Laom Kang Jehova Alang sa Paghupay

“Hinaot ang Diyos nga nagahatag ug pag-agwanta ug paghupay magatugot kaninyo nga mabatonan taliwala kaninyo ang samang tinamdan sa pangisip nga gibatonan ni Kristo Jesus.”​—ROMA 15:5.

1. Nganong ang matag adlaw nagdalag labawng panginahanglan sa paghupay?

DUYOG sa matag paglabay sa adlaw ang nagkadakong panginahanglan sa paghupay. Sumala sa gipahayag sa usa ka manunulat sa Bibliya kapig 1,900 ka tuig kanhi, “ang tanang kalalangan padayong nagaagulo nga tingob ug tingob nga anaa sa kasakit hangtod karon.” (Roma 8:22) Sa atong panahon ang ‘pag-agulo’ ug “kasakit” midako pa kay sukad masukad. Sukad sa Gubat sa Kalibotan I, nasinati sa katawhan ang sunodsunod nga mga suliran sama sa mga gubat, krimen, ug mga katalagman sa kinaiyahan nga kasagarang gilangkit sa sayop nga pagdumala sa tawo sa yuta.​—Pinadayag 11:18.

2. (a) Kinsay labing mabasol sa mga kagul-anan karon sa katawhan? (b) Unsang kamatuoran ang naghatag kanatog pasikaranan sa paghupay?

² Nganong adunay tumang pag-antos sa atong panahon? Sa pagbatbat sa pagtambog kang Satanas gikan sa mga langit human sa pagkatawo sa Gingharian sa 1914, ang Bibliya nagtubag: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:12) Ang tatawng ebidensiya sa pagkatuman nianang tagnaa nagkahulogan nga kita hapit nang makaabot sa kataposan sa tuman-kadaotang pagmando ni Satanas. Makahupay gayod kaayo nga mahibalong ang kinabuhi sa yuta hapit nang mahibalik sa malinawong kahimtang nga naglungtad sa wala pa buyoha ni Satanas ang atong unang mga ginikanan ngadto sa pagrebelde!

3. Kanus-a ba nga ang mga tawo wala magkinahanglan ug paghupay?

³ Sa sinugdan, gitagana sa Maglalalang sa tawo ang usa ka matahom nga parke ingong puloy-anan sa unang tawhanong magtiayon. Kadto nahimutang sa dapit nga gitawag ug Eden, nga nagkahulogang “Kahimuot” o “Kalipay.” (Genesis 2:8, potnot) Dugang pa, natagamtam ni Adan ug Eva ang hingpit nga panglawas, nga may palaaboton nga dili na gayod mamatay. Palandonga ang daghang natad nga diha niana mapauswag nila ang ilang mga katakos​—paghardin, arte, konstruksiyon, musika. Hunahunaa, usab, ang tanang linalang nga ilang matun-an samtang gituman nila ang buluhatong gisugo kanila sa paggahom sa yuta ug paghimo niining paraiso. (Genesis 1:28) Sa tinuoray, ang mga kinabuhi ni Adan ug Eva mahupngan unta, dili sa pag-agulo ug kasakit, kondili sa kalipay ug kahimuot. Tin-aw, sila dili unta manginahanglan ug paghupay.

4, 5. (a) Nganong si Adan ug Eva wala makapasar sa pagsulay sa pagkamasinugtanon? (b) Sa unsang paagi ang katawhan nahidangat sa panginahanglan ug paghupay?

