Kinaraan na ba ang Pagpuasa?

AKO tigpuasa kada Lunes sukad pa sa akong pagkatin-edyer,” matod ni Mrudulaben, usa ka haruhay 78-anyos nga babaye nga taga-India. Nahimong bahin kini sa iyang pagsimba, usa ka paagi sa pagseguro nga siya makabatog maayong kaminyoon ug mahimsog nga mga anak, ingon man usab proteksiyon sa iyang bana. Karon usa na ka biyuda, siya padayong nagpuasa sa mga adlawng Lunes aron makabatog maayong panglawas ug kaharuhay sa iyang mga anak. Sama kaniya, ang kadaghanang Hindu nga mga babaye nagahimo sa regular nga mga pagpuasa nga bahin sa ilang kinabuhi.

Si Prakash, usa ka hamtong nga negosyanteng lalaki nga nagpuyo sa sikbit-sa-siyudad sa Mumbai (Bombay), India, nag-ingon nga siya nagpuasa kada tuig sa mga adlawng Lunes sa Sawan (Shravan). Kini maoy usa ka bulan nga may espesyal relihiyosong kahulogan sa Hindu nga kalendaryo. Si Prakash nagpatin-aw: “Nagsugod ako sa pagpuasa tungod sa relihiyosong mga katarongan, apan karon nakakita akog dugang hinungdan sa pagpadayon tungod sa mga katuyoan sa panglawas. Sanglit ang Sawan modangat sa hinapos ang tinghabagat, mohatag kini sa akong lawas ug higayon sa paghinlo sa kaugalingon sa mga sakit nga moabot lamang sa panahon sa ting-ulan.”

Gibati sa uban nga ang pagpuasa motabang sa usa ka tawo sa pisikal, mental, ug espirituwal. Pananglitan, ang Grolier International Encyclopedia nag-ingon: “Ang dili pa dugayng panukiduki sa siyensiya nagsugyot nga ang pagpuasa mahimong mohatag ug kahimsog ug, kon buhaton nga mainampingon, mahimong magpalambo sa pagkamaamgohon ug pagkamaalinggaton.” Gikaingon nga ang Gregong pilosopo nga si Plato nagpuasa sulod sa napulo ka adlaw o kapin pa ug nga ang eksperto sa matematika nga si Pythagoras nagpapuasa sa iyang mga estudyante sa dili pa tudloan sila.

Alang sa pipila, ang pagpuasa nagpasabot sa bug-os nga pagdili sa kaugalingon sa pagkaon ug tubig sulod sa usa ka pihong yugto sa panahon, samtang ang uban moinom ug mga likido sa panahon sa ilang mga pagpuasa. Ang dili pagkaon ug pipila ka mga kaonan o paglikay sa usa ka matang sa pagkaon giisip sa daghan nga pagpuasa. Apan ang dugayng pagpuasa nga walay superbisyon mahimong peligroso. Ang magsusulat nga si Parul Sheth nag-ingon nga inigkahurot sa abiyo sa lawas nga carbohydrates, himoon niini sunod ang protina sa kaunoran nga glucose ug dayon moliso sa tambok sa lawas. Ang paghimo sa tambok ngadto sa glucose mopagawas ug makahilong mga produkto nga gitawag ug mga ketone body. Samtang kini modaghan, kini moirog ngadto sa utok, nga magdaot sa sentral nga sistema sa nerbiyos. “Niining higayona nga mahimong peligroso ang pagpuasa,” nag-ingon si Sheth. “Ikaw maglibog, mawad-an ug hustong panimbang sa hunahuna, ug grabe pa. . . . [Kini mopahinabog] coma ug sa kataposan kamatayon.”

