Pagbantay sa Bakak nga mga Magtutudlo!
“Aduna unyay bakak usab nga mga magtutudlo taliwala kaninyo.”—2 PEDRO 2:1.
1. Unsay giplano ni Judas nga isulat, ug nganong iyang giusab ang iyang tema?
PAGKAMAKAPAKURAT! Bakak nga mga magtutudlo sa unang-siglong Kristohanong kongregasyon! (Mateo 7:15; Buhat 20:29, 30) Ang igsoon ni Jesus sa inahan nga si Judas nakamatikod niining hitaboa. Siya nag-ingon nga nagplano siya sa pagsulat sa isigkamagtutuo “bahin sa kaluwasan nga gihuptan natong tanan,” apan siya misaysay: “Nakaplagan ko nga kinahanglan kamong sulatan aron sa pag-awhag kaninyo nga kusganong makigbugno alang sa pagtuo.” Nganong giusab ni Judas ang iyang tema? Tungod kay, siya miingon, “adunay mga tawo nga nakayuhot sa sulod [sa mga kongregasyon] . . . nga nagahimo sa dili-takos nga kalulot sa atong Diyos nga katarungan alang sa malaw-ayng panggawi.”—Judas 3, 4.
2. Nganong ang 2 Pedro kapitulo 2 ug Judas kaamgid kaayo?
2 Dayag, si Judas nagsulat human gilayon nga gisulat ni Pedro ang iyang ikaduhang sulat. Si Judas tino nga pamilyar niining sulata. Sa pagkamatuod, siya nagpahayag ug daghang samang mga hunahuna diha sa iyang kaugalingong gamhanang sulat sa pagpanambag. Busa, samtang atong susihon ang 2 Pedro kapitulo 2, atong matikdan nga kini kaamgid gayod sa sulat ni Judas.
Mga Sangpotan sa Bakak nga mga Pagtulon-an
3. Unsay nahitabo sa miagi nga nakaingon si Pedro nga mahitabo pag-usab?
3 Human nga nag-awhag si Pedro sa iyang mga igsoon sa pagpatalinghog sa tagna, siya miingon: “Apan, dihay bakak nga mga propeta [sa karaang Israel] usab, maingon nga aduna unyay bakak usab nga mga magtutudlo taliwala kaninyo.” (2 Pedro 1:14–2:1) Ang katawhan sa Diyos sa karaang panahon nakadawat sa matuod nga tagna, apan sila kinahanglan usab nga makigbisog batok sa dunot nga mga pagtulon-an sa bakak nga mga manalagna. (Jeremias 6:13, 14; 28:1-3, 15) “Diha sa mga manalagna sa Jerusalem,” nagsulat ni Jeremias, “nakita ko ang makalilisang nga mga butang, sila nanapaw ug naglakaw sa mga kabakakan.”—Jeremias 23:14.
4. Nganong takos sa kalaglagan ang bakak nga mga magtutudlo?
4 Nagbatbat sa pagabuhaton sa bakak nga mga magtutudlo diha sa Kristohanong kongregasyon, si Pedro nag-ingon: “Kini sila mismo sa hilom magpasulod ug makalaglag nga mga sekta ug dili-moangkon bisan sa tag-iya [si Jesu-Kristo] nga mipalit kanila, nga magpadangat ug tulin nga kalaglagan diha sa ilang kaugalingon.” (2 Pedro 2:1; Judas 4) Ang kataposang resulta sa unang-siglong sektaryanismo mao ang Kakristiyanohan ingon sa atong pag-ila niini karong adlawa. Gipakita ni Pedro kon nganong ang bakak nga mga magtutudlo angay gayod nga laglagon: “Daghan ang mosunod sa ilang mga buhat sa malaw-ayng panggawi, ug gumikan niini abusaran ug sulti ang dalan sa kamatuoran.”—2 Pedro 2:2.