⁴ Ugaling lang, gikinahanglan gayod nga si Adan ug Eva mag-ugmad sa halalom nga gugma ug pagpabili alang sa ilang malulotong langitnong Amahan. Kanang gugmaha magdasig unta kanila sa pagsugot sa Diyos ubos sa tanang kahimtang. (Itandi ang Juan 14:31.) Ikasubo, ang duruha nato ka orihinal nga mga ginikanan napakyas sa pagsugot sa ilang angayan nga Soberano, si Jehova. Hinunoa, ilang gitugotan nga mailalom sila sa tuman-kadaotang pagmando sa usa ka nahulog nga manulonda, si Satanas nga Yawa. Si Satanas maoy nagtental kang Eva sa pagpakasala ug sa pagkaon sa gidiling bunga. Unya si Adan nakasala sa dihang mikaon usab siya sa bunga sa kahoy nga mahitungod niana ang Diyos tin-awng nagpasidaan: “Sa adlaw nga ikaw mokaon gikan niana ikaw mamatay gayod.”​—Genesis 2:17.

⁵ Sa ingon nga paagi, ang makasasalang magtiayon nagsugod pagkamatay. Sa pagpahamtang sa silot nga kamatayon, ang Diyos miingon usab kang Adan: “Tinunglo ang yuta tungod kanimo. Sa kasakit ikaw magakaon sa bunga niini sa tanang adlaw sa imong kinabuhi. Ug kini magpatubo ug mga sampinit ug mga kadyapa alang kanimo, ug magakaon ka sa talamnon sa kapatagan.” (Genesis 317, 18) Sa ingon nawad-an si Adan ug Eva sa palaaboton sa paghimo sa wala-matikad nga yuta nga usa ka paraiso. Kay gipagawas sa Eden, gigamit nila sa bug-os ang ilang kusog sa pagbudlay aron makabatog pagkaon gikan sa yuta nga tinunglo. Ang ilang mga kaliwat, kay nakapanunod niining makasasala, himalatyong kahimtang, nahidangat sa dakong panginahanglan sa paghupay.​—Roma 5:12.

Usa ka Makapahupay nga Saad Natuman

6. (a) Unsang makapahupay nga saad ang gihimo sa Diyos human sa pagkahulog sa tawo sa sala? (b) Unsang tagna bahin sa paghupay ang gipahayag ni Lamec?

⁶ Sa pagsilot sa tighulhog sa pagrebelde sa tawo, si Jehova nagpamatuod nga ‘Diyos nga nagahatag ug paghupay.’ (Roma 15:5) Gihimo niya kana pinaagi sa pagsaad nga magpadalag usa ka “binhi” nga sa kataposan magluwas sa mga kaliwat ni Adan gikan sa malaglagong mga epekto sa pagrebelde ni Adan. (Genesis 3:15) Sa ngadtongadto, ang Diyos mihatag usab ug mga pasiunang hulagway sa maong pagluwas. Pananglitan, siya nagdasig kang Lamec, usa ka layong kaliwat ni Adan pinaagi sa iyang anak nga si Seth, sa pagtagna bahin sa pagabuhaton sa anak ni Lamec: “Kini siya maghatag kanatog paghupay gikan sa atong buluhaton ug gikan sa kasakit sa atong mga kamot gumikan sa yuta nga gitunglo ni Jehova.” (Genesis 5:29) Nahiuyon sa maong saad, ang batang lalaki ginganlang Noe, nga nagpasabot nga “Pahulay” o “Konsuylo.”

7, 8. (a) Unsang kahimtang ang mitultol sa pagbati ni Jehova ug pagbasol nga nalalang ang tawo, ug unsay Iyang gituyo nga pagabuhaton ingong sanong? (b) Giunsa pagtuman ni Noe ang kahulogan sa iyang ngalan?

⁷ Kasamtangan, si Satanas nakadanig mga sumusunod taliwala sa pipila sa langitnong mga manulonda. Kini sila nagsul-ob ug unod ug mikuha sa matahom nga mga kaliwat nga babaye ni Adan ingong mga asawa. Ang maong di-kinaiyanhong mga pagluon dugang nga nakadaot sa tawhanong katilingban ug nagpatunghag way-diyos nga banay sa Nepilim, “mga tighulog,” kinsa nagpuno sa yuta sa kabangisan. (Genesis 6:1, 2, 4, 11; Judas 6) “Busa nakita ni Jehova nga ang pagkadaotan sa tawo dako sa yuta . . . Ug si Jehova mibatig pagbasol nga iyang gibuhat ang mga tawo sa yuta, ug siya nasakit sa iyang kasingkasing.”​—Genesis 6:5, 6.

