Pasagding ang Salabotan Magapanalipod Kanimo
“Ang katakos sa paghunahuna magabantay kanimo, ang salabotan magapanalipod kanimo.”—PROVERBIO 2:11.
1. Ang salabotan magpanalipod kanato batok sa unsa?
BUOT ni Jehova nga imong gamiton ang salabotan. Ngano? Tungod kay siya nahibalo nga kini magapanalipod kanimo batok sa nagkalainlaing mga kapeligrohan. Ang Proverbio 2:10-19 nagbukas pinaagi sa pag-ingon: “Sa dihang mosulod ang kaalam diha sa imong kasingkasing ug ang kahibalo makapahimuot sa imong mismong kalag, ang katakos sa paghunahuna magabantay kanimo, ang salabotan magapanalipod kanimo.” Magapanalipod kanimo batok sa unsa? Sa mga butang sama sa “daotang dalan,” niadtong mingbiya sa matul-id nga mga dalan, ug sa mga tawong malalangon sa ilang katibuk-ang dalan.
2. Unsa ang salabotan, ug unsang matang sa salabotan ang ilabinang tinguhaon sa mga Kristohanon?
2 Lagmit makahinumdom ka nga ang salabotan mao ang hiyas sa hunahuna diin kini makaila sa usa ka butang gikan sa lain. Ang tawong may salabotan makaila sa kalainan sa mga hunahuna o mga butang ug adunay maayong paghukom. Ingong mga Kristohanon, kita ilabinang nagtinguhang makabaton ug espirituwal nga salabotan pinasukad sa tukmang kahibalo sa Pulong sa Diyos. Sa dihang magtuon kita sa Kasulatan, sama kinig nangubkob kita ug mga blokeng igtutukod sa espirituwal nga salabotan. Ang atong makat-onan makatabang kanato sa paghimog mga desisyon nga makapahimuot kang Jehova.
3. Sa unsang paagi atong mabatonan ang espirituwal nga salabotan?
3 Sa dihang gipangutana sa Diyos si Haring Solomon sa Israel kon unsang panalangin ang iyang gitinguha, ang batan-ong magmamando miingon: “Hatagi ang imong ulipon ug usa ka masinugtanong kasingkasing sa paghukom sa imong katawhan, aron maila ang maayo ug ang daotan.” Si Solomon nangayo ug salabotan, ug gihatagan siya niini ni Jehova sa usa ka talagsaong sukod. (1 Hari 3:9; 4:30) Aron makabaton ug salabotan, kita kinahanglang mag-ampo, ug kita kinahanglang magtuon sa Pulong sa Diyos uban sa tabang sa mga publikasyon nga nagahatag ug kadan-agan nga gitagana pinaagi sa “kasaligan ug mabuot nga ulipon.” (Mateo 24:45-47) Kini motabang kanato sa pag-ugmad sa espirituwal nga salabotan sa sukod nga kita mahimong ‘hingkod diha sa mga kagahom sa pagsabot,’ nga makahimo sa ‘pag-ila [o, pagkakita tali] sa husto ug sayop.’—1 Corinto 14:20; Hebreohanon 5:14.
Linaing Panginahanglan sa Salabotan
4. Unsay kahulogan sa pagbaton ug “yano” nga mata, ug sa unsang paagi kini makahatag kanatog kaayohan?
4 Uban sa hustong salabotan, kita makalihok nga nahiuyon sa mga pulong ni Jesu-Kristo: “Nan, padayong pangitaa nga una ang gingharian ug ang pagkamatarong [sa Diyos], ug kining tanang ubang [materyal nga] mga butang idugang kaninyo.” (Mateo 6:33) Si Jesus nag-ingon usab: “Ang lampara sa lawas mao ang imong mata. Sa dihang yano ang imong mata, ang imong tibuok nga lawas usab hayag.” (Lucas 11:34) Ang mata mao ang mahulagwayong lampara. Ang usa ka “yano” nga mata sinsero, nakapunting. Pinaagi sa ingon niana nga mata, kita makapakitag salabotan ug makalakaw nga walay pagkapandol sa espirituwal.
5. May kalabotan sa mga kasabotan sa negosyo, unsay angay natong ibutang sa hunahuna bahin sa katuyoan sa Kristohanong kongregasyon?
