Paghupay ug Pagdasig—Mga Mutya nga Daghag Dagway
Ang kadaghanan kanato nakaagi sa mga panahon nga gibati nato ang grabe nga kawalad-on—dili kanihit sa pinansiyal kondili kaguol. Kita nalugda, o kaha nasubo kaayo. Apan, sa maong mga panahon mahimong maabot nato ang usa ka butang bililhon nga makaayo gayod kanato. Kana nga “mutya” mao ang pagdasig.
Sa Bibliya parehong Gregong pulong ang gigamit alang sa “pagdasig” ug “paghupay.” Ang duha ka pulong adunay diwa sa paghatag ug kaisog, kalig-on, o paglaom. Nan, tin-aw nga sa dihang bation kitag kaluya o kaguol, ang paghupay ug pagdasig mao gayod ang atong gikinahanglan. Asa ba kini makita?
Ang Bibliya nagpasalig kanato nga si Jehova mao “ang Diyos sa tanang paghupay.” (2 Corinto 1:3) Kini nagtug-an usab kanato nga “siya dili halayo gikan sa matag usa kanato.” (Buhat 17:27) Busa mabatonan ang paghupay ug pagdasig. Atong tagdon ang upat ka kasagarang bahin nga pinaagi niana si Jehova naghatag ug pagdasig.
Pinaagi sa Personal nga Relasyon Uban sa Diyos
Ang labing dakong tuboran sa paghupay mao ang personal nga relasyon kang Jehova nga Diyos. Nga ang maong relasyon posible pa maoy makapadasig. Gawas pa, kinsa ba nga magmamando sa kalibotan ang modawat sa atong mga tawag sa telepono o mopakitag personal nga interes sa atong mga problema? Si Jehova mas gamhanan kaayo kay sa niining mga tawhana. Bisan pa, siya mapainubsanon—andam kaayo sa pagpakiglabot sa ubos, dili-hingpit nga mga tawo. (Salmo 18:35) Si Jehova mihimo pa ganig unang lakang sa pagpakitag gugma kanato. Ang 1 Juan 4:10 nag-ingon: “Mao kini ang gugma niining bahina, dili nga kita nahigugma sa Diyos, kundili nga siya nahigugma kanato ug gipadala ang iyang Anak ingong usa ka pangpasig-uli nga halad alang sa atong mga sala.” Dugang pa, mahigugmaong giagak kita ni Jehova ngadto sa iyang Anak.—Juan 6:44.
Misanong ka ba ug nangitag paghupay diha sa panaghigalaay uban sa Diyos? (Itandi ang Santiago 2:23.) Pananglitan, kon ikaw adunay usa ka minahal, suod nga higala, dili ba makalipay ang paggugol ug pipila ka panahon uban kaniya lamang, nga libreng makasulti bahin sa imong mga kahingawa ug mga kabalaka, sa imong mga paglaom ug mga kalipay? Gidapit ka ni Jehova sa pagbuhat niana uban kaniya. Wala siya magbutang ug limitasyon kon unsa ka dugay ang imong pagpakigsulti kaniya diha sa pag-ampo—ug siya tinuod gayod nga nagapamati. (Salmo 65:2; 1 Tesalonica 5:17) Si Jesus regular nga nag-ampo ug kinasingkasing. Ngani, una pa mipili sa iyang 12 ka apostoles, tibuok gabii siya nga nag-ampo.—Lucas 6:12-16; Hebreohanon 5:7.
Matag karon ug unya, ang matag usa kanato makahimo sa pag-inusara uban kang Jehova. Ang paglingkod lamang nga hilom diha sa bintana o paglakaw nga malinawon makahatag ug maayong higayon sa pagbukas sa atong kasingkasing diha sa pag-ampo kang Jehova. Ang pagbuhat niana mahimong usa ka tuboran sa dakong kahayahay ug paghupay. Kon kita adunay malantaw nga pipila ka bahin sa kalalangan ni Jehova samtang nagapalandong—bisan pa ug usa lamang ka pundok sa mga panganod, pipila ka kahoy o mga langgam—kita mahimong makakita diha niana ug pipila ka makapahupay nga mga pahinumdom sa gugma ug kahingawa ni Jehova alang kanato.—Roma 1:20.
