Magmaisogon Samtang Nagakaduol na ang Kaluwasan

“‘Ako magauban kanimo,’ nagaingon si Jehova, ‘sa pagluwas kanimo.’”—JEREMIAS 1:19.

1, 2. Nganong ang tawhanong pamilya nagkinahanglag kaluwasan?

KALUWASAN! Pagkamakapahupay nga pulong! Ang pagkahimong maluwas nagkahulogang pagkanaluwas, nahigawas sa dili maayo, makasubong kahimtang. Kini naglakip sa hunahuna sa pagkahimong nadala ngadto sa mas maayo, mas malipayong kahimtang.

² Pagkadako sa panginahanglan sa tawhanong pamilya sa maong kaluwasan niining panahona! Ang mga tawo sa tanang dapit nabug-atan ug nangaluya sa malisod nga mga problema​—sa panalapi, sosyal, pisikal, mental, ug emosyonal. Ang kinabag-an dili-malipayon ug nahigawad sa paagi sa pagdagan sa kalibotan ug buot ug kausaban alang sa maayo.​—Isaias 60:2; Mateo 9:36.

“Makuyaw nga mga Panahong Lisod Sagubangon”

3, 4. Nganong adunay mas dakong panginahanglan alang sa kaluwasan karon?

³ Sukad nga nakaagi kining ika-20ng siglo ug mas dakong pag-antos kay sa bisan unsang siglo, adunay mas dakong panginahanglan ug kaluwasan karon kay sa kaniadto. Karon, kapin sa usa ka bilyong katawhan nagpuyo sa sobrang kakabos, ug kanang gidaghanona nag-usbaw sa mga 25 ka milyon matag tuig. Tuigtuig duolan sa 13 ka milyong kabataan ang nangamatay sa kakulag-pagkaon o ubang nalangkit-sa-kakabos nga mga hinungdan​—kapin sa 35,000 sa usa ka adlaw! Ug minilyon sa mga tawong tigulang ahat nga nangamatay gumikan sa nagkalainlaing mga sakit.​—Lucas 21:11; Pinadayag 6:8.

⁴ Ang mga gubat ug mga sibil nga kagubot nakapahinabog dili-maasoy nga pag-antos. Ang librong Death by Government nag-ingon nga ang mga gubat, etniko ug relihiyosong mga panag-away, ug pinakyawng pagpamatay sa mga kagamhanan sa ilang kaugalingong mga lungsoranon “nakapatayg kapin sa 203 ka milyong tawo niining sigloha.” Kini dugang nag-ingon: “Ang aktuwal nga nangamatay maoy duolan sa 360 ka milyong tawo. Daw sama kinig ang atong matang gilaglag sa usa ka moderno nga Black Plague. Ug tinuod gayod nga nakalaglag kini, apan sa usa ka hampak sa Gahom, dili sa mga kagaw.” Ang magsusulat nga si Richard Harwood nag-ingon: “Ang mapintas nga mga gubat sa kasiglohang nangagi wala ra sa kumingking kon itandi.”​—Mateo 24:6, 7; Pinadayag 6:4.

5, 6. Unsay nagpahimo sa atong panahon nga mas makapabalaka kaayo?

⁵ Gawas pa sa malisod nga mga kahimtang sa katuigang dili pa dugay mao ang dakong pag-usbaw sa mabangis nga krimen, imoralidad, ug pagkabungkag sa panimalay. Ang kanhi Kalihim sa Edukasyon sa Tinipong Bansa nga si William Bennett miingon nga sa 30 ka tuig ang populasyon sa T.B. miusbaw sa 41 porsiyento, apan ang mapintas nga krimen miusbaw sa 560 porsiyento, ang gipanganak nga bastardo 400 porsiyento, mga diborsiyo 300 porsiyento, ug ang gidaghanon sa paghikog sa mga tin-edyer 200 porsiyento. Si Propesor John DiIulio, Jr., sa Unibersidad sa Princeton, nagpasidaan sa nag-usbawng gidaghanon sa batan-ong “banggiitang mga tigpangatake,” kinsa “nagapamatay, nagapanulong, nagapanglugos, nagapangawat, nagapanglungkab ug nagahatag ug grabeng kagubot sa komunidad. Sila dili mahadlok nga makabaton ug dili-maayong dungog sa pagkahimong madakpan, sa mga kasakit sa pagkapriso, o sa mga pagtulisok sa tanlag.” Nianang yutaa, ang pagbuno mao karon ang ikaduha-sa-pangunang hinungdan sa kamatayon taliwala niadtong 15 ngadto sa 19 anyos ang edad. Ug mas daghan pang kabataan ubos sa edad nga kuwatro ang nangamatay sa pag-abuso kay sa sakit.