5 Imbes himoon ang ilang mga mata nga yano, gipakomplikar sa pipila ang ilang mga kinabuhi ug ang mga kinabuhi sa uban pinaagi sa madanihong mga kasabotan sa negosyo. Apan angay natong hinumdoman nga ang Kristohanong kongregasyon maoy “usa ka haligi ug tukod sa kamatuoran.” (1 Timoteo 3:15) Sama sa mga haligi sa usa ka tinukod, ang kongregasyon nagatuboy sa kamatuoran sa Diyos, dili sa kang kinsa nga palakaw sa negosyo. Ang mga kongregasyon sa mga Saksi ni Jehova wala tukora ingong mga dapit sa pagpauswag sa intereses sa negosyo, mga baligya, o mga serbisyo. Kita magpugong gayod sa paghimog personal nga mga kalihokan sa negosyo diha sa Kingdom Hall. Ang salabotan motabang kanato sa pagkasabot nga ang mga Kingdom Hall, mga Pagtuon sa Kongregasyon sa Libro, mga asembliya, ug mga kombensiyon sa mga Saksi ni Jehova maoy mga dapit alang sa Kristohanong pag-ubanay ug espirituwal nga panaghisgot. Kon atong gamiton ang espirituwal nga mga relasyon aron sa pagpalambo ug bisan unsang matang sa komersiyalismo, dili ba kini nagpakita ug labing menos kakulag apresasyon sa espirituwal nga mga prinsipyo? Ang mga kaila sa kongregasyon dili angay pahimuslan alang sa pinansiyal nga ganansiya.
6. Nganong ang komersiyal nga mga produkto ug mga serbisyo dili ibaligya o iduso diha sa mga tigom sa kongregasyon?
6 Gigamit sa uban ang teokratikanhong mga kaila sa pagpamaligyag mga tabang sa maayong panglawas o sa pagpaanyag, mga produktong bitamina, mga serbisyo sa telekomunikasyon, mga materyal sa pagtukod, mga plano sa pagbiyahe, mga programa sa kompiyuter ug kasangkapan, ug uban pa. Apan, ang mga tigom sa kongregasyon dili dapit alang sa pagpamaligya o pagdusog komersiyal nga mga produkto o mga serbisyo. Atong masabtan ang paninugdang prinsipyo kon atong hinumdoman nga “giabog [ni Jesus] silang tanan nga may mga karnero ug mga baka pagawas sa templo, ug iyang giyabo ang mga sensilyo sa mga tig-ilis ug salapi ug gipanglintuwad ang ilang mga lamesa. Ug siya miingon kanilang nagabaligya sa mga salampati: ‘Kuhaa kining mga butanga gikan dinhi! Ihunong ang paghimo sa balay sa akong Amahan nga balay sa mga paninda!’”—Juan 2:15, 16.
Unsay Ikasulti Bahin sa mga Pagpamuhonan?
7. Nganong ang salabotan ug pag-amping gikinahanglan labot sa mga pagpamuhonan?
7 Ang salabotan ug pag-amping gikinahanglan kon magplano sa pagpamuhonan ug mga negosyo. Ingnon ta nga adunay buot mohulam ug kuwarta ug manaad nga sama niini: “Pasaligan ti ka nga makasapi ka gayod.” “Dili ka maalkansi. Segurado gayod kini.” Pagbantay sa dihang may mohatag ug ingon niini nga mga pasalig. Mahimong siya dili realistiko o nga siya limbongan, kay ang pagbuhi ug puhonan talagsa ra gayod nga segurado. Sa pagkatinuod, ang ubang maayo kaayong mopalanalana, walay prinsipyong mga tawo nakapanikas na sa mga membro sa kongregasyon. Kini nagpahinumdom kanato sa “mga tawong dili-diyosnon” nga nakayuhot sa unang-siglong kongregasyon ug ‘naghimo sa dili-takos nga kalulot sa Diyos ingong katarongan alang sa malaw-ayng panggawi.’ Sila kaamgid sa gibhangon nga mga bato nga makasamad ug makapatay sa mga maglalangoy. (Judas 4, 12) Tinuod, ang mga motibo sa mga tikasan lainlain, apan ginabiktima usab nila ang mga membro sa kongregasyon.
