Pagpakig-ambit sa Paghupay nga Ginahatag ni Jehova

“Ang among paglaom alang kaninyo walay-pagkapaling, kay nahibalo man kami nga, maingon nga kamo maoy mga mag-aambit sa mga pag-antos, sa samang paagi kamo usab magpakig-ambit sa paghupay.”​—2 CORINTO 1:7.

1, 2. Unsay nasinati sa daghan nga nangahimong mga Kristohanon karong adlawa?

DAGHANG magbabasa karon sa Ang Bantayanang Torre nagtubo nga walay kahibalo bahin sa kamatuoran sa Diyos. Tingali tinuod kana kanimo. Kon mao, hinumdomi kon unsay imong gibati samtang nagsugod pagkabuka ang imong mga mata sa salabotan. Pananglitan, sa dihang una kang nakasabot nga ang mga patay wala mag-antos kondili walay-panimuot, dili ba nahupayan ka man? Ug sa dihang nasayran nimo ang paglaom sa mga patay, nga ang binilyon banhawon ngadto sa kinabuhi sa bag-ong kalibotan sa Diyos, dili ba nahupayan ka man?​—Ecclesiastes 9:5, 10; Juan 5:28, 29.

² Komosta man ang saad sa Diyos nga taposon ang tumang-pagkadaotan ug nga kining yutaa himoong paraiso? Sa dihang nasayran nimo kini, dili ba kini naghupay kanimo ug naghupong kanimo sa maikagong pagdahom? Unsay imong gibati sa dihang una nimong nasayran ang posibilidad nga dili na gayod mamatay kondili makalabang-buhi ngadto nianang umaabot nga yutan-ong Paraiso? Sa walay duhaduha nalipay ka. Oo, ikaw nakadawat sa makapahupayng mensahe sa Diyos nga ginawali karon sa tibuok kalibotan sa mga Saksi ni Jehova.​—Salmo 37:9-11, 29; Juan 11:26; Pinadayag 21:3-5.

3. Nganong kadtong nagapakig-ambit sa makapahupayng mensahe sa Diyos sa uban nag-antos usab ug kasakitan?

³ Ugaling lang, sa dihang gisulayan nimong ipakig-ambit sa uban ang mensahe sa Bibliya, nakaamgo ka usab nga “ang pagtuo dili man panag-iya sa tanang katawhan.” (2 Tesalonica 3:2) Tingali pipila sa imong kanhing mga higala nagtamay kanimo tungod sa pagpahayag ug pagtuo sa mga saad sa Bibliya. Basin nakasinati ka pag paglutos tungod sa pagpadayon pagtuon sa Bibliya kauban sa mga Saksi ni Jehova. Tingali ang pagsupak misamot samtang misugod ka sa paghimog mga kausaban aron ang imong kinabuhi mapahiuyon sa mga prinsipyo sa Bibliya. Nagsugod ka sa pagkaagom sa kasakitan nga gipahamtang ni Satanas ug sa iyang kalibotan diha sa tanang modawat sa paghupay sa Diyos.

4. Sa unsang lainlaing mga paagi nga mahimong mosanong ang bag-ong mga interesado sa kasakitan?

⁴ Ikasubo, sumala sa gitagna ni Jesus, tungod sa kasakitan ang pipila mapandol ug mohunong sa ilang pagpakig-uban sa Kristohanong kongregasyon. (Mateo 13:5, 6, 20, 21) Naagwanta sa uban ang kasakitan pinaagi sa pagpadayon pagpunting sa ilang mga hunahuna ngadto sa makapahupayng mga saad nga ilang nakat-onan. Sa kadugayan sila nagpahinungod sa ilang mga kinabuhi kang Jehova ug nabawtismohan ingong mga tinun-an sa iyang Anak, si Jesu-Kristo. (Mateo 28:19, 20; Marcos 8:34) Siyempre, ang kasakitan dili mohunong inigkabawtismado na sa usa ka Kristohanon. Pananglitan, ang paghupot sa kaputli mahimong lisod nga pakigbisog alang sa usa ka tawong may imoral nga kagahapon. Ang uban kinahanglang makigbisog sa kanunayng pagsupak gikan sa di-matinuohong mga membro sa pamilya. Bisan unsa man ang kasakitan, ang tanan nga matinumanong nagsubay sa kinabuhing napahinungod sa Diyos makapaneguro sa usa ka butang. Sa personal kaayong paagi, masinati nila ang paghupay ug tabang sa Diyos.