⁸ Maoy katuyoan ni Jehova nga laglagon ang tuman-kadaotang kalibotan pinaagi sa tibuok-yutang lunop, apan kinahanglan una nga magpatukod siya kang Noe ug usa ka arka aron mapatunhay ang kinabuhi. Busa, ang tawhanong banay ug ang mga matang sa kahayopan naluwas. Pagkadakong kahupayan ang gibati ni Noe ug sa iyang pamilya human sa Lunop samtang migula sila sa arka ngadto sa nahinloang yuta! Pagkamakapahupay nga hisayran nga ang tunglo sa yuta gihanaw, nga maghimo sa pag-uma nga labi pang sayon! Tinuoray, ang tagna ni Lamec natuman, ug si Noe nagtuman sa kahulogan sa iyang ngalan. (Genesis 8:21) Ingong matinumanong alagad sa Diyos, si Noe nahimong galamiton sa paghatag ug usa ka sukod sa “paghupay” alang sa katawhan. Ugaling lang, ang tuman-kadaotang impluwensiya ni Satanas ug sa iyang demonyong mga manulonda wala matapos pinaagi sa Lunop, ug ang katawhan nagpadayon sa pag-agulo ubos sa kabug-at sa sala, sakit, ug kamatayon.

Usa nga Labaw Kay Kang Noe

9. Sa unsang paagi si Jesu-Kristo nahimong magtatabang ug maghuhupay alang sa mahinulsolong mga tawo?

⁹ Sa kadugayan, pagkatapos sa mga 4,000 ka tuig sa kasaysayan sa tawo, miabot ang gisaad nga Binhi. Kay gitukmod sa dakong gugma alang sa katawhan, gipadala ni Jehova nga Diyos ang iyang bugtong nga Anak sa yuta aron mamatay ingong lukat alang sa makasasalang katawhan. (Juan 3:16) Si Jesu-Kristo maghatag ug dakong kahupayan alang sa mahinulsolong mga makasasala nga magpasundayag ug pagtuo sa iyang haladnong kamatayon. Ang tanan nga magpahinungod sa ilang mga kinabuhi kang Jehova ug mahimong bawtismadong mga tinun-an sa iyang Anak makaagom ug malungtarong kahayahay ug paghupay. (Mateo 11:28-30; 16:24) Bisan pa sa ilang pagkadili-hingpit, sila makakaplag ug dulot nga kangaya sa pag-alagad sa Diyos nga may hinlong tanlag. Pagkamakapahupay nga ilang nasayran nga kon magpadayon sila sa pagpasundayag ug pagtuo kang Jesus, sila gantihan ug kinabuhing walay kataposan! (Juan 3:36; Hebreohanon 5:9) Kon tungod sa kahuyangan makahimo silag bug-at nga sala, nan sila adunay magtatabang, o maghuhupay, nga mao ang binanhaw nga Ginoong Jesu-Kristo. (1 Juan 2:1, 2) Pinaagi sa pagsugid sa maong sala ug pinaagi sa paghimog Kasulatanhong mga lakang aron malikayan nga mahimong mga tigbatasan sa sala, sila makaangkon ug paghupay, kay nahibalo nga ‘ang Diyos kasaligan ug matarong aron magpasaylo sa ilang sala.’​—1 Juan 1:9; 3:6; Proverbio 28:13.

