Ikaw Ba Higala sa Diyos?-Kon Unsay Gipadayag sa Imong mga Pag-ampo

IKAW ba sukad dili tinuyong nakadungog sa duha ka tawo nga nag-estoryahay? Sa walay duhaduha imong natino dayon ang matang sa ilang relasyon​—kon sila suod o mga estranyo, magkaila lamang o suod, masaligong mga higala. Sa samang paagi, ang atong mga pag-ampo mahimong magpadayag sa atong relasyon uban sa Diyos.

Ang Bibliya nagpasalig kanato nga ang Diyos “dili halayo gikan sa matag usa kanato.” (Buhat 17:27) Sa pagkatinuod, siya nagadapit kanato nga makaila kaniya. Mahimo gani kitang iyang mga higala. (Salmo 34:​8; Santiago 2:23) Makapahimulos kita ug tinuod nga panagsuod uban kaniya! (Salmo 25:14) Tin-aw, ang atong relasyon uban sa Diyos mao ang labing bililhong butang nga posibleng mabatonan natong dili-hingpit nga mga tawo. Ug gipabilhan ni Jehova ang atong panaghigala. Kini dayag tungod kay ang atong panaghigalaay uban kaniya pinasikad sa atong pagtuo sa iyang bugtong Anak, kinsa naghatag sa iyang kinabuhi alang kanato.​—Colosas 1:​19, 20.

Busa ang atong mga pag-ampo angayng magsumbalik-silaw sa atong lalom nga gugma ug apresasyon alang kang Jehova. Apan, mibati ka ba sukad nga ang imong mga pag-ampo, bisan tuod matinahuron, daw nakulangan sa tinuod nga giladmon sa pagbati? Kasagaran kini. Ang yawi sa pagpauswag sa mga pag-ampo? Ang pagpalambo sa imong panaghigalaay uban kang Jehova nga Diyos.

Pagpangitag Panahon Alang sa Pag-ampo

Una sa tanan, nagkinahanglag panahon ang pagpalambo ug pag-ugmad ug panaghigalaay. Lagmit adlaw-adlaw nimong timbayahon o pakig-estoryahan pa gani ang daghang tawo​—mga silingan, mga kauban sa trabaho, mga drayber sa bus, ug mga tindera. Sa gihapon, wala kini magkahulogan nga ikaw maoy tinuod nga higala nianang mga tawhana. Ang panaghigalaay molambo samtang makig-estorya ka pag-ayo sa usa ka tawo, nga mouswag gikan sa ordinaryong panag-estoryahay ngadto sa pagpahayag sa imong kinasulorang mga pagbati ug mga hunahuna.

Sa susamang paagi, ang pag-ampo makatabang kanato nga mahimong suod kang Jehova. Apan ang igong panahon kinahanglang igugol niana; labi pa ang gikinahanglan kay sa daklit nga pasalamat panahon sa pagpangaon. Kon sige kang makig-estorya kang Jehova, labi pa nimong masusi ang imong kaugalingong mga pagbati, mga motibo, ug mga binuhatan. Ang mga solusyon sa malisod nga mga suliran magsugod sa pagpadayag samtang ang espiritu sa Diyos magpahinumdom sa mga prinsipyo gikan sa iyang Pulong. (Salmo 143:​10; Juan 14:26) Dugang pa, samtang mag-ampo ka, si Jehova mahimong mas tinuod alang kanimo, ug ikaw mahimong labi pang nahibalo sa iyang mahigugmaong interes ug kahangawa kanimo.

Kini ilabina sa dihang ikaw makasinati ug tubag sa imong mga pag-ampo. Aw, si Jehova “makahimo sa pagbuhat ug labaw pa sa labihan kamadagayaon nga lapaw sa tanang butang nga atong ginapangayo o ginahunahuna”! (Efeso 3:20) Wala kini magpasabot nga ang Diyos mohimog mga milagro alang kanimo. Apan, pinaagi sa iyang sinulat nga Pulong, ang mga publikasyon sa kasaligan nga ulipon nga matang, o sa mga baba sa mahigugmaong mga igsoong lalaki ug babaye, siya mahimong magtagana kanimo sa gikinahanglang tambag o direksiyon. O mahimong hatagan ka niya ug kalig-on nga gikinahanglan sa paglahutay o sa pagpakigbisog sa pagsulay. (Mateo 24:​45; 2 Timoteo 4:17) Ang maong mga kasinatian magtugob sa atong mga kasingkasing sa apresasyon alang sa atong langitnong Higala!

Busa ang usa kinahanglang maggahin ug panahon alang sa pag-ampo. Tinuod, ang panahon mubo na lang sulod niining mapit-os nga mga adlaw. Apan sa dihang may tinuod ka nga kahangawa sa usa ka tawo, kasagaran mangita ka ug panahon nga igugol uban nianang tawhana. Matikdi ang paagi nga gipahayag sa salmista ang iyang kaugalingon: “Ingon sa lagsaw nga nangandoy sa kasapaan, mao usab ang akong kalag nangandoy kanimo, Oh Diyos. Ang akong kalag sa pagkatinuod giuhaw sa Diyos, sa Diyos nga buhi. Kanus-a ako moduol ug moatubang sa Diyos?” (Salmo 42:​1, 2) Ikaw ba adunay samang pangandoy nga makigsulti sa Diyos? Nan palita ang panahon sa paghimo niana!​—Itandi ang Efeso 5:16.

