Mga Magmamantala sa Gingharian Nagtaho

Ang Nagahinlo nga Gahom sa Pulong sa Diyos

GIKATAHO nga kadaghanan sa mga nagiyan sa droga mobalik sa ilang bisyo human mapagawas gikan sa mga sentro sa rehabilitasyon. Apan ang Pulong sa Diyos makapalampos sa kon unsay kasagarang wala mabuhat sa mga klinika. (Hebreohanon 4:12) Daghan ang natabangan sa Pulong ug espiritu sa Diyos aron masumpo ang pagkagiyan sa droga ug ipadapat ang tambag: “Hinloan nato ang atong kaugalingon sa tanang kahugawan sa unod ug espiritu, nga magahingpit sa kabalaan diha sa kahadlok sa Diyos.”​—2 Corinto 7:1.

Kini gihulagway sa usa ka kasinatian gikan sa Myanmar. Ang usa ka tawo nga nakigbisog sa pagkagiyan sa droga sa daghang tuig miasoy: “Nagsugod ang akong pagkagiyan sa droga sa akong pagkatin-edyer. Makadaghan akong misulay nga moundang, apan dili ko makahimo. Aron mapadayon ang akong bisyo sa droga, ako nangawat. Ingong sangpotanan, niadtong 1988, ako nabilanggo sulod sa usa ka tuig.

“Sa dihang ako gipagawas na sa prisohan, ako mibalik sa pagpakigkita sa akong karaang mga higala. Wala magdugay ako mibalik sa akong bisyo sa droga. Kining makalaglag-sa-kaugalingon nga buhat misangpot nga ang mga sakop sa akong pamilya miputol sa ilang tanang pagpakig-uban kanako. Dugang pa, ang akong rebelyosong tinamdan nagpahinabo nga kadaghanan sa komunidad mahadlok kanako, ug sila usab misugod sa paglikay kanako.

“Unya usa ka adlaw nahitabo ang dili kalikayan​—nalabihan akog gamit ug droga. Gibalik ako sa prisohan, nga niining higayona sa sulod na sa tulo ka tuig. Bisan pag ang kinabuhi sa bilanggoan pintas kaayo, sa usa ka paagi nakalahutay ra ako.

“Sa dihang nakapauli na gikan sa prisohan, ako nangayog pasaylo sa akong pamilya tungod sa kanhing mga sayop. Sila maluluy-ong midawat kanako pagbalik, apan sa makausa pa, ang mga higala mihaylo kanako nga mobalik sa akong karaang mga buhat.

“Sa kataposan, ang akong apohang babaye nagrekomendar ngadto sa usa ka lokal nga pastor nga ako patambongon sa usa ka eskuylahan sa Bibliya. Ang pastor miuyon. Apan, sa wala pa ako makasugod sa pagtambong, ang akong iyaan, nga usa sa mga Saksi ni Jehova, miingon nga kon buot ko gayod nga makakat-on sa Bibliya, angay akong magtuon uban sa mga Saksi.

“Miadto ako sa Kingdom Hall ug gipailaila sa usa ka lalaki nga misugot sa pagtuon sa Bibliya uban kanako. Kadaghanan sa tumatambong mainitong mitimbaya kanako ug mipabati nga ako inabiabi.

“Human nga ako makasugod sa pagtuon sa Bibliya ug pagtambong sa Kristohanong mga tigom, ang pangandoy sa droga gipulihan sa pangandoy nga masuod sa Diyos. Usa ka tuig sa ulahi ako miuswag ngadto sa punto nga akong gipahinungod ang akong kinabuhi kang Jehova nga Diyos, ug akong gisimbolohan kana nga pahinungod pinaagi sa pagbawtismo sa tubig.

“Niining bag-o pa, samtang nagduaw sa balay ug balay, akong nahibalag ang usa sa akong karaang mga kauban sa paggamit ug droga. Dili niya masabtan ang akong makapahibulong nga pagkausab. Kini ang mibukas sa pultahan aron makasangyaw, ug ako nakasulti kaniya bahin sa paglaom sa Gingharian.

“Sa kataposan akong nakaplagan ang tinuod nga katuyoan ug kahulogan sa kinabuhi. Salamat sa tabang sa Diyos ug sa tambag gikan sa iyang Pulong, ako karon makatabang na sa uban nga mapalingkawas nila ang ilang kaugalingon mismo sa makapaluyang bisyo sa pag-abuso sa droga.”