Nagtuo Ka ba sa Reinkarnasyon?
“NAHINUMDOM ka ba sa silingang batang babaye nga imong nagustohan sa nagdako ka pa dinhi sa India?” misulat si Mukundbhai sa iyang anak nga lalaki, usa ka estudyante sa unibersidad sa Tinipong Bansa. “Siya magminyo na sa pipila ka semana. Ako nagtuo nga kinahanglan kang mahibalo.”
Nganong gipaambit sa amahan kining balitaa ngadto sa iyang anak? Kon hunahunaon, si Mukundbhai kusganong nagtapos nianang tin-edyer nga panagtratohay katuigan kanhi. Gawas pa, ang anak didto sa Tinipong Bansa nga nagkuhag mas hataas nga edukasyon sulod sa unom ka tuig. Wala siya makigkomunikar sa babaye sulod nianang panahona, ug si Mukundbhai nahibalo niana.
Nan, nganong nabalaka? Gipakita kana tungod kay si Mukundbhai nagtuo sa reinkarnasyon, o pagkatawo pag-usab.a Kon sulagmang ang tin-edyer nga panagtratohay tali sa duha maoy gumikan kay sila magtiayon sa nangaging kinabuhi, dili maayo nga bulagon sila karon nga anaa na sila sa hustong edad nga magminyo. Buot lamang ni Mukundbhai nga mahibalo ang iyang anak sa situwasyon sa dili pa ang babaye mahimong asawa sa laing tawo niining kinabuhia.
Palandonga ang laing kaso. Usa ka kuwatro-anyos nga batang babaye ang grabeng naospital sa makadaghan sa Mumbai, India. Ang iyang problema mao ang depektosong balbula diha sa iyang kasingkasing. Ang iyang adunahang mga ginikanan naguol nga makitang nag-antos ang bata. Apan sila nangatarongan: “Dawaton nato kini. Siya may nahimo gayod sa iyang nangaging kinabuhi nga takos niini.”
Ang pagtuo sa reinkarnasyon nagadulag hinungdanong papel sa mga kinabuhi sa milyonmilyon sa Hinduismo, Budhismo, Jainismo, Sikismo, ug ubang mga relihiyon nga naggikan sa India. Ang mga kasinatian sa kinabuhi—gikan sa paghigugma ngadto sa grabeng pag-antos—giisip nga mga sangpotanan sa mga buhat nga nahimo sa nangaging kinabuhi o mga kinabuhi.
Daghan sa Kasadpanhong mga nasod naikag usab sa doktrina sa reinkarnasyon. Ang Amerikanang artista nga si Shirley MacLaine nag-angkon nga nagatuo niana. Ang magsusulat nga si Laurel Phelan sa Vancouver, British Columbia, Canada, nag-angkon nga may mga handomanan sa 50 ka nangaging mga kinabuhi. Sa 1994 nga surbi sa Gallup nga gidumala sa CNN/USA Today, kapin sa 270 sa 1,016 ka hamtong ang miangkon nga nagtuo sa reinkarnasyon. Ang pagtuo sa reinkarnasyon maoy bahin usab sa kalihokan sa Bag-ong Panahon. Apan unsang ebidensiya ang nagpaluyo niini nga pagtuo?
“Ang mga handomanan sa nangaging kinabuhi!” nag-ingon ang mga magtutuo sa reinkarnasyon. Busa, sa dihang ang tres-anyos nga si Ratana sa Bangkok nagsugod sa pagpakabaton ug “mga handomanan sa iyang nangaging kinabuhi ingong usa ka relihiyosong babaye nga namatay sa nag-edad siyag mga 60,” kadaghanan sa mga tig-obserbar midawat sa iyang kaso ingong balidong pamatuod sa reinkarnasyon.
Hinunoa, daghan ang nagduhaduha. Ug posible ang ubang mga pagpatin-aw sa mga handomanan nga iya sa nangaging mga kinabuhi.b Sa iyang librong Hinduism: Its Meaning for the Liberation of the Spirit, ang pilosopong Hindu nga si Nikhilananda nag-ingon nga ‘ang mga kasinatian human mamatay dili ikapasundayag pinaagig gahom sa pagsabot.’ Bisan pa niana siya nangangkon nga “ang doktrina sa pagkatawo pag-usab mas posible kay sa imposible.”
Apan gipaluyohan ba sa Bibliya kini nga pagtulon-an? Ug unsay paglaom alang sa mga patay ang gitanyag sa dinasig nga Pulong sa Diyos?
[Mga footnote]
a Ang “reinkarnasyon,” matod sa The New Encyclopædia Britannica, nagpasabot sa “pagkatawo pag-usab sa kalag sa usa o dugang sunodsunod nga mga paglungtad, nga tingali tawo, hayop, o, sa pipila ka kahimtang, utanon.” Ang terminong “pagkatawo pag-usab” gigamit usab sa paghubit niining hitaboa, apan ang pulong “reinkarnasyon” maoy komon nga gidawat. Daghang diksiyonaryo sa pinulongang Indian ang nagbaylobaylo sa paggamit sa mga pulong.
b Tan-awa ang mga panid 5-7 sa Hunyo 8, 1994, nga isyu sa Pagmata!
[Hulagway sa panid 4]
Siya ba gisilotan sa kasal-anan sa nangaging kinabuhi?