Nahiusa sa Pag-alagad sa Diyos Latas sa Maayo ug Daotang Kapanahonan

Sumala sa giasoy ni Michel ug Babette Muller

“AKO may daotang balita alang kaninyo,” ang doktor miingon. “Kalimti na lang ang inyong misyonaryong kinabuhi sa Aprika.” Nga nagtan-aw sa akong asawa, nga si Babette, siya miingon, “Ikaw may kanser sa suso.”

Dili mahubit ang among kakugang. Daghang butang ang misantop sa among mga hunahuna. Naghunahuna kami nga ang maong pagduaw sa doktor mao lamay kataposang pagsusi. Ang among mga tiket sa ayroplano pagbalik sa Benin, Kasadpang Aprika, napalit na. Naglaom kaming makabalik didto sulod niadtong semanaha. Sulod sa among 23 ka tuig nga kaminyoon, nakasinati kami ug maayo ug daotang kapanahonan. Nga naglibog ug nahadlok, niadtong tungora nangandam kami sa pagpakigbugno batok sa kanser.

Sugdon nato gikan sa sinugdan. Si Michel natawo niadtong Septiyembre 1947, si Babette sa Agosto 1945. Nagdako kami sa Pransiya ug naminyo niadtong 1967. Nagpuyo kami sa Paris. Usa ka buntag sa sayong bahin sa 1968, naulahi si Babette sa pagtrabaho. Usa ka babaye ang diha sa ganghaan ug mitanyag kaniya ug usa ka relihiyosong brosyur; iyang gidawat kadto. Dayon ang babaye miingon: “Mahimo ba akong mobalik uban sa akong bana aron makigsulti kanimo ug sa imong bana?”

Si Babette naghunahuna bahin sa iyang trabaho. Buot niyang ang babaye molakaw, busa miingon siya, “O, sige.”

Si Michel miasoy: “Wala akoy interes sa relihiyon, apan ang brosyur nakadani sa akong pagtagad, ug ako kadtong gibasa. Pila ka adlaw sa ulahi, ang babaye, si Joceline Lemoine, mibalik uban sa iyang bana, si Claude. Siya hanas kaayo sa iyang paggamit sa Bibliya. Natubag niya ang tanan nakong pangutana. Ako nakadayeg.

“Si Babette usa ka matinumanong Katoliko apan walay Bibliya, nga dili talagsaon sa mga Katoliko. Siya naghinamhinam kaayo sa pagkakita ug pagbasa sa Pulong sa Diyos. Gikan sa among pagtuon among nakat-onan nga daghan sa relihiyosong mga ideya nga gitudlo kanamo maoy bakak. Misugod kami sa pagpakigsulti sa among mga paryente ug mga higala bahin sa mga butang nga among nakat-onan. Sa Enero 1969 nahimo kaming bawtismadong mga Saksi ni Jehova. Siyam sa among mga paryente ug mga higala nabawtismohan wala madugay human niadto.”

Pag-alagad Diin Gikinahanglan ang mga Magsasangyaw

Wala madugay human sa pagbawtismo kanamo, kami naghunahuna: ‘Wala kitay mga anak. Nganong dili mosulod sa bug-os-panahong pag-alagad?’ Busa sa 1970 gibiyaan namo ang among mga trabaho, nagpalista ingong mga regular payunir, ug mibalhin sa gamayng lungsod sa Magny-Lormes, duol sa Nevers, sa sentro sa Pransiya.

Lisod kaayo kadto nga asaynment. Lisod ang pagpangita ug mga tawo nga buot motuon sa Bibliya. Dili kami makakaplag ug sekular nga trabaho, busa diyutay lang ang among salapi. Usahay patatas lang ang among kaonon. Panahon sa tingtugnaw ang mga temperatura mous-os pag-ayo ubos sa sero Sentigrado. Among gitawag ang panahon nga among gigugol didto nga panahon sa pito ka daot nga mga baka.​—Genesis 41:3.

Apan si Jehova nagpalig-on kanamo. Usa ka adlaw sa dihang halos wala na kamiy pagkaon, ang kartero naghatod ug usa ka dakong kahon sa keso gikan sa igsoong babaye ni Babette. Sa laing adlaw mipauli kami gikan sa pagsangyaw ug naabtan namo ang pila ka higala nga mibiyahe ug 500 ka kilometros aron makigkita kanamo. Kay nakadungog bahin sa kalisod, kining mga igsoona nagpuno sa ilang duha ka sakyanan ug pagkaon alang kanamo.