⁶ Ang ingon niana nga krimen ug kapintasan dili kay iya ra sa usa ka nasod. Ang kadaghanang kayutaan nagtaho ug samang mga kiling. Nakaamot niini mao ang pagsulbong sa ilegal nga paggamit sa droga nga nagdaot sa minilyon. Ang Sydney Morning Herald sa Australia nag-ingon: “Ang internasyonal nga pagpamaligyag droga nahimong ang ikaduha sa labing dakog-kita nga negosyo sunod sa negosyo sa pagpamaligyag mga hinagiban sa gubat.” Laing hinungdan mao ang kapintasan ug imoralidad nga karon nagtuhop sa telebisyon. Diha sa daghang nasod, inig-abot sa bata sa edad nga 18, siya nakakita nag tinagpulo ka linibong mapintas ug dili-maisip nga imoral nga mga buhat. Kana maoy usa ka dakong makadaot nga impluwensiya, sanglit ang atong personalidad maumol pinaagi sa kon unsa ang atong ginapakaon sa atong mga hunahuna.​—Roma 12:2; Efeso 5:3, 4.

7. Sa unsang paagi ang tagna sa Bibliya nagtagna sa presenteng daotang mga kahimtang?

⁷ Ang tagna sa Bibliya tukmang nagtagna niining makalilisang nga kiling sa mga hitabo sa atong siglo. Ginaingon niini nga aduna unyay globonhong mga gubat, mga epidemya sa sakit, mga kakulag pagkaon, ug pagdaghan sa pagkamalapason. (Mateo 24:7-12; Lucas 21:10, 11) Ug kon atong palandongon ang tagna nga narekord diha sa 2 Timoteo 3:1-5, kini sama rag nagapamati sa mga taho sa balita magabii. Gipadayag niini ang atong panahon ingong ang “kataposang mga adlaw” ug gibatbat ang mga tawo ingong ‘mga mahigugmaon sa kaugalingon, mga mahigugmaon sa salapi, dili-masinugtanon sa mga ginikanan, dili-maunongon, walay kinaiyanhong pagbati, walay pagpugong-sa-kaugalingon, mabangis, managburot sa garbo, mga mahigugmaon sa kalipayan inay nga mga mahigugmaon sa Diyos.’ Mao gayod kana ang kahimtang sa kalibotan karon. Sama sa giadmitir ni William Bennett: “Hilabihan ra kaayo ka daghan ang mga ilhanan sa . . . sibilisasyon nga nadunot.” Gikaingon pa gani nga ang sibilisasyon natapos sa unang gubat sa kalibotan.

8. Nganong gipahinabo sa Diyos ang Lunop sa adlaw ni Noe, ug sa unsang paagi kini nalangkit sa atong adlaw?

⁸ Ang kahimtang karon mas grabe pa kay sa wala pa ang Lunop sa adlaw ni Noe, sa dihang “ang yuta napuno sa kapintasan.” Balik niadtong panahona, ang mga tawo sa katibuk-an nanagdumili sa paghinulsol sa ilang daotang mga dalan. Busa, ang Diyos miingon: “Ang yuta napuno sa kapintasan tungod kanila; ug ania karon pagalaglagon ko sila.” Ang Baha nagtapos niadtong mapintas nga kalibotan.​—Genesis 6:11, 13; 7:17-24.

