Asa Makaplagi ang Tinuod nga Kalipay?
GIBATI sa daghang tawo nga ang kalipay makaplagan pinaagi sa pagbaton ug materyal nga mga kabtangan. Komosta ka man? Bisan tuod ang materyal nga mga butang makatampo gayod sa atong kalipay, kini dili makapaseguro niana; ni ang pisikal nga mga kaharuhay makapalig-on sa pagtuo o mopuno sa espirituwal nga mga panginahanglan.
Sa iyang Wali sa Bukid, si Jesu-Kristo miingon: “Malipayon kadtong mahunahunaon sa ilang espirituwal nga panginahanglan, sanglit ilaha ang gingharian sa mga langit.” (Mateo 5:3) Si Jesus usab miingon: “Pagbantay batok sa tanang matang sa hakog nga kaibog, tungod kay bisag adunay kadagaya ang usa ka tawo ang iyang kinabuhi wala magagikan sa mga butang nga iyang gipanag-iya.”—Lucas 12:15.
Daghan ang nangitag kalipay pinaagig pagbuhat sa gidili nga sekso ug ubang “mga buhat sa unod.” (Galacia 5:19-21) Bisan pa niana, ang pagpasignunot sa unodnong mga kalipay dili magpatunghag tinuod ug dumalayong kalipay. Sa pagkatinuod, kadtong nagabuhat sa maong mga butang dili makapanunod sa Gingharian sa Diyos.—1 Corinto 6:9, 10.
Ang uban misusi sa kaugalingon sa ilang pagpangitag kalipay pinaagig pagsulay sa pag-ugmad sa ilang pagtahod-sa-kaugalingon. Ang mga librarya ug mga baligyaanag libro napuno sa mga basahon nga makatabang sa kaugalingon, apan ang maong mga publikasyon wala magdalag dumalayong kalipay sa katawhan. Busa, asa man kita makakaplag ug tinuod nga kalipay?
Aron tinuod nga magmalipayon, kinahanglang ilhon nato ang atong kinaiyanhong espirituwal nga panginahanglan. Si Jesus miingon: “Malipayon kadtong mahunahunaon sa ilang espirituwal nga panginahanglan.” Siyempre, diyutay ra ug ikahatag nga kaayohan niini kanato kon atong masabtan kining panginahanglana ug unya mapakyas sa pagbuhat ug bisan unsa bahin niini. Sa pag-ilustrar: Unsay mahitabo sa usa ka magdadagan sa maraton nga mapakyas sa pagsanong sa gipangayo sa iyang lawas nga tubig human sa lumba? Dili kaha siya sa di-madugay makasinatig pagkauga sa lawas ug uban pang seryosong mga resulta? Sa susama, kon kita mapakyas sa pagsanong sa atong panginahanglan sa espirituwal nga pagpahimsog, kita sa kapulihay maluya sa espirituwal nga paagi. Motultol kini sa pagkawala sa kangaya ug kalipay.
Giila pag-ayo ni Jesus ang iyang espirituwal nga panginahanglan, nga makanunayong nagtuon ug namalandong sa Pulong sa Diyos. Dali ra niyang makita ug mabasa ang mga bahin sa Balaang Kasulatan, ug gitudloan niya ang uban sa pagbuhat sa sama. (Lucas 4:16-21; itandi ang Efeso 4:20, 21.) Gipakasama usab ni Jesus ang pagbuhat sa kabubut-on sa iyang langitnong Amahan sa pagkaon. Ang pagbuhat sa kabubut-on sa Diyos naghatag kaniyag dakong kalipay.—Juan 4:34.
Oo, ang tinuod nga kalipay dili makuha pinaagig pagbaton ug materyal nga mga butang; ni moresulta sa kalipay ang pagpahimuot sa makasasalang unod. Ang tinuod nga kalipay maoy usa ka kahimtang sa kasingkasing, pinasukad sa lunsay nga pagtuo ug sa usa ka maayong relasyon uban kang Jehova nga Diyos. Busa, tukma gayod nga ang salmistang si David miawit: “Malipayon ang katawhan kansang Diyos mao si Jehova.”—Salmo 144:15b.
[Hulagway sa panid 23]
Ang pagtuo ug usa ka maayong relasyon uban sa Diyos maghatag kanimog tinuod nga kalipay