Si Jehova-Mahigugmaon sa Pagkamatarong ug Hustisya

USA ka batan-ong babaye sa Sarajevo nangutana sa iyang kaugalingon kon nganong kinahanglang sagubangon man sa kabataan sa iyang siyudad ang daghan kaayong pag-antos. “Kami walay gihimong daotan. Kami walay sala,” siya miingon. Nagpasundayag ang nabalisa kaayong mga inahan nga taga-Argentina sa usa ka publikong plasa sa Buenos Aires duolan sa 15 na ka tuig, ingong pagprotesta sa pagkawala sa ilang mga anak nga lalaki. Usa ka Aprikano nga ginganlag Emmanuel, kansang inahan ug tulo ka igsoong babaye ngilngig nga gipatay sa panahon sa pagbuto sa etnikong kapintasan, miinsister: “Ang tanan kinahanglang makadawat sa iyang angay nga silot . . . Buot namo ang hustisya.”

Ang hustisya maoy usa sa pangunang mga hiyas ni Jehova nga Diyos. “Ang tanan niyang mga dalan hustisya,” nag-ingon ang Bibliya. Sa pagkatinuod, si Jehova maoy “mahigugmaon sa pagkamatarong ug hustisya.” (Deuteronomio 32:4; Salmo 33:5) Aron makaila pag-ayo sa Diyos, kita kinahanglang makasabot sa iyang hunahuna bahin sa hustisya ug magtuon sa pagsundog niana.​—Oseas 2:19, 20; Efeso 5:1.

Ang atong ideya bahin sa hustisya tingali naimpluwensiyahan sa kon unsay pag-isip niining hiyasa sa mga tawo. Sa ubang bahin sa kalibotan, ang hustisya sagad gihulagway ingong babaye nga tinabonan ang mga mata nga nagkupot ug espada ug timbangan. Ang hustisya sa tawo gituohan nga walay gidapigan, sa ato pa, buta sa bahandi ug impluwensiya. Angayng timbangtimbangon niinig maayo ang pagkasad-an o pagkainosente sa akusado. Pinaagi sa espada niini, ang hustisya angayng manalipod sa inosente ug silotan ang mga mamumuhat ug daotan.

Ang librong Right and Reason​—Ethics in Theory and Practice nag-ingon nga “ang hustisya konektado sa balaod, obligasyon, mga katungod, ug mga katungdanan, ug ipakanaog ang mga hukom niini nga walay dapigan o sa takos gayod niana.” Apan ang hustisya ni Jehova labaw pa niana. Atong makita kini pinaagi sa pagtagad sa mga buhat ug mga hiyas ni Jesu-Kristo, nga sama gayod sa iyang langitnong Amahan.​—Hebreohanon 1:3.

Ang mga pulong sa Isaias 42:3 gipadapat kang Jesus sa magsusulat sa Ebanghelyo nga si Mateo, nga nag-ingon: “Walay nabun-og nga tangbo nga iyang gupokon, ug walay nagbaga nga pabilong lino nga iyang palongon, hangtod nga iyang ikapadala ang hustisya nga may kalamposan.” Gipahayag ni Jesus ang makapalipay nga mensahe ngadto sa katawhan nga samag nabun-og nga tangbo nga nabawog ug giyatakan pa. Sila samag nag-awop-awop nga pabilo sa lampara, nga daw ang ilang kataposang siga sa kinabuhi hapit nang mapalong. Imbes mahulagwayong gupokon ang nabun-og nga mga tangbo ug palongon ang nag-awop-awop nga pabilo, si Jesus naluoy sa gisakit, nagtudlo ug nag-ayo kanila, ug nagpatin-aw kanila sa hustisya ni Jehova nga Diyos. (Mateo 12:10-21) Ingon sa gitagna sa tagna ni Isaias, ang maong matang sa hustisya nagdasig ug paglaom.

Kaluoy ug Hustisya ni Jehova

Ang kaluoy maoy usa ka dakong bahin sa hustisya sa Diyos. Kini napasiugda sa dihang dinhi pa si Jesus sa yuta. Hingpit niyang gihawasan ang mga sukdanan sa Diyos sa hustisya ug pagkamatarong. Ugaling, ang Hudiyohanong mga eskriba ug mga Pariseo naningkamot sa pagkab-ot sa pagkamatarong pinaagi sa pagsunod sa higpit nga kodigo sa mga kasugoan​—nga ang kadaghanan ilang hinimo. Ang ilang hustisya nga subay sa balaod kasagaran wala ubanig kaluoy. Daghang panagbangi tali kang Jesus ug sa mga Pariseo nasentro niining isyuha: Unsa ang matuod nga hustisya ug pagkamatarong?​—Mateo 9:10-13; Marcos 3:1-5; Lucas 7:36-47.