10. Unsay atong makat-onan gikan sa mga milagro nga gihimo ni Jesus samtang dinhi siya sa yuta?

¹⁰ Samtang dinhi sa yuta, si Jesus naghatag usab ug kahayahay pinaagi sa pagpahigawas sa tawong gidemonyohan, pinaagi sa pag-ayo sa tanang matang sa sakit, ug pinaagi sa pagbanhaw sa namatayng mga minahal. Tinuod, kadtong mga milagroha may temporaryo lamang nga kaayohan, sanglit kadtong nabulahan sa ingon human niana natigulang man ug namatay. Bisan pa niana, sa maong paagi si Jesus mipunting sa umaabot nga permanenteng mga panalangin nga igabubo niya sa tanang tawo. Nga karon usa na ka gamhanang langitnong Hari, sa dili madugay himoon niya ang labaw pa sa pagpagula lang sa mga demonyo. Siya magtambog kanila sa bung-aw kauban sa ilang pangulo, si Satanas, sa kahimtang nga walay-mahimo. Unya magsugod na ang mahimayaong Usa ka Libo ka Tuig nga Paghari ni Kristo.​—Lucas 8:30, 31; Pinadayag 20:1, 2, 6.

11. Nganong ginganlan ni Jesus ang iyang kaugalingon nga “Ginoo sa igpapahulay”?

¹¹ Si Jesus miingon nga siya maoy “Ginoo sa igpapahulay,” ug daghan sa iyang mga pagpang-ayo gibuhat sa adlaw nga Igpapahulay. (Mateo 12:8-13; Lucas 13:14-17; Juan 5:15, 16; 9:14) Ngano mang gibuhat niya kadto? Aw, ang Igpapahulay maoy bahin sa Balaod sa Diyos ngadto sa Israel ug sa ingon nag-alagad nga usa ka ‘anino sa maayong mga butang nga moabot.’ (Hebreohanon 10:1) Ang unom ka adlaw sa semana sa panarbaho magpahinumdom kanato sa miaging 6,000 ka tuig nga pagkaulipon sa tawo ngadto sa madaogdaogong pagmando ni Satanas. Ang adlaw nga Igpapahulay pagkatapos sa semana magpahinumdom sa makapahupay nga pahulay nga maagoman sa katawhan sulod sa Usa ka Libo ka Tuig nga Paghari sa Labaw nga Noe, si Jesu-Kristo.​—Itandi ang 2 Pedro 3:8.

12. Kita makapanan-aw sa unsang makapahupay nga mga kasinatian?

¹² Pagkadakong paghupay ang bation sa yutan-ong mga ginsakpan sa pagmando ni Kristo sa dihang, sa kataposan, sila bug-os nang mahigawas sa tuman-kadaotang impluwensiya ni Satanas! Ang dugang paghupay moabot samtang ilang masinati ang pagkaayo sa ilang lawasnon, emosyonal, ug mental nga mga sakit. (Isaias 65:17) Dayon, hunahunaa lamang ang ilang tumang kalipay samtang mosugod sila pag-abiabi sa mga minahal nga nangabanhaw! Niining mga paagiha ang Diyos ‘magapahid sa matag luha sa ilang mga mata.’ (Pinadayag 21:4) Samtang anam-anam nga ipadapat ang mga kaayohan sa halad lukat ni Jesus, ang masinugtanong mga sakop sa Gingharian sa Diyos mouswag ngadto sa kahingpitan, nga mahimong bug-os nga nahigawas sa tanang daotang mga epekto sa sala ni Adan. (Pinadayag 22:1-5) Unya si Satanas pagabuhian “sa diyutayng panahon.” (Pinadayag 20:3, 7) Ang tanang tawo nga matinumanong magtuboy sa angayan nga pagkasoberano ni Jehova pagagantihan ug kinabuhing walay kataposan. Tiaw na ang di-ikabatbat nga kangaya ug paghupay tungod kay bug-os nga ‘nahigawas gikan sa pagkaulipon sa pagkadunot’! Sa ingon ang matinumanong katawhan magpahimulos “sa mahimayaong kagawasan sa mga anak sa Diyos.”​—Roma 8:21.

