Kon Unsaon Pagkakaplag ug Paglaom Taliwala sa Kawalay-Paglaom
HANDURAWA nga ikaw nahiagom sa mosunod nga mga kasinatian: Ang tanan nimong materyal nga mga kabtangan nahanaw, nga naghimo kanimong kabos. Ang imong mga anak—ang kalipay sa imong kinabuhi—nangamatay. Ang imong kapikas wala maghatag kanimog moral nga pagpaluyo. Grabe ang imong sakit. Ang matag adlaw maoy hilabihan nga pag-antos.
Kon kana maoy imong kahimtang sa kinabuhi, aduna ka pa bay katarongan nga magpabiling buhi? O ikaw magpadaog na lamang sa kawalay-paglaom?
Ang subong kahimtang nga bag-o pang gihubit maoy usa ka tinuod-kinabuhing kasinatian ni Job, usa ka tawo nga nabuhi sa panahon sa Bibliya. (Job, mga kapitulo 1, 2) Sa labing makapasubong higayon, si Job mimulo: “Ang akong kalag mibati gayod ug kasilag sa akong kinabuhi.” Buot pa niya ang kamatayon ingong kahupayan. (Job 10:1; 14:13) Apan, bisan pa sa iyang hilabihang pag-antos, gihuptan ni Job ang iyang pagkamaunongon sa Diyos. Busa si Jehova “nagpanalangin sa kataposan ni Job nga labaw pa kay sa iyang sinugdanan.” Busa siya namatay nga malinawon, “tigulang ug natagbaw sa iyang mga adlaw.”—Job 42:12, 17.
Si Job nagpakitag panig-ingnan sa paglahutay nga gidayeg hangtod niining adlawa. Ang iyang mga pagsulay nagpalunsay sa iyang personalidad ug nagdasig sa uban sa maayong binuhatan. (Santiago 5:10, 11) Labaw sa tanan, ang walay-ikasaway nga pagkamaunongon ni Job nakapalipay sa kasingkasing ni Jehova. (Proverbio 27:11) Busa ang usa ka makahahadlok nga damgo sa pag-antos sa kataposan nahimong usa ka dakong kadaogan sa pagkadiyosnon, pagtuo, ug pagkamaunongon nga nagdalag mga panalangin kang Job ug sa tanan niadtong kinsa gipalihok sa iyang panig-ingnan.
Paglaom Luyo sa Nagkalainlaing mga Pagsulay
Ikaw tingali nag-antos sa mga pagsulay nga susama niadtong giantos ni Job. Ang pagkamatay sa usa ka minahal tingali nagpahugno kanimo sa emosyon. Ang grabeng balatian tingalig naghimo sa imong pagkinabuhi nga usa ka masakit nga kasinatian. Ang imong tibuok nga paagi sa kinabuhi daw nabungkag tungod sa makapasubong diborsiyo. Ang mga kalisod sa ekonomiya mahimong nagpakabos kanimo. Ikaw tingali mao ang tumong sa mapintas nga paglutos pinaagi sa madumtanong mga magsusupak sa matuod nga pagsimba. Ang pakigbisog sa pagsagubang sa imong mga pagsulay tingalig mopabati kanimong walay-paglaom ang imong umaabot.—1 Pedro 1:6.
Imbes magpadaog sa kawalay-paglaom, pangutan-a ang imong kaugalingon, ‘Nganong ako nag-antos?’ Ikaw nag-antos tungod kay ikaw nagkinabuhi sa usa ka kalibotan nga “nahimutang diha sa gahom sa tuman-kadaotang usa,” si Satanas nga Yawa. (1 Juan 5:19) Tungod niini, ang tanan nag-antos. Sa usa ka paagi kitang tanan apektado sa gidasig-sa-Yawang pagdumot sa mensahe sa Gingharian, sa dili-mahigugmaong mga pulong sa uban, o sa makalilisang nga mga buhat sa pagkadili-diyosnon nga komon kaayo niining “makuyaw nga mga panahon.”—2 Timoteo 3:1-5.
Kon may makapasubong nahitabo sa imong kinabuhi, ikaw tingali nabiktima sa “panahon ug wala-damhang panghitabo.” (Ecclesiastes 9:11) Sa laing bahin, usahay mahitabo ang dili maayong mga butang sa kinabuhi tungod sa atong kaugalingong napanunod nga kasal-anan. (Roma 5:12) Bisan kon ikaw grabeng nakasala apan naghinulsol ug nangitag espirituwal nga tabang, ayawg batia nga ikaw gisalikway sa Diyos. (Salmo 103:10-14; Santiago 5:13-15) Labaw kang bisan kinsa, siya nagatagad kanato. (1 Pedro 5:6, 7) Ikaw makasalig nga “si Jehova haduol niadtong dugmok ang kasingkasing; ug iyang giluwas kadtong mahinulsolon sa espiritu.” (Salmo 34:18) Bisag unsa pa ka makapasubo o ka grabe ang imong pagsulay, si Jehova makahatag kanimo ug kaalam sa pag-atubang niana. (Santiago 1:5-8) Hinumdomi kanunay nga si Jehova makaayo sa tanang samad. Kon imong nabatonan ang iyang pag-uyon, walay makapugong kanimo sa pagbaton sa ganti nga kinabuhi.—Roma 8:38, 39.