5. Alang sa unsa nga may tulobagon ang bakak nga mga magtutudlo?
5 Hunahunaa kini! Tungod sa impluwensiya sa bakak nga mga magtutudlo, daghan diha sa mga kongregasyon ang nalangkit sa malaw-ayng panggawi. Ang Gregong pulong nga gihubad “malaw-ayng panggawi” nagkahulogang pagkamapatuyangon, kawalay-pagpugong, kawalay-kaligdong, pagkamahigalon, makauulawng paggawi. Si Pedro miingon sayosayo nga ang mga Kristohanon ‘nakaikyas na gikan sa pagkadunot nga ania sa kalibotan pinaagi sa daotang pangibog.’ (2 Pedro 1:4) Apan ang uban namalik niana nga kadunotan, ug ang bakak nga mga magtutudlo sa mga kongregasyon mao gayod ang manubag! Sa ingon ang dalan sa kamatuoran nag-antos sa pagkadaot sa dungog. Pagkamakasubo! Sa pagkamatuod, usa kini ka butang nga kinahanglang tagdon sa tanang Saksi ni Jehova karong adlawa. Dili gayod nato kalimtan nga, depende sa atong panggawi, kita mahimong makahatag ug kadayeganan kang Jehova nga Diyos ug sa iyang katawhan o kaulawan diha kanila.—Proverbio 27:11; Roma 2:24.
Pagpresentar sa Bakak nga mga Pagtulon-an
6. Unsay nagtukmod sa bakak nga mga magtutudlo, ug sa unsang paagi sila naningkamot sa pagkuha sa ilang gusto?
6 Sa maalamon, atong tagdon kon sa unsang paagi gipresentar sa bakak nga mga magtutudlo ang ilang dunot nga panghunahuna. Si Pedro miingon una nga ilang gihimo kini sa hilom, o dili-mamatikdan, malalangong paagi. Siya midugang: “Uban ang hakog nga kaibog sila magpahimulos kaninyo pinaagig mini nga mga pulong.” Ang hakog nga mga motibo maoy nagtukmod sa bakak nga mga magtutudlo, ingon sa gipasiugda sa pagkahubad diha sa The Jerusalem Bible: “Sila maikagong mosulay sa pagpahimulos kaninyo alang sa ilang kaugalingon pinaagi sa malipotong mga pakigpulong.” Sa susama, ang hubad ni James Moffatt dinhi nag-ingon: “Sa ilang kaulag sila magpahimulos kaninyo pinaagi sa inabtik nga mga pangatarongan.” (2 Pedro 2:1, 3) Ang gipanulti sa bakak nga mga magtutudlo daw makataronganong pamation sa usa nga maluya sa espirituwal, apan ang ilang mga pulong maayo kaayong pagkalaraw aron “sa pagpahimulos” sa mga tawo, nga nagdaldal kanila sa pag-alagad sa hakog nga mga katuyoan sa mga malimbongon.
7. Unsang pilosopiya ang nahimong popular sa unang siglo?
7 Tino, ang unang-siglong bakak nga mga magtutudlo naimpluwensiyahan sa kalibotanong panghunahuna sa maong panahon. Sa panahon sa pagsulat ni Pedro, usa ka pilosopiya nga gitawag ug Gnostisismo nagkapopular. Ang mga Gnostiko nagtuo nga ang tanang butang maoy daotan ug kanang may kalabotan lamang sa espiritu maoy maayo. Busa, ang uban kanila miingon nga walay kaso kon unsay himoon sa tawo sa iyang pisikal nga lawas. Sa ulahi, sila nangatarongan, ang tawo dili makaangkon niini nga lawas. Tungod niini, sila mihinapos, ang lawasnon—lakip ang seksuwal—nga mga sala dili hinungdanon. Dayag, anam-anam nga naimpluwensiyahan sa maong mga panglantaw ang ubang nag-angkong sakop sa Kristiyanidad.
8, 9. (a) Unsang tinuis nga pangatarongan ang nakaapektar sa ubang unang mga Kristohanon? (b) Sumala kang Judas, unsay gihimo sa uban diha sa mga kongregasyon?