Human sa usa ka tuig ug tunga, ang Sosyedad nagtudlo kanamo ingong mga espesyal payunir. Latas sa misunod nga upat ka tuig, nag-alagad kami sa Nevers, unya sa Troyes, ug sa kataposan sa Montigny-lès-​Metz. Niadtong 1976, si Michel gitudlo nga mag-alagad ingong magtatan-aw sa sirkito sa habagatan-kasadpang Pransiya.

Duha ka tuig sa ulahi, panahon sa pagtungha sa mga magtatan-aw sa sirkito, nakadawat kamig sulat gikan sa Watch Tower Society nga nagdapit kanamo nga moadto sa langyawng mga nasod aron mag-alagad ingong mga misyonaryo; ang sulat nag-ingon nga makapili kami tali sa Chad ug Burkina Faso (kanhing Upper Volta). Gipili namo ang Chad. Sa wala madugay nakadawat kami ug laing sulat, nga nag-asayn kanamo nga mag-alagad ilalom sa sangang buhatan sa Tahiti. Gihangyo namo ang Aprika, nga usa ka dakong kontinente, apan sa wala madugay nakakaplag sa among kaugalingon diha sa usa ka gamayng isla!

Pag-alagad sa Habagatang Pasipiko

Ang Tahiti maoy matahom tropikanhong isla sa Habagatang Pasipiko. Sa pag-abot namo, mga usa ka gatos ka igsoon ang didto sa pagtagbo kanamo sa erport. Ila kaming giabiabi pinaagig mga kulintas nga bulak, ug bisan tuod kami gikapoy human sa dugay nga panaw gikan sa Pransiya, kami malipayon kaayo.

Upat ka bulan tapos sa among pag-abot sa Tahiti, misakay kami sa usa ka gamay nga sakayang linayagan nga puno sa kargamentong kopras. Lima ka adlaw sa ulahi nakaabot kami sa among bag-ong asaynment​—ang isla sa Nuku Hiva sa Kaislahan sa Marquesas. Mga 1,500 ka tawo ang nagpuyo sa isla, apan walay mga igsoon. Kami lamang.

Ang mga kahimtang maoy primitibo niadtong panahona. Nagpuyo kami sa usa ka gamay nga balay nga hinimo sa semento ug kawayan. Walay elektrisidad. Kami may gripo nga moagas usahay, apan ang tubig lubog. Kasagaran, gigamit namo ang tubig sa ulan nga nasalod sa usa ka atabay. Walay senementong mga karsada, mga gagmayng dalandalan lamang.

Aron makaabot sa kinalay-ang mga bahin sa isla, kinahanglang moabang kami ug mga kabayo. Ang mga siya hinimo sa kahoy​—dili komportable, ilabina alang kang Babette, nga wala pa gayod makasakay ug kabayo sukad. Nagdala kami ug usa ka pulang aron putlon ang kawayan nga nangatumba sa agianan. Dako kaayo kadtong kalainan sa kinabuhi sa Pransiya.

Gihimo namo ang mga tigom sa Dominggo, bisan tuod kami lang duha ang motambong. Sa sinugdan wala namo himoa ang laing mga miting sanglit kami rang duha. Hinunoa gibasa namong duha ang tun-anan sa tigom.

Tapos sa pipila ka bulan, kami nakahukom nga dili maayo nga magpadayon niadtong paagiha. Si Michel miasoy: “Akong giingnan si Babette, ‘Kinahanglang magsul-ob kita ug angay sa okasyon. Molingkod ka diha, ug ako molingkod diri. Sugdan nako pinaagi sa pag-ampo, ug unya himoon nato ang Tunghaan sa Teokratikanhong Ministeryo ug ang Tigom sa Pag-alagad. Mosukot ako ug mga pangutana, ug ikaw motubag, bisan kon ikaw lang ang bugtong laing tawo diha sa lawak.’ Maayong gibuhat namo kadto tungod kay sayon ang pagpasagad sa espirituwal sa dihang walay kongregasyon.”