“Ang Diyos sa Tanang Paghupay”

5. Duyog sa daghang pagsulay nga giantos ni Pablo, unsay nasinati usab niya?

⁵ Ang usang dulot nagpabili sa paghupay nga ginahatag sa Diyos mao si apostol Pablo. Human sa linain masulayong panahon sa Asia ug Macedonia, iyang nasinati ang dakong paghupay sa pagkadungog nga ang kongregasyon sa Corinto maayog pagsanong sa iyang mabadlongong sulat. Kadto nakatandog kaniya sa pagsulat kanila sa ikaduhang sulat, nga naundan sa mosunod nga pagpahayag sa pagdayeg: “Bulahan ang Diyos ug Amahan sa atong Ginoong Jesu-Kristo, ang Amahan sa malumong mga kaluoy ug ang Diyos sa tanang paghupay, kinsa nagahupay kanamo sa tanan namong kasakitan.”​—2 Corinto 1:3, 4.

6. Unsay atong makat-onan gikan sa mga pulong ni Pablo nga makaplagan sa 2 Corinto 1:3, 4?

⁶ Kining dinasig nga mga pulong naghatag ug daghang impormasyon. Atong susihon kini sila. Sa dihang si Pablo nagpahayag ug pagdayeg o mga pasalamat ngadto sa Diyos o may gihangyo kaniya diha sa iyang mga sulat, kasagarang atong masayran nga siya naglakip usab ug halalom nga pagpabili kang Jesus, ang Ulo sa Kristohanong kongregasyon. (Roma 1:8; 7:25; Efeso 1:3; Hebreohanon 13:20, 21) Busa, gitumong ni Pablo kining maong pagpahayag sa pagdayeg ngadto sa “Diyos ug Amahan sa atong Ginoong Jesu-Kristo.” Unya, sa unang higayon diha sa iyang mga sinulat, gigamit niya ang Gregong nombre nga gihubad nga “malumong mga kaluoy.” Kining maong nombre naggikan sa usa ka pulong nga gigamit sa pagpahayag ug kasubo tungod sa pag-antos sa lain. Sa ingon gibatbat ni Pablo ang malumong mga pagbati sa Diyos alang kang bisan kinsang Iyang matinumanong mga alagad nga nagaantos sa kasakitan​—malumong mga pagbati nga makatandog sa Diyos nga molihok nga maluluy-on alang kanila. Sa kataposan, si Pablo milaom kang Jehova ingong tinubdan niining tilinguhaong hiyas pinaagi sa pagtawag kaniyang “ang Amahan sa malumong mga kaluoy.”

7. Nganong ikaingon nga si Jehova mao “ang Diyos sa tanang paghupay”?

⁷ Ang “malumong mga kaluoy” sa Diyos mosangpot sa paghupay alang sa usang nagaantos sa kasakitan. Busa si Pablo nagpadayon sa pagbatbat kang Jehova ingong “ang Diyos sa tanang paghupay.” Mao nga bisan unsang paghupay ang ato tingaling maagoman gumikan sa kalulot sa mga isigkamagtutuo, kita makasalig nga si Jehova mao ang tinubdan. Wala ing tinuod, malungtarong paghupay nga dili gikan sa Diyos. Dugang pa, siya mao ang naglalang sa tawo diha sa iyang dagway, busa tungod niana kita mahimong mga maghuhupay. Ug ang balaang espiritu sa Diyos maoy nagtukmod sa iyang mga alagad sa pagpakitag malumong kaluoy ngadto niadtong nagkinahanglan ug paghupay.

