Likayi ang Pagpasangil ug Sayop nga mga Motibo

USA ka iladong ebanghelisador sa telebisyon nagpasangil sa isigkamagwawali nga nakapanapaw. Apan, sulod sa usa ka tuig ang namasangil nga ebanghelisador nasakpan nga nakigdulog ug pampam.

Sa laing kaso, usa ka pangunang gahom sa kalibotan nagpadalag mga emisaryo sa paghaylo sa naggubatay nga mga nasod nga sabotan ang pakigdait. Kasamtangan, ang samang nasod tagong nagpadalag mga negosyante sa mga armas niini ngadto sa langyawng mga nasod aron ibaligya ang binilyong dolyar nga kantidad sa mga armas.

Sanglit ang dayag nga pagkasalingkapaw komon kaayo, ikahibulong ba nga ang pagduhaduha sa dakong bahin naghulip sa pagsalig? Alang sa daghan, ang pagduhaduha sa mga motibo sa uban nahimong naandan.

Ingong mga Kristohanon, kita kinahanglang magbantay nga dili tugotan ang maong mga tinamdan nga makaapektar sa atong relasyon uban sa matinumanong mga isigkamagtutuo. Bisag giawhag kita ni Jesu-Kristo nga ‘magmabinantayon ingon sa mga halas’ samtang anaa taliwala sa atong mga kaaway, siya walay gisulti nga kita angayng magsuspetsa sa iyang matuod nga mga sumusunod. (Mateo 10:16) Busa, unsa ang mga kapeligrohan sa pagpasangil ug sayop nga mga motibo sa uban? Sa unsang mga natad nga kita kinahanglang mag-amping gayod aron malikayan ang maong hilig? Ug sa unsang paagi atong maampingan ang atong bililhong relasyon uban sa mga isigka-Kristohanon?

Usa ka Pagtulon-an sa Nangagi

Ang pagpasangil ug sayop nga mga motibo sa uban nga walay pasikaranan maoy katumbas sa paghukom kanila. Kini ingon sa daw kita nagahimog hinanaling paghukom nga ang ilang mga pulong o mga buhat maoy paglingla lamang nga nagtago sa butang nga daotan ug malisyoso. Sagad ang hinungdan sa problema mao ang sayop nga panglantaw sa mga butang, ingon sa makita sa asoy sa Bibliya nga makaplagan sa Josue kapitulo 22.

Ang mga Israelinhon nakatapos na sa ilang pagpangdaog sa Yutang Saad ug mao pay pagkadawat sa ilang tribonhong mga teritoryo. Ang mga tribo ni Ruben ug Gad ug ang katunga sa tribo ni Manases nagtukod ug “dako kaayong” halaran duol sa Subang Jordan. Ang ubang mga tribo sayop nga naghunahunang kini maoy usa ka buhat sa apostasya. Gituohan nga gamiton sa tulo ka tribo kining dakong tinukod sa paghalad imbes nga moadto sa balongbalong nga tigomanan sa Shilo, ang tinudlong dapit alang sa pagsimba. Dihadiha, ang nag-akusar nga mga tribo nangandam alang sa aksiyong militar.​—Josue 22:​10-12.

Maayo na lang sila nakigkomunikar sa ilang Israelinhong mga igsoon pinaagi sa pagpadalag opisyal nga delegasyon nga gipangunahan ni Finehas. Human makadungog sa mga sumbong sa pagkadili-matinumanon, pag-alsa, ug apostasya batok kang Jehova, ang gituohang nakasalang mga tribo nagpatin-aw sa ilang katarongan alang niining dakong halaran. Inay nga mahimong halaran sa paghalad, kadto nahimong “usa ka saksi” sa panaghiusa sa mga tribo sa Israel sa pagsimba kang Jehova. (Josue 22:​26, 27) Ang delegasyon mipauli nga natagbaw nga walay sayop sa ilang mga igsoon. Busa nalikayan ang sibil nga gubat ug grabeng pagbanaw sa dugo.

Pagkamaayong leksiyon alang kanato nga dili dayon mopasangil ug sayop nga mga motibo sa uban! Sagad ang mopatim-aw nga maorag tinuod sa daling pagtan-aw makaplagan nga bug-os lahi diha sa mas duol nga pagsusi. Tinuod kini diha sa daghang bahin sa kinabuhi sa usa ka Kristohanon.

