Unsaon Nato Pag-ampo sa Diyos?
SA DIHANG nangayo ang usa ka disipulo ug instruksiyon labot sa pag-ampo, wala mobalibad si Jesus sa paghatag niini kaniya. Sumala sa Lucas 11:2-4, siya mitubag: “Sa dihang kamo mag-ampo, umingon: Amahan, balaana ang imong ngalan. Paanhia ang imong gingharian. Hatagi kami karong adlawa sa among adlaw-adlaw nga tinapay. Ug pasayloa kami sa among mga sala, kay kami usab nagapasaylo sa matag usa nga nakautang kanamo. Ug ayaw kami dad-a sa pagsulay.” (Katolikong Douay Version) Kini komon nga gitawag nga Pag-ampo sa Ginoo. Daghan kaayong impormasyon ang gipahayag niini.
Una, ang una gayod nga pulong nagpadayag kanato kon ngadto kang kinsa itumong ang atong mga pag-ampo—ngadto sa atong Amahan. Matikdi nga wala maghatag si Jesus ug bisan unsang luna sa pag-ampo ngadto sa ubang tawo, imahen, “santo,” o bisan ngadto kaniya. Gawas pa, ang Diyos nag-ingon: “Dili nako ihatag ang akong himaya ngadto sa lain, ni ang akong pagdayeg ngadto sa mga linilok nga mga butang.” (Isaias 42:8, Dy) Busa ang mga pag-ampo nga itumong ngadto sa bisan unsang butang o kang bisan kinsa gawas sa atong langitnong Amahan dili niya patalinghogan, bisag unsa pa ka sinsero sa magsisimba. Diha sa Bibliya, si Jehova nga Diyos lamang ang gitawag nga “Tigpatalinghog sa pag-ampo.”—Salmo 65:2.
Ang uban tingali moingon nga ang “mga santos” nagsilbi lamang ingong mga tigpataliwala sa Diyos. Apan si Jesus mismo nagsugo: “Ako ang dalan ug ang kamatuoran ug ang kinabuhi. Walay usa nga makaadto sa Amahan gawas kon pinaagi kanako. Usab, bisan unsa man nga inyong pangayoon sa akong ngalan, ako kining pagabuhaton, aron nga ang Amahan mahimaya may kalabotan sa Anak.” (Juan 14:6, 13) Sa ingon gisalikway ni Jesus ang ideya nga ang si bisan kinsa nga gitawag ug santo makaalagad sa papel ingong tigpataliwala. Matikdi usab kon unsay giingon ni apostol Pablo bahin kang Kristo: “Siya wala lamang namatay alang kanato—siya mibangon gikan sa mga patay, ug didto sa tuong kamot sa Diyos siya nagbarog ug nangamuyo alang kanato.” “Siya buhi sa walay kataposan nga mangilabot alang sa tanan nga moduol sa Diyos pinaagi kaniya.”—Roma 8:34; Hebreohanon 7:25, Katolikong Jerusalem Bible.
Ang Ngalan nga Kinahanglang Balaanon
Ang sunod nga mga pulong sa pag-ampo ni Jesus mao: “Balaana ang imong ngalan.” Sa unsang paagi mabalaan, sa ato pa, madayeg, o malain, sa usa ang ngalan sa Diyos gawas kon ang usa nahibalo niana ug nagagamit niana? Kapin sa 6,000 ka higayon diha sa “Daang Tugon,” ang Diyos gipaila pinaagi sa personal nga ngalang Jehova.