13. Nganong ang tanang matuod nga mga Kristohanon nanginahanglan sa paghupay nga ginahatag sa Diyos?

¹³ Kasamtangan, kita magpadayong makaagom sa pag-agulo ug kasakit nga samang nasinati sa tanan nga nagkinabuhi taliwala sa tuman-kadaotang sistema ni Satanas. Ang pagsamot sa lawasnong sakit ug emosyonal nga mga sakit nag-apektar sa tanang matang sa katawhan, apil ang matinumanong mga Kristohanon. (Filipos 2:25-27; 1 Tesalonica 5:14) Dugang pa, ingong mga Kristohanon kita sagad mag-antos sa di-makataronganong pagtamay ug paglutos nga gipahamtang ni Satanas kanato tungod sa ‘pagsugot sa Diyos ingong magmamando inay kay sa mga tawo.’ (Buhat 5:29) Busa, kon magpadayon kita sa paglahutay sa pagbuhat sa kabubut-on sa Diyos hangtod sa kataposan sa kalibotan ni Satanas, gikinahanglan nato ang paghupay, tabang, ug kusog nga Iyang ginahatag.

Kon Asa Hikaplagi ang Paghupay

14. (a) Unsay gisaad ni Jesus sa gabii una pa sa iyang pagkamatay? (b) Unsay gikinahanglan aron kita bug-os nga makapahimulos sa paghupay sa balaang espiritu sa Diyos?

¹⁴ Sa gabii una pa sa iyang pagkamatay, gitin-aw ni Jesus ngadto sa iyang matinumanong mga apostoles nga hapit na siyang mobiya kanila ug mobalik sa iyang Amahan. Kadto nakapabalaka ug nakapaguol kanila. (Juan 13:33, 36; 14:27-31) Kay nahibalo sa ilang panginahanglan sa padayong paghupay, si Jesus misaad: “Pagahangyoon ko ang Amahan ug siya mohatag kaninyo ug laing maghuhupay nga mahiuban kaninyo hangtod sa hangtod.” (Juan 14:16, potnot) Si Jesus nagtumong dinhi sa balaang espiritu sa Diyos, nga gibubo sa iyang mga tinun-an 50 ka adlaw human sa iyang pagkabanhaw.a Taliwala sa uban pa, ang espiritu sa Diyos naghupay kanila panahon sa ilang mga pagsulay ug nagpalig-on kanila sa pagpadayon sa pagbuhat sa kabubut-on sa Diyos. (Buhat 4:31) Ugaling lang, ang maong tabang angayng isipon nga dili-awtomatiko. Aron bug-os nga makapahimulos niini, ang matag Kristohanon kinahanglang magpadayon sa pag-ampo alang sa makapahupay nga tabang nga ginahatag sa Diyos pinaagi sa iyang balaang espiritu.​—Lucas 11:13.

15. Unsay pipila sa mga paagi nga si Jehova nagahatag kanato sa paghupay?

¹⁵ Ang laing paagi nga ang Diyos nagtaganag paghupay maoy pinaagi sa iyang Pulong, ang Bibliya. Si Pablo misulat: “Ang tanang butang nga gisulat kanhi gisulat alang sa atong instruksiyon, aron nga pinaagi sa atong pag-agwanta ug pinaagi sa paghupay gikan sa mga Kasulatan kita makabatog paglaom.” (Roma 15:4) Kini nagpakita sa panginahanglan nga kita regular nga magtuon ug mamalandong sa mga butang nga nahisulat sa Bibliya ug sa binase-sa-Bibliya nga mga basahon. Gikinahanglan usab nga kita mahimong regular sa pagtambong sa Kristohanong mga tigom, diin ang makapahupay nga mga hunahuna ginaambitan gikan sa Pulong sa Diyos. Usa sa pangunang mga katuyoan sa maong mga tigom mao ang pagdasig sa usag usa.​—Hebreohanon 10:25.

