Pagtuman sa Imong Panumpa sa Kaminyoon!

ANG adlaw sa kasal maoy usa ka malipayong adlaw. Kana usab usa ka seryoso kaayong okasyon. Ang pangasaw-onon ug pamanhonon mohimog ugdang nga pakigsaad nga mag-apektar sa tibuok nilang kinabuhi. Kadtong nanambong sa kasal ingong mga dinapit maoy mga saksi niining ugdang nga pakigsaad, apan si Jehova nga Diyos mao ang pangunang Saksi.

Ang Bibliya wala magbaod ug tinong mga paagi o usa ka linain nga matang sa seremonyas sa kasal. Apan, sa pag-ila sa balaang tinubdan niini, ang kaminyoon naandang himoon pinaagi sa paggamit sa mga panumpa sa kaminyoon panahon sa usa ka relihiyosong seremonyas. Sulod sa daghang katuigan ang mga Saksi ni Jehova nagagamit sa mosunod nga panumpa sa kaminyoon: “Ako —— nagdawat kanimo —— ingong akong pinakaslang (asawa/bana), aron higugmaon ug mahalon (Pangasaw-onon: ug tahoron pag-ayo) sumala sa diyosnong balaod nga nahisulat sa Balaang Kasulatan alang sa Kristohanong (mga asawa/mga bana), samtang kitang duha buhi dinhi sa yuta sumala sa kahikayan sa Diyos sa kaminyoon.”a

Usa ka Butang nga Angayng Hunahunaon

Kon ikaw nagplanong magminyo, bililhon kaayong maghunahuna mahitungod sa giladmon ug kahulogan niining maong panumpa una sa adlaw sa kasal. Si Solomon miingon: “Ayaw pagpadalia pagsulti ang imong baba; ug mahitungod sa imong kasingkasing, ayaw kana pagpadalia pagpamulong sa atubangan sa matuod nga Diyos.” (Ecclesiastes 5:2) Unsa na man kon ikaw minyo na? Nan makabenepisyo ka gikan sa pagpalandong sa kahinungdanon sa ugdang nga pakigsaad nga imong gihimo atubangan ni Jehova. Nagatuman ka ba niana? Ang mga Kristohanon nag-isip nga seryoso ang ilang mga saad. Si Solomon mipadayon: “Kon unsay imong gipanaad, tumana. Labi pang maayo nga dili ka manaad kay sa manaad ka ug dili motuman. Ayaw tugoti ang imong baba nga mahimong hinungdan sa pagpakasala sa imong unod, ni magsulti ka sa atubangan sa usa ka manulonda nga kadto usa ka sayop.”​—Ecclesiastes 5:4-6.

Ang usa ka prase-por-praseng pagkonsiderar sa panumpa sa kaminyoon sa walay duhaduha magpauswag sa imong pagsabot niining ugdang nga pakigsaad.

“Ako —— nagdawat kanimo”: Mao kini ang pangbukas nga mga pulong sa panumpa. Kini nagpasiugda nga ikaw modawat ug personal nga responsabilidad sa imong desisyon nga magminyo.

Ubos sa Kristohanong kahikayan, walay Kasulatanhong obligasyon nga magminyo. Si Jesu-Kristo mismo nagpabiling ulitawo ug nagrekomendar sa pagkatagsaanon alang niadtong ‘makahatag ug luna alang niana.’ (Mateo 19:10-12) Sa laing bahin, kadaghanan sa mga apostol ni Jesus maoy minyong mga tawo. (Lucas 4:38; 1 Corinto 9:5) Tin-aw nga ang desisyong magminyo maoy personal nga desisyon. Walay tawo ang adunay Kasulatanhong awtoridad nga magpugos sa lain nga magminyo.

Busa, ikaw maoy responsable sa pagpili nga magminyo. Lagmit, gipili nimo ang imong minyoan. Sa dihang ikaw mohimo sa panumpa sa kaminyoon, nga nag-ingon, ‘Ako nagdawat kanimo ​—​—,’ imong gidawat ang maong tawo uban sa iyang maayong mga hiyas​—apan uban usab sa iyang mga kahuyangon.

