Ang Tawong Sinahan

ANG Hebreohanong pinulongan adunay usa lamang ka gamot nga pulong alang sa “pangabugho.” Sa dihang magtumong sa makasasalang mga tawo, ang Hebreohanon mahimong hubaron nga “kasina” o “kaindig.” (Genesis 26:14; Ecclesiastes 4:4) Hinunoa, ang Gregong pinulongan adunay kapin sa usa ka pulong alang sa “pangabugho.” Ang pulong zeʹlos, sama sa Hebreohanong katumbas niini, mahimong magtumong sa matarong o sa dili-angay nga pangabugho. Ang laing Gregong pulong, phthoʹnos, nagtumong lamang sa negatibong diwa. Sa New World Translation, kanunay nga gihubad kinig “kasina.”

Sa unsang paagi gigamit ang pulong phthoʹnos sa karaang Grego? Ang The Anchor Bible Dictionary nagpahayag: “Dili sama sa mga tawong hakog, ang tawong naapektahan sa phthonos wala gayod magkinahanglan sa mga butang nga iyang gikalagotang nabatonan sa uban; dili lamang siya gusto nga makabaton ang uban niana. Siya lahi sa tawong maindigon tungod kay ang iyang tumong, dili sama sa tawong maindigon, maoy dili aron makadaog kondili pugngan ang uban nga makadaog.”

Ang tawong sinahan sagad dili makamatikod nga ang iyang kaugalingong tinamdan mao ang dakong hinungdan sa iyang mga suliran. “Usa sa mga kalainan sa phthonos,” matod sa mao gihapon nga diksiyonaryo, “mao ang kakulang niinig kaamgohan. Ang tawong phthoneros, kon pangutan-on sa pagmatarong sa iyang panggawi, kanunayng mosulti sa iyang kaugalingon ug sa uban nga kadtong iyang mga giatake takos niana ug tungod sa dili maayo nga kahimtang nga siya natukmod sa pagpanaway. Kon pangutan-on kon nganong nakasulti siya sa usa ka higala niadtong iyang mga gipanulti, siya moingon nga ang iyang mga panaway maoy alang sa labing ikaayo sa iyang higala.”

Ang mga magsusulat sa Ebanghelyo nga si Mateo ug Marcos migamit sa Gregong pulong phthoʹnos sa paghubit sa motibo niadtong maoy responsable sa kamatayon ni Jesus. (Mateo 27:18; Marcos 15:10) Oo, sila napalihok sa kasina. Ang samang makadaot nga emosyon nagpaliso sa mga apostata nga mahimong mapintas nga mga magdudumot sa ilang mga igsoon kanhi. (1 Timoteo 6:3-5) Dili ikahibulong nga ang mga tawong sinahan dili makasulod sa Gingharian sa Diyos! Si Jehova nga Diyos nagbaod nga ang tanan nga magpadayon nga “puno sa kasina” maoy “takos sa kamatayon.”​—Roma 1:29, 32; Galacia 5:21.

[Hulagway sa panid 7]

Ayaw itugot nga madaot sa kasina ang imong kinabuhi