Diyosnong Pagkamasinugtanon sa Pamilya nga Nabahin sa Relihiyon
“MAS masakit kini kay sa bisan unsang pisikal nga suntok. . . . Gibati ko nga daw nabun-og ang akong tibuok kalawasan, ug bisan pa niana walay makakita niini.” “Usahay mobati ako ug tumang kapakyas sa akong kinabuhi nga buot kong taposon na kini . . . o molayas ug dili na gayod mobalik pa.” “Lisod usahay ang paghupot ug maayong panghunahuna.”
Kanang tugob sa pagbati nga mga pulong nagpadayag sa mga pagbati sa kawalay-paglaom ug kamingaw. Kini naggikan sa mga biktima sa binaba nga pag-abuso—mga akusasyon, mga hulga, makauulaw nga mga balikas, pakigbungol—ug bisan pisikal nga pag-abuso gikan sa mga kapikas ug mga membro sa pamilya. Nganong ngil-ad kaayo ang pagtratar niining mga tawhana? Tungod lamang sa lahi nga relihiyosong mga pagtuo. Ubos niining mga kahimtanga, ang pagpuyo diha sa usa ka pamilya nga nabahin sa relihiyon naghimo sa pagsimba kang Jehova nga usa ka tinuod nga pakigbisog. Apan, daghan nianang nag-antos nga mga Kristohanon malamposong nagpasundayag ug diyosnong pagkamasinugtanon.
Salamat na lang, ang maong mga kagul-anan ug kapit-os dili makaplagan sa tanang panimalay nga nabahin sa relihiyon. Bisan pa niana, kini nagalungtad gayod. Ang imo bang panimalay mihaom niining maong paghubit? Nan, tingali malisdan ka sa paghupot ug pagtahod sa imong kapikas o sa imong mga ginikanan. Kon ikaw usa ka asawa nianang maong kahimtang o mga anak sa maong kalikopan, sa unsang paagi ikaw molampos sa pagpakita ug diyosnong pagkamasinugtanon sa panimalay nga nabahin sa relihiyon? Unsang pagpaluyo ang ikahatag sa uban? Ug unsa ba ang panglantaw sa Diyos niana?
Nganong Lisod Kaayo nga Magmasinugtanon?
Ang iya sa kalibotan nga kaugalingong-interes ug pagkadili-mapasalamaton sa trabaho mag-impluwensiya duyog sa imong kaugalingong dili-hingpit nga mga hilig ug maghimo sa diyosnong pagkamasinugtanon nga kanunayng pakigbisog. Nasayod si Satanas niini, ug iyang katuyoan nga bungkagon ang imong determinasyon nga mahimong Kristohanon. Subsob gamiton niya ang mga membro sa pamilya nga adunay diyutay o walay apresasyon ug pagtahod sa diyosnong mga sukdanan. Ang imong taas nga espirituwal ug moral nga mga prinsipyo kasagaran lahi kaayo niadtong sa imong dili-magtutuong pamilya. Kini nagkahulogan ug nagkasumpaking mga panglantaw bahin sa panggawi ug kalihokan. (1 Pedro 4:4) Ang pagpit-os sa pagpaliso kanimo gikan sa pagsunod sa Kristohanong sukdanan mahimong hilabihan kaayo, sanglit imong gituman ang sugo: “Hunong na sa pagpakig-ambit kanila diha sa dili-mabungahong mga buhat nga iya sa kangitngit.” (Efeso 5:11) Sa ilang panglantaw wala kay gibuhat nga husto. Kini tungod sa imong relihiyon. Usa ka inahan, sa dihang nabug-atan gumikan sa masakitong mga anak, mihangyo ug tabang gikan sa iyang bana ug nakadawat ug makantalitahong tubag nga, “May panahon ka para sa imong relihiyon; wala ka magkinahanglan ug tabang.” Ang maong mga komento makadugang sa hagit sa pagkahimong masinugtanon.
Unya may mga panahon sa dihang kamo magkasumpaki bahin sa mga butang nga dili direktang supak sa Kasulatan. Bisan pa, imong naamgohan nga ikaw bahin sa usa ka pamilya ug sa maong gilapdon adunay pipila ka obligasyon. “Mapikal kaayo ako sa dihang maghunahuna kon giunsa kami pagtratar sa akong amahan tungod kay akong naamgohan nga siya mibating nag-inusara,” matud ni Connie. “Kinahanglang pahinumdoman ko ang akong kaugalingon kanunay nga dili maglagot sa pagsupak sa akong amahan. Kinahanglang sultian ko ang akong kaugalingon nga adunay lig-ong katarongan kon nganong mosupak siya o mosalikway sa among baroganan. Si Satanas mao ang magmamando niining sistemaha sa mga butang.” Si Susan, nga may bana nga dili magtutuo, misugilon: “Sa sinugdan mibati ako nga buot kong makigbulag—apan dili na karon. Nasayod ako nga si Satanas naggamit kaniya sa pagsulay kanako.”
