Mga Pangutana Gikan sa mga Magbabasa

Nalipay kami sa among pagtuon sa sambingay ni Jesus bahin sa mga karnero ug mga kanding. Tungod niining bag-ong pagsabot nga gipresentar sa “Ang Bantayanang Torre” sa Oktubre 15, 1995, makaingon ba gihapon kita nga ang mga Saksi ni Jehova karong adlawa nakig-ambit sa pagbulagbulag nga buluhaton?

Oo. Masabtan, daghan ang naghunahuna bahin niini tungod kay ang Mateo 25:​31, 32 nag-ingon: “Sa dihang moabot ang Anak sa tawo diha sa iyang himaya, ug ang tanang anghel uban kaniya, niana siya molingkod sa iyang mahimayaong trono. Ug ang tanang kanasoran tigomon atubangan kaniya, ug siya maglain sa katawhan gikan sa usag usa, maingon sa usa ka pastol nga nagalain sa mga karnero gikan sa mga kanding.” Ang Bantayanang Torre sa Oktubre 15, 1995, nagpakita kon nganong kining maong mga bersikulo mapadapat human magsugod ang dakong kasakitan. Si Jesus moabot sa iyang himaya uban sa iyang mga manulonda ug molingkod sa iyang mahimayaong trono sa paghukom. Unya, siya magbulagbulag sa katawhan. Sa unsang diwa? Siya magpahamtang ug mga paghukom pinasikad sa gibuhat sa mga tawo o wala buhata una pa nianang panahona.

Ikatandi nato kini sa kaugmaran sa usa ka legal nga proseso nga motultol ngadto sa usa ka kaso sa korte. Ang ebidensiya matigom latas sa gilugwayang panahon una pa ang korte momando ug mohatag ug hukom. Ang ebidensiya kon ang mga tawo nga buhi karon mamahimong mga karnero o mga kanding natigom na sa dugayng panahon. Ug kini nadugangan pa. Apan sa dihang molingkod si Jesus sa iyang trono, ang kaso makompleto na. Andam na siya sa pagpahamtang ug paghukom. Ang mga tawo bulagbulagon ngadto sa walay-kataposang pagkalaglag o ngadto sa walay-kataposang kinabuhi.

Apan, ang kamatuoran nga ang pagbulagbulag sa mga tawo ngadto sa kinabuhi o sa kamatayon nga gihisgotan sa Mateo 25:​32 maoy sa umaabot pa wala magpasabot nga walay pagbahinbahin, o pagbulagbulag, nga mahitabo una pa niana. Ang Bibliya, sa Mateo kapitulo 13, naghisgot ug usa ka pagbulagbulag nga buluhaton nga mahitabong mas sayo pa. Makaiikag, ang librong Nahiusa sa Pagsimba sa Bugtong Matuod nga Diyos, mga panid 179-80, naghisgot niini ubos sa ulohang “Katawhan Pagabulagbulagon”.a Ang libro nag-ingon: “Aduna usab ing hinungdanong mga hitabo nga gilangkit gayod ni Jesus sa konklusyon sa sistema sa mga butang. Ang usa niini mao ang pagbulag sa ‘mga anak sa gingharian’ gikan sa ‘mga anak sa usa nga daotan.’ Naghisgot si Jesus niini diha sa iyang sambingay bahin sa trigong umahan nga gisapawan-pagsabod sa kaaway ug mga bunglayon.”

Ang libro nagtumong sa ilustrasyon ni Jesus nga gihisgotan sa Mateo 13:​24-30 ug gipatin-aw sa mga bersikulo 36-43. Matikdi sa bersikulo 38 nga ang maayong mga binhi sa trigo naghawas sa mga anak sa Gingharian, apan ang mga bunglayon nagbarog alang sa mga anak sa daotang usa. Ang mga bersikulo 39 ug 40 nagpakita nga sa ‘konklusyon sa sistema sa mga butang’​—ang panahon nga kita nagkinabuhi karon​—ang mga bunglayon tigomon. Sila gilain ug sa kataposan sunogon, laglagon.