Walay Kaluwasan Pinaagi sa mga Tawhanon

9, 10. Nganong dili kita angay mosalig sa mga tawo sa pagtaganag kaluwasan?

⁹ Ang mga paningkamot ba sa tawo makaluwas kanato gikan niining daotang mga kahimtang? Ang Pulong sa Diyos nagtubag: “Ayaw ibutang ang inyong pagsalig diha sa mga halangdon, ni sa anak sa tawo, nga kaniya walay kaluwasan.” “Dili iya sa tawo nga nagalakaw sa pagtultol bisan sa iyang lakang.” (Salmo 146:3; Jeremias 10:23) Ang linibong katuigan sa kasaysayan nagpamatuod niadtong mga kamatuorana. Ang mga tawo nakasulay na sa tanang politikanhon, ekonomikanhon, ug sosyal nga sistema nga mahanduraw, apan ang mga kahimtang misamot. Kon may tawhanon pang kasulbaran, makita na unta kini karon. Hinunoa, ang kamatuoran mao nga ang “tawo nagmando sa tawo sa iyang kadaot.”​—Ecclesiastes 8:9; Proverbio 29:2; Jeremias 17:5, 6.

¹⁰ Sa pipila ka tuig nga milabay, ang nasodnong tigtambag niadto may kalabotan sa seguridad sa T.B. nga si Zbigniew Brzezinski miingon: “Ang dili-malikayang konklusyon sa bisan unsang walay-pagpihig nga pag-analisar sa mga kiling sa tibuok-yuta mao nga ang kagubot sa katilingban, ang kasamok sa politika, krisis sa ekonomiya, ug internasyonal nga kabingkilan malagmit mas mokaylap.” Siya midugang: “Ang kapeligrohang ginaatubang sa katawhan [mao] ang tibuok-kalibotan nga anarkiya.” Kana nga pagtimbangtimbang sa mga kahimtang sa kalibotan mas tinuod pa karon. Nagkomento bahin niining panahona sa nag-usbaw nga kapintasan, usa ka editoryal sa Register sa New Haven, Connecticut, nag-ingon: “Kita daw layo na kaayog naabot aron makapahunong pa niana.” Wala, walay paghunong niining pagkadaot sa kalibotan, kay ang tagna bahin niining “kataposang mga adlaw” nag-ingon usab: “Ang mga tawo nga tuman-kadaotan ug mga impostor mosamot pa kangil-ad, nagapahisalaag ug ginapahisalaag.”​—2 Timoteo 3:13.

11. Nganong ang nagkagrabeng kahimtang dili mausab sa tawhanong mga paningkamot?

¹¹ Ang mga tawo dili makausab niini nga mga kiling tungod kay si Satanas mao “ang diyos niini nga sistema sa mga butang.” (2 Corinto 4:4) Oo, “ang tibuok kalibotan nahimutang diha sa gahom sa tuman-kadaotang usa.” (1 Juan 5:19; tan-awa usab ang Juan 14:30.) Sa tukma ang Bibliya nag-ingon bahin sa atong adlaw: “Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:12) Si Satanas nahibalo nga ang iyang pagmando ug ang iyang kalibotan hapit nang matapos, busa siya sama sa ‘nagasuroysuroy nga leon nga nagangulob, nga nagapangita ug usa nga matukob.’​—1 Pedro 5:8.

Kaluwasan Haduol Na​—Alang Kang Kinsa?

12. Alang kang kinsa nga nagakahiduol na ang kaluwasan?

¹² Ang dugang nga nagkalisod nga mga kahimtang sa yuta maoy talagsaong pamatuod nga usa ka dakong kausaban​—sa pagkatinuod, usa ka dakong kaluwasan​—haduol na! Alang kang kinsa? Ang kaluwasan haduol na alang niadtong nagapatalinghog sa pasidaang mga timaan ug kinsa nagahimog nahiangay nga lihok. Ang 1 Juan 2:17 nagpakita kon unsa ang kinahanglang himoon: “Ang kalibotan [sistema sa mga butang ni Satanas] nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”​—Tan-awa usab ang 2 Pedro 3:10-13.