Ang mga paningkamot ni Satanas nga pabation kang walay-bili tingali daw walay paghunong. Ang mga adlaw manglabay nga dili makigsulti kanimo ang imong kapikas. Ang kinabuhi mahimong mingaw kaayo. Kini magdaot sa pagsalig ug pagtahod-sa-kaugalingon ug magsulay sa imong diyosnong pagkamasinugtanon. Ang mga anak mobati usab sa emosyonal ug pisikal nga kaluya. Sa usa ka kahimtang, bisan tuod ang ilang mga ginikanan misupak, tulo ka batan-ong mga alagad sa Diyos matinumanong mitambong sa Kristohanong mga tigom. Usa kanila, nga karon usa na ka bug-os-panahong ministro, miangkon: “Daw dili na kami mobati ug nahapo sa emosyonal nga paagi; dili kami makatulog; magul-anon kaayo kami.”
Unsay Gidahom sa Diyos Kanimo?
Ang pagkamasinugtanon sa Diyos kanunay maoy una, ug ang relatibong pagkamasinugtanon ngadto sa pagkaulo sa bana kinahanglang uyon kanunay sa gitudlo ni Jehova. (Buhat 5:29) Kana tingali lisod, apan posible. Kanunayng mangayo ug tabang sa Diyos. Buot niyang ikaw “mosimba pinaagi sa espiritu ug kamatuoran” ug mamati ug magpasakop sa iyang pagtultol. (Juan 4:24) Ang kahibalo gikan sa Pulong sa Diyos, samtang kini magpuno sa hustong matang sa kasingkasing, mag-aghat sa kinabubut-ong pagkamasinugtanon. Bisan tuod ang imong personal nga mga kahimtang tingali mausab, si Jehova o ang iyang Pulong dili mausab. (Malakias 3:6; Santiago 1:17) Si Jehova nagtudlo sa pagkaulo ngadto sa bana. Kini maoy tinuod modawat man siya sa pagkaulo ni Kristo o dili. (1 Corinto 11:3) Bisan tuod kining maong pagkaulo lisod dawaton ug agwantahon kon ikaw nag-atubang ug kanunayng pag-abuso ug pakaulaw, ang disipulong Santiago miingon: “Ang kaalam gikan sa itaas . . . andam mosunod.” (Santiago 3:17) Ang pag-ila niining maong pagkaulo nga walay pagduhaduha ug ang pagdawat niana nagkinahanglan sa espiritu sa Diyos, ilabina ang bunga niini nga gugma.—Galacia 5:22, 23.
Sa dihang ikaw may minahal, sayon ang pagpakita ug diyosnong pagkamasinugtanon sa tinudlo sa Diyos nga awtoridad. Ang Efeso 5:33 nagtambag: “Higugmaon gayod sa matag usa kaninyo nga tagsa-tagsa ang iyang asawa ingon sa iyang ginahimo sa iyang kaugalingon; sa laing bahin, ang asawa angayng adunay halalom nga pagtahod alang sa iyang bana.”
Tagda si Jesus. Siya sa binaba ug sa pisikal giabusohan, apan wala gayod siya manamastamas kang bisan kinsa. Iyang nahuptan ang walay-lama nga rekord. (1 Pedro 2:22, 23) Aron makaantos si Jesus sa maong hilabihang mga pakaulaw, gikinahanglan niya ang dakong kaisog ug dili-matarog nga gugma alang sa iyang Amahan, si Jehova. Apan, ang gugma “moantos sa tanang butang.”—1 Corinto 13:4-8.