Ngadtongadto lagmit madiskobrehan nimo ang wala nimo damhang mga bahin sa personalidad sa imong kapikas. Adunay popanahong mga kahigawad. Ang Bibliya nag-ingon nga “ang tanan nakasala ug wala makaabot sa himaya sa Diyos.” (Roma 3:23) Busa kinahanglan tingaling mohimo ka ug mga pagpasibo aron magpahiuyon sa imong kapikas. Kini tingali malisod, ug usahay daw gusto na nimong moangka. Apan hinumdomi, ang panumpa sa kaminyoon gihimo atubangan ni Jehova. Siya makatabang kanimo nga molampos.

“Ingong akong pinakaslang (asawa/bana)”: Sa unang kasal, sa dihang si Eva gihatag kang Adan diha sa kaminyoon, si Jehova nga Diyos nag-ingon nga “sila mahimong usa ka unod.” (Genesis 2:24; Mateo 194-6) Sa ingon ang panaghiusa sa kaminyoon mao ang kinasuorang relasyon nga mahimong maglungtad tali sa duha ka tawo. Ang kaminyoon magdala kanimo ngadto sa usa ka bag-ong relasyon. Imong dawaton ang usa ingong imong “pinakaslang asawa” o “pinakaslang bana.” Lahi kini sa bisan unsang ubang relasyon. Ang mga binuhatan nga magpahinabog diyutayng kadaot sa ubang mga relasyon mahimong magpahinabog dulot nga kasakit sulod sa kahikayan sa kaminyoon.

Tagda, pananglitan, ang Kasulatanhong tambag nga makaplagan sa Efeso 4:26. Didto ang Bibliya nag-ingon: “Pagkapungot, apan ayaw pagpakasala; ayaw pasalopa ang adlaw nga kamo anaa sa suko nga kahimtang.” Tingali dili kanunayng masulbad ninyo ang inyong mga suliran batok sa mga paryente ug mga higala nga ingon ka dali sa angay unta ninyong himoon. Apan ang imong kapikas mas suod kay ni bisan kinsang paryente o higala. Ang kapakyasan sa paghusay dayon sa mga suliran batok sa imong kapikas mahimong magpameligro sa espesyal nga relasyon tali kaninyo.

Gitugotan ba nimo ang dili-pagsinabtanay tali kanimo ug sa imong kapikas nga mahimong padayong tinubdan sa kapikal o kalagot? Nagpadayon ba sa daghang adlaw ang mga dili-pagsinabtanay ug makapasukong mga kahimtang? Aron makatuman sa imong panumpa, sa dihang motungha ang mga kalisdanan ayaw tugoting ang adlaw molabay nga dili makigdait sa imong kapikas. Kini nagkahulogan ug pagpasaylo ug pagkalimot maingon man sa pagdawat sa imong kaugalingong kasaypanan ug kasal-anan.​—Salmo 51:5; Lucas 17:3, 4.

“Aron higugmaon”: Ang pamanhonon manumpa nga “higugmaon ug mahalon” ang iyang pangasaw-onon. Kining maong gugma naglakip sa romantikong gugma nga lagmit maoy naghiusa kanila. Apan dili pa igo ang romantikong gugma. Ang gugma nga ipanumpa sa usa ka Kristohanon alang sa iyang kapikas maoy mas dulot ug mas sangkad.

Ang Efeso 5:25 nag-ingon: “Mga bana, padayong higugmaa ang inyong mga asawa, maingon nga si Kristo nahigugma usab sa kongregasyon.” Ang gugma ni Jesus alang sa kongregasyon tinong dili samag kategoriya sa romantikong gugma tali sa magkaatbang nga sekso. Ang mga terminong “higugmaa” ug “nahigugma” nga gigamit niining maong kasulatan naggikan sa pulong nga a·gaʹpe, nga nagtumong sa gugma nga giniyahan sa prinsipyo. Ang Bibliya dinhi nagsugo sa mga bana nga ipasundayag ang makanunayon, walay-pagkabalhin, maagwantahon nga gugma alang sa ilang mga asawa.

Dili lang kay yanong “nahigugma ako kanimo tungod kay ikaw nahigugma kanako” nga matang sa emosyon. Ang bana magtinguha sa kaayohan sa iyang asawa nga una pa sa iyaha, ug ang asawa mahigugma sa iyang bana sa samang paagi. (Filipos 2:4) Ang pag-ugmad ug halalom nga gugma alang sa imong paris motabang kanimo sa pagtuman sa imong panumpa sa kaminyoon.