8. Unsay nahitabo labot sa ubang daw dakog kita nga mga negosyo?
8 Bisag ang maayog-tuyong mga Kristohanon nakahatag ug impormasyon bahin sa daw dakog kita nga mga negosyo, nga makakaplag lamang nga sila ug kadtong misunod usab kanila napildihan ug kuwarta nga ilang gipuhonan. Tungod niini, ubay-ubayng mga Kristohanon ang nawad-an ug mga pribilehiyo sa kongregasyon. Sa dihang ang masapian-dayon nga mga paagi sa negosyo mapamatud-ang panikas nga mga laraw, ang nakaganansiya lang mao ang tikasan, nga sagad mawagtang ug kalit. Sa unsang paagi ang salabotan makatabang sa usa aron malikayan ang ingon niini nga mga situwasyon?
9. Nganong gikinahanglan ang salabotan sa pagtimbangtimbang sa mga pangangkon bahin sa pagpamuhonan?
9 Ang salabotan nagkahulogag kaarangan sa pagsabot sa dili klaro. Kining maong katakos gikinahanglan sa pagtimbangtimbang sa mga pangangkon labot sa mga pagpamuhonan. Ang mga Kristohanon adunay pagsalig sa usag usa, ug ang uban tingali mangatarongan nga ang ilang espirituwal nga mga igsoong lalaki ug mga igsoong babaye dili mosulod ug mga negosyo nga magpameligro sa mga kahinguhaan sa mga isigkamagtutuo. Apan ang kamatuoran nga ang negosyante maoy usa ka Kristohanon dili garantiya nga siya maayo kaayong mopalakaw ug negosyo o nga ang iyang sudlang negosyo molampos.
10. Nganong ang ubang mga Kristohanon mangutang alang sa negosyo gikan sa mga isigkamagtutuo, ug unsay mahimong mahitabo sa maong mga pagpamuhonan?
10 Ang ubang mga Kristohanon mangutang aron inegosyo gikan sa mga isigkamagtutuo tungod kay ang iladong mga ahensiya nga nagapahulam dili mobuhi ug kuwarta nga ipuhonan alang sa ilang walay kasegurohang mga negosyo. Daghan ang nalimbongan sa pagtuo nga pinaagi sa yanong pagbuhi sa ilang kuwarta aron ipamuhonan, sila dihadiha makasapig dako nga wala kaayoy paghago o tingali wala gayoy paghago. Ang uban nadani sa pagpamuhonan tungod sa kaukyab nga nalangkit niana, nga mapildihan lamang sa ilang tibuok kinabuhi nga tinigom! Usa ka Kristohanon namuhonan ug dakong kantidad nga salapi, nga naglaom ug 25-porsiyentong ganansiya sa duha lamang ka semana. Nawagtang kaniya ang tanan niadtong kuwartaha sa dihang gideklarar ang pagkahapay. Sa laing negosyo, usa ka real-estate developer nanghulam ug dakong kantidad nga kuwarta gikan sa uban diha sa kongregasyon. Nanaad siya ug hilabihan ka dako nga ganansiya apan nahapay ug napildihan sa gihulam nga mga kuwarta.
Sa Dihang Dili Molampos ang mga Negosyo
11. Unsang tambag ang gihatag ni Pablo bahin sa kahakog ug gugma sa salapi?
11 Ang mga negosyong dili molampos mosangpot ug kahigawad ug pagkawala pa sa espirituwalidad sa bahin sa ubang mga Kristohanon kinsa misulod sa walay-kasegurohang mga negosyo. Ang kaguol ug kasuko maoy misangpot tungod sa kapakyasan sa paggamit sa salabotan ingong panalipod. Ang kahakog nakalit-ag sa daghan. “Ayaw tugoti bisan na lang gani nga mahisgotan taliwala kaninyo ang . . . pagkadalo, ingon gayod sa nahiangay sa mga balaan,” nagsulat si Pablo. (Efeso 5:3) Ug siya nagpasidaan: “Silang kinsa determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagabanlod sa mga tawo sa kalaglagan ug pagkagun-ob. Kay ang gugma sa salapi maoy usa ka gamot sa tanang matang sa makadaot nga mga butang, ug sa pagpangab-ot niini nga gugma ang pipila napahisalaag gikan sa pagtuo ug lukop nga nagtusaktusak sa ilang kaugalingon sa daghang kasakit.”—1 Timoteo 6:9, 10.