16. Ang mga tagana sa paghupay sa Diyos angay nga magtukmod kanato sa pagbuhat sa unsa?

¹⁶ Ang sulat ni Pablo ngadto sa mga taga-Roma nagpadayon sa pagpakita sa maayong mga resulta nga atong madawat gikan sa pagpahimulos sa makapahupay nga mga tagana sa Diyos. “Hinaot ang Diyos nga nagahatag ug pag-agwanta ug paghupay,” misulat si Pablo, “magatugot kaninyo nga mabatonan taliwala kaninyo ang samang tinamdan sa pangisip nga gibatonan ni Kristo Jesus, aron nga uban ang panag-uyon kamo sa usa ka baba managhimaya sa Diyos ug Amahan sa atong Ginoong Jesu-Kristo.” (Roma 15:5, 6) Oo, pinaagi sa pagpahimulos sa bug-os sa makapahupay nga mga tagana sa Diyos, kita mas mahisama sa atong maisogong Pangulo, si Jesu-Kristo. Kini magatukmod kanato nga magpadayon paggamit sa atong mga baba aron himayaon ang Diyos diha sa atong buluhaton sa pagsangyaw, sa atong mga tigom, sa pribadong pakig-estorya sa mga isigkamagtutuo, ug sa atong mga pag-ampo.

Sa mga Panahon sa Grabeng Pagsulay

17. Giunsa paghupay ni Jehova ang iyang Anak, ug unsay resulta?

¹⁷ Si Jesus nahimong ‘nasamok sa hilabihan’ ug “dulot nga naguol” sa gabii una pa sa iyang masakit nga kamatayon. (Mateo 26:37, 38) Busa siya mipalayo ug diyutay gikan sa iyang mga tinun-an ug miampo ngadto sa iyang Amahan alang sa tabang. “Gidungog siya nga may pabor tungod sa iyang diyosnong kahadlok.” (Hebreohanon 5:7) Ang Bibliya nagtaho nga “usa ka anghel gikan sa langit mipakita [kang Jesus] ug mipalig-on kaniya.” (Lucas 22:43) Ang maisogon ug lalakin-ong paagi nga pag-atubang ni Jesus sa iyang mga magsusupak maoy ebidensiya nga ang paagi sa Diyos sa paghupay sa iyang Anak maoy labing epektibo.​—Juan 18:3-8, 33-38.

18. (a) Unsang yugto sa kinabuhi ni apostol Pablo ang ilabinang masulayon? (b) Sa unsang paagi kita makapahupay sa kugihan, mahangawaong mga ansiyano?

¹⁸ Si apostol Pablo nakaagi usab ug mga yugto sa grabeng pagsulay. Pananglitan, ang iyang ministeryo sa Efeso maoy tiniman-an sa “mga luha ug mga pagsulay nga nahitabo [kaniya] gumikan sa mga laraw sa mga Judio.” (Buhat 20:17-20) Sa kataposan, mibiya si Pablo sa Efeso human nga ang mga tigpaluyo sa diyosang si Artemis nagpagubot sa siyudad tungod sa iyang buluhaton sa pagwali. (Buhat 19:23-29; 20:1) Samtang nagpaamihanan si Pablo ngadto sa siyudad sa Troas, may lain pa nga nakapabalaka kaayo kaniya. Usa ka panahon sa wala pa ang kagubot sa Efeso, nakadawat siyag makapabalakang taho. Ang bag-ong kongregasyon sa Corinto giatake sa pagkabahinbahin, ug kadto nagtugot sa pakighilawas. Busa gikan sa Efeso, si Pablo nakahimog sulat nga may masakit nga pagbadlong nga naglaom nga matul-id ang kahimtang. Alang kaniya kadto dili sayon nga buhaton. “Gikan sa daghang kasakitan ug tumang kaguol sa kasingkasing ako nagsulat kaninyo inubanan sa daghang luha,” siya nagbutyag sa ulahi diha sa ikaduhang sulat. (2 Corinto 2:4) Sama kang Pablo, ang maluluy-ong mga ansiyano dili sayonan sa paghatag ug makapatul-id nga tambag ug pagbadlong, sa bahin tungod kay sila nahibalo pag-ayo sa ilang kaugalingong mga kahuyangan. (Galacia 6:1) Nan, hinaot nga kita makapahupay niadtong nagapanguna sa atong taliwala pinaagi sa pagsanong dayon sa mahigugmaon, binase-sa-Bibliya nga tambag.​—Hebreohanon 13:17.