Atong Panglantaw sa mga Ansiyano

Sa pagtuman sa ilang mga responsabilidad nga “magpastol sa kongregasyon sa Diyos,” usahay makaplagan sa mga ansiyano nga kinahanglang tambagan ang nagkalainlaing mga indibiduwal diha sa kongregasyon. (Buhat 20:28) Pananglitan, unsay atong reaksiyon kon ang usa ka ansiyano makigsulti kanato bahin sa atong mga anak bahin sa mga butang sama sa daotang panagkauban o dili-maayong panggawi uban sa usa nga kaatbang sa sekso? Naghunahuna ba kita nga siya adunay tinagong motibo ug moingon sa atong kaugalingon, ‘Wala gayod siya makaangay sa among pamilya’? Kon tugotan nato ang maong mga pagbati nga mag-impluwensiya kanato, atong basolan kining mga pagbatia sa ulahi. Ang espirituwal nga kaayohan sa atong mga anak mahimong mameligro, ug angay natong pabilhan ang makatabang nga tambag sa Bibliya.​—Proverbio 12:15.

Sa dihang tambagan kita sa usa ka ansiyano sa kongregasyon, dili kita mangita ug pipila ka natagong mga motibo. Hinunoa, atong pangutan-on ang atong kaugalingon kon aduna bay pipila ka paagi nga kita makabenepisyo gikan sa iyang gipasukad-sa-Bibliyang tambag. Si apostol Pablo misulat: “Matuod, walay disiplina ang daw makapangaya sa pagkakaron, kondili makapaguol; apan human niana ngadto kanilang kinsa nabansay pinaagi niini kini magpatunghag madaitong bunga, nga mao, ang pagkamatarong.” (Hebreohanon 12:11) Busa kita magmapasalamaton ug hunahunaon ang mga butang sa positibong paagi. Hinumdomi nga sagad malisod alang sa mga ansiyano ang paghatag ug tambag kanato maingon nga malisod kini alang kanato sa pagdawat.

Pagbati Bahin sa mga Ginikanan

Kon giatubang sa pipila ka mga pagdili sa ginikanan, ang ubang mga batan-on mokuwestiyon sa mga motibo sa ilang mga ginikanan. Ang pipila ka mga batan-on tingali moingon: ‘Nganong ang akong mga ginikanan naghimog daghan kaayong lagda? Dili gayod nila buot nga magpahimulos ako sa kinabuhi.’ Imbes mohimo niana nga konklusyon, hinunoa, kinahanglang palandongon ug maayo sa mga batan-on ang situwasyon.

Ang mga ginikanan migugol ug mga tuig sa pag-atiman sa ilang mga anak. Gihimo kini uban sa dakong pagsakripisyo sa materyal ug sa laing paagi. Aduna bay bisan unsang katarongan ang paghinapos nga sila determinado karon sa paghimo sa kinabuhi sa ilang tin-edyer nga mga anak nga miserable? Dili ba mas makataronganon ang paghunahuna nga ang gugma ang nagdasig niining maong mga ginikanan sa pagpanalipod sa ilang mga anak ug sa pag-atiman kanila? Dili ba ang samang gugma ang mag-agda kanila sa paghimog pipila ka mga pagdili diha sa ilang mga anak, kinsa karon nagaatubang ug bag-ong mga hagit sa kinabuhi? Pagkadi-maluloton ug pagkadi-mapasalamaton unya ang pagpasangil ug sayop nga mga motibo sa mahigugmaong mga ginikanan!​—Efeso 6:​1-3.

Atong Tinamdan sa Kaubang mga Kristohanon

Daghan ang hilig sa paghukom daan sa uban ug paghatag kanilag mapihigong larawan. Komosta kon kita mismo nakabaton niana nga tinamdan ug daw nagsuspetsa sa pipila ka tawo? Kita ba mahimong naimpluwensiyahan sa kalibotan niining bahina?

Pananglitan, tugotan ta nga usa sa atong espirituwal nga mga igsoon nakabatog maanindot nga balay ug mahalong kotse. Angay ba kitang mohinapos dihadiha nga siya usa ka materyalistiko nga wala mag-una sa mga intereses sa Gingharian diha sa kinabuhi? Ang pipila ka Kristohanon tingalig makaarang sa pagpalit ug maayong mga butang, apan kana wala magpasabot nga sila adunay daotang motibo o wala ‘mangita nga una sa gingharian.’ Sila tingali puliki kaayo sa espirituwal nga mga kalihokan, nga mahinatagong nagagamit sa ilang materyal nga mga kabtangan sa pagpalambo sa mga intereses sa Gingharian, tingali sa hilom nga paagi.​—Mateo 6:​1-4, 33.