12. Kon ang mga Kristohanon makignegosyo sa usag usa, unsa ilabina ang angay nilang hinumdoman?
12 Kon matugkan ang Kristohanon ug gugma sa salapi, makahatag siya sa iyang kaugalingon ug dakong espirituwal nga kadaot. Ang mga Pariseo maoy mga mahigugmaon sa salapi, ug kining hiyasa daghan niining kataposang mga adlaw. (Lucas 16:14; 2 Timoteo 3:1, 2) Sa kasukwahi, ang Kristohanong paagi sa kinabuhi kinahanglang “mahigawas sa gugma sa salapi.” (Hebreohanon 13:5) Siyempre, ang mga Kristohanon mahimong makignegosyo sa usag usa o makasugod sa pakigsosyo ug mga negosyo. Apan, kon magnegosyo man ugaling sila, ang mga panaghisgot ug mga kasabotan kinahanglang ibulag gikan sa kongregasyonal nga mga butang. Ug hinumdomi: Bisan taliwala sa espirituwal nga mga igsoon, kinahanglang isulat kanunay ang mga kasabotan sa negosyo. Makatabang niining bahina mao ang artikulong “Ibutang Kana sa Kasulatan!,” nga gipatik sa Pagmata! sa Hulyo 8, 1983, mga panid 13 ngadto sa 15.
13. Sa unsang paagi ikapadapat nimo ang Proverbio 22:7 bahin sa mga negosyo?
13 Ang Proverbio 22:7 nagsulti kanato: “Ang manghulam ulipon sa magpahulam.” Sagad dili maalamon nga atong ibutang ang atong kaugalingon o ang atong igsoon diha sa kahimtang nga mahimong ingon niini nga ulipon. Kon adunay mohangyo kanato sa pagpahulam kaniya ug kuwarta alang sa negosyo, maayong palandongon ang iyang katakos sa pagbayad sa kantidad. Ilado ba siya nga kasaligan ug kapiyalan? Siyempre, kinahanglang mahibalo kita nga ang pagpahulam mahimong magkahulogang pagkapildi sa kuwarta tungod kay daghang negosyo dili molampos. Ang kontrata mismo dili makapaneguro ug malamposong negosyo. Ug siyempre dili maalamon alang kang bisan kinsa nga magpahulam ug dugang kuwarta sa usa ka palakaw sa negosyo kay sa iyang maarangan nga mapildi.
14. Nganong kinahanglang magpakita kitag salabotan kon kita nakapautang ug kuwarta sa isigka-Kristohanon kansang negosyo wala molampos?
14 Kita kinahanglang magpakitag salabotan kon kita nakapahulam ug kuwarta sa usa ka Kristohanon alang sa mga katuyoan sa negosyo ug ang kuwarta napildi, bisan pag walay linimbong nga mga buhat ang nalangkit. Kon ang pagkapakyas sa negosyo dili sayop sa atong isigkamagtutuo nga nanghulam sa kuwarta, makaingon ba kita nga kita gitikasan? Dili, tungod kay kinabubut-on kitang nagpahulam ug kuwarta, kita tingali nakakitag interes niana, ug walay panglimbong nga nahitabo. Sanglit walay panglimbong, kita walay basehanan sa pagpasakag sumbong batok sa nanghulam. Unsay kaayohang makuha sa pagkiha sa usa ka matinud-anong isigka-Kristohanon kinsa mideklarar ug pagkahapay tungod kay wala molampos ang maayog-tuyong negosyo?—1 Corinto 6:1.
15. Unsang mga butang ang nagkinahanglag pagpalandong kon gideklarar ang pagkahapay?
15 Kadtong nakaagig pakyas nga mga negosyo usahay mangayog kahupayan pinaagi sa pagdeklarar nga nahapay. Sanglit ang mga Kristohanon dili man mapinasagdanon bahin sa pagkautang, bisan human nga napahigawas sa legal nga paagi sa pipila ka utang, ang uban mibating obligado sa pagpaningkamot sa pagbayad sa gikanselar nga mga utang sumala sa mga balaod sa pagkahapay kon ang mga nagpautang modawat ug bayad. Apan komosta kon napildi sa nanghulam ang kuwarta sa iyang igsoon ug unya nagkinabuhi sa maluhong paagi? O komosta kon ang nanghulam nakabaton ug igong kuwarta sa pagbayad ug balik sa iyang gihulam apan wala magtagad sa iyang moral nga obligasyon sa pagbayad ngadto sa iyang igsoon? Nan kaduhaduhaan ang kuwalipikasyon sa nanghulam sa pag-alagad sa responsableng kapasidad diha sa kongregasyon.—1 Timoteo 3:3, 8; tan-awa Ang Bantayanang Torre, Septiyembre 15, 1994, panid 30-1.