Pinaagi sa Personal nga Pagtuon sa Pulong sa Diyos
Pinaagi sa personal nga pagtuon sa Bibliya, hinunoa, nga ang mga hiyas ni Jehova mahikyad gayod alang kanato. Ang Bibliya sublisubling nagpadayag kang Jehova nga “usa ka Diyos nga maluloy-on ug mapuangoron, mahinay sa kasuko ug dagaya sa mahigugmaong-kalulot.” (Exodo 34:6; Nehemias 9:17; Salmo 86:15) Ang tinguha sa paghupay sa iyang yutan-ong mga alagad maoy usa ka dakong bahin sa personalidad ni Jehova.
Tagda, pananglitan, ang mga pulong ni Jehova sa Isaias 66:13: “Sama sa usa ka tawo nga ginalipay kanunay sa iyang inahan, busa ako mismo padayong magalipay kaninyo.” Gilaraw ni Jehova ang gugma sa inahan ngadto sa iyang mga anak nga mahimong masakripisyohon sa kaugalingon ug maunongon. Kon nakakita ka na ug usa ka mahigugmaong inahan nga naghupay sa iyang nasamdang anak, ikaw nahibalo kon unsay ipasabot ni Jehova sa dihang siya miingon nga siya magalipay sa iyang katawhan.
Gipakita sa daghang asoy sa Bibliya ang maong paghupay nga naglihok. Sa dihang ang propetang si Elias gihulga nga patyon sa daotang Raynang Jezebel, nahadlok siya ug mikalagiw alang sa iyang kinabuhi. Naguol gayod siya kaayo nga siya milakaw ngadto sa kamingawan sa tibuok adlaw nga panaw, dayag nga wala siya magdalag tubig o mga abiyo uban kaniya. Sa hilabihang kasubo gisultihan ni Elias si Jehova nga siya gusto nang mamatay. (1 Hari 19:1-4) Unsay gibuhat ni Jehova sa paghupay ug pagdasig sa iyang propeta?
Wala sawaya ni Jehova si Elias sa pagbating nag-inusara, walay-bili, ug nahadlok. Sa kasukwahi, nadungog sa propeta ang “kalmado, hinay nga tingog.” (1 Hari 19:12) Kon basahon nimo ang 1 Hari kapitulo 19, imong mamatikdan kon giunsa paghupay ni Jehova si Elias, nagpakalma kaniya, ug nagpalig-on sa iyang pagtuo. Dili taphaw kini nga paghupay. Kini mitaop sa naguol nga kasingkasing ni Elias, nga nagpadasig sa propeta sa pagpadayon. (Itandi ang Isaias 40:1, 2.) Wala magdugay, mibalik siya sa iyang buluhaton.
Si Jesu-Kristo usab naghupay ug nagdasig sa iyang maunongong mga sumusunod. Ngani, si Isaias mitagna bahin sa Mesiyas: “Ang Soberanong Ginoong Jehova . . . nagpadala kanako sa pagbugkos sa dugmok-ug-kasingkasing, . . . sa paghupay sa tanang nagbalata.” (Isaias 61:1-3) Sa tibuok niyang kinabuhi, gipatin-aw ni Jesus nga kining mga pulonga aplikado kaniya. (Lucas 4:17-21) Kon bation nimong nagkinahanglan ug paghupay, palandonga ang malumo, mahigugmaong mga pagpakiglabot ni Jesus sa mga tawo nga nasakit ug nanginahanglan. Sa pagkatinuod, ang mainampingong pagtuon sa Bibliya maoy usa ka dakong tuboran sa paghupay ug pagdasig.
Pinaagi sa Kongregasyon
Diha sa Kristohanong kongregasyon, ang mga mutya sa paghupay ug pagdasig nagsidlaksidlak sa daghang dagway niini. Si apostol Pablo gidasig sa pagsulat: “Padayon sa paghupayay sa usag usa ug paglinig-onay sa usag usa.” (1 Tesalonica 5:11) Sa unsang paagi makita ang paghupay ug pagdasig diha sa mga tigom sa kongregasyon?
Panguna, siyempre, motambong kita sa Kristohanong mga tigom aron “matudloan ni Jehova,” sa pagdawat sa instruksiyon bahin kaniya ug sa iyang mga paagi. (Juan 6:45) Kini nga instruksiyon gilaraw nga makadasig ug makahupay. Diha sa Buhat 15:32, atong mabasa: “Si Judas ug si Silas . . . nagdasig sa mga igsoon pinaagi sa daghang pakigpulong ug nagpalig-on kanila.”