Nabansay nga Mahimong mga Maghuhupay

8. Bisan pag ang Diyos dili mao ang tinubdan sa atong mga pagsulay, unsa kaha ang maayong epekto diha kanato ang atong pag-agwanta sa kasakitan?

⁸ Bisan pag si Jehova nga Diyos nagtugot sa lainlaing mga pagsulay nga modangat sa iyang matinumanong mga alagad, siya dili gayod ang tinubdan sa maong mga pagsulay. (Santiago 1:13) Bisan pa niana, ang paghupay nga iyang ginahatag sa dihang atong agwantahon ang kasakitan makabansay kanato nga mahimong mas sensitibo sa mga panginahanglan sa uban. Unsay resulta? “Aron kami makahupay nilang anaa sa bisan unsang matang sa kasakitan pinaagi sa paghupay nga pinaagi niini kami sa among kaugalingon ginahupay sa Diyos.” (2 Corinto 1:4) Sa maong paagi si Jehova nagbansay kanato aron mahimong epektibong mga tigpaambit sa iyang paghupay ngadto sa mga isigkamagtutuo ug niadtong kinsa atong mahibalag sa atong ministeryo samtang kita nagsunod kang Kristo ug ‘naghupay sa tanan nga nagbangotan.’​—Isaias 61:2; Mateo 5:4.

9. (a) Unsay motabang kanato sa pag-agwanta sa kasakitan? (b) Sa unsang paagi ang uban mahupayan sa dihang kita matinumanong nagaantos sa kasakitan?

⁹ Giagwanta ni Pablo ang iyang daghang pag-antos tungod sa dakong paghupay nga iyang nadawat gikan sa Diyos pinaagi ni Kristo. (2 Corinto 1:5) Kita usab makasinati ug dakong paghupay pinaagi sa pagpalandong sa bililhong mga saad sa Diyos, pinaagi sa pag-ampo alang sa pagpaluyo sa iyang balaang espiritu, ug pinaagi sa pagkasinati sa mga tubag sa Diyos sa atong mga pag-ampo. Sa ingon mapalig-on kita sa pagpadayon sa pagtuboy sa pagkasoberano ni Jehova ug pagpamatuod nga ang Yawa bakakon. (Job 2:4; Proverbio 27:11) Sa dihang sa kamatinumanon atong giagwanta ang bisan unsang matang sa kasakitan, angay nga kita, sama kang Pablo, maghatag sa tanang dungog ngadto kang Jehova, kansang paghupay makapaarang sa mga Kristohanon sa pagpabiling matinumanon ubos sa pagsulay. Ang pag-agwanta sa matinumanong mga Kristohanon dunay makapahupayng epekto diha sa kaigsoonan, nga maghimo sa uban nga madeterminado nga “makaagwanta sa samang mga pag-antos.”​—2 Corinto 1:6.

10, 11. (a) Unsa ang pipila ka butang nga nagpahinabo sa pag-antos sa kongregasyon sa karaang Corinto? (b) Giunsa paghupay ni Pablo ang kongregasyon sa Corinto, ug unsang paglaom ang iyang gipahayag?

¹⁰ Ang mga taga-Corinto nakabaton sa ilang bahin sa mga pag-antos nga modangat sa tanang matuod nga mga Kristohanon. Dugang pa, gikinahanglan nila ang tambag aron sa pagpalagpot sa usa ka dili-mahinulsolong makihilawason. (1 Corinto 5:1, 2, 11, 13) Ang pagkapakyas sa paghimo sa maong aksiyon ug pagtapos sa panag-away ug mga pagkabahinbahin nakahatag ug kaulawan sa kongregasyon. Apan sa kataposan gipadapat nila ang tambag ni Pablo ug gipadayag ang tinuod nga paghinulsol. Busa, siya madasigong nagdayeg kanila ug nagpahayag nga ang ilang maayong pagsanong sa iyang sulat nakapahupay kaniya. (2 Corinto 7:8, 10, 11, 13) Dayag, ang usang gipalagpot naghinulsol usab. Busa si Pablo mitambag kanila nga “magpasaylo ug maghupay kaniya, aron nga sa unsa mang paagi ang maong tawo dili lamyon sa iyang hilabihang kamasulub-on.”​—2 Corinto 2:7.