Komosta Kon Adunay Gihimong Panikas?
16. Unsang mga lakang ang mahimong himoon kon daw kita nangabiktima sa panikas sa negosyo?
16 Ang salabotan motabang kanato sa pagkaamgo nga dili sa tanang panahong may mapaabot nga ganansiya ang tanang mga pagpamuhonan. Apan, komosta kon may nalangkit nga panikas? Ang panikas mao ang “tinuyo nga paggamit sa panglimbong, panuwitik, o pagtuis sa kamatuoran alang sa katuyoan sa pagdani sa lain sa pagtugyan sa pipila ka mahalong butang nga iyang gipanag-iya o sa pagsibog gikan sa legal nga katungod.” Gilaraw ni Jesu-Kristo ang mga lakang nga mahimong himoon sa dihang ang usa ka tawo nagtuo nga siya gitikasan sa isigkamagtutuo. Sumala sa Mateo 18:15-17, si Jesus nag-ingon: “Kon makahimo ug sala ang imong igsoon, adtoa ihikyad ang iyang sayop tali kanimo ug kaniya lamang. Kon siya mamati kanimo, imong nakabig ang imong igsoon. Apan kon dili siya mamati, pagdala uban kanimo ug usa o duha pa, aron nga sa baba sa duha o tulo ka saksi ang matag butang mapamatud-an. Kon dili siya mamati kanila, sultihi ang kongregasyon. Kon dili siya mamati bisan sa kongregasyon, ipakasama siyag tawo sa kanasoran alang kanimo ug ingong maniningil ug buhis.” Ang ilustrasyon sunod niana nga gihatag ni Jesus nagpakita nga anaa sa iyang hunahuna ang ingon niana nga mga sala sama niadtong nalangkit sa pinansiyal nga mga butang, lakip ang panikas.—Mateo 18:23-35.
17, 18. Kon ang usa ka nag-angkong Kristohanon nakapanikas kanato, sa unsang paagi ang salabotan magapanalipod kanato?
17 Siyempre, walay Kasulatanhong basehanan sa paghimog mga lakang nga gilaraw diha sa Mateo 18:15-17 kon walay ebidensiya o bisan timaan nga may nahimong panikas. Bisan pa, komosta kon gitikasan gayod kita sa nag-angkong Kristohanon? Ang salabotan magpugong kanato sa paghimog aksiyon nga makadaot sa dungog sa kongregasyon. Gitambagan ni Pablo ang isigka-Kristohanon nga tugotan nila ang ilang kaugalingon nga mabuhatan ug sayop ug bisan matikasan imbes ikiha ang igsoon.—1 Corinto 6:7.
18 Ang atong tinuod nga mga igsoong lalaki ug mga igsoong babaye dili ‘puno sa panikas ug kadaotan,’ sama sa magdidiwata nga si Bar-Jesus. (Buhat 13:6-12) Busa tugoting gamiton nato ang salabotan sa dihang mapildi ang kuwarta sa mga negosyo nga nalangkit ang mga isigkamagtutuo. Kon kita naghunahuna sa paghimog legal nga aksiyon, atong angay palandongon ang posibleng mga epekto kanato sa personal, sa ubang tawo o mga tawo, sa kongregasyon, ug sa mga tagagawas. Ang pagtinguha nga mabalik ang kuwarta makahurot sa daghan natong panahon, kusog, ug ubang mga kahinguhaan. Tingali kini moresulta lang nga atong gipadato ang mga abogado ug ubang mga propesyonal. Ikasubo, gisakripisyo sa ubang mga Kristohanon ang teokratikanhong mga pribilehiyo tungod sa sobrang pagkalinga niining mga butanga. Ang atong pagkanahisimang niining bahina tinong nakahatag ug kalipay ni Satanas, apan buot nato nga malipay ang kasingkasing ni Jehova. (Proverbio 27:11) Sa laing bahin, ang pagdawat sa kapildihan magpalingkawas kanato sa mga kaguol ug makadaginot ug dakong panahon alang kanato ug alang sa mga ansiyano. Kini makatabang sa pagpatunhay sa kalinaw sa kongregasyon ug makapaarang kanato sa pagpadayon sa pagpangita pag-una sa Gingharian.