8 Usa ka eskolar sa Bibliya nag-ingon nga “may mga sakop sa Iglesya kinsa nagtuis sa doktrina sa grasya,” o “dili-takos nga kalulot.” (Efeso 1:5-7) Matod pa niya, ang pangatarongan sa uban maingon-ingon niini: “Nag-ingon ka ba nga ang [dili-takos nga kalulot] sa Diyos may pagkadagaya nga igong makatabon sa matag sala? . . . Nan magpadayon kita sa pagpakasala, kay ang [dili-takos nga kalulot] sa Diyos makapahid sa matag sala. Sa pagkamatuod kon mas daghan kita ug sala mas daghag purohan nga molihok ang [dili-takos nga kalulot] sa Diyos.” Nakadungog ka ba sukad ug grabeng pagkatuis nga pangatarongan kay niana?
9 Gitubag ni apostol Pablo ang sayop nga panghunahuna bahin sa kaluoy sa Diyos sa dihang siya nangutana: “Magpadayon ba kita diha sa sala, aron ang dili-takos nga kalulot modagaya?” Siya usab nangutana: “Mohimo ba diay kitag sala tungod kay dili kita ilalom sa balaod apan ilalom sa dili-takos nga kalulot?” Sa matag pangutana si Pablo kusganong nagtubag: “Dili gayod unta kana mahitabo!” (Roma 6:1, 2, 15) Matin-aw, ingon sa gipamulong ni Judas, may mga tawo nga “nagahimo sa dili-takos nga kalulot sa atong Diyos nga katarungan alang sa malaw-ayng panggawi.” Apan, si Pedro nag-ingon nga alang niining matanga sa mga tawo ang ‘paglaglag wala mahitagpilaw.’—Judas 4; 2 Pedro 2:3.
Pasidaang mga Panig-ingnan
10, 11. Unsang tulo ka pasidaang mga panig-ingnan ang gihatag ni Pedro?
10 Sa pagpasiugda nga molihok ang Diyos batok sa motuyo sa pagbuhat ug daotan, si Pedro naghatag gikan sa Kasulatan ug tulo ka pasidaang mga panig-ingnan. Una, siya nagsulat: “Ang Diyos wala magpugong sa pagsilot sa mga anghel nga nakasala.” Kini sila, matod pa ni Judas, “wala magpadayon sa paghupot sa ilang orihinal nga pagkabutang hinunoa mitalikod sa ilang kaugalingong angay nga dapit puy-anan” sa langit. Sila nanaog sa yuta sa wala pa ang Lunop ug nagsul-ob ug unodnong mga lawas aron makapakighilawas uban sa mga anak nga babaye sa mga tawo. Ingong silot sa ilang dili-angay, dili-kinaiyanhong panggawi, sila gitambog ngadto sa “Tartaro,” o sumala sa asoy ni Judas, sila “gikatagana uban ang dayon nga mga gapos diha sa naglugitom nga kangitngit alang sa paghukom sa dakong adlaw.”—2 Pedro 2:4; Judas 6; Genesis 6:1-3.
11 Sunod, gihisgotan ni Pedro ang mga tawo sa panahon ni Noe. (Genesis 7:17-24) Siya miingon nga sa panahon ni Noe ang Diyos “wala magpugong sa pagsilot sa usa ka karaang kalibotan . . . dihang nagpadangat siya ug lunop sa usa ka kalibotan sa dili-diyosnong katawhan.” Sa kataposan, si Pedro nagsulat nga ang Diyos “nagbutang ug sumbanan alang sa mga tawong dili-diyosnon labot sa mga butang nga moabot” pinaagi sa “pag-ut-ot ngadto sa pagkaabo sa mga siyudad sa Sodoma ug Gomora.” Si Judas naghatag ug dugang impormasyon nga kadtong mga tawhana “nakighilawas nga mapatuyangon ug nag-agap sa unod alang sa dili-kinaiyanhong gamit.” (2 Pedro 2:5, 6; Judas 7) Ang mga lalaki malaw-ayng nakigsekso dili lamang sa mga babaye kondili napukaw pa ang ilang gana sa unod sa ubang mga lalaki, tingali bisan sa mga unod sa mabangis nga mga mananap.—Genesis 19:4, 5; Levitico 18:22-25.