19. Nganong si Pablo mipadayon ngadto sa Macedonia gikan sa Troas, ug sa kataposan sa unsang paagi siya nahupayan?

¹⁹ Samtang didto sa Efeso, si Pablo wala lamang magsulat sa mga igsoon sa Corinto kondili gipadala usab niya si Tito aron pagtabang kanila, nga gisugo siya nga itaho ang ilang sanong ngadto sa sulat. Si Pablo naglaom nga maabtan si Tito sa Troas. Didto si Pablo napanalanginan ug maayong mga kahigayonan sa paghimog mga tinun-an. Apan kadto wala makapahupay sa iyang kabalaka tungod kay si Tito wala pa makaabot. (2 Corinto 2:12, 13) Busa iyang gipadayon ang pagpanaw ngadto sa Macedonia, kay naglaom nga mahibalag si Tito didto. Ang kabalaka ni Pablo misamot tungod sa dakong pagsupak ngadto sa iyang ministeryo. “Sa dihang kami miabot sa Macedonia,” misaysay siya, “wala makabatog kahupayan ang among unod, apan padayon kaming gisakit sa tanang paagi​—dihay mga pakig-away sa gawas, mga kahadlok sa sulod. Bisan pa niana ang Diyos, kinsa nagahupay kanilang gipaubos, mihupay kanamo pinaagi sa pagkaania ni Tito.” (2 Corinto 7:5, 6) Pagkadakong paghupay sa dihang sa kataposan nakaabot si Tito aron isulti kang Pablo ang positibong sanong sa mga taga-Corinto sa iyang sulat!

20. (a) Sama sa kahimtang ni Pablo, unsay laing hinungdanong paagi nga si Jehova nagahatag ug paghupay? (b) Unsay pagahisgotan sa sunod artikulo?

²⁰ Ang kasinatian ni Pablo makapahupay sa mga alagad sa Diyos karong adlawa, nga daghan kanila nag-atubang usab ug mga pagsulay nga makapahinabo nga sila “gipaubos,” o “magul-anon.” (Phillips) Oo, ‘ang Diyos nga nagahatag ug paghupay’ nasayod sa atong tinagsa ka mga panginahanglan ug makagamit kanato aron makapahupay sa usag usa, maingon nga si Pablo nahupayan tungod sa taho ni Tito bahin sa mahinulsolong tinamdan sa mga taga-Corinto. (2 Corinto 7:11-13) Sa among sunod artikulo, among hisgotan ang madasigong sanong ni Pablo ngadto sa mga taga-Corinto ug kon sa unsang paagi kini makatabang kanato nga mahimong epektibong mga tigpaambit sa paghupay sa Diyos karong adlawa.

[Footnote]

Makatubag Ka Ba?

◻ Sa unsang paagi ang tawo nahiagom sa panginahanglan sa paghupay?

◻ Sa unsang paagi si Jesus napamatud-ang labaw kay kang Noe?

◻ Nganong si Jesus nagngalan sa iyang kaugalingon nga “Ginoo sa igpapahulay”?

◻ Sa unsang paagi ang Diyos nagahatag ug paghupay karong adlawa?

[Mapa/Hulagway sa panid 10]

(Alang sa aktuwal nga pagkahan-ay, tan-awa ang publikasyon)

Si Pablo nakasinatig dakong paghupay gumikan sa taho ni Tito bahin sa mga taga-Corinto

MACEDONIA

Filipos

GRESYA

Corinto

ASIA

Troas

Efeso