Nakaagi ka na ba nga mitambong sa usa ka Kristohanong tigom sa panahong ikaw nagmasulob-on ug mipauli nga mas maayo ang gibati? Tingalig may nahisgotan diha sa usa ka pakigpulong, diha sa usa ka komento, o diha sa usa ka pag-ampo nga nakatandog sa imong kasingkasing ug nakahatag ug gikinahanglang paghupay ug pagdasig. Busa ayaw pagpalta sa Kristohanong mga tigom.—Hebreohanon 10:24, 25.
Ang pagpakig-uban sa atong mga igsoong lalaki ug babaye diha sa ministeryo ug sa ubang mga okasyon adunay samang epekto. Sa Hebreohanon daghang berbo nga nagkahulogang “tingbon pagbugkos” nagpunting usab sa “paglig-on” o “napalig-on”—ang dayag nga ideya nga ang mga butang mas molig-on kon tingbon pagbugkos. Kini nga prinsipyo tinuod diha sa kongregasyon. Kita gihupay, gidasig, oo, napalig-on, pinaagi sa tingob nga panag-ubanay. Ug kita tingob nga nabugkos sa gugma, ang kinalig-onan sa mga bugkos.—Colosas 3:14.
Usahay ang pagkamatinumanon sa atong espirituwal nga mga igsoong lalaki o babaye ang nagdasig kanato. (1 Tesalonica 3:7, 8) Usahay ang gugma nga ilang ginapakita. (Filemon 7) Ug usahay ang tingob nga pagbuhat lamang, pagtinabangay, samtang nagapakigsulti sa uban bahin sa Gingharian sa Diyos. Kon bation nimo ang kaluya ug nagkinahanglan ug pagdasig kon bahin sa ministeryo, nganong dili mohimog mga kahikayan sa paggula uban sa usa ka edaran o sa mas eksperyensiyadong magmamantala sa Gingharian? Ikaw malagmit makakaplag ug dakong kahupayan sa pagbuhat niana.—Ecclesiastes 4:9-12; Filipos 1:27.
Pinaagi sa “Kasaligan ug Mabuot nga Ulipon”
Kinsa ang nag-organisar sa makapahupay nga mga bahin sa atong pagsimba? Si Jesus nagtudlo ug usa ka matang nga iyang gipiyalan ingong “ang kasaligan ug mabuot nga ulipon” sa paghatag ug espirituwal nga “pagkaon sa hustong panahon.” (Mateo 24:45) Sa unang siglo K.P., naglihok na kini nga lawas sa dinihogan-sa-espiritu nga mga Kristohanon. Ang nagamandong lawas sa mga ansiano sa Jerusalem nagpadalag mga sulat sa pagtudlo ug paggiya sa mga kongregasyon. Uban sa unsang resulta? Ang Bibliya nagrekord kon unsay pagsanong sa mga kongregasyon sa usa nianang sulata: “Human sa pagbasa niini, sila nagmaya maylabot sa maong pagdasig.”—Buhat 15:23-31.
Sa susama, niining kritikal nga kataposang mga adlaw, ang kasaligan ug mabuot nga ulipon naghatag ug espirituwal nga pagkaon nga nagtaganag dakong paghupay ug pagdasig sa katawhan ni Jehova. Nakig-ambit ka ba niana nga pagkaon? Kini daling mabatonan diha sa pinatik nga literatura nga gitagana sa ulipon nga matang sa tibuok kalibotan. Ang mga magasing Bantayanang Torre ug Pagmata! ingon man ang mga libro, mga brosyur, ug mga tract nga gipatik sa Watch Tower Society naghatag ug paghupay sa di-maihap nga mga magbabasa.
Usa ka nagapanaw nga magtatan-aw misulat: “Ang kadaghanan sa atong mga igsoong lalaki ug babaye buot nga mobuhat sa matarong, apan sagad nagapakigbisog sila sa mga kapakyasan, mga kahadlok, ug sa pagbati nga sila walay gahom sa pagtabang sa ilang kaugalingon. Ang mga artikulo sa atong mga basahon nagatabang sa daghan nga makagahom pag-usab sa ilang mga kinabuhi ug mga emosyon. Ang mga artikulo usab naghatag sa mga ansiano ug labaw pa nga ikatanyag kay sa taphaw nga pagdasig.”