“Mahalon”: Sumala sa usa ka diksiyonaryo, ang ‘pagmahal’ nagkahulogan ug ‘pagpangga, pagbati o pagpakita ug pagkamabination.’ Kinahanglang ipakita nimo ang imong gugma pinaagi sa mga pulong ug mga buhat! Ang usa ka asawa ilabinang nagkinahanglang makadawat ug kanunayng mga pasundayag sa gugma sa iyang bana. Ang iyang bana mahimong mag-atiman sa iyang pisikal nga mga panginahanglan, apan dili pa kini igo. Adunay mga asawa nga may igong pagkaon ug komportableng pinuy-anan apan dili gayod malipayon tungod kay gipasagdan o wala tagda sa ilang kapikas sa kaminyoon.

Sa laing bahin, ang usa ka asawa nga nasayod nga siya gihigugma ug gimahal tinong may katarongang magmalipayon. Siyempre, ang susama ikaingon bahin sa bana. Ang tinuod nga gugma mapalambo pag-ayo pinaagi sa tinuod nga mga pahayag sa pagmahal. Sa Awit ni Solomon, ang hinigugmang magbalantay sa karnero mipatugbaw: “Pagkatahom sa mga kapahayagan sa imong gugma, Oh igsoon ko nga babaye, akong pangasaw-onon! Pagkalabi pang maayo ang imong kapahayagan sa gugma kay sa bino ug ang kahumot sa imong mga lana kay sa tanang matang sa mga pahumot!”​—Awit ni Solomon 4:10.

“Ug tahoron pag-ayo”: Latas sa kasiglohan, adunay mga lalaki nga nag-abuso ug nagpakaulaw sa kababayen-an. Bisan karong adlawa, sumala sa magasing World Health, “ang kapintasan batok sa kababayen-an nahitabo sa matag nasod ug sa matag sosyal ug ekonomikanhong hut-ong. Sa daghang kultura, ang pagdagmal sa asawa giisip nga katungod sa lalaki.” Kadaghanang lalaki tingali dili sad-an sa maong panggawi. Sa gihapon, daw daghang lalaki ang napakyas sa pagpakita ug tiunayng interes sa mga isyu may kalabotan sa kababayen-an. Ingong resulta, daghang babaye ang nakaugmad ug negatibong tinamdan maylabot sa kalalakin-an. Ang pila ka asawa nadunggang miingon, “Gihigugma ko ang akong bana, apan dili gayod nako siya mahimong tahoron!”

Si Jehova nga Diyos, hinunoa, nagpabili sa babaye nga maningkamot sa pagtahod sa iyang bana​—bisan tuod ang bana mapakyas usahay sa pagkab-ot sa iyang gidahom. Iyang giila nga siya adunay hinatag-Diyos nga asaynment, o katungdanan. (1 Corinto 11:3; Efeso 5:23) Ang halalom nga pagtahod sa iyang bana sa ingon maoy bahin sa iyang pagsimba ug pagkamasinugtanon kang Jehova. Dili kay dili panumbalingon sa Diyos ang pagkamasinugtanon sa diyosnong kababayen-an.​—Efeso 5:33; 1 Pedro 3:1-6; itandi ang Hebreohanon 6:10.

Ang pagtahod diha sa kaminyoon kinahanglang ipakita sa duha, ug kinahanglan kining hagoan inay kay dahomon lamang o pangayoon. Pananglitan, ang makantalitahon o bastos nga sinultihan walay dapit diha sa kahikayan sa kaminyoon. Dili mahigugmaon o matinahoron nga mohimog makauulawng mga komento mahitungod sa imong bana o asawa. Walay maayong moresulta sa pagpadayag sa mga kasaypanan sa imong kapikas ngadto sa uban o sa paghisgot bahin niana diha sa publiko. Bisan pag komedya lang ang usa mahimong magpakita ug tumang kawalay-pagtahod niining bahina. Ang mga pulong sa Efeso 429, 32 mapadapat sa bana ug asawa. Didto ang Bibliya nag-ingon: “Ayaw pagulaa ang usa ka dunot nga sulti gikan sa inyong baba, kundili ang unsa mang sulti nga maayo alang sa pagpalig-on sumala sa gikinahanglan . . . Magmaluloton sa usag usa, magmabination uban ang kalumo.”