13, 14. Giunsa pagpasiugda ni Jesus ang panginahanglan sa pagtukaw?

¹³ Si Jesus nagtagna nga ang dunot nga katilingban karon sa dili madugay bug-os pagalaglagon sa panahon sa kasamok nga ang “ingon niana wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab.” (Mateo 24:21) Maoy hinungdan nga siya nagpasidaan: “Tagda ang inyong kaugalingon nga ang inyong mga kasingkasing dili gayod mabug-atan sa pagpalabig kaon ug pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat nganha kaninyo ingon nga usa ka lit-ag. Kay moabot kini nganha sa tanang nagapuyo ibabaw sa nawong sa tibuok nga yuta. Nan, padayong magtukaw nga sa tanang panahon magapangamuyo nga kamo molampos sa pag-ikyas niining tanang butanga nga gikatinong mahitabo.”​—Lucas 21:34-36.

¹⁴ Kadtong kinsa ‘nagatagad’ ug ‘padayong nagatukaw’ mangita sa kabubut-on sa Diyos ug motuman niana. (Proverbio 2:1-5; Roma 12:2) Kini sila mao ang “molampos sa pag-ikyas” sa kalaglagan nga hapit nang ikapanaog diha sa sistema ni Satanas. Ug sila bug-os makasalig nga sila pagaluwason.​—Salmo 34:15; Proverbio 10:28-30.

Ang Pangunang Manluluwas

15, 16. Kinsa ang pangunang Manluluwas, ug nganong kita makatino nga ang iyang mga paghukom matarong?

¹⁵ Aron maluwas ang mga alagad sa Diyos, si Satanas ug ang iyang enterong tibuok-kalibotang sistema sa mga butang kinahanglang pagawagtangon. Kini nagkinahanglag usa ka tuboran sa kaluwasan nga mas gamhanan kay sa mga tawo. Kana nga tuboran mao si Jehova nga Diyos, ang Supremong Soberano, ang labing-gamhanang Maglalalang sa katingalahang uniberso. Siya mao ang pangunang Manluluwas: “Ako​—ako si Jehova, ug gawas kanako wala nay manluluwas.”​—Isaias 43:11; Proverbio 18:10.

¹⁶ Diha kang Jehova anaa ang kinadak-ang sukod sa gahom, kaalam, hustisya, ug gugma. (Salmo 147:5; Proverbio 2:6; Isaias 61:8; 1 Juan 4:8) Busa sa dihang ipahamtang na niya ang iyang mga paghukom, kita makatino nga ang iyang mga buhat matarong. Si Abraham nangutana: “Ang Maghuhukom sa tibuok yuta dili ba magabuhat kon unsa ang matarong?” (Genesis 18:24-33) Si Pablo mipatugbaw: “Aduna bay inhustisya sa Diyos? Dili gayod unta kana mahimong ingon!” (Roma 9:14) Si Juan nagsulat: “Oo, Jehova nga Diyos, ang Labing-Gamhanan, matuod ug matarong ang imong hudisyal nga mga desisyon.”​—Pinadayag 16:7.

17. Sa unsang paagi gipahayag sa mga alagad ni Jehova sa nangagi ang pagsalig diha sa iyang mga saad?

¹⁷ Sa dihang nanaad si Jehova ug kaluwasan, siya sa walay pagkapakyas magatuman niini. Si Josue nag-ingon: “Walay saad nga nakawang sa tanang maayong saad nga gihimo ni Jehova.” (Josue 21:45) Si Solomon nag-ingon: “Walay nakawang nga usa ka pulong sa tanan niyang maayong saad.” (1 Hari 8:56) Si apostol Pablo miingon nga si Abraham ‘wala magpalingpaling diha sa kawalay pagtuo, . . . nga bug-os kombinsido nga kon unsa ang gisaad [sa Diyos] siya usab makahimo sa pagbuhat.’ Si Sara sa susama ‘nagtamod [sa Diyos] nga kasaligan nga misaad.’​—Roma 4:20, 21; Hebreohanon 11:11.