Ang unang-siglong Kristohanong kongregasyon naglangkob sa mga tawo sa tanang matang​—dato ug pobre. (Buhat 17:​34; 1 Timoteo 2:​3, 4; 6:​17; Santiago 2:5) Ang Diyos dili magbanabana sa mga tawo pinasukad sa ilang pinansiyal nga kahimtang, ug ingon man usab kita. Angay natong mahalon ang atong nasulayan ug maunongong mga isigkamagtutuo, “nga dili magbuhat ug unsa man sumala sa pagkamapihigon.”​—1 Timoteo 5:21.

Niining kalibotana nga nahimutang sa gahom ni Satanas, ang mapihigong paglarawan ug pagsuspetsa gipakita sa nagkalainlaing paagi. Pananglitan, ang usa ka tawo mahimong lantawon nga mapintas o materyalistiko tungod lamang sa iyang kagikan. Ingong mga Kristohanon, hinunoa, kita kinahanglang dili mabiktima sa maong mga tinamdan. Walay dapit sa organisasyon ni Jehova ang pagkahiktin ug hunahuna ug pagsuspetsa. Kinahanglang sundogon sa tanang matuod nga mga Kristohanon ang Diyos nga Jehova, nga kaniya ‘walay pagkadili-matarong o pagkamapihigon.’​—2 Cronicas 19:​7; Buhat 10:​34, 35.

Madasig Pinaagi sa Gugma

Ang Kasulatan yanong nag-ingon nga “ang tanan nakasala ug wala makaabot sa himaya sa Diyos.” (Roma 3:23) Busa angay natong lantawon ang atong mga isigkamagsisimba ingon niadtong nahiusa uban kanato sa pagpaningkamot sa paghatag ug dalawatong pag-alagad kang Jehova. Kon gitugotan nato ang pagsuspetsa o ubang negatibong mga pagbati nga mag-apektar sa atong relasyon uban sa usa ka espirituwal nga igsoong lalaki o babaye, mag-ampo kita alang sa tabang sa Diyos nga suklan ang maong tinamdan aron nga kita dili mabiktima ni Satanas. (Mateo 6:13) Gikombinsir niya si Eva nga si Jehova may daotang mga motibo, nga wala magtagad sa iyang kaayohan, ug wala maghatag ug kagawasan nga maghimo kaniyang tinuod nga malipayon. (Genesis 3:​1-5) Ang atong pagpasangil ug sayop nga mga motibo sa atong mga igsoon nag-alagad sa iyang mga katuyoan.​—2 Corinto 2:​11; 1 Pedro 5:8.

Kon atong namatikdan nga kita may hilig sa pagpasangil ug sayop nga mga motibo sa uban, palandonga ang panig-ingnan ni Jesu-Kristo. Bisag siya maoy hingpit nga Anak sa Diyos, wala siya mangitag sayop nga mga motibo diha sa iyang mga tinun-an. Hinunoa, gilantaw ni Jesus ang maayo diha kanila. Sa dihang giilogan sa iyang mga tinun-an ang posisyon sa pagkainila, wala siya maghunahuna nga sila may daotang mga motibo ug pulihan sila ug 12 ka bag-ong mga apostol. (Marcos 9:​34, 35) Kay dili-hingpit, sila tingali naimpluwensiyahan sa pipila ka paagi sa kultura sa apostatang Judaismo, uban ang pagpasiugda niini sa garbo ug kahimtang sa kinabuhi. Nahibalo si Jesus nga ang pangunang motibo sa iyang mga sumusunod mao ang gugma alang kang Jehova. Tungod sa pagpasundayag niana nga gugma ug sa pagpabilin uban kang Jesus, sila gigantihan pag-ayo.​—Lucas 22:​28-​30.

Kon lantawon nato nga masuspetsahon ang atong matinumanong mga isigkamagtutuo, kini sama sa pagtan-aw sa mga butang pinaagi sa daot nga lente. Walay tinuod gayod nga butang ang makita. Busa kita molantaw pinaagi sa lente sa gugma. Daghan ang pamatuod nga ang maunongong mga isigka-Kristohanon nahigugma kanato ug takos sa atong malulotong konsiderasyon. (1 Corinto 13:​4-8) Busa hinaot nga kita magpakita kanila sa maong gugma ug likayan ang pagpasangil ug sayop nga mga motibo.

[Hulagway sa panid 26]

Unsay imong paglantaw sa uban nga matinumanong nagasimba sa Diyos?

[Hulagway sa panid 27]

Ang pagsalig ug pagtahod nagahimo sa mga Saksi ni Jehova nga usa ka malipayong pamilya