¹¹ Ang ikaduhang sulat ni Pablo seguradong nakapahupay sa kongregasyon sa Corinto. Ug kadto usa sa iyang mga tuyo. Misaysay siya: “Ang among paglaom alang kaninyo walay-pagkapaling, kay nahibalo man kami nga, maingon nga kamo maoy mga mag-aambit sa mga pag-antos, sa samang paagi kamo usab magpakig-ambit sa paghupay.” (2 Corinto 1:7) Sa katiklopan sa iyang sulat, si Pablo miawhag: “Padayon . . . sa pagkanahupay, . . . ug ang Diyos sa gugma ug kalinaw maanaa uban kaninyo.”​—2 Corinto 13:11.

12. Unsa ang gikinahanglan sa tanang Kristohanon?

¹² Pagkahinungdanon nga pagtulon-an ang atong makat-onan gikan niini! Ang tanang membro sa Kristohanong kongregasyon kinahanglang “magpakig-ambit sa paghupay” nga ginahatag sa Diyos pinaagi sa iyang Pulong, sa iyang balaang espiritu, ug sa iyang yutan-ong kongregasyon. Bisan ang mga gipalagpot mahimong nagkinahanglag paghupay kon sila naghinulsol ug nagtul-id sa ilang daotang binuhatan. Busa, ‘ang matinumanon ug mabuot nga ulipon’ nagpasiugda ug usa ka maluluy-ong tagana sa pagtabang kanila. Kas-a sa usa ka tuig duha ka ansiyano mahimong moduaw sa pipila ka gipalagpot. Mahimong kini sila wala na magpakitag rebelyosong tinamdan o magbuhat sa dakong sala ug mahimong nagkinahanglag tabang aron himoon ang gikinahanglang mga lakang aron mapasig-uli.​—Mateo 24:45; Ezequiel 34:16.

Kasakitan ni Pablo sa Asia

13, 14. (a) Giunsa pagbatbat ni Pablo ang panahon sa grabeng kasakitan nga iyang nasinati sa Asia? (b) Unsang hitabo ang tingali diha sa hunahuna ni Pablo?

¹³ Ang matang sa pag-antos nga naagoman sa kongregasyon sa Corinto hangtod niadtong panahona dili ikatandi sa daghang kasakitan nga giagwanta ni Pablo. Busa, iyang gipahinumdoman sila: “Dili namo buot nga kamo mawalay-alamag, mga igsoon, mahitungod sa kasakitan nga nahitabo kanamo sa distrito sa Asia, nga kami nailalom sa hilabihang pagpiot saylo sa among kusog, nga sa ingon kami gayod wala-makatino bisan sa among mga kinabuhi. Sa pagkatinuod, among gibati sulod sa among kaugalingon nga amo nang nadawat ang sentensiya sa kamatayon. Kini aron kami magasalig, dili sa among kaugalingon, kundili sa Diyos kinsa nagabangon sa mga patay. Gikan sa ingon ka dakong butang ingon sa kamatayon siya miluwas kanamo ug magaluwas kanamo; ug ang among paglaom anaa kaniya nga siya usab dugang pa nga magaluwas kanamo.”​—2 Corinto 1:8-10.