Milabay ang pila ka panahon usa mitambong ang mga tawo sa among Kristohanong mga tigom. Kami rang duha sulod sa unang walo ka bulan. Sa ulahi, giduyogan kami sa usa, duha, o usahay sa laing tulo pa. Usa ka tuig, kami lang duha ang nagsugod sa tinuig nga selebrasyon sa Panihapon sa Ginoo. Human sa napulo ka minutos, pipila ka tawo ang miabot, busa mihunong ako ug gisugdan na usab ang pakigpulong.

Karong adlawa, may 42 na ka magmamantala ug 3 ka kongregasyon sa Kaislahan sa Marquesas. Bisan tuod nga ang kinadak-ang bahin sa buluhaton gihimo sa mga misunod kanamo, ang pipila ka tawo nga among nakontak kaniadto nabawtismohan na.

Bililhon ang Among mga Igsoon

Nakakat-on kami sa pagpailob didto sa Nuku Hiva. Kinahanglang maghulat kami sa tanang butang gawas lamang sa labing kinahanglanong mga butang. Kon gusto ka ug libro, pananglitan, kinahanglang mosulat ka alang niana, unya maghulat ug duha o tulo ka bulan una kana moabot.

Ang laing leksiyon nga among nakat-onan mao nga ang among mga igsoon maoy bililhon. Sa dihang miduaw kami sa Tahiti ug mitambong sa tigom didto ug nakadungog sa mga igsoon nga nanganta, nanglugmaw ang among mga luha. Tinuod nga ang pipila ka igsoon lisod ikasinabot, apan sa dihang ikaw nag-inusara, imong maamgohan kon unsa ka maayo nga mahiuban sa kaigsoonan. Sa 1980 ang Sosyedad mihukom nga kami kinahanglang mobalik sa Tahiti ug mag-alagad sa sirkitong buluhaton. Didto kami nadasig pag-ayo sa mainitong pag-abiabi sa mga igsoon ug sa ilang gugma alang sa buluhatong pagsangyaw. Migugol kami ug tulo ka tuig sa sirkitong buluhaton sa Tahiti.

Gikan sa Isla Ngadto sa Isla

Sunod giasayn kami sa usa ka puy-anan sa misyonaryo sa Raïatéa, laing isla sa Pasipiko, ug kami nagpabilin didto sulod sa mga duha ka tuig. Tapos sa Raïatéa, kami giasayn sa sirkitong buluhaton sa pundok sa kaislahan sa Tuamotu. Kami miduaw sa 25 sa 80 ka isla sakay sa barko. Alang kang Babette malisod kadto. Matag panahon nga siya magbiyahe sa barko, siya dagaton.

Si Babette miingon: “Grabe kadto! Ako gidagat sa tanang panahon nga among gigugol sa barko. Kon kami maglawig sulod sa lima ka adlaw, ako dagaton ug lima ka adlaw. Walay tambal nga mosaler nako. Apan, bisan pag ako dagaton, ako naghunahuna nga ang dagat maoy matahom. Kahibulongan kadtong talan-awon. Ang mga lumod makiglumba sa barko. Molukso sila gikan sa tubig kon mopakpak ka sa imong mga kamot!”

Human sa lima ka tuig sa sirkitong buluhaton, giasayn kami pag-usab sa Tahiti sulod sa duha ka tuig ug sa makausa pa nalingaw sa buluhatong pagsangyaw. Ang among kongregasyon nadoble gikan sa 35 ngadto sa 70 ka magmamantala sulod sa usa ka tuig ug tunga. Napulog duha niadtong gitun-an namo sa Bibliya nabawtismohan una kami mibiya. Ang pipila kanila mga ansiano na karon sa kongregasyon.

Tanantanan migugol kami ug 12 ka tuig sa Habagatang Pasipiko. Unya nakadawat kami ug sulat gikan sa Sosyedad nga nag-ingon nga wala na sila magkinahanglan ug mga misyonaryo diha sa kaislahan sanglit ang mga kongregasyon lig-on na. Dihay duolan sa 450 ka magmamantala sa dihang miabot kami sa Tahiti ug kapin sa 1,000 sa among pagbiya.

Aprika sa Kataposan!