12. Sumala kang Pedro, sa unsang paagi pagagantihan ang matarong nga paggawi?
12 Apan, sa samang higayon, si Pedro nag-ingon nga si Jehova maoy tighatag ug ganti niadtong matinumanong moalagad kaniya. Pananglitan, iyang giasoy kon sa unsang paagi ang Diyos “mitipig kang Noe, usa ka magwawali sa pagkamatarong, nga hilwas uban sa pito pa” sa dihang Iyang gipadangat ang Lunop. Siya usab nagsugilon bahin sa paghatag ni Jehova ug kaluwasan sa “matarong nga si Lot” sa panahon sa Sodoma, nga mihinapos: “Si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay, apan sa pagtagana sa katawhang dili-matarong alang sa adlaw sa paghukom aron pamutlon.”—2 Pedro 2:5, 7-9.
Mga Buhat nga Takos sa Silot
13. Kinsa ilabina ang gitagana alang sa paghukom, ug unsay ilang gipangdamgo?
13 Gitudlo ni Pedro ang mga tawo nga ilabinang gitagana alang sa paghukom sa Diyos, nga mao, “kadtong mga nagaagap sa unod uban sa tinguha nga hugawan kini ug kinsa ang pagkaginoo ginapakaubos.” Halos atong mabati ang kayugot ni Pedro sa dihang siya miingon: “Mapangahason, mabuoton sa kaugalingon, sila walay pagpangurog sa mga mahimayaon hinunoa nagapamulong nga inabusar.” Si Judas nagsulat nga “kining mga tawhana, . . . nanagpangdamgo, nagahugaw sa unod . . . ug nagapamulong nga inabusar labot sa mga mahimayaon.” (2 Pedro 2:10; Judas 8) May kalabotan tingali ang ilang mga damgo sa mahugawng seksuwal nga mga handurawan nga nagdasig sa ilang pagpangagpas sa imoral nga pagtagbaw sa sekso. Apan, sa unsang diwa nga ilang ‘gipakaubos ang pagkaginoo’ ug “nagapamulong nga inabusar labot sa mga mahimayaon”?
14. Sa unsang diwa nga ang bakak nga mga magtutudlo ‘nagpakaubos sa pagkaginoo’ ug “nagapamulong nga inabusar labot sa mga mahimayaon”?
14 Ilang gihimo kini sa paagi nga gitamay nila ang tinudlo sa Diyos nga awtoridad. Ang Kristohanong mga ansiyano naghawas sa mahimayaong Diyos nga Jehova ug sa iyang Anak ug, tungod niini, gitugahan sila ug himaya. Tinuod, sila masayop, sama kang Pedro mismo, apan ang Kasulatan nag-awhag sa mga sakop sa kongregasyon nga magpasakop sa maong mga mahimayaon. (Hebreohanon 13:17) Ang ilang mga kahuyangan dili katarongan nga pasipad-an sila ug sulti. Si Pedro nag-ingon nga ang mga manulonda wala “magapadangat ug sumbong batok [sa bakak nga mga magtutudlo] sa maabusohong mga pulong,” bisag angay gayod unta kini kaayo. “Apan kini nga mga tawo,” si Pedro nagpadayon, “samag walay-pangatarungang mga hayop nga kinaiyanhong gipanganak aron dakpon ug laglagon, makaagom gayod, sa mga butang nga niini sila mga walay-alamag ug nagapamulong nga inabusar, sa pagkalaglag.”—2 Pedro 2:10-13.