¹⁴ Gituohan sa pipila ka eskolar sa Bibliya nga si Pablo naghisgot sa kagubot sa Efeso, nga mahimong si Pablo maingon man sa iyang duha ka kauban sa panaw nga taga-Macedonia, si Gayo ug si Aristarco, mapildihan unta sa ilang mga kinabuhi. Kining duha ka Kristohanon gidala nga pinugos ngadto sa usa ka teatro nga napuno sa panon sa mga manggugubot nga “misinggit sulod sa mga duha ka takna: ‘Bantogan si Artemis [ang diyosa] sa mga taga-Efeso!’” Sa ngadtongadto, usa ka opisyal sa siyudad milampos sa pagpahilom sa panon. Kadtong hulga sa mga kinabuhi ni Gayo ug Aristarco nakapaguol gayod pag-ayo kang Pablo. Sa pagkatinuod, buot niyang mosulod ug makigpangatarongan sa panatikong panon sa mga manggugubot, apan napugngan siya sa pagpameligro sa iyang kinabuhi sa ingon nga paagi.​—Buhat 19:26-41.

15. Unsang hingaping kahimtang ang mahimong gibatbat sa 1 Corinto 15:32?

¹⁵ Bisan pa niana, si Pablo mahimong nagbatbat sa usa ka kahimtang nga labi pang grabe kay sa nahisgotang hitabo. Sa iyang unang sulat ngadto sa mga taga-Corinto, si Pablo nangutana: “Kon, sama sa mga tawo, ako nakapakigbugnog mapintas nga mga mananap sa Efeso, unsay kaayohan niini kanako?” (1 Corinto 15:32) Kini mahimong nagpasabot nga ang kinabuhi ni Pablo nameligro dili lamang tungod sa mananapong mga tawo kondili sa literal nga mapintas nga mga mananap sa estadyum sa Efeso. Ang mga kriminal may panahong gisilotan pinaagi sa pinugos nga pagpakig-away sa mapintas nga mga mananap samtang nagtan-aw ang giuhaw-sa-dugong mga panon sa katawhan. Kon si Pablo nagpasabot nga iyang giatubang ang literal nga mapintas nga mga mananap, sa kataposang gutlo milagroso gayod siyang naluwas gikan sa mapintas nga kamatayon, sama ra nga si Daniel naluwas gikan sa baba sa literal nga mga leyon.​—Daniel 6:22.

Modernong-Adlaw nga mga Panig-ingnan

16. (a) Nganong daghan sa mga Saksi ni Jehova ang mahimong mobati sa mga kasakitang giantos ni Pablo? (b) Unsay atong maseguro bahin niadtong namatay tungod sa ilang pagtuo? (c) Unsay maayong epekto nga midangat sa dihang ang mga Kristohanon makasinati ug igo lang nga mga pag-ikyas sa kamatayon?

¹⁶ Daghang Kristohanon karon ang mahimong mobati sa mga kasakitan nga giantos ni Pablo. (2 Corinto 11:23-27) Karong adlawa, usab, ang mga Kristohanon “nailalom sa hilabihang pagpiot saylo sa [ilang] kusog,” ug daghan ang nag-atubang sa mga kahimtang diin sila ‘gayod wala-makatino bisan sa ilang mga kinabuhi.’ (2 Corinto 1:8) Ang pipila namatay diha sa mga kamot sa mga mamumunog dinaghan ug sa mabangis nga mga maglulutos. Kita makatino nga ang makahupayng gahom sa Diyos nakapaarang nila sa pag-agwanta ug sila nangamatay nga ang ilang mga kasingkasing ug mga hunahuna lig-ong natisok diha sa katumanan sa ilang paglaom, mahimong langitnon kahang paglaom o yutan-on. (1 Corinto 10:13; Filipos 4:13; Pinadayag 2:10) Sa ubang mga hitabo, si Jehova nagmaniobra sa kahimtang, ug ang atong mga igsoon naluwas gikan sa kamatayon. Walay duhaduhang kadtong nakaagom sa maong kaluwasan nakaugmad ug labawng pagsalig “sa Diyos kinsa nagabangon sa mga patay.” (2 Corinto 1:9) Human niadto, sila nakasulting may labawng pagtuo samtang ilang gipakig-ambit ang makapahupay nga mensahe sa Diyos sa uban.​—Mateo 24:14.

