Pagkamatinud-anon Sulagma o pinili?

“BISAG ako walay hilig sa pagkamatinud-anon, ako usahay sulagma nga matinud-anon.” Matod sa usa ka bilyako nga si Autolycus diha sa The Winter’s Tale ni William Shakespeare. Kini nag-ilustrar sa usa ka pangunang kahuyangan sa tawo​—ang atong hilig sa pagbuhat ug daotan, nga maoy resulta sa ‘daotang kasingkasing.’ (Jeremias 17:​9; Salmo 51:​5; Roma 5:12) Apan nagpasabot ba kini nga kita walay kapilian niana? Ang maayong pamatasan ba yanong usa ka butang nga sulagma? Dili gayod!

Sa wala pa mosulod ang mga anak ni Israel sa Yutang Saad, si Moises nakigsulti kanila samtang sila nagkampo sa kapatagan sa Moab. Gibutang niya atubangan kanila ang duha ka tin-awng kapilian. Mahimong sugton nila ang mga sugo sa Diyos ug makadawat sa iyang panalangin o mosalikway niini ug anihon ang mapait nga mga bunga sa sala. (Deuteronomio 30:​15-​20) Sila ang magpili.

Sanglit kita adunay kagawasan sa pagpili, kita usab adunay kapilian. Walay usa​—lakip ang Diyos​—ang makapugos kanato sa pagbuhat ug maayo o sa pagbuhat ug daotan. Apan, ang pipila tingali sa husto mangutana, ‘Kon ang imong kasingkasing hilig sa pagkadaotan, unsaon nato pagbuhat kon unsa ang maayo?’ Aw, ang usa ka dentista mainampingong nagasusi sa ngipon aron makita ang nagipod o nadunot sa dili pa kini modako. Sa susama, kinahanglan natong susihon ang atong mahulagwayong kasingkasing sa pagpangita sa mga kahuyangan ug pagkadunot sa moral. Ngano? Tungod kay “nagagula gikan sa kasingkasing ang tuman-kadaotang mga pangatarongan, mga pagbuno, mga pagpanapaw, mga pakighilawas, mga pagpangawat, bakak nga mga panghimatuod, mga pasipala,” matod ni Jesus.​—Mateo 15:​18-20.

Aron matipigan ang usa ka ngipon, kinahanglang tangtangon nga bug-os sa usa ka dentista ang bisan unsang dunot nga makita. Sa ingon usab, ang mahukmanong lihok gikinahanglan aron mapapas ang “daotang mga pangatarongan” ug daotang mga pangibog gikan sa kasingkasing. Pinaagi sa pagbasa ug pagpamalandong sa Pulong sa Diyos, ang Bibliya, dili lamang kita makaila sa mga dalan sa atong Maglalalang kondili kita usab matabangan sa pagbuhat kon unsa ang matarong.​—Isaias 48:17.

Si Haring David sa Israel nagpahimulos sa iyang kaugalingon sa dugang gikinahanglang tabang sa pagpakigbugno sa pagbuhat kon unsa ang matarong. Siya nag-ampo: “Buhati ako ug usa ka putli nga kasingkasing, Oh Diyos, ug ibutang sa sulod kanako ang usa ka bag-ong espiritu, usa nga malig-on.” (Salmo 51:10) Oo, pinaagi sa mainampoong pagsalig diha kang Jehova nga Diyos, kita usab makabuntog sa atong hilig sa pagbuhat kon unsa ang daotan ug maugmad ang usa ka “bag-ong espiritu” sa pagbuhat sa maayo. Niining paagiha, dili nato itugyan ang pagkamatinud-anon sa sulagma. Usa kini ka butang nga pinili.

[Hulagway sa panid 21]

Sama sa kahimtang ni David, ang pag-ampo ngadto kang Jehova makatabang kanato sa pagbuhat ug maayo