Aduna bay Kaayohan sa Bisan Unsang Pagsulay?
Adunay karaang panultihon nga, “Adunay paglaom ang matag kalisod.” Kana maoy yanong paagi sa pag-ingon nga bisan unsa pa ka daotan ang nahitabo, ikaw kanunayng may katarongan sa paglaom. Ang katuyoan luyo sa tanan nga gisulat sa Pulong sa Diyos maoy aron “kita makabaton ug paglaom.” (Roma 15:4) Walay sapayan kon unsa ka grabe ang imong kahimtang, ang mga saad ug mga prinsipyo sa Bibliya makahatag kanimog nabag-ong kusog ug paglaom.
Gipakita sa Kasulatan nga “ang kasakitan makadiyot ug magaan” kon itandi sa walay kataposang mga panalangin nga gibutang atubangan niadtong kinsa nahigugma sa Diyos. (2 Corinto 4:16-18) Ang Bibliya nagpaila usab nga ang diyosnong mga hiyas nga naugmad taliwala sa mga pagsulay mas dako pag bili kay sa kabantog o materyal nga bahandi. (1 Juan 2:15-17) Busa, bisan ang pag-antos makahatag ug mga kaayohan. (Hebreohanon 5:8) Sa pagkatinuod, ang pagpadapat sa nakat-onan panahon sa mga pagsulay makahatag kanimo ug wala-damhang mga panalangin.
Ang malisod nga pagsulay basin maghimo kanimong mas maluloton. Ikaw modawat tingali nga sa nangagi ikaw may hiyas sa personalidad nga nakapalagot sa uban ug nakapugong pa sa imong espirituwal nga pag-uswag. Tingali kadto maoy sobrang pagsalig. Human gipaubos sa pipila ka katalagman, ikaw kalit nga nakaamgo kon unsa ikaw ka huyang ug unsa ka dako nga ikaw nagkinahanglan sa uban. Kon ang imong pagsulay nagtudlo kanimo nianang leksiyona ug ikaw nakahimog gikinahanglang mga kausaban, kini nakahatag kanimog kaayohan.
Komosta kon, sa nangagi, ang uban nalisdan nga makiglabot kanimo tungod kay ikaw naglisod sa pagpugong sa imong kasuko? Kini tingali nakahatag pa kanimog pipila ka kalisod labot sa imong panglawas. (Proverbio 14:29, 30) Apan, karon ang kahimtang mas miarang-arang kay ikaw nagsalig sa espiritu sa Diyos sa pagtabang kanimo nga ipakita ang pagpugong sa kaugalingon.—Galacia 5:22, 23.
Sama sa uban, ikaw lagmit sa usa ka panahon nawad-ag kahingawa nga magmaluluy-on niadtong nakasala. Apan kon ikaw mismo makasinati sa kahimtang diin gibati nimo ang dakong panginahanglan sa kaluoy, lagmit ikaw karon mas kiling na nga magmaluluy-on ngadto sa uban. Ang makapadasig nga simpatiya, kabalaka, ug kaluoy nga gipakita kanimo nagpaamgo kanimo nga ikaw angayng magpakita sa samang mga hiyas ngadto sa mahinulsolong mga mamumuhat ug daotan. Kon ang imong kasakit nagpalihok kanimo sa pagtul-id niining maong mga kahuyangan sa imong personalidad, kini maoy usa ka kaayohan nga imong nakuha gikan sa imong kasinatian. Imong nakat-onan nga “ang kaluoy nagasadya nga madaogon ibabaw sa paghukom.”—Santiago 2:13; Mateo 5:7.
Komosta kon ang disiplina sa Kristohanong kongregasyon mosangpot sa pagkawala sa imong gipabilhang mga pribilehiyo ug sa pagtahod sa uban? Ayaw pagpadaog sa kawalay-paglaom. Ang pagdisiplina motabang sa paghupot sa kahinlo sa kongregasyon, apan ang mga tumong niini naglakip sa espirituwal nga kapasig-ulian sa mamumuhat ug daotan. Sa pagkatinuod, “walay disiplina ang daw makapangaya sa pagkakaron, kondili makapaguol; apan human niana ngadto kanilang kinsa nabansay pinaagi niini kini magpatunghag madaitong bunga, nga mao, ang pagkamatarong.” (Hebreohanon 12:11) Bisag ang disiplina makapaguol, dili kini magbiya sa nagpaubos mahinulsolong tawo nga walay paglaom. Ang karaang Hari sa Israel nga si David gidisiplinag maayo tungod sa sayop nga binuhatan, apan siya mahinulsolon ug sa ulahi nakadawat ug linaing komendasyon ingong usa ka tawo nga may talagsaong pagtuo.—2 Samuel 12:7-12; Salmo 32:5; Hebreohanon 11:32-34.