18. Nganong ang mga alagad ni Jehova karong adlawa makasalig nga sila pagaluwason?

¹⁸ Dili sama sa mga tawo, si Jehova bug-os gayod nga kasaligan, nga matuod sa iyang pulong. “Si Jehova sa mga panon nanumpa, nga nagaingon: ‘Sa pagkamatuod ingon sa akong nahunahuna, ingon niana ang mahitabo; ug ingon sa akong gitinguha, mao ang mamatuman.’” (Isaias 14:24) Busa sa dihang ang Bibliya moingon nga “si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay, apan sa pagtagana sa katawhang dili-matarong alang sa adlaw sa paghukom aron pamutlon,” kita bug-os makasalig nga kini mahitabo. (2 Pedro 2:9) Bisan sa dihang nameligrong malaglag pinaagi sa gamhanang mga kaaway, ang mga alagad ni Jehova nagmaisogon tungod sa iyang tinamdan, nga gipabanaag diha sa iyang saad ngadto sa usa sa iyang mga manalagna: “Sila makig-away batok kanimo, apan sila dili makadaog batok kanimo, kay ‘ako magauban kanimo,’ nagaingon si Jehova, ‘sa pagluwas kanimo.’”​—Jeremias 1:19; Salmo 33:18, 19; Tito 1:2.

Mga Kaluwasan sa Nangaging Panahon

19. Sa unsang paagi giluwas ni Jehova si Lot, nga may unsang katugbang niini sa atong panahon?

¹⁹ Kita madasig gayod pinaagi sa pag-asoy sa pipila ka buhat ni Jehova sa pagluwas sa nangaging panahon. Pananglitan, si Lot “nasakit pag-ayo” sa pagkadaotan sa Sodoma ug Gomora. Apan si Jehova nakadungog sa “pagtuaw sa pagreklamo” batok niadtong mga siyudara. Sa tukmang panahon, siya nagpadala ug mga mensahero nga nag-agda kang Lot ug sa iyang pamilya sa paggawas niadtong lugara dihadiha. Ang resulta? “Gipahigawas [ni Jehova] ang matarong nga si Lot,” ‘nga giut-ot ngadto sa pagkaabo ang mga siyudad sa Sodoma ug Gomora.’ (2 Pedro 2:6-8; Genesis 18:20, 21) Karon, usab, si Jehova nakamatikod sa pagtuaw sa pagreklamo bahin niining tuman nga pagkadaotan sa kalibotan. Sa dihang ang iyang modernong-adlawng mga mensahero makatapos na sa ilang dinaliang buluhatong pagsangyaw sa sukod nga buot niya, siya molihok batok niining kalibotana ug magaluwas sa iyang mga alagad sama sa iyang gihimo kang Lot.​—Mateo 24:14.

20. Ibatbat ang pagluwas ni Jehova sa karaang Israel gikan sa Ehipto.

²⁰ Sa karaang Ehipto minilyong katawhan sa Diyos ang naulipon. Si Jehova miingon bahin kanila: “Nadunggan ko ang ilang pagtuaw . . . nahibalo ako sa mga kasakit nga ilang giantos. Ug ako nanaog sa pagluwas kanila.” (Exodo 3:7, 8) Apan, human nga gipagawas ang katawhan sa Diyos, nabag-o ang hunahuna ni Paraon ug gigukod sila uban sa iyang gamhanang kasundalohan. Ang mga Israelinhon daw nababoy diha sa Pulang Dagat. Bisan pa niana si Moises miingon: “Ayaw kahadlok. Barog nga malig-on ug tan-awa ang kaluwasan ni Jehova, nga iyang pagahimoon karon kaninyo.” (Exodo 14:8-14) Gibulag ni Jehova ang Pulang Dagat, ug ang mga Israelinhon nakalingkawas. Ang kasundalohan ni Paraon miagpas kanila, apan gigamit ni Jehova ang iyang gahom nga sa ingon “ang dagat mingtabon kanila; sila nangaunlod samag tingga sa kahiladman sa tubig.” Human niadto, gibayaw ni Moises si Jehova pinaagi sa awit: “Kinsay sama kanimo, nga nagpamatuod sa imong kaugalingon nga gamhanan sa pagkabalaan? Ang Usa nga pagakahadlokan uban sa mga awit sa pagdayeg, ang Usa nga nagahimog mga katingalahan.”​—Exodo 15:4-12, 19.