Pananglitan, mahimong sulayan nimo pagmata ug sayo sa buntag aron may pribadong panahon sa pag-ampo. (Salmo 119:​147) May mga gabii ba nga dili ka makatulog? Nan, sama sa salmista, mahimo nimong isipon ang maong magubot nga mga panahon ingong kahigayonan sa pagpadayag sa imong mga kabalaka ngadto sa Diyos. (Salmo 63:6) O tingali yanong magtanyag ug daghang mugbo nga mga pag-ampo panahon sa adlaw. Ang salmista nag-ingon sa Diyos: “Kanimo ako kanunayng nagatuaw sa tibuok adlaw.”​—Salmo 86:3.

Pagpauswag sa Kalidad sa Atong mga Pag-ampo

Usahay makaplagan usab nimo nga makatabang ang pagpauswag sa gitas-on sa imong mga pag-ampo. Panahon sa mubo nga pag-ampo, lagmit makiling ka sa paghisgot sa dili importanteng mga butang. Apan sa dihang mamulong ka ug dugay ug dulot nga mga pag-ampo, ikaw mas daling makapahayag sa imong mga hunahuna ug mga pagbati sa kahiladman. Kas-a si Jesus labing menos migugol ug tibuok gabii sa pag-ampo. (Lucas 6:12) Sa walay duhaduha makaplagan nimo nga ang imong kaugalingong mga pag-ampo mahimong mas suod ug makahuloganon kon likayan nimong dalidalion kana.

Wala kini magpasabot ug pagsigeg likoliko sa dihang diyutay lang ang imong isulti; ni nagkahulogan kini ug paggamit sa walay kahulogang pagbalikbalik. Si Jesus nagpasidaan: “Sa dihang mag-ampo, ayawg isulti ang samang mga butang nga pabalikbalik, maingon sa ginahimo sa katawhan sa kanasoran, kay sila nagahanduraw nga dunggon sila tungod sa paggamit nila ug daghang pulong. Busa, ayawg himoa ang inyong kaugalingon nga sama kanila, kay ang Diyos nga inyong Amahan nahibalo kon unsang mga butanga ang inyong gikinahanglan sa dili pa gayod kamo makapangayo kaniya.”​—Mateo 6:​7, 8.

Ang pag-ampo mas makahuloganon sa dihang maghunahuna kang daan kon unsang mga ulohan ang buot nimong hisgotan. Ang mga posibilidad walay kataposan​—atong kalipay diha sa ministeryo, atong mga kahuyangan ug mga kapakyasan, atong mga kahigawad, atong ekonomikanhong mga kabalaka, mga pagpit-os diha sa trabaho o sa tunghaan, ang kaayohan sa atong mga pamilya, ug ang espirituwal nga kahimtang sa atong lokal nga kongregasyon, sa pagngalan lang ug pipila.

Ang imo bang hunahuna usahay mokiling sa paglatagaw sa dihang mag-ampo ka? Nan, paningkamot pa sa pagsentro sa imong pagtagad. Total, si Jehova andam nga ‘mamati sa atong mga pangaliyupo.’ (Salmo 17:1) Dili ba kita magmaandam sa pagpaningkamot pag-ayo nga mamati sa atong kaugalingong mga pag-ampo? Oo, ‘itumong ang imong kaisipan diha sa mga butang sa espiritu,’ ug ayaw tugoting maglatagaw kana.​—Roma 8:5.

Ang paagi nga kita makigsulti kang Jehova hinungdanon usab. Bisag buot niyang isipon nato siyang usa ka higala, dili gayod nato kalimtan nga kita nakigsulti sa Soberano sa uniberso. Basaha ug palandonga ang makalilisang nga esena nga gihulagway sa Pinadayag mga kapitulo 4 ug 5. Didto si Juan nakakita ug panan-awon sa kahalangdon sa Usa nga atong duolon diha sa pag-ampo. Pagkadakong pribilehiyo nga atong nabatonan nga makaduol ug makapakigsulti “sa Usa nga naglingkod sa trono”! Dili gayod nato buot nga ang atong pinulongan mahimong dili matinahuron o walay dignidad. Hinunoa, duyog kitang maningkamot nga himoon ‘ang mga pulong sa atong baba ug ang pagpalandong sa atong kasingkasing nga makapahimuot kang Jehova.’​—Salmo 19:14.

Apan, amgoha nga dili nato mapahimut-an si Jehova pinaagig mapahitas-ong mga sinultihan. Siya mahimuot sa atong matinahuron, kinasingkasing nga mga pahayag, bisan unsa pa ka yano nga kini gipahayag.​—Salmo 62:8.