Giilustrar ni Jesus kon unsaon pagtratar sa uban sa makataronganon ug matarong nga paagi. Usa ka lalaki nga sinati kaayo sa Kasugoan kas-a nangutana kang Jesus kon unsay gikinahanglan aron makapanunod ug kinabuhing walay kataposan. Sa pagtubag nangutana si Jesus kaniya ug usa ka pangutana ug gidayeg siya sa dihang mitubag siya nga ang duha ka labing hinungdanong kasugoan mao ang paghigugma sa Diyos sa bug-os nga kasingkasing, kalag, hunahuna, ug kusog ug sa paghigugma sa silingan sama sa iyang kaugalingon. Ang tawo dayon nangutana: “Kinsa sa pagkatinuod ang akong silingan?” Mitubag si Jesus pinaagi sa pag-asoy ug ilustrasyon sa mabinationg Samaritano.​—Lucas 10:25-37.

Ang pagkamatarong ug maluloy-ong hustisya ni Jehova gilarawan diha sa ilustrasyon ni Jesus bahin sa Samaritano. Pinaagi sa di-mahakogong pagtabang sa tawong nasamdan nga wala siya makaila, gihimo sa Samaritano ang matul-id, makataronganon, ug maluloy-ong buhat. Gipakita ni Jesus mismo ang samang espiritu sa dinhi pa sa yuta. Siya matarong ug makataronganon. Dugang pa, gihatag niya ang iyang kinabuhi alang sa mga tawong nanginahanglan, alang sa makasasala ug di-hingpit nga katawhan nga naulipon sa pag-antos, sakit, ug kamatayon. Gilangkit ni apostol Pablo ang pagkamatarong uban sa tagana sa lukat. Siya misulat: “Pinaagi sa usa ka paglapas ang resulta nganha sa tanang matang sa tawo mao ang pagkahinusgahan, sa ingon usab pinaagi sa usa ka buhat sa pagmatarong [o, “usa ka buhat nga matarong,” potnot] ang resulta nganha sa tanang matang sa tawo mao ang usa ka pagpahayag kanila nga matarong alang sa kinabuhi.” (Roma 5:18) Kining “usa ka buhat nga matarong” maoy paagi sa Diyos sa pagluwas sa masinugtanong katawhan gikan sa malaglagong mga sangpotanan sa sala ni Adan, nga niana sila dili direktang responsable.

Ang hustisya sa Diyos nagtinguha sa paglukat sa mga tawong makasasala ug sa pagtuboy sa matarong nga mga prinsipyo sa samang panahon. Ang dili pag-ila ug sala maoy di-matarong ug di-mahigugmaon, kay magdasig kini sa pagkamalapason. Sa laing bahin, kon ang hustisya sa Diyos limitado lamang sa pagpakanaog ug ganti o silot, ang kahimtang sa katawhan mahimo untang walay paglaom. Sumala sa Bibliya, “ang suhol nga ginabayad sa sala maoy kamatayon” ug “walay tawong matarong, wala bisan usa.” (Roma 3:10; 6:23) Sa iyang dakong personal nga kapildihan ug sa iyang pinalanggang Anak, gitagana ni Jehova ang usa ka halad pagpasig-uli alang sa mga sala.​—1 Juan 2:1, 2.

Ang lukat nagpakita nga ang diyosnong hustisya nalambigit sa may prinsipyong gugma (Grego, a·gaʹpe). Sa pagkatinuod, ang hustisya sa Diyos mao ang pagpadapat sa iyang matarong nga mga prinsipyo​—usa ka banaag sa iyang mga sukdanan sa maayong pamatasan. Busa, sa dihang ipasundayag sa Diyos, ang a·gaʹpe maoy gugma nga niana gipasukad ang diyosnong hustisya. (Mateo 543-48) Busa kon nasabtan gayod nato ang hustisya ni Jehova, kita adunay bug-os nga pagsalig sa iyang hudisyal nga mga paghukom. Ingong “ang Maghuhukom sa tibuok nga yuta,” buhaton gayod niya kanunay ang matarong.​—Genesis 18:25; Salmo 11975.

Sundoga ang Hustisya ni Jehova

Ang Bibliya nagtambag kanato nga ‘magmahimong mga tigsundog sa Diyos.’ (Efeso 5:1) Kini nagkahulogan sa pagsundog sa iyang hustisya ingon man sa iyang gugma. Apan, kay dili man kita hingpit, ang atong mga dalan dili ingon ka hataas niadtong iya kang Jehova nga Diyos. (Isaias 55:8, 9; Ezekiel 18:25) Busa unsaon nato pagpamatuod nga kita mga mahigugmaon sa pagkamatarong ug hustisya? Pinaagi sa pagsul-ob “sa bag-ong pagkatawo, nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:24) Nan atong higugmaon ang gihigugma sa Diyos ug dumtan ang iyang ginadumtan. Ang “matuod nga pagkamatarong” maglikay sa kapintasan, imoralidad, kahugawan, ug apostasiya, kay kini nagalapas kon unsay balaan. (Salmo 11:5; Efeso 5:3-5; 2 Timoteo 2:16, 17) Ang hustisya sa Diyos magpalihok usab kanato sa pagpakitag sinserong kaikag sa uban.​—Salmo 37:21; Roma 15:1-3.