Bug-os nga pahimusli ang literatura gikan sa kasaligang ulipon nga matang. Ang tukma-sa-panahong mga magasin, mga libro, ug ubang mga publikasyon makatabang kanato nga makakaplag ug paghupay sa dihang malisod ang mga panahon. Sa laing bahin, kon ikaw anaa sa posisyon sa paghatag ug pagdasig sa usa ka tawo nga naguol pag-ayo, gamita ang Kasulatanhong impormasyon niining mga basahona. Ang mga artikulo gisulat nga mainampingon kaayo, sagad human sa daghang semana o mga bulan sa maidlot nga panukiduki, pagtuon, ug pag-ampo. Ang tambag maoy pinasukad sa Bibliya, nasulayan na ug tinuod. Nakita sa uban nga nakatabang ug dako ang pagbasa sa usa ka tukmang artikulo o mga artikulo uban sa usa nga naguol. Kini moresultag dakong paghupay ug pagdasig.
Kon ikaw nakakaplag ug bililhong mga mutya, itago ba nimo kini, o mahinatagon ba nimong ipakig-ambit ang pipila ka bahandi sa uban? Tinguhaa nga mahimong usa ka tuboran sa paghupay ug pagdasig sa imong mga igsoong lalaki ug babaye diha sa kongregasyon. Kon ikaw nagapalig-on imbes nagapaluya, nagahatag ug komendasyon imbes nagapanaway, nagapamulong nga may “dila sa mga natudloan” imbes ‘walay-paghunahunang mga duslak sa espada,’ malagmit makahimo kag kalainan sa mga kinabuhi sa uban. (Isaias 50:4; Proverbio 12:18) Sa pagkatinuod, ikaw malantaw ingong usa ka mutya mismo—usa ka tuboran sa tinuod nga paghupay ug pagdasig!
[Kahon sa panid 20]
Paghupay Alang Niadtong Nanginahanglan
DAGHAN ang mikomento kon sa unsang paagi ang pipila ka mga artikulo sa Bantayanang Torre o Pagmata! nagpalalom sa ilang personal nga relasyon uban kang Jehova. Miingon ang usa: “Human mabasa kining artikuloha, gibati nako nga si Jehova uban sa tanan niyang kagahom ug kahalangdon diha mismo uban kanako. Gibati nako nga siya maoy usa ka tinuod nga persona.” Laing sulat nag-ingon: “Ang atong mga kasingkasing ug mga hunahuna nabag-o gayod pag-ayo sa atong panglantaw bahin kang Jehova nga kita dili managsama nga mga tawo. Morag adunay nagpahid sa atong mga antiyohos, ug karon atong makita ang tanan nga tin-aw kaayo.”
Ang uban misulat sa pag-ingon nga ang mga magasin nakatabang kanila sa espesipikong mga problema o mga kalisod, sa ingon napasaligan sila sa personal nga interes ni Jehova kanila. Gipadayag kini sa usa ka magbabasa niining paagiha: “Salamat kaayo sa makausa pa sa pagpakita kanamo kon unsa ka dako ang pagtagad ug gugma ni Jehova sa iyang katawhan.” Usa ka babaye sa Hapon nga namatyan ug anak miingon niini bahin sa mga artikulo sa Pagmata! nianang ulohana: “Ang dako nga kaluoy sa Diyos gibubo niini nga mga panid, ug ako mihilak ug mihilak ug mihilak. Gibutang ko kining mga artikuloha sa lugar nga dali nakong mabasa sa panahong bation nako ang kasubo ug kamingaw.” Ang laing nagbangotan nga babaye misulat: “Ang mga artikulo sa Bantayanang Torre ug Pagmata! ug ang brosyur nga “Sa Dihang ang Imong Minahal Mamatay” naghatag kanako ug kalig-on nga akong gikinahanglan aron maagwanta ang akong mga panahon sa kaguol.”
Ang Balaang Kasulatan mao ang dakong tuboran sa paghupay. (Roma 15:4) Ang Bantayanang Torre nagsunod sa Bibliya ingong awtoridad niini, ug ingon man ang kauban niining magasin, ang Pagmata! Tungod niini, kining mga basahona napamatud-an nga usa ka paghupay ug pagdasig sa ilang mga magbabasa.
[Hulagway sa panid 23]
Ang Diyos sa tanang paghupay mao usab ang Tigpatalinghog sa pag-ampo