Mga Magmamantala sa Gingharian Nagtaho
‘Usa ka Dakong Pultahan nga Motultol Ngadto sa Kalihokan Nabuksan’ sa Cuba
SI APOSTOL Pablo maoy talagsaong magwawali sa maayong balita sa Gingharian sa Diyos. Gigamit niya ang tanang kahigayonan sa pagpakig-ambit sa uban sa mga saad sa Maglalalang nga kinabuhing walay kataposan alang sa masinugtanong katawhan. Samtang nagduaw sa karaang Efeso, naila ni Pablo ang bag-ong kahimtang nga magtugot kaniya sa pagtabang sa mas daghan pang katawhan. Siya miingon: “Magapabilin ako sa Efeso . . . , kay usa ka dakong pultahan nga nagatultol ngadto sa kalihokan nabuksan kanako.”—1 Corinto 16:8, 9.
Ang mga Saksi ni Jehova sa Cuba nahimutang usab sa usa ka bag-ong kahimtang. Bisan tuod dili pa opisyal nga girehistro, ang mga Saksi sa pagkakaron makapakig-ambit na nga dayag sa ilang paglaom sa Bibliya uban sa isigka-tagilungsod. Di pa dugay ang gobyerno sa Cuba nagpahayag ug tiunay nga interes sa pagtugot sa nagkalainlaing relihiyosong mga grupo nga molihok nga dayag. Si Presidente Castro publikong naghisgot sa mga Saksi ni Jehova ingong usa ka relihiyosong grupo nga uban niana ang gobyerno sa Cuba nagpahimulos karon ug mas maayong relasyon.
Kining bag-ong kahimtang nagbukas ug “usa ka dakong pultahan nga nagatultol ngadto sa kalihokan” alang sa mga Saksi. Pananglitan, ang mga Saksi ni Jehova di pa dugay nag-abli ug sangang buhatan sa Cuba, nga motabang kanila sa pagpahiluna sa ilang buluhatong pagsangyaw sa maong nasod. Kapin sa 65,000 ka Saksi ang nagatabang sa katawhan sa pagtuon ug pagsabot sa Bibliya. Ilang gigamit ang literatura sa Bibliya, sama sa mga magasing Bantayanang Torre ug Pagmata! Daghang mahiligon sa pagkamatarong nga mga Cubano ang nakabaton ug kaayohan gumikan sa pagtuon sa Bibliya uban sa mga Saksi ni Jehova.
Ang mga Saksi nagahimo usab ug regular nga mga tigom sa ginagmayng mga grupo sa tibuok isla. Usahay nakapahimulos gani sila sa pribilehiyo sa paghimog mas dagkong mga asembliya sa mga grupo sa mga 150. Sila tinuod nga nagpabili sa pagtugot nga ilang nadawat gikan sa mga awtoridad sa Cuba, nga naghatag kanila ug kahigayonan sa pagtigom kauban sa ilang espirituwal nga mga igsoong lalaki ug babaye, nga nagaawit ug mga pagdayeg sa Diyos, ug nagaampo nga magkauban.
Di pa dugay ang “Diyosnong Kahadlok” Distritong Kombensiyon gihimo sa kapin sa 1,000 ka beses sulod sa tulo lamang ka hinapos-semana. Usa ka taho nag-ingon nga ang “kahusay, disiplina, ug kalinaw” maoy dayag diha sa matag kombensiyon. Ang mga awtoridad nagpahalipay sa mga Saksi niining bahina.
Sa tibuok kalibotan, ang matuod nga mga Kristohanon naningkamot sa pagtuman sa ilang hinatag-Diyos nga sugo sa pagwali sa maayong balita sa Gingharian sa Diyos. Sa samang panahon, sila naningkamot sa paghupot ug malinawong relasyon uban sa mga awtoridad sa kagamhanan. (Tito 3:1) Ang mga Saksi ni Jehova nagsunod sa tambag ni apostol Pablo, kinsa misulat: “Busa ako magaawhag, una sa tanan, nga ang mga pangamuyo, mga pag-ampo, mga pangaliya alang sa uban, mga pagpasalamat, pagahimoon labot sa tanang matang sa mga tawo, labot sa mga hari ug kanilang tanan nga anaa sa hataas nga pangatungdanan; aron kita padayong magkinabuhi sa usa ka walay-gubot ug malinawong kinabuhi uban ang bug-os nga diyosnong pagkamahinalaron ug pagkaugdang.”—1 Timoteo 2:1, 2.