Mipauli kami sa Pransiya, ug human sa usa ka bulan ug tunga, ang Sosyedad naghatag kanamo ug bag-ong asaynment​—Benin, Kasadpang Aprika. Buot na namong moadto sa Aprika 13 ka tuig kanhi, busa nalipay kami pag-ayo.

Miabot kami sa Benin sa Nobyembre 3, 1990, ug nalakip sa unang mga misyonaryo nga miabot human matangtang ang 14-ka-tuig nga pagdili sa pagsangyaw sa Gingharian nga kalihokan. Kulbahinam kaayo kadto. Wala kamiy suliran sa pagpahiluna tungod kay ang kinabuhi susama nianang sa kaislahan sa Pasipiko. Ang katawhan mahigalaon kaayo ug maabiabihon. Mahimo kang mohunong ug makigsulti kang bisan kinsa diha sa karsada.

Mga pipila lang ka semana human sa among pag-abot sa Benin, si Babette nakamatikod ug bugon sa iyang suso. Busa miadto kami sa usa ka gamayng klinika haduol sa bag-ong natukod nga sangang buhatan. Ang doktor nagsusi kaniya ug miingon nga kinahanglang operahan dayon siya. Sa misunod nga adlaw miadto kami sa laing klinika diin nagpahiling kami sa usa ka Uropanhong doktor, usa ka espesyalista sa mga sakit sa babaye nga taga-Pransiya. Siya usab miingon nga kinahanglang moadto kami dayon sa Pransiya aron nga si Babette makapaopera. Duha ka adlaw sa ulahi misakay na kami sa ayroplano paingon sa Pransiya.

Nasubo kami nga mobiya sa Benin. Tungod sa napasig-uli nga relihiyosong kagawasan sa nasod, ang mga igsoon nalipay nga makabaton ug bag-ong mga misyonaryo, ug nalipay kami nga atua didto. Busa naguol kami nga kinahanglan kaming mobiya sa nasod human lamang sa pipila ka semana.

Sa pag-abot namo sa Pransiya, ang siruhano nagsusi kang Babette ug nagkompirmar nga gikinahanglan niya ang operasyon. Milihok dayon ang mga doktor, mihimog gamayng operasyon, ug nagpagawas kang Babette gikan sa ospital sa misunod nga adlaw. Kami naghunahuna nga mao na kadto ang kataposan sa maong suliran.

Walo ka adlaw sa ulahi, nakigkita kami sa siruhano. Niadtong tungora gisulti niya ang balita nga si Babette may kanser sa suso.

Sa paghinumdom kon unsay gibati niya niadtong tungora, si Babette miingon: “Sa sinugdan, menos ang akong kaguol kay kang Michel. Apan sa adlaw human ipahayag ang daotang balita, wala akoy pagbati. Wala ako makahilak. Wala ako makapahiyom. Ako naghunahuna nga ako mamatay na. Alang kanako, ang kanser katumbas sa kamatayon. Ang akong tinamdan mao, Kinahanglang buhaton namo kon unsay angay namong buhaton.”

Ang Pagpakigbugno sa Kanser

Nadungog namo ang daotang balita sa Biyernes, ug si Babette gieskedyul nga operahan sa ikaduhang higayon sa Martes. Miestar kami sa magulang nga babaye ni Babette, apan siya usab masakiton, busa dili kami makapadayon sa pag-estar sa iyang gamayng apartment.

Kami nahibulong kon asa kami paingon. Unya among nahinumdoman si Yves ug Brigitte Merda, usa ka magtiayon nga among giestaran kaniadto. Kining maong magtiayon maabiabihon kaayo kanamo. Busa among gitawagan si Yves sa telepono ug giingnan siya nga si Babette kinahanglang operahan ug wala kami masayod kon asa moestar. Amo usab siyang gisultihan nga si Michel nagkinahanglag trabaho.

Si Yves nagpatrabaho kang Michel sa tibuok niyang balay. Ang mga igsoon nagsuportar ug nagdasig kanamo pinaagi sa daghang buhat sa kalulot. Mitabang usab sila kanamo sa pinansiyal nga paagi. Ang Sosyedad mibayad sa medikal nga balayranan ni Babette.

