Mga Pangutana Gikan sa mga Magbabasa

Mapihigon ba ang Diyos sa pagpili alang sa unang nagamandong lawas sa mga lalaki nga may samang rasanhon ug nasodnong kagikan​—sanglit ang tanan maoy mga Hudiyo?

Dili, dili gayod. Kadtong tanan nga unang gitawag ni Jesus ingong iyang mga tinun-an maoy mga Hudiyo. Unya, sa Pentekostes 33 K.P., ang mga Hudiyo ug Hudiyong mga kinabig mao ang unang gidihogan sa balaang espiritu ug sa ingon mikuwalipikar nga magmando uban kang Kristo sa langit. Sa ulahi lamang nga ang mga Samarianhon ug di-tuling Hentil nga mga kinabig gilakip. Busa, masabtan nga ang nagamandong lawas niadtong yugtoa nalangkoban sa mga Hudiyo, “mga apostol ug mga ansiano didto sa Jerusalem,” sumala sa giingon sa Buhat 15:2. Sila maoy mga lalaking may lalom nga pagsabot sa Kasulatanhong kahibalo ug katuigan sa kasinatian sa matuod nga pagsimba, ug sila may dako nang panahon sa pagkahimong hamtong Kristohanong mga ansiano.​—Itandi ang Roma 3:1, 2.

Sa panahon sa miting sa nagamandong lawas nga giasoy sa Buhat kapitulo 15, daghang Hentil ang nahimong mga Kristohanon. Nag-apil kini sa mga Aprikano, Uropanhon, ug mga tawo gikan sa ubang mga dapit. Apan, walay rekord nga may bisan kinsa sa maong mga Hentil ang nadugang sa nagamandong lawas aron himoon ang Kristiyanidad nga madanihon ngadto sa mga dili-Hudiyo. Bisan tuod kining bag-ong nakabig nga Hentil nga mga Kristohanon samag kahimtang sa mga membro sa “Israel sa Diyos,” ilang gitahod ang kahamtong ug mas labawng kasinatian sa Hudiyong mga Kristohanon, sama sa mga apostol, kinsa mga bahin sa nagamandong lawas niadtong panahona. (Galacia 6:16) Matikdi sa Buhat 1:21, 22 kon unsa ka dako ang pagtahod sa maong kasinatian.​—Hebreohanon 2:3; 2 Pedro 1:18; 1 Juan 1:1-3.

Sulod sa daghang katuigan ang Diyos nakiglabot sa linaing paagi sa nasod sa Israel, diin gipili ni Jesus ang iyang mga apostol. Dili sayop o inhustisya nga walay apostol nga naggikan sa mga dapit karon nga Habagatang Amerika o Aprika o sa Halayong Silangan. Ngadtongadto ang mga lalaki ug mga babaye gikan niadtong mga dapita nakabaton ug kahigayonan nga makaangkon ug mga pribilehiyo nga mas dako pa kay sa pagkahimong apostol dinhi sa yuta, ang pagkahimong membro sa unang-siglong nagamandong lawas, o sa pagbaton ug uban pang katungdanan taliwala sa katawhan sa Diyos karong adlawa.​—Galacia 3:27-29.

Usa ka apostol natukmod sa pag-ingon nga “ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:34, 35) Oo, ang mga kaayohan sa lukat ni Kristo mabatonan sa tanan, nga walay pagpihig. Ug ang mga indibiduwal gikan sa matag tribo ug pinulongan ug nasod ilakip sa langitnong Gingharian ug sa dakong panon nga mabuhing walay kataposan sa yuta.

Daghang tawo ang nahimong sensitibo sa rasanhon, sa pinulongan, o sa nasodnong kagikan. Kini giilustrar sa atong mabasa sa Buhat 6:1 bahin sa isyu nga nagpahinabog pagbagulbol tali sa tigsultig-Grego nga mga Kristohanon ug niadtong tigsultig Hebreohanon. Tingali namatuto kita o nakasagop ug sensitibo kaayong mga tinamdan bahin sa pinulongan, rasa, etnikong kagikan, o henero. Tungod nianang tinuod nga posibilidad, maayong maningkamot kita pag-ayo nga tugotan ang atong mga pagbati ug mga reaksiyon nga mahulma sa panglantaw sa Diyos, nga mao nga ang tanang tawo managsama sa iyang atubangan, bisan unsay atong panggawas nga panagway. Sa dihang ang Diyos nagpasulat sa kuwalipikasyon sa mga ansiano ug ministeryal nga mga alagad, wala siyay gihisgotan nga rasa ug nasodnong kagikan. Wala, siya nagtunong sa pagtagad diha sa espirituwal nga mga kuwalipikasyon niadtong makaarang sa pag-alagad. Tinuod kana sa lokal nga mga ansiano, nagapanawng mga magtatan-aw, ug mga kawani sa sangang buhatan karong adlawa, nga matuod usab sa nagamandong lawas sa unang siglo.