Gipahinumdoman ni Pablo ang iyang kaubang magbubuhat nga si Timoteo, ug iya kitang gipahinumdoman karong adlawa: “Kay dili usa ka espiritu sa katalaw ang gihatag sa Diyos kanato, apan kanang sa gahom ug sa gugma ug sa pagkamabuot sa hunahuna.” (2 Timoteo 1:7) Ang halalom nga gugma alang kang Jehova ug kang Jesu-Kristo makaaghat kanimo sa pagsugot sa Diyos sa dihang ang kahimtang daw imposibleng antoson. Ang pagkamabuot sa hunahuna makatabang kanimo sa paghupot ug timbang nga panglantaw ug makatumong kanunay sa pagtagad sa imong relasyon kang Jehova ug kang Jesu-Kristo.—Itandi ang Filipos 3:8-11.
Mga Kapikas nga Milampos sa Pagpakita ug Diyosnong Pagkamasinugtanon
Usahay kinahanglang magpaabot ka ug dugay una makita kon sa unsang paagi dumalahon ni Jehova ang imong mga suliran. Bisan pa niana, ang iyang kamot dili mubo. “Buhata kanunay ang mga butang nga gihatagan ka ni Jehova ug katungod ug pribilehiyo sa pagbuhat—ang pagsimba kaniya diha sa mga tigom ug mga asembliya, pagtuon, pagsangyaw, ug pag-ampo,” mitambag ang usa kinsa milampos sa pagpakita ug diyosnong pagkamasinugtanon. Ang imong mga paningkamot maoy panalanginan ni Jehova, dili lamang ang imong mga kalamposan. Sa 2 Corinto 4:17, si apostol Pablo miingon nga ‘ang kasakitan makadiyot lamang, apan kini nagapatungha alang kanamo ug usa ka himaya nga walay-kataposan.’ Palandonga kini. Makapalig-ong punto kini alang kanimo. Usa ka asawa nahinumdom: “Ang akong pamilyahanong kinabuhi wala moarang-arang, ug usahay ako nahibulong kon si Jehova nahimuot ba kanako. Apan usa ka butang nga akong giisip nga iyang panalangin mao ang kamatuoran nga ako migula niining malisod nga mga kahimtang nga mas maayo ug kahimtang sa hunahuna kay sa akong bana. Kay nasayod nga ang atong gibuhat nakapahimuot kang Jehova nagpahimo sa tanang pakigbisog nga takos niana.”
Si Jehova nagsaad nga dili niya tugotan nga masinati nimo ang mga kahimtang nga saylo sa imong maantos. Salig kaniya. Mas nasayod siya kay kanimo, ug siya mas nakaila kanimo kay sa imong pagkaila sa imong kaugalingon. (Roma 8:35-39; 11:33; 1 Corinto 10:13) Ang pag-ampo kang Jehova sa malisod nga mga kahimtang makatabang. Pag-ampo alang sa iyang espiritu sa paggiya kanimo, ilabina sa dihang wala ka masayod kon unsang dalana ang subayon o kon unsaon pagdumala ang usa ka kahimtang. (Proverbio 3:5; 1 Pedro 3:12) Kanunayng mangamuyo kaniya alang sa pailob, pagpugong-sa-kaugalingon, ug sa kamapaubsanon sa pagtuman sa awtoridad sa imong kinabuhi. Ang salmista miingon: “Si Jehova mao ang akong bato ug ang akong kuta ug ang Tigtagana ug kaikyasan alang kanako.” (Salmo 18:2) Ang paghinumdom niini maoy usa ka makapalig-ong tabang alang niadtong anaa sa mga panimalay nga nabahin sa relihiyon.
Labaw sa tanan, paningkamot pag-ayo sa paghimo sa imong kaminyoon nga malipayon. Oo, nalantaw ni Jesus nga ang maayong balita magpahinabog mga pagkabahinbahin. Apan, pag-ampo nga walay bisan unsang pagkabahinbahin ang ipahinabo sa imong tinamdan o kagawian. (Mateo 10:35, 36) Uban niining tumonga sa hunahuna, ang kooperasyon magpamenos sa mga suliran sa kaminyoon. Bisan kon imo lamang gipakita kining tukmang tinamdan, dako kinig mahimo sa pagsanta sa mga suliran nga moabot sa punto nga adunay hilabihang panagbingkil ug pagsumpakiay. Ang pagkamapailobon ug gugma hinungdanon kaayo. “Magmalumo” ug “magpugong sa kaugalingon ilalom sa daotan.”—2 Timoteo 2:24.