Dako ang operasyon. Ang mga doktor kinahanglang magkuha sa mga lymph node ug sa suso. Gisugdan dayon nila ang chemotherapy. Human sa usa ka semana, si Babette mahimo nang mogawas sa ospital, apan kinahanglang mobalik siya matag tulo ka semana alang sa padayong pagtambal.

Niadtong panahon nga si Babette gitambalan, ang mga igsoon sa kongregasyon matinabangon kaayo. Usa ka igsoong babaye nga may kanser usab sa suso nakadasig pag-ayo. Iyang giingnan si Babette kon unsay dahomon ug gihupay siya pag-ayo.

Bisan pa niana, nabalaka kami sa among umaabot. Nga nakasabot niini, si Michel ug Jeanette Cellerier nagdala kanamo sa usa ka restawran aron mangaon.

Amo silang giingnan nga kinahanglang moundang kami sa misyonaryong pag-alagad ug nga dili na gayod kami makabalik sa Aprika. Apan, si Brader Cellerier miingon: “Unsa? Kinsay nag-ingon nga kinahanglan mong moundang? Ang Nagamandong Lawas? Ang mga igsoon sa Pransiya? Kinsay nagsulti niana?”

“Walay nagsulti niana,” ako mitubag, “ako ang nagsulti niana.”

“Dili, dili!” matod ni Brader Cellerier. “Mobalik gayod kamo!”

Ang chemotherapy gisundan sa radyasyon, nga natapos sa kataposan sa Agosto 1991. Ang mga doktor nag-ingon nga wala silay nakitang suliran sa among pagbalik sa Aprika, basta si Babette mobalik sa Pransiya alang sa regular nga pagsusi.

Balik sa Benin

Busa misulat kami sa hedkuwarter sa Brooklyn, nga nangayog pagtugot nga mobalik sa misyonaryong pag-alagad. Gusto na namong madungog ang ilang tubag. Miaginod ang mga adlaw. Sa kataposan, dili na makapaabot si Michel, busa iyang giteleponohan ang Brooklyn ug nangutana kon nadawat ba nila ang among sulat. Sila miingon nga ila kanang gikonsiderar​—makabalik kami sa Benin! Pagkamapasalamaton namo kang Jehova!

Ang pamilyang Merda nag-organisar ug usa ka salusalo sa pagsaulog sa balita. Sa Nobyembre 1991 mibalik kami sa Benin, ug ang mga igsoon nag-abiabi kanamo pinaagi sa usa ka kombira!

Morag maayo na si Babette karon. Nakapauli kami sa Pransiya matag karon ug unya alang sa kompletong medikal nga mga pagsusi, ug ang mga doktor walay makitang timailhan sa kanser. Nalipay kami nga nakabalik sa among misyonaryong asaynment. Gibati namong gikinahanglan sa Benin, ug si Jehova nagpanalangin sa among buluhaton. Sukad sa among pagbalik nakatabang kami sa 14 ka tawo nga magpabawtismo. Lima kanila karon maoy mga regular payunir, ug ang usa gitudlo ingong ministeryal nga alagad. Nakita usab namo ang among gamayng kongregasyon nga mitubo ug unya nabahin ngadto sa duha ka kongregasyon.

Latas sa katuigan, nag-alagad kami kang Jehova ingong bana ug asawa ug nakapahimulos sa daghang panalangin ug nakaila sa daghang kahibulongang katawhan. Apan nabansay usab kami ug napalig-on ni Jehova sa paglahutay sa mga kalisdanan nga malamposon. Sama kang Job, dili namo kanunayng masabtan kon nganong ang mga butang nahitabo nga ingon niana, apan nasayod kami nga si Jehova kanunayng anaa aron sa pagtabang kanamo. Sama kini sa giingon sa Pulong sa Diyos: “Tan-awa! Ang kamot ni Jehova dili mubo kaayo nga dili kana makaluwas, ni ang iyang dalunggan bug-at kaayo nga dili kana makadungog.”​—Isaias 59:1.

[Hulagway sa panid 23]

Si Michel ug Babette Muller nga nagsul-ob sa tradisyonal nga sinina sa Benin

[Hulagway sa panid 25]

Misyonaryong buluhaton taliwala sa mga Polynesian sa tropikanhong Tahiti