Paghupay ug Pagsabot sa Panahon sa Panginahanglan

Sa dihang nagkinahanglan kita ug tabang ug paghupay, subsob kitang modangop sa usa ka suod nga higala alang sa pagpaluyo ug simpatiya. Aw, walay higala nga labi pang dali duolon kay kang Jehova. Siya maoy “usa ka tabang nga daling makaplagan sa panahon sa mga kalisdanan.” (Salmo 46:1) Ingong “Diyos sa tanang paghupay,” siya labi pang nakasabot kon unsay atong naagoman kay kang bisan kinsa. (2 Corinto 1:​3, 4; Salmo 5:​1; 31:7) Ug siya adunay tinuod nga empatiya ug kaluoy alang niadtong anaa sa walay paglaom nga mga kahimtang. (Isaias 63:​9; Lucas 1:​77, 78) Ang pag-ila kang Jehova ingong masinabotong higala, mobati kitang makigsulti kaniya nga kinasingkasing, mabination. Kita matukmod sa pagpahayag sa mga kahadlok ug mga kabalaka sa atong kahiladman. Busa kita makasinati mismo kon sa unsang paagi ang iya ni Jehova nga ‘kaugalingong mga paghupay mosugod sa pagpahimuot sa atong kalag.’​—Salmo 94:​18, 19.

Usahay mobati tingali kitang dili takos nga moduol sa Diyos tungod sa atong mga kasaypanan. Apan komosta kon ang usa ka suod nga higala nimo nakasala batok kanimo ug nangayo ug pasaylo? Dili ka ba matukmod sa paghupay ug pagpasalig pag-usab sa maong tawo? Nan, nganong dahomon man nimo ang kaatbang niana kang Jehova? Siya dagayang magapasaylo sa iyang mga higala kinsa nakasala ingong resulta sa tawhanong pagkadili-hingpit. (Salmo 86:​5; 103:3, 8-11) Sa pagkasayod niini, dili kita magpanuko sa bukas nga pagsugid sa atong mga sala ngadto kaniya; makasalig kita sa iyang gugma ug kaluoy. (Salmo 51:17) Kon kita naguol tungod sa atong mga kakulangan, kita mahupay sa mga pulong sa 1 Juan 3:​19, 20: “Pinaagi niini atong mahibaloan nga kita nagagikan sa kamatuoran, ug atong mapasaligan ang atong mga kasingkasing atubangan kaniya bahin sa bisan unsa nga ang atong mga kasingkasing mahimong maghusga kanato, tungod kay ang Diyos mas labaw kay sa atong mga kasingkasing ug nahibalo sa tanang butang.”

Hinunoa, dili kinahanglang maglisod una kita aron mapahimuslan ang mahigugmaong kahangawa sa Diyos. Si Jehova interesado sa bisan unsa nga mahimong mag-apektar sa atong espirituwal ug emosyonal nga kaayohan. Oo, dili gayod kita kinahanglang maghunahuna nga ang atong mga pagbati, mga hunahuna, ug mga kahangawa dili gayod hinungdanon nga dili mahisgotan sa pag-ampo. (Filipos 4:6) Kon ikaw kauban sa usa ka suod nga higala, ginahisgotan ba lamang nimo ang dagkong mga hitabo sa imong kinabuhi? Dili ka ba usab makig-ambit sa medyo gagmayng mga kalihokan? Sa samang paagi, mobati kang libre sa pagpakigsulti mahitungod sa bisan unsang bahin sa imong kinabuhi uban kang Jehova, nga nasayod nga “siya aduna may kahangawa kaninyo.”​—1 Pedro 5:7.

Siyempre, ang usa ka panaghigala lagmit dili magdugay kon ang imo lang hisgotan mao ang imong kaugalingon. Sa susama, ang atong mga pag-ampo dili angayng nakasentro kanunay sa kaugalingon. Angay usab natong ipahayag ang atong gugma ug kahangawa alang kang Jehova ug sa iyang mga intereses. (Mateo 6:​9, 10) Ang pag-ampo dili lamang kahigayonan sa paghangyo ug tabang gikan sa Diyos kondili usa usab ka higayon sa pagsulti ug mga pasalamat ug pagdayeg. (Salmo 34:​1; 95:2) Ang “pagkuha ug kahibalo” pinaagi sa regular personal nga pagtuon motabang kanato niining bahina, sanglit motabang kini kanato nga mahimong mas masinati kang Jehova ug sa iyang mga dalan. (Juan 17:3) Mahimong makaplagan nimong ilabinang makatabang ang pagbasa sa basahon sa Mga Salmo ug matikdan kon sa unsang paagi ang ubang matinumanong mga alagad nagpahayag sa ilang kaugalingon kang Jehova.

Ang pakighigalaay kang Jehova sa pagkatinuod maoy usa ka bililhong gasa. Hinaot nga atong ipakita nga ato kanang giapresyar pinaagi sa paghimo sa atong mga pag-ampo nga mas suod, kinasingkasing, ug personal. Unya atong mapahimuslan ang kalipay nga gipahayag sa salmista, kinsa mipahayag: “Malipayon ang usa nga imong pilion ug paduolon kanimo.”​—Salmo 65:4.

[Hulagway sa panid 28]

Makaampo kita sa Diyos sa tibuok adlaw sumala sa motunghang kahigayonan