Ang pagsulay mahimong may dulot nga epekto sa imong panglantaw. Sa nangagi, ang imong pagtagad mahimong nasentro sa materyalistikong mga tumong ug mga kalamposan nga nakahatag kanimog pag-ila ug sosyal nga baroganan niining kalibotana. Tingali ang pagsulay duyog sa kalisod sa pinansiyal o materyal nga kapildihan nagsentro sa imong mga hunahuna sa mas hinungdanong mga butang. (Itandi ang Filipos 1:10.) Karon imong naamgohan nga ang espirituwal nga mga hiyas ug mga tumong sa sagradong pag-alagad mao lamang ang mga butang nga makahatag sa tinuod nga kalipay ug dumalayong katagbawan.
Salig kang Jehova
Ang pagtanyag ug sagradong pag-alagad kang Jehova mahimong moresulta sa paglutos ug pag-antos sa mga kamot niadtong kinsa mosupak sa imong Kristohanong pagtuo. Bation tingali nimong giyatakan tungod niini nga pagsulay, apan ang kaayohan mosangpot tungod niini. Kini nga pagsulay mahimong magpalig-on sa imong pagtuo. Dugang pa, ang ubang nag-antos sa paglutos tingalig madasig ug mapalig-on sa pagkakita sa imong paglahutay. Ang mga saksing nagpakakita sa imong maayong panggawi tingalig madasig sa paghimaya sa Diyos. Bisan ang imong mga magsusupak mahimong maulaw ug modawat sa imong maayong mga buhat!—1 Pedro 2:12; 3:16.
Aron malikayan ang kawalay-paglaom sa dihang lutoson, ikaw kinahanglang mosalig kang Jehova. Ang iyang Pulong nagpakita nga ang paghupay gikan sa usa ka pagsulay tinong moabot, apan tingalig dili kini moabot ingon ka dali sa imong gusto. Sa kasamtangan, “ayaw pag-undang sa pagbuhat sa husto.” (2 Tesalonica 3:13) Padayon sa pagpangitag mga paagi nga makasagubang sa mga pagsulay ug makalahutay. Bisan sa dihang ang mga butang daw walay-paglaom, “itugyan mo kang Jehova mismo ang imong palas-anon, ug siya mismo magalig-on kanimo. Dili gayod niya pasagdan nga matarog ang matarong.” (Salmo 55:22) Imbes magpadaog sa pagkaluoy sa kaugalingon, hunahunaa ang pagkadako sa imong panalangin nga nakaila kang Jehova, nga adunay dapit taliwala sa iyang katawhan, ug nakabaton sa paglaom sa kinabuhing walay kataposan.—Juan 3:16, 36.
Padayong ipunting ang imong hunahuna sa mga kinahanglanon. Duol kang Jehova kada adlaw diha sa pag-ampo, nga mangayog kusog sa paglahutay. (Filipos 4:6, 7, 13) Isalikway ang bisan unsang mga hunahuna sa pagpanimalos niadtong nagpahinabo sa imong pag-antos. Itugyan ang mga butang diha sa mga kamot ni Jehova. (Roma 12:19) Padayon sa pagpangitag mga paagi sa paglunsay sa imong personalidad, nga mag-ugmad sa Kristohanong mga hiyas. (2 Pedro 1:5-8) Pabilhi ang tanang butang nga nahimo sa uban alang kanimo, lakip sa mga ansiyano nga mahigugmaong nagaatiman sa imong espirituwal nga mga panginahanglan. (Hebreohanon 13:7, 17) Magmatinumanon sa Diyos, ug itutok ang imong mata sa ganti nga kinabuhi, nga masaligon nga bisan ang kamatayon dili makahikaw niana kanimo.—Juan 5:28, 29; 17:3.
Kon ikaw karon nagasinatig dakong kasubo o grabeng mga pagsulay, “salig kang Jehova sa tibuok nimong kasingkasing,” ug ang dagayang kalipay sa ngadtongadto mohulip sa imong kasubo ug kalisdanan. (Proverbio 3:5, 6; Juan 16:20) Ang kaguol pagahulipan ug kalipay sa dihang ang Diyos magapanalangin kanimo ingon sa gibuhat niya kang Job. Ang presenteng-adlaw nga mga pag-antos walay kapuslanan kon itandi sa imong ganti. (Itandi ang Roma 8:18.) Ang imong matinumanong paglahutay makadasig sa uban ug motabang kanimo sa pag-ugmad sa maanindot Kristohanong mga hiyas nga moabot uban “sa bag-ong pagkatawo.” (Efeso 4:23, 24; Colosas 3:10, 12-14) Busa, pagbatog kaisog gikan sa maalamong tambag ni apostol Pedro: “Sila nga mga nagaantos uyon sa kabubut-on sa Diyos papadayona sa pagpiyal sa ilang mga kalag ngadto sa usa ka kasaligan nga Maglalalang samtang sila nagabuhat ug maayo.”—1 Pedro 4:19.
[Hulagway sa panid 23]
Mahisama kang Job. Ayaw wad-a ang paglaom
[Hulagway sa panid 24]
Salig kang Jehova uban sa tibuok nimong kasingkasing