Usa ka Kasangkapan ug Usa ka Rituwal

Ang pagpuasa gigamit ingong usa ka gamhanang kasangkapan alang sa politikal ug sosyal nga mga katuyoan. Usa ka prominenteng tiggamit niini nga kasangkapan mao si Mohandas K. Gandhi sa India. Gitamod pag-ayo sa gatosan ka minilyong katawhan, gigamit niya ang pagpuasa aron makakuhag kusganong impluwensiya sa mga katawhang Hindu sa India. Nagbatbat sa resulta sa iyang pagpuasa sa paghusay sa industriyal nga kasungian tali sa mga obrero ug sa mga tag-iya sa pabrika, si Gandhi miingon: “Ang paninugdang resulta niini mao ang panag-uliay sa maayong kabubut-on sa tanang nalangkit. Ang mga kasingkasing sa mga tag-iya sa pabrika natandog . . . Ang pag-aklas giundang human ako nagpuasa sa tulo lamang ka adlaw.” Ang presidente sa Habagatang Aprika, si Nelson Mandela, miapil sa lima ka adlawng aklas-gutom sa panahon sa iyang mga tuig ingong binilanggo sa politika.

Ang kinabag-an niadtong nagabatasan sa pagpuasa, hinunoa, nagabuhat niana tungod sa relihiyosong mga hinungdan. Ang pagpuasa maoy usa ka prominenteng rituwal sa Hinduismo. Sa pipila ka adlaw, nag-ingon ang librong Fast and Festivals of India, “ang bug-os nga pagpuasa ginabuhat . . . walay imnon bisag tubig. Ang mga lalaki ug mga babaye nagbatasan ug estriktong pagpuasa . . . aron mapaneguro ang kalipay, kauswagan ug kapasayloan sa mga kasaypanan ug mga kasal-anan.”

Ang pagpuasa kaylap nga ginabatasan sa relihiyong Jain. Ang The Sunday Times of India Review nagtaho: “Usa ka Jain nga muni [tawong manggialamon] sa Bombay [Mumbai] nag-inom ug duha ka baso lamang sa pinabukalang tubig sa usa ka adlaw​—sulod sa 201 ka adlaw. Siya nawad-an ug 33 kg [73 lb].” Ang uban nagpuasa hangtod sa punto nga nangamatay tungod sa kagutom, nga naghunahunang kini mohatag ug kaluwasan.

Alang sa mga hamtong sa katibuk-an nga nagsunod sa Islam, ang pagpuasa obligado sa panahon sa bulan nga Ramadan. Walay pagkaon o tubig ang pagaimnon gikan sa pagsubang sa adlaw hangtod sa pagsalop sa adlaw sa tibuok bulan. Ang bisan kinsa nga nasakit o nagabiyahe niining panahona kinahanglang maghulip sa mga adlaw sa pagpuasa. Ang Kuwaresma, ang 40-ka-adlaw nga yugto sa dili pa ang Pasko sa Pagkabanhaw, maoy panahon sa pagpuasa alang sa pipila sa Kakristiyanohan, ug daghang relihiyosong mga orden ang nagabatasan sa mga pagpuasa sa ubang tinudlong mga adlaw.

Ang pagpuasa wala gayod mawagtang. Ug sanglit usa kini ka bahin sa daghan kaayong mga relihiyon, kita mangutana, Gibaod ba sa Diyos ang pagpuasa? Aduna bay mga okasyon sa dihang ang mga Kristohanon mahimong mohukom sa pagpuasa? Mapuslanon ba kini? Ang sunod nga artikulo mohisgot niini nga mga pangutana.

[Hulagway sa panid 3]

Ang relihiyong Jain nagalantaw sa pagpuasa ingong usa ka paagi nga maangkon ang kaluwasan sa kalag

[Hulagway sa panid 4]

Gigamit ni Mohandas K. Gandhi ang pagpuasa ingong gamhanang kasangkapan alang sa politikal o sosyal nga mga katuyoan

[Hulagway sa panid 4]

Sa Islam, ang pagpuasa obligado sa panahon sa bulan nga Ramadan

[Credit Line]

Garo Nalbandian