Ang ilustrasyon naghisgot bahin sa dinihogang mga Kristohanon (kinsa sa sambingay bahin sa mga karnero ug mga kanding gitawag nga mga igsoon ni Jesus). Sa gihapon, tin-aw ang punto nga ang hinungdanong pagbulagbulag mahitabo gayod sa atong panahon, nga ang mga dinihogan mailhan gikan niadtong nag-angkong mga Kristohanon apan kinsa nagpamatuod sa ilang mga kaugalingon nga “mga anak sa usang daotan.”

Si Jesus nagtagana ug laing mga pananglitan sa katawhan nga gibahinbahin, o gibulagbulag. Hinumdomi nga siya namulong mahitungod sa halapad nga dalan nga motultol ngadto sa kalaglagan: “Daghan ang mga nanagpanulod agi niini.” (Mateo 7:13) Dili kadto komento mahitungod lamang sa kataposang sangpotanan. Kana maoy komento mahitungod sa padayong kaugmaran, maingon nga tinuod usab nga nahitabo karon sa pipila nga nakakaplag sa sigpit nga dalan nga motultol ngadto sa kinabuhi. Hinumdomi, usab, nga sa dihang gipadala ang mga apostol, si Jesus miingon nga sila makakaplag ug pipila nga takos. Ang uban dili takos, ug ang mga apostol magtaktak sa abog sa ilang mga tiil “ingong usa ka pagsaksi batok” sa maong mga tawo. (Lucas 9:5) Dili ba tinuod nga ang susamang butang nagakahitabo samtang ang mga Kristohanon nagabuhat sa ilang publikong ministeryo karong adlaw? Ang uban maayog pagsanong, samtang ang uban mosalikway sa balaang mensahe nga atong ginadala.

Ang mga artikulo sa Ang Bantayanang Torre nga naghisgot bahin sa mga karnero ug mga kanding nag-ingon: “Samtang ang paghukom nga gihisgotan sa sambingay maoy sa haduol pang umaabot, bisan karon usa ka hinungdanong butang ang nagakahitabo. Kitang mga Kristohanon nagapakigbahin sa nagaluwas ug kinabuhing buluhaton sa pagmantala sa mensahe nga nagpahinabog pagkabahinbahin taliwala sa katawhan. (Mateo 10:​32-39).” Sa maong teksto sa Mateo kapitulo 10, atong mabasa nga si Jesus miingon nga ang pagsunod kaniya mahimong hinungdan sa pagkabahinbahin​—amahan batok sa anak lalaki, anak nga babaye batok sa inahan.

Sa kataposan, ang dinihogan sa espiritung mga igsoon ni Kristo nagapanguna sa tibuok-kalibotang pagsangyaw sa mensahe sa Gingharian. Samtang madungog kana sa mga tawo ug mosanong nga paborable o dili-paborable, sila nagpaila sa ilang kaugalingon. Kitang mga tawo dili makaingon, ug dili angayng moingon, ‘Kining tawhana karnero; kana kanding,’ sa diwa nga gipasabot sa Mateo kapitulo 25. Sa gihapon, ang atong pagladlad sa mga tawo ngadto sa maayong balita magtugot kanila sa pagpakita kon hain sila nagabarog​—kon unsa sila ug sa unsang paagi mosanong sila sa mga igsoon ni Jesus. Busa, sama sa nagkadaghan nga ebidensiya alang sa kaso sa korte, ang pagbahinbahin tali niadtong mopaluyo sa mga igsoon ni Jesus ug kadtong modumili sa pagpaluyo kanila nagakadayag. (Malaquias 3:18) Ingon sa gipakita sa Ang Bantayanang Torre, si Jesus sa dili madugay molingkod sa iyang trono ug magpahayag ug paghukom, ang mga tawo unya sa mahukmanong paagi lainlainon sa kataposan ngadto sa kinabuhi o pagkalaglag.

[Mga footnote]