Ginasundog ba Nimo ang Atong Walay-Pinalabing Diyos?

PAGKAWALAY-PINALABI​—asa kini makita? Adunay Usa nga bug-os walay-pinalabi, walay pagpihig, paboritismo, ug pagpinig. Siya mao si Jehova nga Diyos, ang Maglalalang sa katawhan. Apan, labot sa mga tawo, ang ika-19ng siglong Ingles nga magsusulat nga si Charles Lamb prangkang misulat: “Ako, sa yanong pagkasulti, puno sa pagpihig​—nga daghag kagustohan ug dili-kagustohan.”

Kon bahin sa pagkawalay-pinalabi, ang tawhanong mga relasyon nagkulang niini. Daghang siglo ang miagi ang maalamong Haring Solomon sa Israel nag-ingon nga “ang tawo nagmando sa tawo sa iyang kadaot.” (Ecclesiastes 8:9) Ang pagdumot sa rasa, mga panagbangi sa nasod, ug mga pagbatokay sa pamilya padayong nagdaghan. Busa, realistikanhon ba ang pagtuo nga, sa ilang kaugalingon, ang mga tawo makaugmad ug usa ka walay-pinalabing katilingban?

Ang dakong paningkamot gikinahanglan sa pagkontrolar sa atong mga tinamdan ug sa pagwagtang diha sa atong kaugalingon sa bisan unsang nakagamot pag-ayong mga pagpihig. (Efeso 4:22-​24) Wala makaamgo niini kita tingali kiling sa pagbaton ug mga tinamdan nga naugmad pinaagi sa atong sosyal ug edukasyonal nga palibot ug nga nakagamot diha sa atong pamilyahanon, rasanhon, ug nasodnong mga kagikan. Kining daw kasarangang mga kiling sagad dulot-kaayo ug nagpalambo sa mga tinamdan nga motultol sa pagkamay-pinalabi. Ang hurado ug editor nga taga-Scotland nga si Lord Francis Jeffrey miadmitir pa: “Walay butang labot sa tawo ang tingali dugay nang namatikdan, kay sa iyang dulot kaayong pagkagamot nga mga pagpihig.”

Si Lenaa maoy usa ka tawo nga moadmitir nga gikinahanglan ang dakong paningkamot sa pagpakigbisog sa kiling sa pagkamay-pinalabi. Ang pagpukgo sa mga pagbati sa pagpihig sulod sa kaugalingon sa usa, siya nag-ingon, “nagkinahanglan ug dakong paningkamot tungod kay ang pagmatuto maoy usa ka kusganon kaayong impluwensiya.” Ginadawat usab ni Lena nga gikinahanglan ang padayong mga pahinumdom.

Ang Rekord ni Jehova sa Pagkawalay-Pinalabi

Si Jehova maoy hingpit nga panig-ingnan sa pagkawalay-pinalabi. Gikan sa pangbukas nga mga panid sa Bibliya, mabasa nato kon sa unsang paagi siya nagpakita sa iyang pagkawalay-pinalabi diha sa iyang mga pagpakiglabot sa mga tawo. Dako kitag makat-onan gikan niining ekselenteng mga panig-ingnan ug mga pahinumdom.

Si Jehova nagpakitag pagkawalay-pinalabi sa pagmaniobra sa mga butang aron ang Hudiyohanong apostol Pedro magmantala sa maayong balita kang Cornelio ug sa ubang mga Hentil niadtong 36 K.P. Niadtong panahona si Pedro miingon: “Ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.”​—Buhat 10:34, 35.

Sa tanan niyang mga pagpakiglabot sa tawhanong pamilya, si Jehova padayong nagpakita sa iyang pagkawalay-pinalabi. Si Kristo Jesus miingon bahin sa iyang Amahan: “Nagapasubang siya sa iyang adlaw diha sa mga tawong tuman-kadaotan ug sa mga maayo ug nagapaulan diha sa mga tawong matarong ug sa mga dili-matarong.” (Mateo 5:45) Dugang nagdayeg kang Jehova ingong ang walay-pinalabing Diyos, si Pedro nagpamatuod: “Siya mapailobon kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.”​—2 Pedro 3:9.