“Samtang Nagakombira Duyog Kaninyo”
15. Unsa ang mga paagi sa bakak nga mga magtutudlo, ug diin sila nagapangdaldal?
15 Bisan pag kining dunot nga mga tawo “nag-isip ingong kalipayan ang maluhong pagkinabuhi panahon sa adlaw” ug “maoy mga buling ug mga lama,” sila usab malalangon. Sila “hilom” nga nagalihok, ginamit ang “mini nga mga pulong,” ingon sa sayosayo nga gipamulong ni Pedro. (2 Pedro 2:1, 3, 13) Mao nga dayag kaayo nilang gihagit ang mga paningkamot sa mga ansiyano sa pagtuboy sa moral nga mga sukdanan sa Diyos o dayag nga nagapangagpas sa ilang pagtagbaw mismo sa sekso. Hinunoa, si Pedro nag-ingon nga sila nakigbahin “sa walay-pugong nga kalipay diha sa ilang malimbongong mga pagtulon-an samtang nagakombira duyog kaninyo.” Ug si Judas nagsulat: “Kini mao ang mga bato nga natago ilalom sa tubig diha sa inyong mga kombira sa gugma.” (Judas 12) Oo, sama nga ang hait nga bato sa ilalom sa tubig makasisi sa sampot sa barko, nga makapalunod sa dili-mabinantayong mga sakayanon, ang bakak nga mga magtutudlo nagpadunot sa mga dili-mabinantayon diin salingkapaw nilang gipakitaan ug gugma sa panahon sa “mga kombira sa gugma.”
16. (a) Unsa ang “mga kombira sa gugma,” ug unsang kaamgid nga kahimtang nga nagalihok ang mga imoral karong adlawa? (b) Ngadto kang kinsa gipunting sa bakak nga mga magtutudlo ang ilang pagtagad, busa unsa ang angay nilang himoon?
16 Tingali kining “mga kombira sa gugma” maoy sosyal nga mga okasyon sa dihang ang unang-siglong mga Kristohanon magsalosalo aron kalipayan ang pagkaon ug pag-ubanay. Ang mga Saksi ni Jehova karong adlawa usab magsalosalo usahay, tingali sa mga bangkete sa kasal, sa mga piknik, o alang sa usa ka pag-ubanay sa gabii. Sa unsang paagi gamiton sa daotang mga indibiduwal kining mga okasyona aron makadaldal ug mga biktima? Si Pedro nagsulat: “Sila adunay mga mata nga puno sa pagpanapaw . . . , ug ilang ginahaylo ang mga mabalhinong kalag.” Ilang ipunting ang ilang “kasingkasing nga nabansay diha sa hakog nga kaibog” sa mga tawong dili-kaayo malig-on sa espirituwal kinsa napakyas sa paghimo sa kamatuoran nga bug-os nga mahimong ilang kaugalingon. Busa pagmatngon sa nahitabo sa panahon ni Pedro, ug pag-amping! Sukli ang bisan unsang mahilayong mga pagbirigbirig, ug ayaw padala sa katahom o sa pisikal nga pagkamadanihon sa tawo nga sa kalaw-ay nagbirigbirig!—2 Pedro 2:14.
“Ang Dalan ni Balaam”
17. Unsa “ang dalan ni Balaam,” ug sa unsang paagi naapektohan niini ang 24,000 ka Israelinhon?
17 Kining mga “tinunglo” dugaydugay nang nahibalo sa kamatuoran. Sila tingali aktibong tan-awon diha sa kongregasyon. Apan si Pedro nag-ingon: “Mibiya sa tul-id nga dalan, sila napahisalaag. Ilang gisunod ang dalan ni Balaam, ang anak nga lalaki ni Beor, kinsa nahigugma sa ganti sa kasaypanan.” (2 Pedro 2:14, 15) Ang dalan ni manalagnang Balaam maoy sa pagtambag sa dalan sa imoral nga pagpangdaldal alang sa iyang kaugalingong kaayohan. Iyang gisultihan ang Moabihanong Haring Balak nga tunglohon sa Diyos ang Israel kon ang mga tawo mahaylo sa pagpakighilawas. Tungod niini, daghan sa katawhan sa Diyos nadaldal sa mga babayeng Moabihanon, ug 24,000 ang gipamatay tungod sa ilang imoral nga panggawi.—Numeros 25:1-9; 31:15, 16; Pinadayag 2:14.
