Kon Unsaon Pagbansay ang Imong Tanlag

“ANG hinlong tanlag makapahinanok kanimo.” Kining karaang panultihon nagpasiugda sa hinungdanong kamatuoran: Sa dihang sundon nato ang atong tanlag, kita makapahimulos ug kalinaw ug kaharmonya sa kahiladman.

Apan, dili ang tanan mopili sa paghimo niana. Si Adolf Hitler nagpahayag mismo sa iyang misyon nga hatagag kagawasan ang tawo gikan sa makauulawng hinanduraw, o ilusyon, nga nailhang tanlag. Ang iyang makalilisang nga pagmando nagtagana ug makapaguol nga paghandom kon unsa gayod ka bangis ang mga tawo sa dihang isalikway nila ang ilang tanlag. Hinunoa, susamang walay kaluoy mao ang daghan sa mapintas nga mga kriminal karong adlawa​—kadtong nanagpanglugos ug nanagpamatay nga wala hasola sa tanlag. Ang nagkadaghan niining maong mga kriminal maoy mga bata pa kaayo. Usa ka libro nga nagtuon niining maong talagsaong hitabo sa ingon adunay sub-ulohan nga Children Without a Conscience.

Bisan tuod ang kadaghanang tawo dili gayod maghunahuna nga mohimo ug mapintas nga krimen, daghan ang dili mahasol bahin sa pagpakig-ambit sa seksuwal nga imoralidad, pagpamakak, o pagpanglimbong. Ang mga pamatasan nagakadaot sa tibuok kalibotan. Nga nagtumong sa dakong apostasya gikan sa matuod nga pagsimba, si apostol Pablo misulat nga ang pipila ka Kristohanon magpadala sa mga impluwensiya sa kalibotan ug busa mahimong “minarkahan diha sa ilang tanlag nga ingon ug pinaagi sa binagang puthaw.” (1 Timoteo 4:2) Ang hulga sa pagkadunot misamot pa gani karong adlawa panahon niining “kataposang mga adlaw.” (2 Timoteo 3:1) Busa ang mga Kristohanon kinahanglang maningkamot pag-ayo sa pagpanalipod sa ilang tanlag. Mahimo nato kini pinaagi sa pagbansay ug pag-ugmad niana.

Ang Hunahuna, ang Kasingkasing, ug ang Imong Tanlag

Si apostol Pablo nag-ingon: “Ako nagasulti sa kamatuoran diha kang Kristo; ako wala magapamakak, sanglit ang akong tanlag nagapanaksi uban kanako sa balaang espiritu.” (Roma 9:1) Busa ang tanlag mahimong magasaksi. Kini makasusi sa gisubay nga panggawi ug mouyon o kaha mosaway niini. Kadaghanan sa atong pagbati sa matarong ug daotan gibutang sa atong Maglalalang diha kanato. Sa gihapon, ang atong tanlag mahimong mahulma ug mabansay. Sa unsang paagi? Pinaagi sa atong pagkuha ug tukmang kahibalo gikan sa Pulong sa Diyos. “Mag-usab pinaagi sa pagbag-o sa inyong kaisipan, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos,” matod ni apostol Pablo. (Roma 12:2) Samtang imong itisok ang mga hunahuna ug kabubut-on sa Diyos diha sa imong hunahuna, ang imong tanlag magsugod sa paglihok diha sa labi pa ka diyosnong paagi.

Ang mga Saksi ni Jehova nakatabang sa minilyon sa tibuok kalibotan sa ‘pagkuha ug kahibalo kang Jehova nga Diyos ug kang Jesu-Kristo.’ (Juan 17:3) Pinaagi sa ilang kahikayan sa libre nga pagtuon sa Bibliya sa balay, ilang gitudloan ang matinud-anog kasingkasing nga mga tawo sa mga sukdanan ni Jehova nga Diyos bahin sa sekso, alkoholikong mga ilimnon, kaminyoon, mga pakiglabot sa negosyo, ug daghang ubang mga ulohan.a (Proverbio 11:​1; Marcos 10:​6-12; 1 Corinto 6:​9, 10; Efeso 5:​28-33) Ang pagbaton niining “tukmang kahibalo” maoy hinungdanong lakang sa pag-ugmad ug diyosnong tanlag. (Filipos 1:9) Siyempre, bisan human ang usa ka Kristohanon makabaton ug hamtong nga pagsabot sa Bibliya, kinahanglang magpadayon siya sa pagpakaon sa iyang hunahuna sa Pulong sa Diyos sa regular nga paagi aron magpabiling himsog ang iyang tanlag.​—Salmo 1:​1-3.