Sa mga adlaw ni Noe, sa dihang “ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon,” gibaod ni Jehova ang kalaglagan sa kalibotan sa katawhan. (Genesis 6:5-7, 11, 12) Bisan pa niana, sa sugo sa Diyos ug bug-os makita sa iyang mga katalirongan, nagtukod si Noe ug arka. Samtang siya ug ang iyang mga anak nagtukod sa arka, si Noe usab maoy “usa ka magwawali sa pagkamatarong.” (2 Pedro 2:5) Bisag nasayod sa daotang hilig sa kasingkasing niadtong kaliwatana, si Jehova sa pagkawalay-pinalabi nagpadala kanila ug tin-awng mensahe. Siya nangamuyo sa ilang mga hunahuna ug mga kasingkasing pinaagi sa pagpatukod ug pagpasangyaw kang Noe. Anaa kanila ang tanang higayon sa pagsanong, apan hinunoa “wala sila magmatikod hangtod nga ang baha miabot ug mibanlas kanilang tanan.”​—Mateo 24:39.

Pagkamaayong panig-ingnan sa pagkawalay-pinalabi ni Jehova! Niining makuyaw nga mga panahon, kini magpalihok sa mga alagad sa Diyos sa pagmantala sa maayong balita sa Gingharian nga may samang pagkawalay-pinalabi. Dugang pa, sila wala magpugong sa pagmantala sa adlaw sa pagpanimalos ni Jehova. Bug-os nga makita sa publiko, gitanyag nila ang mensahe ni Jehova nga walay pinalabi alang sa tanan nga mamati.​—Isaias 61:1, 2.

Ang mga saad ni Jehova sa mga patriarkang si Abraham, Isaac, ug Jacob nagpatin-aw nga siya usa ka walay-pinalabing Diyos. Pinaagi sa ilang espesipikong linya sa banay moabot ang dinihogang Usa nga pinaagi kaniya ang ‘tanang nasod sa yuta magapanalangin sa ilang kaugalingon.’ (Genesis 22:18; 26:4; 28:14) Si Kristo Jesus napamatud-ang mao kanang dinihogang Usa. Pinaagi sa kamatayon ug pagkabanhaw ni Jesus, gitagana ni Jehova ang dalan sa kaluwasan alang sa tanang masinugtanong katawhan. Oo, ang mga kaayohan sa halad lukat ni Kristo mabatonan nga walay pinalabi.

Sa mga adlaw ni Moises, si Jehova sa pagkawalay-pinalabi nagpakita mismo diha sa labing makaiikag nga paagi maylabot sa mga anak nga babaye ni Zelofehad. Kining lima ka babaye may suliran labot sa kabilin sa ilang amahan sa Yutang Saad. Naingon niini tungod kay kostumbre sa Israel nga ang kabilin sa yuta igapasa diha sa mga anak nga lalaki sa usa ka tawo. Apan, si Zelofehad namatay nga walay anak nga lalaki nga modawat sa kabilin. Busa ang lima ka anak nga babaye ni Zelofehad nagdala sa ilang hangyo alang sa walay-pinalabing pagtagad atubangan ni Moises, nga nag-ingon: “Nganong pagakuhaon ang ngalan sa among amahan gikan sa taliwala sa iyang pamilya tungod kay siya walay anak nga lalaki? Oh hatagi kami ug kabtangan taliwala sa mga igsoong lalaki sa among amahan.” Si Jehova namati sa ilang mga pangamuyo ug nagsugo kang Moises: “Sa dihang ang bisan kinsang tawo mamatay nga walay iyang anak nga lalaki, nan imong igapasa ang iyang kabilin ngadto sa iyang anak nga babaye.”​—Numeros 27:1-11.

Pagkamahigugmaon walay-pinalabing sumbanan! Aron mapaneguro nga ang kabilin sa tribo dili mapasa ngadto sa laing tribo sa dihang magminyo ang mga anak nga babaye, sila kinahanglang magminyo lamang diha “sa pamilya sa tribo sa ilang mga amahan.”​—Numeros 36:5-12.