Ang potnot diha sa Exodo 6:3 sa Katolikong Douay Version nag-ingon bahin sa ngalan sa Diyos: “Gimugna sa pipila ka moderno ang ngalang Jehova . . . , alang sa tinuod nga paglitok sa ngalan [sa Diyos], diin sa Hebreohanong teksto, tungod sa kadugay nga wala gamita wala na karon mahibaloi.” Busa ang Katolikong New Jerusalem Bible nagagamit sa ngalang Yahweh. Bisan pag ang ubang mga eskolar pabor niana nga paglitok, ang “Jehovah” mao ang makataronganon ug dugay nang natukod nga paagi sa paglitok sa ngalan sa Diyos sa Ingles. Ang ubang mga pinulongan adunay ilang kaugalingong mga paagi sa paglitok sa ngalan sa Diyos. Ang hinungdanon mao nga atong gamiton ang ngalan aron sa pagbalaan niana. Ang imo bang iglesya nagtudlo kanimo sa paggamit sa ngalang Jehova diha sa pag-ampo?
Tukmang Hilisgotan Diha sa Pag-ampo
Sunod gitudloan ni Jesus ang iyang mga disipulo sa pag-ampo: “Paanhia ang imong gingharian.” Ang Ebanghelyo ni Mateo midugang sa mga pulong: “Matuman ang imong kabubut-on sa yuta maingon man usab sa langit.” (Mateo 6:10, Dy) Ang Gingharian sa Diyos maoy usa ka kagamhanan diha sa mga kamot ni Jesu-Kristo. (Isaias 9:6, 7) Sumala sa tagna sa Bibliya, kini sa dili madugay mopapha sa tanang tawhanong mga gingharian ug magpasulod ug usa ka panahon sa globonhong kalinaw. (Salmo 72:1-7; Daniel 2:44; Pinadayag 21:3-5) Busa ang matuod nga mga Kristohanon naghimo sa umaabot nga Gingharian nga mao kanunay ang tema sa ilang mga pag-ampo. Ang imo bang iglesya nagtudlo kanimo sa pagbuhat niini?
Makaiikag, gipakita usab ni Jesus nga ang atong mga pag-ampo mahimong maglakip ug personal nga mga butang may kalabotan kanato. Siya miingon: “Hatagi kami karong adlawa sa among adlaw-adlaw nga tinapay. Ug pasayloa kami sa among mga sala, kay kami usab nagapasaylo sa matag usa nga nakautang kanamo. Ug ayaw kami dad-a sa pagsulay.” (Lucas 11:3, 4, Dy) Ang mga pulong ni Jesus nagpasabot nga kita makapangita sa kabubut-on sa Diyos sa adlaw-adlawng mga butang, nga kita makaduol kang Jehova labot sa bisan unsang butang nga tingali nakapabalaka kanato o nakatugaw sa kalinaw sa atong hunahuna. Ang kanunay nga pagpangamuyo sa Diyos niining paagiha magtabang kanato sa pagpabili sa atong pagdepende kaniya. Sa ingon labaw pa natong makita ang iyang impluwensiya diha sa atong mga kinabuhi. Ang adlaw-adlaw nga paghangyo nga pasayloon kita sa Diyos sa atong mga sala mapuslanon usab. Sa ingon labaw pa natong makita ang atong mga kahuyangan—ug mas mapalabyon sa mga kahuyangan sa uban. Ang tambag ni Jesus nga kita moampo nga luwason gikan sa mga pagsulay tukma usab, ilabina tungod sa pag-us-os sa moral niining kalibotana. Nahiuyon niana nga pag-ampo, kita magbantay sa paglikay sa mga sirkumstansiya ug mga kahimtang nga moagak kanato sa paghimog daotan.
Nan, tino nga ang Pag-ampo sa Ginoo nagpadayag kanato ug daghan kaayo labot sa pagtanyag ug mga pag-ampo nga makapahimuot sa Diyos. Apan mao bay tuyo ni Jesus nga atong himoon kini nga pag-ampo ug sumaysumayon lang kini sa regular?
