Paghatag—Ginadahom ba Kini?

NASAYOD ka tingali nga ang paghatag ug mga gasa kanunayng diniktahan sa kustombre. Sa kadaghanang kultura adunay mga okasyon nga ang mga regalo ginadahom. Ang maong mga regalo tingali gipasabot nga mga timaan sa pagtahod o pagpakita sa gugma. Ang kadaghanan niini wala gayod gamita sa mga dumadawat; ang uban nakatabang sa pagpuno sa tinuod nga mga panginahanglan ug giapresyar gayod.

Sa Denmark sa dihang matawo ang usa ka bata, ang mga higala ug mga paryente moduaw ug magdalag mga regalo nga ilang gilaomang mapuslan sa masuso. Sa ubang kayutaan, ang mga higala maghimog salosalo nga niana ang mga regalo ihatag sa pagpaabot sa pagpanganak.

Ang mga okasyon sa dihang ang mga regalo ginalaoman maoy, sa daghang higayon, tinuig nga mga kalihokan. Bisag ang maong mga selebrasyon dili batasan taliwala sa unang mga Kristohanon, kini nahimong popular kaayo taliwala sa nag-angkong mga Kristohanon ug sa mga dili-Kristohanon. Ang batasan sa paghatag ug mga regalo sa adlawng natawhan hayan nagkawala sa ubang mga kultura sa magkadako na ang mga bata, apan ang kustombre taliwala sa mga Grego lahi. Sa Gresya dakong pagtagad ang ihatag sa mga adlawng natawhan. Sila manghatag usab ug mga regalo alang sa usa ka tawo sa “adlaw sa pagngalan” kaniya. Unsa kini? Aw, ang relihiyosong kustombre naglangkit ug usa ka lahi nga “santo” sa matag adlaw sa tuig, ug daghang tawo ang ginganlan sa ngalan sa “mga santo.” Sa dihang moabot na ang adlaw sa “santo,” kadtong may ngalan niana makadawat ug mga regalo.

Dugang pa sa mga selebrasyon sa adlawng natawhan alang sa ilang kabataan, ang mga Koreano adunay nasodnong selebrasyon nga nailhang Adlaw sa Kabataan. Panahon kini diin magpiknik ang pamilya ug ang mga regalo ihatag sa kabataan bisag unsa pay petsa sa ilang pagkatawo. Ang mga Koreano usab adunay Adlaw sa mga Ginikanan, sa dihang regalohan sa kabataan ang ilang mga ginikanan, ug Adlaw sa mga Magtutudlo, sa dihang pasidunggan sa mga estudyante ang ilang mga magtutudlo ug regalohan sila. Sumala sa kustombreng Koreano, sa dihang makaabot ang usa ka tawo ug 60 anyos, usa ka dakong salosalo ang himoon. Ang pamilya ug mga higala mag-uban sa pagtanyag ug mga panghinaot nga maabot ang taas nga kinabuhi ug kalipay, ug ihatag ang mga gasa alang sa usa nga nakaabot nianang puntoha sa kinabuhi.

Ang kasal maoy laing okasyon sa dihang ang popular nga kustombre nagkinahanglan ug mga regalo. Sa dihang magminyo ang usa ka parisan sa Kenya, ang pamilya sa pamanhonon ginadahom nga maghatag ug regalo sa pamilya sa pangasaw-onon. Ang mga bisita usab magdalag mga regalo. Kon sundon sa pangasaw-onon ug pamanhonon ang gidiktar sa kustombre, sila manglingkod diha sa usa ka entablado, samtang ang mga bisita manuol sa pagtunol sa ilang mga regalo. Samtang ang matag usa ipresentar, usa ka pahibalo ang pagahimoon nga “si Pulano nagdalag regalo sa magtiayon.” Daghan sa nagregalo dili gayod mahimuot kon dili sila makadawat sa maong pag-ila.

Taliwala sa mga taga-Lebanon, sa dihang adunay magminyo, ang mga higala ug mga silingan, bisan ang mga tawo nga wala kaayo makaila sa parisan, moabot sa mga adlaw human ang kasal nga magdalag mga gasa. Sukad sa pagkabata, sila gitudloan nga ang paghatag ug mga regalo maoy usa ka responsibilidad, sama sa pagbayad ug utang. “Kon dili nimo kana buhaton, dili maayo ang imong bation,” matod sa usa ka tawong taga-Lebanon. “Usa kini ka tradisyon.”

Apan, sa tanang okasyon sa dihang ang paghatag ginadahom sa daghang kayutaan ang Pasko mao ang nanguna. Dili ba tinuod kana sa imong dapit? Sa dili pa dugay nga 1990, gibanabana nga ang mga Amerikano migastog labaw sa $40 bilyones sa mga regalo sa Pasko tuigtuig. Uban ang dakong kadasig kana nga selebrasyon gisaulog usab sa mga Budhista ug mga Shintoista sa Hapon, ug ang nagkalainlaing matang sa pagsaulog makaplagan sa Uropa, Habagatang Amerika, ug mga bahin sa Aprika.

Ang Pasko maoy panahon sa dihang ang mga tawo magdahom nga magmalipayon, apan daghan ang dili. Ug daghang tawo ang nakakaplag nga ang puliki nga pagpamalit ug mga regalo ug ang kabalaka sa pagbayad sa nautang molabaw sa bisan unsang yugto sa kalipay nga nasinati nila.

Bisan pa, ang Bibliya nag-ingon nga adunay kalipay sa paghatag. Sa pagkatinuod aduna, depende sa espiritu diin gibuhat ang paghatag.​—Buhat 20:35.