Ang Bibliya naglangkit usab sa tanlag uban sa mahulagwayong kasingkasing, nga naglakip sa atong mga pagbati ug mga emosyon. (Roma 2:15) Ang hunahuna ug kasingkasing kinahanglang duyog nga molihok nga magkaharmonya aron ang tanlag molihok sa hustong paagi. Kana nagkahulogan ug labaw pa kay sa pagpasulod ug impormasyon diha sa imong hunahuna. Kinahanglang hulmahon usab nimo ang imong kasingkasing​—imong mga pagbati sa kahiladman, mga tinguha, ug mga pangandoy. Ang basahon sa Proverbio sa ingon naggamit sa mga pahayag sama sa “ikiling ang imong kasingkasing,” “bug-osa ang imong kasingkasing,” ug “mandoi ang imong kasingkasing.” (Proverbio 2:​2; 23:​19; 27:​23) Usa ka paagi sa pagbuhat niana maoy pinaagi sa pagpalandong ug paghunahuna sa Kasulatan. “Mamalandong gayod ako sa tanan mong kalihokan, ug magmapuliki ako sa imong mga buluhaton,” matod sa Salmo 77:12. Ang pagpalandong motabang kanato nga maabot ang atong kinailadmang mga pagbati ug mga motibo.

Ibutang ta, pananglitan, nga ikaw adunay mahugaw nga bisyo sama sa pagkagiyan sa tabako. Sama sa kadaghanang tawo, ikaw sa walay duhaduha nahibalo sa mga kapeligrohan niana sa panglawas. Sa gihapon, bisan pa sa mga pag-aghat sa mga higala ug pamilya, nalisdan ka sa pag-undang. Sa unsang paagi ang pagpalandong sa mensahe sa Bibliya magpalig-on sa imong tanlag niining bahina?

Ingong pananglitan, sulayi pagpalandong ang mga pulong ni apostol Pablo nga makaplagan diha sa 2 Corinto 7:​1: “Busa, sanglit aduna man kita niini nga mga saad, mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa kabalaan diha sa kahadlok sa Diyos.” Sabta ang diwa niining mga pulonga. Pangutan-a ang imong kaugalingon, ‘Unsa ba gayod kining “mga saad” nga gitumong ni Pablo?’ Pinaagi sa pagbasa sa konteksto, ikaw makaobserbar nga ang nag-unang mga bersikulo nag-ingon: “‘“Gumula kamo gikan sa taliwala kanila, ug ilain ang inyong kaugalingon,” nagaingon si Jehova, “ug hunong na sa paghikap sa dili-hinlong butang”’; ‘“ug pasudlon ko kamo.”’ ‘“Ug ako mahimong usa ka amahan kaninyo, ug kamo mahimong mga anak nga lalaki ug mga anak nga babaye kanako,” nagaingon si Jehova nga Labing-Gamhanan.’”​—2 Corinto 6:​17, 18.

Ang sugo ni Pablo nga ‘hinloan ang atong kaugalingon sa tanang kahugawan’ karon adunay dugang puwersa! Ingong gamhanang panukmod sa pagbuhat niana, ang Diyos nagsaad sa ‘pagpasulod kanato,’ nga mao, pagbutang kanato ilalom sa iyang mapanalipdanong pag-atiman. ‘Mapahimuslan ko ba ang suod nga relasyon uban kaniya​—sama nianang sa anak lalaki o babaye uban sa amahan?’ tingali mangutana ka sa imong kaugalingon. Dili ba ang hunahuna nga “pasudlon” o higugmaon sa usa ka maalamon, mahigugmaong Diyos madanihon kaayo? Kon kanang hunahunaa daw dili mapadapat kanimo, matikdi ang paagi nga ang mahigugmaong mga amahan magpahayag ug gugma ug pagbati ngadto sa ilang mga anak. Karon handurawa nga ang maong pagkasuod naglungtad tali kanimo ug ni Jehova! Kon labi pa nimo kanang palandongon, labi pang motubo ang tinguha alang sa maong relasyon.

Apan matikdi: Ang pakigsuod sa Diyos posible lamang kon ikaw ‘mohunong sa paghikap sa dili-hinlong butang.’ Pangutan-a ang imong kaugalingon: ‘Dili ba ang pagkagiyan sa tabako nalakip sa “dili-hinlong mga butang” nga gisaway sa Diyos? Ang paggamit ba niana usa ka “kahugawan sa unod,” nga magladlad sa akong kaugalingon sa tanang matang sa mga kapeligrohan sa panglawas? Sanglit si Jehova maoy hinlo, o “balaan,” nga Diyos, siya ba mouyon sa akong tinuyong paghugaw sa akong kaugalingon niining paagiha?’ (1 Pedro 1:15, 16) Matikdi nga si Pablo nagpasidaan usab batok sa ‘kahugawan sa espiritu sa usa,’ o kiling sa hunahuna. Pangutan-a ang imong kaugalingon: ‘Kini bang maong pagkagiyan nagdominar sa akong panghunahuna? Maningkamot ba ako pag-ayo aron matagbaw ang akong pangandoy, bisan tingalig magpameligro sa akong panglawas, akong pamilya, o bisan sa akong baroganan atubangan sa Diyos? Sa unsang gilapdon nga akong gitugotan ang akong pagkagiyan sa tabako sa pagdaot sa akong kinabuhi?’ Ang pag-atubang niining makapatugaw nga mga pangutana maghatag gayod kanimo sa kaisog nga mohunong!

