Ang Bibliya—Usa ka Talagsaong Basahon

Gitawag kining ang labing himalitan sa tibuok kalibotan, ug haom gayod. Ang Bibliya gibasa ug gipakahamili nga mas labaw kay sa bisan unsang ubang basahon. Niining tungora, ang pagpanagtag niini (sa bug-os o sa bahin) gibanabana nga upat ka bilyong kopya sa kapin sa 2,000 ka pinulongan.

Apan, labaw pang kahibulongan kay sa sirkulasyon sa Bibliya mao ang pangangkon niini nga ang Diyos maoy awtor. “Ang tanang Kasulatan maoy inspirado sa Diyos,” nagsulat ang Kristohanong apostol nga si Pablo. (2 Timoteo 3:16) Unsay gipasabot niini? Ang pamulong “inspirado sa Diyos” (Grego, the·oʹpneu·stos) sa literal nagkahulogan ug “hinuypan-sa-Diyos.” Ang susamang Gregong pulong, pneuʹma, nagkahulogan ug “espiritu.” Busa, ang pangangkon mao nga ang balaang espiritu sa Diyos nagpalihok sa tawhanong mga magsusulat, nga naghuyop kanila, sa mahulagwayong pagkasulti, aron ang resulta sa pagkamatuod matawag nga Pulong sa Diyos, dili sa tawo. Sa pagkamatuod, daghang nagtuon sa Bibliya nahingangha sa katibuk-ang pagkaharmonya niini, sa siyentipikanhong pagkatukma niini, sa pagkamatinud-anon ug pagkaprangka sa mga magsusulat niini, ug labaw sa tanan, sa nangatuman nga mga tagna niini​—kining tanan nakakombinsir sa minilyong nagahunahunang mga tigbasa nga kining basahona naggikan sa tinubdang mas hataas kay sa tawo.a

Apan unsa ka suod nga gigiyahan sa Diyos ang pagsulat sa Bibliya? Ang uban miingon nga iyang gidiktar ang Bibliya pulong por pulong. Ang uban miingon nga gidasig lamang niya ang mga hunahuna nga makaplagan sa Bibliya, dili ang mga pulong. Hinunoa, sa pagkamatuod, ang pagkadinasig dili malimitahan sa usa ka paagi, tungod kay ang Diyos nagsulti “sa daghang paagi ngadto sa atong mga katigulangan pinaagi sa mga propeta.” (Hebreohanon 1:​1; itandi ang 1 Corinto 12:6.) Sa sunod nga artikulo, atong susihon ang mga paagi nga nakigsulti ang Diyos sa pipila sa 40 ka tawhanong mga magsusulat nga nagsulat sa Bibliya.

[Footnote]