“Sumala sa diyosnong balaod nga nahisulat sa Balaang Kasulatan”: Buot sa Diyos nga magpahimulos kita ug kagawasan sa pagpili ug pagbuhat. Wala niya kita pabug-ati sa walay-kinutobang listahan sa mga lagda nga nagmando sa kinabuhing minyo. Bisan pa niana, alang sa atong kaayohan siya naghatag ug pipila ka giya.

Karong adlawa, adunay dagayang kadaiyahan sa mga basahon bahin sa kaminyoon, ug daghang tawo ang adunay kaugalingong mga pilosopiya. Apan pagbantay! Sa ulohan bahin sa kaminyoon, daghang impormasyon ang kaylap nga kasukwahi sa Bibliya.

Ilha usab nga ang mga kahimtang nagkalainlain gikan sa usa ka magtiayon ngadto sa lain. Sa usa ka paagi, ang mga magtiayon maoy sama sa mga tipik sa niyebe; tingali pareho silang tan-awon sa halayo, apan sa pagkatinuod ang matag usa maoy talagsaon, lahi gikan sa uban. Ang kombinasyon sa imong personalidad uban nianang sa imong kapikas dili masundog sa laing magtiayon sa kalibotan. Busa ayaw pagdalidali sa pagdawat sa personal nga mga panglantaw sa uban. Walay hinimog-tawong pormula nga mapadapat sa tanang kaminyoon!

Sa kasukwahi, ang tanang sugo sa Bibliya maoy matuod ug mapadapat. Si apostol Pablo misulat: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang.” (2 Timoteo 3:16; Salmo 119:151) Kon imong basahon ang Bibliya ug dawaton ang mga pagtulon-an niini ingong giya sa imong inadlawng kinabuhi, makahimo ka sa pagtuman sa imong panumpa sa kaminyoon.​—Salmo 119:105.

“Samtang kitang duha buhi dinhi sa yuta”: Kini nagpunting sa dugayng panag-uban. Ang Diyos nagsugo nga “ang lalaki mobiya sa iyang amahan ug sa iyang inahan ug kinahanglang moipon siya sa iyang asawa.” (Genesis 2:24) Buot ni Jehova nga kamo magkauban. Alagara ang Diyos nga magkauban. Tun-i ang iyang Pulong nga magkauban. Paggahin ug panahon nga manglakawng magkauban, manglingkod nga magkauban, mangaong magkauban. Pahimusli ang kinabuhi nga magkauban!

Ang pila ka magtiayon naningkamot sa paggahin ug panahon matag adlaw aron lamang sa pagpakigsulti sa usag usa. Bisan human sa daghang katuigan sa kaminyoon, kining maong panagkauban kinahanglanon aron magmalipayon ang kaminyoon.

“Sumala sa kahikayan sa Diyos sa kaminyoon”: Ang kaminyoon maoy gasa gikan ni Jehova nga Diyos, kinsa maoy nagtukod sa kahikayan sa kaminyoon. (Proverbio 19:14) Ang pagkapakyas sa pagsunod sa iyang kahikayan magpameligro dili lamang sa imong kalipay sa kaminyoon kondili sa imong relasyon usab uban sa Maglalalang. Sa laing bahin, sa dihang ang bana ug asawa mag-ugmad ug usa ka maayong relasyon uban kang Jehova, nga gipasundayag sa pagkamasinugtanon sa iyang mga kahikayan, sila makabaton ug malinawong relasyon sa uban, lakip sa usag usa.​—Proverbio 16:7.

Ayawg kalimti nga si Jehova mao ang pangunang Saksi sa inyong panumpa sa kaminyoon. Padayon sa pagtuman niining ugdang nga pakigsaad, ug ang imong kaminyoon mahimong tuboran sa pagdayeg ug paghimaya kang Jehova nga Diyos!

[Footnote]

[Blurb/Mga hulagway sa panid 22]

Sa usa ka paagi, ang mga magtiayon maoy sama sa mga tipik sa niyebe. Kining tanan tingali parehong tan-awon sa halayo, apan sa pagkatinuod ang matag magtiayon sa pagkatalagsaon managlahi

[Credit Line]

Niyebeng mga Kristal/Dover