Dugang Tambag Bahin sa Pag-ampo
Si Jesus mihatag ug dugang instruksiyon bahin sa pag-ampo. Diha sa Mateo 6:5, 6, atong mabasa: “Sa dihang mag-ampo kamo, ayaw gayod kamo pagpakaingon sa mga salingkapaw; tungod kay gusto nilang mag-ampo nga nagabarog sa mga sinagoga ug sa mga eskina sa lapad nga kadalanan aron makita sa mga tawo. . . . Apan, ikaw, sa dihang mag-ampo ka, sulod sa imong kaugalingong lawak ug, human masirhi ang imong pultahan, pag-ampo sa imong Amahan nga anaa sa tago; unya ang imong Amahan nga nagatan-aw sa tago magabayad kanimo.” Kining mga pulonga nagtudlo kanato nga ang pag-ampo kinahanglang dili itanyag sa mapangandakon, mapagawalong paagi aron magpadayeg ug tawo. Ginabubo ba nimo ang imong kasingkasing kang Jehova sa pribado, ingon sa giawhag sa Bibliya?—Salmo 62:8.
Si Jesus mihatag niini nga pasidaan: “Sa inyong mga pag-ampo ayaw pagyamyam ingon sa mga pagano, kay sila nagtuo nga pinaagi sa ilang paggamit ug daghang pulong sila mismo madungog.” (Mateo 6:7, JB) Matin-aw, si Jesus wala mouyon sa pagsag-ulo sa mga pag-ampo—labi na sa pagbasa niini gikan sa usa ka basahon. Ang iyang mga pulong wala usab magtugot sa paggamit ug rosaryohan.
Usa ka basahon sa misa sa Katoliko midawat niini: “Ang atong labing maayong pag-ampo mao ang atong kaugalingong tiunay nga mga hunahuna sa dihang modangop kita kaniya sa pagpasalamat o sa manginahanglan, sa mga panahon sa kaguol, o sa atong regular nga pagsimba kaniya.” Ang kaugalingong mga pag-ampo ni Jesus tiunay, dili sinag-ulo. Pananglitan, basaha ang pag-ampo ni Jesus nga narekord sa Juan kapitulo 17. Nahiuyon kini sa sulondang pag-ampo, nga nagpasiugda sa tinguha ni Jesus sa pagbalaan sa ngalan ni Jehova. Ang pag-ampo ni Jesus tiunay ug kinasingkasing gayod.
Mga Pag-ampo nga Patalinghogan sa Diyos
Kon ikaw gitudloan sa pagtanyag ug sinag-ulo nga mga pag-ampo, sa pag-ampo sa “mga santos” o sa mga imahen, o sa paggamit ug relihiyosong mga butang, sama sa rosaryohan, ang ideya sa pag-ampo sumala sa gilatid ni Jesus tingali sa sinugdan bakikaw. Bisan pa, ang yawi mao ang pagkaila sa Diyos—sa iyang ngalan, sa iyang mga katuyoan, sa iyang personalidad. Imong mahimo kini pinaagi sa bug-os nga pagtuon sa Bibliya. (Juan 17:3) Ang mga Saksi ni Jehova andam ug buot motabang kanimo niining bahina. Ngani, sila nakatabang ug minilyon sa tibuok kalibotan sa “pagtilaw ug sa pagtan-aw nga si Jehova maayo”! (Salmo 34:8) Samtang dugang mo nga mailhan ang Diyos, dugang nga mapukaw ka sa pagdayeg kaniya diha sa pag-ampo. Ug samtang dugang nga magpaduol ka kang Jehova diha sa kinasingkasing nga pag-ampo, dugang nga mahimong suod ang imong relasyon kaniya.
Busa ang tanang tinuod nga mga magsisimba sa Diyos giawhag sa “pag-ampo nga walay-hunong.” (1 Tesalonica 5:17) Paneguroa nga ang imong mga pag-ampo tinuod gayod nga nahiuyon sa Bibliya, lakip sa mga instruksiyon ni Jesu-Kristo. Niining paagiha makatino ka nga ang imong mga pag-ampo may pag-uyon sa Diyos.
[Hulagway sa panid 7]
Samtang dugang kita nga makakat-on bahin kang Jehova, dugang nga mapukaw kita sa pag-ampo kaniya nga kinasingkasing