Dugang pa, kon pabilhan nato ang maluloy-ong kinaiyahan sa hustisya sa Diyos, kita dili mokiling sa paghukom sa espirituwal nga mga igsoong lalaki o babaye. Sa unsang paagi masabtan nato sila sama sa pagsabot ni Jehova? Dili ba hukman nato sila gikan sa atong kaugalingong mapihigong hunahuna? Busa, si Jesus nagpasidaan: “Hunong na sa pagpanghukom aron dili kamo pagahukman; kay sa unsa mang hukom nga inyong ginahukom, kamo pagahukman; ug sa sukod nga inyong ginasukod, sila magasukod nganha kaninyo. Nan, nganong tan-awon nimo ang uhot diha sa mata sa imong igsoon, apan wala magatagad sa salagunting diha sa imong kaugalingong mata? O unsaon man nimo pag-ingon sa imong igsoon, ‘Tugoti ako pagkuha sa uhot gikan sa imong mata’; sa dihang, tan-awa! usa ka salagunting ang anaa sa imong kaugalingong mata? Salingkapaw! Kuhaa una ang salagunting gikan sa imong kaugalingong mata, ug unya makita mo nga tin-aw unsaon pagkuha sa uhot gikan sa mata sa imong igsoon.” (Mateo 7:1-5) Ang matinud-anong pagtimbangtimbang sa atong kaugalingong mga kahuyangon magpugong kanato sa paghimog mga paghukom nga gilantaw ni Jehova nga dili matarong.

Ang tinudlong mga ansiano sa kongregasyon obligado sa paghukom sa mga kaso sa seryosong kasal-anan. (1 Corinto 5:12, 13) Sa paghimo niini, hinumdoman nila nga ang hustisya sa Diyos nagtinguha sa pagpaabot ug kaluoy kon mahimo. Kon walay basehanan alang niana​—sama sa kahimtang sa dili mahinulsolong makasasala​—ang kaluoy dili ikapaabot. Apan dili ipalagpot sa mga ansiano ang maong makasasala sa kongregasyon tungod lamang sa pagkamapanimaslon. Sila naglaom nga ang lihok sa pagpalagpot mismo magpaamgo kaniya. (Itandi ang Ezekiel 18:23.) Ubos sa pagpanguna ni Kristo, ang mga ansiano mag-alagad sa mga interes sa hustisya, ug kini naglakip sa pagkahimong sama sa “usa ka tagoanang dapit batok sa bagyo.” (Isaias 32:1, 2) Busa sila kinahanglang magpakitag pagkadi-mapihigon ug pagkamakataronganon.​—Deuteronomio 1:16, 17.

Pagpugas ug mga Binhi Diha sa Pagkamatarong

Samtang nagpaabot kita sa matarong nga bag-ong kalibotan sa Diyos, kinahanglang “pangitaon [nato] ang pagkamatarong” aron matagamtam ang pag-uyon sa Diyos. (Sofonias 2:3; 2 Pedro 3:13) Kining hunahunaa maanindot kaayong pagkapahayag niining mga pulonga, nga makita sa Oseas 10:12: “Pagpugas kamo ug binhi diha sa pagkamatarong; magaani sumala sa mahigugmaong-kalulot. Tikara ninyo ang darohonon nga yuta, samtang aduna pay panahon sa pagpangita kang Jehova hangtod nga siya moanhi ug mohatag ug instruksiyon sa pagkamatarong nganha kaninyo.”

Sa atong adlaw-adlaw nga pagkinabuhi, daghan kitag higayon sa ‘pagpugas ug mga binhi diha sa pagkamatarong,’ sama sa giilustrar ni Jesus sa iyang sambingay bahin sa mabinationg Samaritano. Tinoon ni Jehova nga kita “magaani sumala sa mahigugmaong-kalulot.” Kon kita magpadayon sa paglakaw diha sa “dalan sa hustisya,” kita magpadayon sa pagkadawat ug instruksiyon sa pagkamatarong ubos sa pagmando sa Gingharian. (Isaias 40:14) Sa molabay ang panahon, kita sa walay duhaduha makadangat sa pagpabili sa mas bug-os pa nga si Jehova maoy mahigugmaon sa pagkamatarong ug hustisya.​—Salmo 33:4, 5.

[Hulagway sa panid 23]

Ang mabinationg Samaritano naglarawan sa hustisya ni Jehova

[Hulagway sa panid 23]

Si Jesus naluoy sa mga tawong sinakit, nga samag nabun-og nga mga tangbo