Si apostol Pablo nahimong “tanang butang ngadto sa tanang matang sa tawo.” (1 Corinto 9:22) Sa susama, samtang dili ikompromiso ang Kristohanong mga katungdanan, usahay tingali kinahanglang usbon nimo ang imong eskedyol aron sa paggugol ug dugang panahon uban sa imong kapikas ug pamilya. Hatagig dakong panahon kutob sa mahimo ang usa nga gipili nimo nga kauban sa kinabuhi. Ipakita ang Kristohanong konsiderasyon. Kini maoy usa ka pagpahayag ug diyosnong pagkamasinugtanon.
Ang usa ka mahinadlokon-sa-Diyos ug mapinasakopong asawa nga mapaangayon ug mabination makakaplag nga mas sayon ang pagpasundayag ug diyosnong pagkamasinugtanon. (Efeso 5:22, 23) Ang mga pulong nga madanihon, “tinimplahan ug asin,” makatabang sa pagpamenos sa kasubsob sa posibleng mga pagharongay.—Colosas 4:6; Proverbio 15:1.
Ang diyosnong kaalam nagtambag kanimo sa paghusay dayon sa mga panagbingkil ug sa pagpasig-uli sa kalinaw pinaagi sa maayong mga pulong nga makapalig-on, inay matulog diha sa “suko nga kahimtang.” (Efeso 4:26, 29, 31) Nagkinahanglan kini ug pagpaubos. Salig pag-ayo kang Jehova alang sa kusog. Usa ka Kristohanong asawa mapaubsanong miangkon: “Tapos sa tim-os nga pag-ampo, akong gibati nga ang espiritu ni Jehova nagpalig-on kanako nga mahimong labi pang mahigugmaon sa akong kapikas.” Ang Pulong sa Diyos nagtambag: “Ngadto kang bisan kinsa ayaw balosig daotan ang daotan. . . . Padayong daoga ang daotan pinaagi sa maayo.” (Roma 12:17-21) Kini maoy maalamong tambag ug maoy dalan sa diyosnong pagkamasinugtanon.
Mga Anak nga Nagpakita ug Diyosnong Pagkamasinugtanon
Ang tambag ni Jehova kaninyong mga anak sa mga pamilya nga nabahin sa relihiyon mao: “Magmasinugtanon sa inyong mga ginikanan sa tanang butang, kay kini makapahimuot pag-ayo diha sa Ginoo.” (Colosas 3:20) Matikdi nga ang Ginoong Jesu-Kristo gihisgotan aron konsiderahon. Busa, ang pagkamasinugtanon ngadto sa mga ginikanan dili absoluto. Sa usa ka diwa ang tambag sa Buhat 5:29, nga “sugton ang Diyos ingong magmamando inay kay sa mga tawo,” nagtumong usab sa Kristohanong mga batan-on. Ang mga kahimtang motungha diin kinahanglan mohukom kamo kon unsay buhaton pinasikad sa inyong nasayran nga matarong sumala sa Kasulatan. Tingali mosangpot kini sa usa ka matang sa silot tungod sa pagdumili nga moapil sa usa ka buhat sa bakak nga pagsimba. Bisan tuod dili kini maayong palaabuton, mahimong makakaplag ka ug kahupayan ug mahimo pa ganing magmaya sa kamatuoran nga ikaw nag-antos gumikan sa pagbuhat sa kon unsay matarong sa mga mata sa Diyos.—1 Pedro 2:19, 20.
Sanglit ang imong mga hunahuna gigiyahan sa mga prinsipyo sa Bibliya, magkasungi kamo sa inyong mga ginikanan bahin sa pipila ka isyu. Wala kini maghimo kanila nga imong mga kaaway. Bisan pag sila dili dedikadong mga alagad ni Jehova, takos sila sa angayng pasidungog. (Efeso 6:2) Si Solomon miingon: “Pamati sa imong amahan nga nagpakatawo kanimo, ug ayaw tamaya ang imong inahan.” (Proverbio 23:22) Sulayi sa pagsabot ang kahiubos nga ilang gibati tungod sa imong pagsunod sa pagtuo nga daw talagsaon kanila. Pakigsulti kanila, ug “ipaila ang inyong pagkamakatarunganon.” (Filipos 4:5) Ipakig-ambit ang imong mga pagbati ug mga kabalaka. Magmalig-on sa pagsunod sa diyosnong mga prinsipyo, bisan pa niana, “kon posible, kutob sa nagaagad kaninyo, magmadaiton sa tanang tawo.” (Roma 12:18) Ang kamatuoran nga kamo nagtuman sa sugo sa mga ginikanan karon nagpakita kang Jehova nga kamo nagtinguha sa pagpadayon nga masinugtanon ingong sakop sa Gingharian.