21. Sa unsang paagi ang katawhan ni Jehova giluwas gikan sa Amon, Moab, ug Seir?

²¹ Sa laing okasyon, ang kaawayng mga nasod nga Amon, Moab, ug Seir (Edom) nanghulga sa katawhan ni Jehova nga pagalaglagon. Si Jehova miingon: “Ayaw kamo kahadlok o kalisang tungod niini nga dakong [kaaway nga] panon; kay ang gubat dili inyo, kondili iya sa Diyos. . . . Kamo dili kinahanglang makig-away . . . Tindog kamo nga walay lihok ug tan-awa ang kaluwasan ni Jehova alang kaninyo.” Giluwas ni Jehova ang iyang katawhan pinaagi sa pagpagubot sa mga pundok sa kaaway nga sa ingon sila nagpinatyanay sa usag usa.​—2 Cronicas 20:15-23.

22. Unsang milagrosong kaluwasan gikan sa Asirya ang gitagana ni Jehova alang sa Israel?

²² Sa dihang ang Asiryanhong Gahom sa Kalibotan miasdang sa Jerusalem, gibiaybiay ni Haring Senacherib si Jehova pinaagi sa pag-ingon sa katawhan diha sa kuta: “Kinsa ba taliwala sa tanang mga diyos niining mga yutaa [nga akong nailog] ang nakaluwas sa ilang yuta gikan sa akong kamot aron nga si Jehova magaluwas sa Jerusalem gikan sa akong kamot?” Ngadto sa mga alagad sa Diyos siya miingon: “Ayaw pagpadala kang Hezekias aron kamo mosalig kang Jehova, nga nagaingon: ‘Sa walay pagkapakyas si Jehova magaluwas kanato.’” Unya si Hezekias tim-os nga nag-ampo alang sa kaluwasan, “aron nga ang tanang gingharian sa yuta makaila nga ikaw, Oh Jehova, mao lamang ang Diyos.” Gipatay ni Jehova ang 185,000 ka sundalong Asiryanhon, ug ang mga alagad sa Diyos nangaluwas. Sa ulahi, samtang nagsimba si Senacherib sa iyang bakak nga diyos, gipatay siya sa iyang mga anak nga lalaki.​—Isaias, kapitulo 36 ug 37.

23. Unsang mga pangutana ang kinahanglang tubagon bahin sa kaluwasan karong adlawa?

²³ Kita tinong makabaton ug kaisog sa dihang makita nato kon sa unsang paagi katingalahang giluwas ni Jehova sa nangaging panahon ang iyang katawhan. Komosta karong adlawa? Ngadto sa unsang makuyawng kahimtang modangat ang iyang matinumanong mga alagad nga nagkinahanglag milagrosong pagluwas? Nganong naghulat pa siya hangtod karon aron sa paghatag sa ilang kaluwasan? Unsang katumanan ang mahinabo unya sa mga pulong ni Jesus: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kapahigawasan nagakaduol na”? (Lucas 21:28) Ug sa unsang paagi ang kaluwasan moabot alang sa mga alagad sa Diyos nga nangamatay na? Tukion sa sunod nga artikulo kining mga pangutanaha.

Mga Pangutana sa Pagrepaso

◻ Nganong adunay dakong panginahanglan alang sa kaluwasan?

◻ Nganong dili kita angay mosalig sa mga tawo alang sa kalawasan?

◻ Alang kang kinsa nga haduol na ang kaluwasan?

◻ Nganong kita makasalig sa kaluwasan ni Jehova?

◻ Unsang mga panig-ingnan sa nangaging mga kaluwasan ang makapadasig?

[Hulagway sa panid 10]

Si Abraham maoy usa niadtong may bug-os nga pagsalig kang Jehova