Salabotan ug Paghimog Desisyon
19. Unsay mahimo sa espirituwal nga salabotan ug pag-ampo alang kanato kon kita nagahimog malisod nga mga desisyon?
19 Ang paghimog mga desisyon may kalabotan sa pinansiyal nga mga butang o sa mga negosyo makahatag gayod ug dakodakong tensiyon. Apan ang espirituwal nga salabotan makatabang kanato sa pagtimbangtimbang sa mga butang ug sa paghimog maalamong mga desisyon. Dugang pa, ang mainampoong pagsalig kang Jehova mohatag kanatog “kalinaw sa Diyos.” (Filipos 4:6, 7) Kini maoy kakalma ug kalinaw nga maoy mosangpot sa suod nga personal nga relasyon uban kang Jehova. Sa pagkamatuod, ang maong kalinaw makatabang kanato sa paghupot sa atong pagkatimbang sa dihang mag-atubang kita ug malisod nga mga desisyon.
20. Magmadeterminado kita sa pagbuhat ug unsa may kalabotan sa mga butang sa negosyo ug sa kongregasyon?
20 Pasagding magmadeterminado kita sa dili pagtugot sa mga kabingkilan sa negosyo nga magdaot sa atong kalinaw ug nianang sa kongregasyon. Kinahanglang atong hinumdoman nga ang Kristohanong kongregasyon nagalihok sa pagtabang kanato sa espirituwal, dili sa pag-alagad ingong sentro sa komersiyal nga mga katuyoan. Ang mga butang may kalabotan sa negosyo angay ibulag kanunay gikan sa mga kalihokan sa kongregasyon. Kinahanglang atong gamiton ang salabotan ug pag-amping sa dihang mosulod ug mga negosyo. Ug huptan nato kanunay ang timbang nga hunahuna sa maong mga butang, nga unahon pagpangita ang intereses sa Gingharian. Kon ang negosyo nga naglangkit sa mga isigkamagsisimba dili molampos, hinaot nga kita maningkamot sa pagbuhat sa labing maayo alang sa tanang hingtungdan.
21. Sa unsang paagi atong magamit ang salabotan ug sa paglihok nga uyon sa Filipos 1:9-11?
21 Imbes sobrang kabalak-an ang pinansiyal nga mga butang ug ang ubang dili kaayo hinungdanong mga butang, hinaot ikiling natong tanan ang atong mga kasingkasing sa salabotan, mag-ampo alang sa paggiya sa Diyos, ug ibutang pag-una ang intereses sa Gingharian. Nahiuyon sa pag-ampo ni Pablo, ‘hinaot ang atong gugma modagaya nga labi ug labi pa gayod uban ang tukmang kahibalo ug bug-os mailahong pagpanabot aron atong matino ang mas hinungdanong mga butang ug dili makapandol sa uban’ o sa atong kaugalingon. Karon nga si Kristo ang Hari naglingkod diha sa iyang langitnong trono, pasagding magpakita kita ug espirituwal nga salabotan sa tanang bahin sa kinabuhi. Ug ‘hinaot mapuno kita sa matarong nga bunga pinaagi kang Jesu-Kristo, sa himaya ug kadayeganan sa atong Diyos,’ ang Soberanong Ginoong Jehova.—Filipos 1:9-11.
Unsay Imong Tubag?
◻ Unsa ang salabotan?
◻ Nganong adunay linaing panginahanglan sa pagpakitag salabotan labot sa mga kasabotan sa negosyo taliwala sa mga Kristohanon?
◻ Sa unsang paagi ang salabotan makatabang kanato kon kita mobati nga gitikasan kita sa usa ka isigkamagtutuo?
◻ Unsang papel ang gidula sa salabotan diha sa paghimog desisyon?
[Hulagway sa panid 18]
Ang salabotan motabang kanato sa pagpadapat sa tambag ni Jesus sa pagpadayon sa pagpangita pag-una sa Gingharian
[Hulagway sa panid 20]
Kinahanglang isulat kanunay ang mga kasabotan sa negosyo