Mga Magmamantala sa Gingharian Nagtaho

Ang Makapabag-ong Gahom sa Pulong sa Diyos

IYANG giangkon mismo, siya kanhi maoy “usa ka tigpasipala ug maglulutos ug tawong bagis.” (1 Timoteo 1:13) Apan siya nausab! Ang pagkausab ni apostol Pablo dako kaayo nga siya sa ulahi nakapahayag: “Magmahimong mga tigsundog kanako, sama gayod nga ako mao kang Kristo.”​—1 Corinto 11:1.

Karong adlawa, ginatos ka libong sinserong mga magsisimba sa tibuok kalibotan ang nagahimo ug susamang mga kausaban. Unsay nakapaarang kanila sa paghimo niana? Sila nagakuha ug kahibalo sa Pulong sa Diyos ug nagpadapat niana sa ilang mga kinabuhi. Ang mosunod nga kasinatian nagpasiugda sa makapabag-ong gahom sa Pulong sa Diyos.

Sa Slovenia usa ka edarang magtiayon nagpuyo nga silasila ra sa gawas sa usa ka balangay. Ang bana, si Jože, maoy mga 60 anyos ang edad ug may grabeng suliran sa alkoholismo. Sa gihapon, iyang giatiman ang iyang masakitong asawa, si Ljudmila. Usa ka adlaw si Jože giduol sa duha ka magmamantala sa Gingharian. Iyang gidapit ang mga Saksi ngadto sa iyang balay, diin ilang nahimamat ang iyang asawa. Sa pagkadungog sa mensahe sa Gingharian, ang mga luha sa kalipay nanaligdig sa aping ni Ljudmila. Si Jože usab nalipay sa iyang nadungog ug nagpatungha ug daghang pangutana. Human makapahimutang ug pipila ka literatura sa Bibliya uban sa magtiayon, ang mga Saksi milakaw.

Usa ka bulan sa ulahi ang mga Saksi nakabalik, ug ilang namatikdan ang librong Ikaw Mabuhing Walay Kataposan sa Paraiso sa Yuta nga gitungtong sa lamesa. Sa dihang gipangutana kon diin niya kadto makuha, si Jože miingon: “Nakita nako ang anunsiyo sa luyo nga hapin sa usa sa mga magasin nga inyong gibilin kanako. Busa misulat ako sa inyong buhatan sa Zagreb ug mihangyo sa libro.” Tungod sa iyang kaikag, gidapit siya sa pagtambong sa nagsingabot nga Memoryal sa kamatayon ni Kristo nga pagahimoon sa Kingdom Hall. Sa kalipay sa mga Saksi, siya miabot!

Sa wala madugay nasugdan ang usa ka pagtuon sa Bibliya, ug maayo ang nahimong pag-uswag. Pananglitan, sa dihang gipakitaan si Jože gikan sa Bibliya nga “dili ka gayod magahimo alang sa imong kaugalingon ug usa ka linilok nga larawan o . . . moyukbo kanila ni madani sa pagsimba kanila,” dihadiha gitigom niya ang tanang relihiyosong mga imahen nga diha sa iyang balay, lakip ang mga estampa, ug gilabay kana sila.​—Exodo 20:4, 5.

Ang kauhaw ni Jože sa espirituwal nga kamatuoran natagbaw. Hinunoa, ikasubong siya may lain pang kauhaw. Sulod sa mga 18 ka tuig, siya nakainom ug mga 10 ka litros nga bino matag adlaw. Tungod sa iyang suliran sa pag-inom, wala kaayo siya magpakabana sa iyang personal nga panagway. Apan human makakat-on sa panglantaw sa Diyos bahin sa sayop nga paggamit sa alkohol, siya determinadong mag-usab.

Naningkamot siya sa pagbuntog sa iyang suliran sa pag-inom nga hinayhinay, nga naglista kon unsa ka daghan ang iyang giinom kada adlaw. Sa wala madugay siya wala na maulipon sa bino. Sa padayon niyang pagtuon sa Bibliya, nakakat-on usab siya nga ang tinuod nga mga Kristohanon gikinahanglang maghupot ug maayong personal nga batasan sa kahinlo. Busa, mitunol siya ug salapi sa mga Saksi ug miingon: “Aw, lakaw kamo ug pagpalit ug bisan unsang mga sinina nga gikinahanglan nako aron mahimong presentable diha sa Kristohanong mga tigom ug sa pagsangyaw sa kanataran!” Ang mga Saksi mibalik dala ang kamisin ug karsonsilyo, mga medyas, mga sapatos, mga polo, amerkana, mga korbata, ug usa ka bag.

Human magtuon sa Bibliya sulod sa usa ka tuig, si Jože ug Ljudmila mikuwalipikar nga mokuyog sa mga Saksi diha sa balay-balay nga buluhatong pagsangyaw. Tulo ka bulan sa ulahi ilang gisimbolohan ang ilang dedikasyon ngadto sa Diyos pinaagi sa pagpabawtismo sa tubig panahon sa usa ka distritong kombensiyon sa mga Saksi ni Jehova. Bisan pa sa katigulangon ug dili-maayong panglawas, si Jože regular nga nakig-uban sa pagsangyaw sa maayong balita ug sa ulahi, hangtod sa iyang kamatayon sa Mayo 1995, matinumanong nag-alagad ingong ministeryal nga alagad sa kongregasyon. Ang positibong bunga nga napatungha diha sa mga kinabuhi niining mapainubsanong tawo ug sa iyang asawa naghatag ug pamatuod sa makapabag-ong gahom sa Pulong sa Diyos!