‘Kita Nanginahanglan ug Matinud-anong mga Tawo’
ANG pagkamatinud-anon maoy talagsaon sa kalibotan karong adlawa. Apan, kini maoy pasukaranang kinahanglanon alang sa mga Kristohanon. Si Pablo misulat: “Buot man namong managgawi mismo nga matinud-anon sa tanang butang.” (Hebreohanon 13:18) Mao kini ang buot buhaton ni Wilma, usa sa mga Saksi ni Jehova sa Faenza, Italya.
Ang mantalaang Il Resto del Carlino nag-asoy nga sa dihang siya nakakaplag ug pitaka nga may sulod nga dakong kantidad sa salapi sa gawas sa usa ka supermarket sa iyang siyudad, iyang gihatag kana ngadto sa polis “nga walay pagpanuko” aron ikauli kadto sa tag-iya niini.
Sa dihang nadunggan kini sa mayor, siya dihadiha nagpadalag mubong sulat sa pasalamat ngadto kang Wilma. “Sa ngalan sa Siyudad,” siya misulat, “ako kinasingkasing nga nagapasalamat kanimo sa imong maayong gibuhat. Ang atong hamiling siyudad sa Faenza nanginahanglan ug maayo ug matinud-anong mga tawo.”
Mahibaloan man o dili ang atong maayong mga buhat, kinahanglang maningkamot kita kanunay nga magmatinud-anon. Ingon sa gitambag sa Balaang Kasulatan, “naningkamot kami sa pagbuhat ug maayo, dili lamang sa panan-aw sa Diyos apan usab sa panan-aw sa mga tawo.”—2 Corinto 8:21, The Jerusalem Bible.