Kon Unsay Mahimo sa Uban
Ang mga Kristohanon nga nagkinabuhi sa mga pamilya nga nabahin sa relihiyon nagkinahanglan ug pagpaluyo ug pagsabot gikan sa kaubang mga magsisimba. Kini dayag gikan sa mga pulong sa usa nga miingon: “Mibati akong wala gayoy paglaom ug walay-mahimo, sanglit walay mahimo si bisan kinsa, ug wala akoy mahimo sa pag-usab niana. Ako nagasalig kang Jehova nga tumanon ang iyang kabubut-on sa among pamilya, bisan unsa man kana.”
Ang pagpakig-uban sa espirituwal nga mga igsoong lalaki ug babaye diha sa Kristohanong mga tigom maoy panalipod. Kining samang babaye nagbatbat sa iyang kinabuhi nga “sama sa duha ka managkalahing kalibotan. Ang usa nga kinahanglang maana ako ug ang usa nga buot nakong maanaa.” Ang gugma sa mga igsoon maoy nagpahimong posible alang niining nag-antos sa paglahutay ug pag-alagad sa tanang kahimtang. Ilakip sila sa imong mga pag-ampo. (Efeso 1:16) Sa regular, sa tanang panahon, sulti ug makapadasig, positibo, ug makapahupay nga mga pulong kanila. (1 Tesalonica 5:14) Sa dihang praktikal ug tukma, ilakip sila sa imong teokratikanhon ug sosyal nga mga kalihokan.
Mga Panalangin ug mga Kaayohan sa Diyosnong Pagkamasinugtanon
Palandonga adlaw-adlaw ang mga panalangin ug mga kaayohan sa pagpasundayag ug diyosnong pagkamasinugtanon diha sa panimalay nga nabahin sa relihiyon. Paningkamot kanunay nga magmasinugtanon. ‘Ayaw paglunga.’ (Galacia 6:9) Ang paglahutay sa dili-maayong mga kahimtang ug mga inhustisya “tungod sa tanlag ngadto sa Diyos . . . butang nga kahimut-anan” sa Diyos. (1 Pedro 2:19, 20) Magmasinugtanon sa gilapdon nga ang matarong nga mga prinsipyo ug balaod ni Jehova dili makompromiso. Nagpakita kini ug pagkamaunongon sa kahikayan ni Jehova. Ang imong diyosnong panggawi mahimong magluwas sa kinabuhi sa imong kapikas, mga anak, o mga ginikanan.—1 Corinto 7:16; 1 Pedro 3:1.
Samtang ikaw nakigbisog sa pagtagana sa mga panginahanglan ug mga gidahom sa pamilya nga nabahin sa relihiyon, hinumdomi ang kahinungdanon sa paghupot sa integridad ngadto kang Jehova nga Diyos ug kang Jesu-Kristo. Tingali mapasiboon ka sa daghang punto nga gisumpakian, apan ang pag-angka sa integridad maoy pag-angka sa tanan, lakip sa kinabuhi mismo. Si apostol Pablo miingon: “Ang Diyos . . . sa kataposan niining mga adlawa namulong kanato pinaagi sa usa ka Anak, si kinsa gitudlo niya nga manununod sa tanang butang, ug pinaagi kang kinsa iyang gihimo ang mga sistema sa mga butang.” Ang pag-ila niining “ingon kadako nga kaluwasan” magpalig-on kanimo nga magmasinugtanon.—Hebreohanon 1:1, 2; 2:3.
Ang imong dili-mokompromisong pagkamasinugtanon ug kalig-on dapig sa matarong nga mga moral ug mga prinsipyo maoy maayong panalipod kanimo ug sa imong dili-magtutuong kapikas. Ang pagkamaunongon magpalig-on sa bugkos sa pamilya. Ang Proverbio 31:11 naghisgot bahin sa usa ka takos ug maunongong asawa: “Kaniya ang kasingkasing sa iyang tag-iya nagasalig.” Ang imong hinlong panggawi ug lalom nga pagtahod mahimong magbukas sa mga mata sa imong dili-magtutuong bana. Mahimong motultol kini kaniya sa pagdawat sa kamatuoran sa Diyos.
Ang diyosnong pagkamasinugtanon sa pagkatinuod maoy bililhon ug makaluwas-kinabuhi. Iampo kana diha sa imong pamilyahanong kinabuhi. Kini mosangpot sa kalinaw sa hunahuna ug magdalag himaya kang Jehova.