17-19. Unsang mga kasinatian ang nagpakita nga ang atong mga igsoon sa Rwanda nakaambit sa paghupay sa Diyos?

¹⁷ Karong bag-o ang atong minahal nga mga igsoon sa Rwanda nakaagom sa kasinatiang susama sa kang Pablo ug sa iyang mga kauban. Daghan ang nawad-an sa ilang mga kinabuhi, apan ang mga paningkamot ni Satanas napakyas sa paggun-ob sa ilang pagtuo. Sa kapulihay, ang atong mga igsoon sa maong nasod nakaagom sa paghupay sa Diyos sa daghang personal nga mga paagi. Panahon sa pagpinatyanay sa mga Tutsi ug Hutu nga nagpuyo sa Rwanda, may mga Hutu nga nagpameligro sa ilang mga kinabuhi aron panalipdan ang mga Tutsi ug mga Tutsi nga nanalipod sa mga Hutu. Ang uban gipatay sa mga radikal tungod sa pagpanalipod sa ilang mga isigkamagtutuo. Pananglitan, usa ka Saksing Hutu nga ginganlag Gahizi gipatay human tagoi ang usa ka igsoong babayeng Tutsi nga ginganlag Chantal. Ang bana ni Chantal nga Tutsi, si Jean, gitagoan sa laing dapit sa usa ka igsoong babayeng Hutu nga ginganlag Charlotte. Sulod sa 40 ka adlaw si Jean ug ang laing Tutsi nga igsoong lalaki nagpabiling nagtago sa usa ka dakong panghaw, nga migawas lamang sa kadiyot nga mga panahon sa magabii. Nianang tanang panahon, si Charlotte naghatag kanilag pagkaon ug panalipod, bisan pag nagpuyo duol sa usa ka kampo sa kasundalohang Hutu. Niining panira, imong makita ang usa ka hulagway sa nahiusa na usab nga si Jean ug si Chantal, kinsa mapasalamaton nga ang ilang mga isigkamagtutuong Hutu ‘nagpameligro sa ilang mga liog’ alang kanila, sama sa gibuhat ni Prisca ug Aquila alang kang apostol Pablo.​—Roma 16:3, 4.

¹⁸ Ang laing Saksing Hutu, si Rwakabubu, gidayeg sa mantalaang Intaremara tungod sa pagpanalipod sa mga isigkamagtutuong Tutsi.a Kini nag-ingon: “Anaa usab si Rwakabubu, usa sa mga Saksi ni Jehova, kinsa nagpadayon pagtago sa mga tawo dinhi ug didto taliwala sa iyang mga igsoon (kana ang pagtawganay sa usag usa sa mga isigkamagtutuo). Tiggugol siya sa tibuok adlaw sa pagdalag pagkaon ug tubig nga mainom alang kanila bisan pag siya hubakon. Apan sa talagsaon gipalig-on siya sa Diyos.”

¹⁹ Tagda, usab, ang interesadong magtiayong Hutu nga ginganlag Nicodeme ug Athanasie. Una mosilaob ang tribonhong pagpinatyanay, kining magtiayona nagtuon sa Bibliya uban sa usa ka Saksing Tutsi nga ginganlag Alphonse. Sa kapeligrohan sa ilang mga kinabuhi, gitagoan nila si Alphonse diha sa ilang balay. Sa ulahi nakaamgo sila nga ang balay dili luwas nga dapit tungod kay ang ilang mga silingang Hutu nasayod bahin sa ilang higalang Tutsi. Busa, si Nicodeme ug Athanasie nagtago kang Alphonse sa usa ka lungag diha sa ilang tugkaran. Kadto maayong lihok tungod kay ang mga silingan nagsugod pagpangabot nga nangita kang Alphonse halos kada adlaw. Samtang naghigda sa maong lungag sulod sa 28 ka adlaw, si Alphonse nagpalandong sa mga asoy sa Bibliya sama sa usa nga kabahin kang Rahab, kinsa nagtago sa duha ka Israelinhon sa atop sa iyang balay sa Jerico. (Josue 6:17) Karong adlawa si Alphonse nagpadayon sa iyang pag-alagad sa Rwanda ingong magwawali sa maayong balita, mapasalamaton nga ang iyang Hutu nga mga estudyante sa Bibliya nagpameligro sa ilang mga kinabuhi tungod kaniya. Ug komosta si Nicodeme ug Athanasie? Sila karon bawtismadong mga Saksi ni Jehova ug nagdumalag kapin sa 20 ka pagtuon sa Bibliya uban sa mga tawong interesado.

