sa libre-sa-korapsiyon nga bag-ong kalibotan sa Diyos, kinahanglang isalikway nato ang korap nga mga paagi niining kalibotana.

Ang mga Tawo Mahimong Magbag-o

Sa mga adlaw ni Jesu-Kristo, dihay mga nag-abusar sa ilang gahom ug nagdaogdaog sa ilang isigkatawo. Pananglitan, ang mga maniningil ug buhis ilado tungod sa ilang malimbongong mga buhat. Kadto nahitabo bisan pa sa tin-awng balaod sa Diyos: “Dili ka modawat ug hiphip, kay ang hiphip magabuta sa mga tawong matin-aw ug panan-aw ug makatuis sa mga pulong sa matarong nga mga tawo.” (Exodo 23:8) Si Zaqueo, usa ka pangulong maniningil ug buhis, miangkon nga siya nakapanikas pinaagi sa bakak nga sumbong. Apan inay magpasiugdag sosyal nga reporma sa dakong sukod, si Jesus mihangyo sa mga indibiduwal sa paghinulsol ug pagbiya sa ilang korap nga mga paagi. Ingong sangpotanan, ang iladong limbongang mga maniningil ug buhis sama ni Mateo ug Zaqueo mibiya sa ilang kanhing estilo-sa-kinabuhi.​—Mateo 4:17; 9:9-13; Lucas 19:1-10.

Kadtong nalangkit sa malimbongong mga buhat karong adlawa susamang makasalikway sa korapsiyon pinaagi sa pagsul-ob ug “bag-ong pagkatawo nga nalalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:24) Tingali dili sayon nga magbinuotan sa pagbayad ug buhis o mohunong pag-apil sa kuwestiyonableng mga proyekto. Sa gihapon, ang mga kaayohan takos bisan sa dakong paningkamot.

Kay wala na maghunahuna nga nahiuyon niining korap nga kalibotan, kadtong mabalak-on sa kaayohan sa uban nagtagamtam ug sulodnong kalinaw. Wala na ang kabalaka nga hisakpan sa buhat nga daotan. Hinunoa, gipahimuslan nila ang maayong konsensiya. Sila nagsundog sa panig-ingnan sa Bibliya nga si Daniel nga propeta. Ang asoy sa Bibliya nag-ingon nga ang hatag-as nga opisyales kanunayng nangitag pasumangil batok kang Daniel. “Apan walay pasumangil o malimbongong butang ang ilang nakaplagan, kay siya kasaligan ug walay pagpasagad o butang nga malimbongon ang nakaplagan diha kaniya.”​—Daniel 6:4.

Saad ni Jehova

Si Jehova nagsaad nga “bisan pag ang usa ka makasasala tingali nagabuhat ug daotan sa makagatos ug nagapadayon sa hataas nga panahon sumala sa iyang gikahimut-an, apan ako nasayod usab nga mosangpot ang maayo niadtong nahadlok sa matuod nga Diyos, tungod kay sila nahadlok kaniya. Apan dili gayod mosangpot ang maayo sa usang tuman-kadaotan, ni pagalugwayan niya ang iyang mga adlaw nga sama sa usa ka anino, tungod kay siya wala mahadlok sa Diyos.”​—Ecclesiastes 8:12, 13.

Pagkamakapahupay sa dihang ang korapsiyon dili na magpahinabo ug kasubo! Pagkadako sa panalangin nga mabuhing walay kataposan sa kalibotan nga walay korapsiyon! Dili kini imposible. Ang Bibliya naghisgot sa “paglaom sa kinabuhing walay kataposan nga gisaad sa Diyos, kinsa dili makabakak, sa wala pa ang dugay na kaayong kapanahonan.” (Tito 1:2) Kon giayran mo ang korapsiyon ug gihigugma ang pagkamatarong, dako ang posibilidad nga imong makita ang katumanan sa saad sa Diyos sa kalibotan nga walay korapsiyon.

[Hulagway sa panid 4]

Ang korapsiyon kaylap sa gobyerno ug sa mga negosyo

[Hulagway sa panid 5]

Ang korapsiyon sagad nagaapektar sa mga pakiglabot uban sa mga opisyal sa publiko