Siyempre, magkinahanglan ka tingali ug tabang ug pagpaluyo gikan sa uban aron mabuntog ang pagtabako. Sa gihapon, ang pagpalandong sa Bibliya dakog mahimo sa pagbansay ug pagpalig-on sa imong tanlag aron makalingkawas ka sa pagkagiyan.

Sa Dihang Nakabuhat Kita ug Sayop

Bisan pa sa atong pagpaningkamot pag-ayo sa pagbuhat kon unsay matarong, usahay ang atong mga pagkadili-hingpit mobuntog kanato ug kita makasala. Unya ang atong tanlag maghasol kanato, apan mokiling kita nga sulayang dili kana tagdon. O mahimong mahigawad kita pag-ayo nga buot natong mohunong sa tanan natong mga paningkamot sa pag-alagad sa Diyos. Bisan pa niana, hinumdomi ang kaso ni Haring David. Human siya makapanapaw uban kang Batseba, ang iyang tanlag naghasol kaniya. Iyang gihubit ang pag-antos nga iyang gibati: “Sa adlaw ug gabii ang imong kamot nagpabug-at sa ibabaw kanako. Ang kaumog sa akong kinabuhi nailisan ingon sa pagkamala sa ting-init.” (Salmo 32:4) Masakit? Siyempre! Apan kining diyosnong kaguol nagpalihok kang David nga maghinulsol ug mapasig-uli ngadto sa Diyos. (Itandi ang 2 Corinto 7:10.) Ang magul-anong paghangyo ni David alang sa pasaylo naghatag ug daghang pamatuod sa iyang sinserong paghinulsol. Tungod kay siya misanong sa iyang tanlag, si David natabangan ug sa ngadtongadto nakabaton pag-usab sa iyang kangaya.​—Salmo 51.

Ang susama mahitabo karong adlawa. Ang pipila nagtuon sa Bibliya uban sa mga Saksi ni Jehova kaniadto apan mihunong sa dihang ilang nahibaloan nga ang ilang mga kinabuhi wala maharmonya sa hataas nga mga sukdanan sa Diyos. Tingali sila nagkinabuhi kauban sa usa ka membro sa kaatbang nga sekso ug wala makasal o naulipon sa dili-hinlong mga bisyo. Ang ilang tanlag nagsakit kanila!

Kon anaa ka sa maong kahimtang, tagda ang mga pulong ni apostol Pedro sa adlaw sa Pentekostes. Sa dihang iyang giyagyag ang mga sala sa iyang mga Hudiyong kataginasod, “sila nasamdan sa kasingkasing.” Inay mohunong, ilang gisunod ang tambag ni Pedro nga maghinulsol, ug nabatonan nila ang pabor sa Diyos. (Buhat 2:​37-41) Mahimo nimo ang susama! Inay mobiya sa kamatuoran tungod kay ang imong tanlag nagsakit kanimo, pasagdi ang imong tanlag nga mopalihok kanimo sa ‘paghinulsol ug pagtalikod.’ (Buhat 3:19) Uban sa determinasyon ug paningkamot, makahimo ka sa mga kausaban nga gikinahanglan aron mabatonan ang pag-uyon sa Diyos.

“Paghupot ug Maayong Tanlag”

Kon ikaw nagsugod pa lang sa pagtuon sa mga dalan ni Jehova o aduna nay daghang katuigan sa kasinatian ingong hamtong nga Kristohanon, ang tambag ni Pedro maoy tukma: “Paghupot ug maayong tanlag.” (1 Pedro 3:16) Kana maoy kaayohan, dili usa ka kabug-at. Bansaya kana pinaagi sa pagpakaon sa imong hunahuna ug kasingkasing sa kaalam nga anaa sa Pulong sa Diyos, ang Bibliya. Sunda ang imong tanlag sa dihang kana nagpasidaan kanimo. Pahimusli ang pangsulod nga kalinaw sa hunahuna nga ipahinabo sa pagtuman sa tanlag sa usa.

Tinuod, ang pagbansay ug paghulma sa imong tanlag dili sayon nga tahas. Bisan pa niana, ikaw makaampo kang Jehova nga Diyos aron tabangan ka. Pinaagi sa iyang tabang, ikaw makaalagad sa Diyos “gikan sa maayong tanlag ug gikan sa pagtuo nga walay pagkasalingkapaw.”​—1 Timoteo 1:5.

[Mga footnote]

[Hulagway sa panid 6]

Ang pagbasa ug pagpalandong sa Pulong sa Diyos motabang kanato sa pagbansay sa atong tanlag