20. Sa unsang paagi si Jehova naghupay sa atong mga igsoon sa Rwanda, apan unsay padayong gikinahanglan sa daghan kanila?

²⁰ Sa panahong misugod ang tribonhong pagpinatyanay sa Rwanda, may 2,500 ka magmamantala sa maayong balita sa nasod. Bisan pag ginatos ang nawad-an sa ilang mga kinabuhi o napugos sa pagpahawa sa nasod, ang gidaghanon sa mga Saksi miuswag ngadto sa kapig 3,000. Pamatuod kana nga ang Diyos naghupay gayod sa atong mga igsoon. Komosta ang daghang ilo ug mga babayeng balo taliwala sa mga Saksi ni Jehova? Natural lamang, kini sila nag-antos gihapon sa kasakitan ug nagkinahanglan sa padayong paghupay. (Santiago 1:27) Ang ilang mga luha bug-os lamang nga mapahiran sa dihang ang pagkabanhaw mahitabo na sa bag-ong kalibotan sa Diyos. Bisan pa niana, tungod sa mga pag-alagad sa ilang mga igsoon ug tungod kay sila mga magsisimba sa “Diyos sa tanang paghupay,” sila nakaarang sa pagsagubang sa kinabuhi.

21. (a) Diin pa nga ang atong mga igsoon nanginahanglan pag-ayo sa paghupay sa Diyos, ug unsay usa ka paagi nga kitang tanan makatabang? (Tan-awa ang kahon nga “Paghupay Panahon sa Upat ka Tuig nga Gubat.”) (b) Kanus-a ba hingpit nga matagbaw ang atong panginahanglan sa paghupay?

²¹ Sa daghang laing mga dapit, sama sa Eritrea, Singapore, ug kanhing Yugoslavia, ang atong mga igsoon nagpadayon sa pag-alagad nga matinumanon kang Jehova bisan pa sa kasakitan. Hinaot nga atong tabangan ang maong mga igsoon pinaagi sa paghimog regular nga mga pangaliya nga makadawat unta silag paghupay. (2 Corinto 1:11) Ug hinaot kita moagwanta nga matinumanon hangtod sa panahon nga ang Diyos pinaagi ni Jesu-Kristo ‘magapahid sa matag luha sa atong mga mata’ sa labing bug-os nga diwa. Unya sa hingpit atong masinati ang paghupay nga ihatag ni Jehova diha sa iyang bag-ong kalibotan sa pagkamatarong.​—Pinadayag 7:17; 21:4; 2 Pedro 3:13.

[Footnote]

Nahibalo Ka Ba?

◻ Nganong si Jehova gitawag man “ang Diyos sa tanang paghupay”?

◻ Unsay angay nga atong pag-isip sa mga kasakitan?

◻ Uban kang kinsa makapaambit kita sa paghupay?

◻ Sa unsang paagi ang atong panginahanglan sa paghupay hingpit nga matagbaw?

[Hulagway sa panid 17]

Si Jean ug Chantal, bisan pag mga Saksing Tutsi, gitagoan sa separadong mga dapit sa mga Saksing Hutu panahon sa tribonhong pagpinatyanay sa Rwanda

[Hulagway sa panid 17]

Ang mga Saksi ni Jehova nagpadayon sa pagpakig-ambit sa makapahupayng mensahe sa Diyos sa ilang mga silingan sa Rwanda