Matuod nga Kasegurohan—Usa ka Maikyasong Tumong
USA ka bata si Arnold nga gusto kaayo sa iyang tigre-tigre. Bisan asa siya moadto, daladalaon niya kini—sa dula, sa pagpangaon, sa iyang pagkatulog. Alang kaniya, ang tigre nakahatag ug kalipay, kasegurohan. Usa ka adlaw, dihay usa ka problema. Nawala ang tigre!
Samtang naghilak si Arnold, gipangita sa iyang inahan, amahan, ug tulo ka magulang nga lalaki ang tigre sa ilang dakong balay. Nakit-an sa usa kanila kana sa kataposan diha sa hunos. Dayag, gibutang kini ni Arnold didto ug dayon nakalimtan kon hain na kini. Gibalik ang tigre, ug gipahiran ni Arnold ang iyang mga luha. Gibati niya pag-usab ang kalipay ug kasegurohan.
Pagkamaayo unta kon ang tanang problema masulbad nga ingon niana ka sayon—ingon ka sayon sa pagpangita sa tigre-tigre diha sa hunos! Alang sa kadaghanang tawo, hinunoa, ang mga problema bahin sa kasegurohan mas malisod ug komplikado kay niana. Halos sa tanang dapit, ang mga tawo nahibulong, ‘Ako ba mahimong biktima sa krimen o kapintasan? Nameligro ba ako nga mawad-an sa akong trabaho? Ang ako bang pamilya seguradong makabaton ug igong pagkaon? Likayan ba ako sa uban tungod sa akong relihiyon o sa akong etnikong kagikan?’
Daghan kaayong tawo ang walay kasegurohan. Sumala sa Hiniusang Kanasoran, halos tulo ka bilyon ang dili lang kay dili-makaarang sa pagpatambal sa kasagarang mga sakit kondili sa pagpalit usab sa hinungdanong mga tambal. Kapin sa usa ka bilyong tawo ang nag-antos sa tumang kakabos. Halos usa ka bilyon, bisag makahimo sa pagtrabaho, ang walay permanenteng trabaho. Mitaas ang gidaghanon sa mga kagiw. Sa naghinapos ang 1994, duolan sa 1 sa matag 115 ka tawo sa yuta ang napugos sa pagkalagiw gikan sa ilang mga balay. Minilyong kinabuhi ang nangadaot ingong resulta sa $500-bilyon-matag-tuig nga negosyo sa mga narkotiko nga maoy hinungdan sa di-maihap nga mga buhat sa krimen ug kapintasan. Ang gubat nagpatay sa mga kinabuhi sa minilyon. Sa 1993 lamang, 42 ka nasod ang nakigbahin sa dagkong mga panag-away, samtang 37 ka nasod pa ang nakasinatig kapintasan sa politika.
Ang gubat, kakabos, krimen, ug ubang mga hulga sa tawhanong kasegurohan nalanggikit, ug kini nagkadaghan. Walay sayon nga mga sulbad niining mga problemaha. Ngani, ang mga tawo dili gayod makasulbad niana.
“Ayaw pag-ibutang ang inyong pagsalig sa mga dungganon, ni sa anak nga lalaki sa yutan-ong tawo, nga kaniya walay kaluwasan,” nagpasidaan ang Pulong sa Diyos, ang Bibliya. Nan, kang kinsa kita makasalig? Kini nga kasulatan nagpadayon: “Malipayon siya nga anaa kaniya ang Diyos ni Jacob alang sa iyang panabang, kansang paglaom anaa kang Jehova nga iyang Diyos, ang Magbubuhat sa langit ug sa yuta, sa dagat, ug sa tanang anaa niana.”—Salmo 146:3-6.
Nganong makasalig kita kang Jehova nga makapatunghag kasegurohan niining yutaa? Posible ba ang pagtagamtam ug may kasegurohan, malipayong mga kinabuhi karon? Sa unsang paagi wagtangon sa Diyos ang mga babag sa tawhanong kasegurohan?