Ang dugang pagsabot sa pagkawalay-pinalabi ni Jehova makita sa mga adlaw sa maghuhukom ug manalagna nga si Samuel. Si Jehova nagsugo kaniya sa pagdihog ug bag-ong hari sa tribo ni Juda sa pamilya ni Jesse nga taga-Betlehem. Apan si Jesse may walo ka anak nga lalaki. Kinsa ang pagadihogan ingong hari? Nakadayeg si Samuel sa pisikal nga barog ni Eliab. Ugaling, si Jehova wala madala sa panggawas nga mga panagway. Gisultihan niya si Samuel: “Ayaw pagtan-aw sa iyang panagway ug sa gitas-on sa iyang barog . . . Kay ang paglantaw sa tawo dili ingon sa paglantaw sa Diyos, tungod kay ang yanong tawo nagatan-aw kon unsay makita sa mga mata; apan si Jehova, siya nagatan-aw sa kasingkasing.” Si David, ang kinamanghorang anak nga lalaki ni Jesse, ang gipili.​—1 Samuel 16:1, 6-13.

Pagkakat-on Gikan sa Pagkawalay-Pinalabi ni Jehova

Maayong sundon sa Kristohanong mga ansiyano si Jehova pinaagi sa pagtan-aw sa espirituwal nga mga hiyas sa isigkamagtutuo. Sayon ang paghukom sa indibiduwal pinaagi sa atong kaugalingong mga sukdanan, nga nagtugot sa atong personal nga mga pagbati nga magpalubog sa atong paghukom. Sama sa pag-ingon niini sa usa ka ansiyano, “Ako naningkamot sa pagpakiglabot sa uban sa paagi nga makapahimuot kang Jehova, dili pinasukad sa akong kaugalingong naisip-daang mga ideya.” Pagkamapuslanon alang sa tanang alagad ni Jehova nga gamiton ang iyang Pulong ingong ilang sukdanan!

Ang nag-unang mga panig-ingnan sa Bibliya motabang kanato nga makigbisog sa nagpabiling mga pagbati sa rasanhon o nasodnong pagpihig. Pinaagi sa pagsundog sa pagkawalay-pinalabi ni Jehova, atong gipanalipdan ang Kristohanong kongregasyon batok sa pagpihig, pagpinig, ug paboritismo.

Si apostol Pedro nakakat-on nga “ang Diyos dili mapihigon.” (Buhat 10:34) Ang paboritismo maoy kaaway sa pagkawalay-pinalabi ug nagalapas sa mga prinsipyo sa gugma ug panaghiusa. Nangaliyupo si Jesus sa mga kabos, sa mga maluya, ug sa mga timawa, ug iyang gipagaan ang ilang mga luwan. (Mateo 11:28-30) Lahi gayod siya sa Hudiyohanong mga lider sa relihiyon, nga nagpakaagalon ibabaw sa katawhan, nagpapas-an kanila sa mabug-at nga mga luwan sa kasugoan. (Lucas 11:45, 46) Ang pagbuhat niini ug pagpakita ug paboritismo ngadto sa mga bahandianon ug mga prominente dayag nga dili uyon sa mga pagtulon-an ni Kristo.​—Santiago 2:1-4, 9.

Karong adlawa, ang Kristohanong mga ansiyano magpasakop sa pagkaulo ni Kristo ug magpakitag pagkawalay-pinalabi sa tanang dedikadong katawhan ni Jehova. Samtang sila ‘nagabantay sa panon sa Diyos nga anaa sa ilang pag-atiman,’ sila nagpugong sa pagpakitag paboritismo tungod sa kahimtang sa ekonomiya, mga kalainan sa personalidad, o mga relasyon sa pamilya. (1 Pedro 5:2) Pinaagi sa pagsundog sa walay-pinalabing Diyos ug pagpamati sa iyang pasidaan batok sa mga buhat sa paboritismo, ang Kristohanong mga ansiyano magpalambo sa espiritu sa pagkawalay-pinalabi diha sa kongregasyon.

Ang Kristohanong kongregasyon sa mga Saksi ni Jehova maoy usa ka internasyonal nga panag-igsoonay. Kini maoy buhing ebidensiya nga ang walay pagpihig, walay-pinalabing katilingban mahimong katinuoran ubos sa pagtultol ni Jesu-Kristo. Ang mga Saksi ‘nagasul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.’ (Efeso 4:24) Oo, sila nagpakakat-on sa hingpit nga panig-ingnan sa walay-pinalabing Diyos, si Jehova, ug adunay palaaboton nga kinabuhing walay kataposan diha sa bag-ong kalibotan nga libre sa tanang pagpalabilabi.​—2 Pedro 3:13.

[Footnote]

[Hulagway sa panid 26]

Si apostol Pedro nakakat-on nga ang Diyos walay pinalabi