18. Unsa ka malugoton si Balaam, ug sa unsang paagi ang resulta maoy pasidaan sa bakak nga mga magtutudlo?
18 Si Pedro nag-ingon nga napugngan si Balaam sa dihang nakigsulti kaniya ang iyang asno, apan si Balaam “nahigugma [kaayo] sa ganti sa kasaypanan” nga bisan pa sa nahitabo, wala siya mohunong sa iyang ‘binuang nga dalan.’ (2 Pedro 2:15, 16) Pagkadaotan! Alaot ang si bisan kinsa nga sama kang Balaam kinsa maningkamot sa pagpadunot sa katawhan sa Diyos pinaagi sa pagtental kanila sa pagpakigbahin sa imoralidad! Si Balaam namatay sa iyang pagkadaotan, usa ka pagtan-aw-daan sa mahitabo ngadto sa tanan nga mosunod sa iyang dalan.—Numeros 31:8.
Ang Ilang Yawan-ong mga Pagpangdaldal Ngadto sa Pagkadaotan
19, 20. (a) Ngadto sa unsa gitandi ang mga tawong sama kang Balaam, ug ngano? (b) Kinsay ilang gidaldal, ug sa unsang paagi? (c) Nganong makaingon kita nga ang ilang mga pagpangdaldal yawan-on, ug sa unsang paagi atong mapanalipdan ang atong kaugalingon ug ang uban batok kanila?
19 Nagbatbat sa mga tawong sama kang Balaam, si Pedro nagsulat: “Kini sila maoy mga tuboran [o, mga tabay] nga walay tubig, ug mga gabon [o, mga panganod] nga ginahandos sa mabangis nga bagyo.” Alang sa usa ka giuhaw nga biyahedor diha sa desyerto, ang uga nga tabay nagkahulogag kamatayon. Dili ikahibulong nga “ang kaitom sa kangitngit gikatagana” alang niadtong kaamgid sa maong mga butang! “Kay nagapamulong sila ug mga pinaburot nga mga pulong nga walay kapuslanan,” si Pedro nagpadayon, “ug pinaagi sa mga tinguha sa unod ug pinaagi sa malaw-ayng mga batasan ilang ginahaylo silang kinsa igo pa lang nakaikyas gikan sa mga tawo nga nagagawi sa ilang kaugalingon sa kasaypanan.” Ilang ginatental ang walay mga kasinatian pinaagi sa ‘pagsaad kanila ug kagawasan,’ si Pedro nag-ingon, samtang “sila mismo nagalungtad ingon nga mga ulipon sa pagkadunot.”—2 Pedro 2:17-19; Galacia 5:13.
20 Ang mga pagpangdaldal sa maong dunot nga mga magtutudlo maoy yawan-on. Sila tingali moingon, pananglitan: ‘Nahibalo ang Diyos nga kita mahuyang ug daling madala sa kainit sa kailibgon. Busa kon kita makigbahin ug tagbawon ang atong seksuwal nga gana, ang Diyos magmaluluy-on. Kon isugid nato ang atong mga sala, kita iyang pasayloon sama sa iyang pagpasaylo sa dihang kita unang nakadangat sa kamatuoran.’ Hinumdomi nga gigamit sa Yawa ang daw susamang paagi diha kang Eva, nga nagsaad kaniya nga siya makasala nga dili masilotan. Sa kaso ni Eva, giadmitir niya nga ang pagkasala batok sa Diyos mohatag kaniya ug kadan-agan ug kagawasan. (Genesis 3:4, 5) Kon ugaling makasugat kita ug ingon niini ka daotan nga tawo nga nakig-uban sa kongregasyon, kita adunay obligasyon sa pagpanalipod sa atong kaugalingon maingon man sa uban pinaagi sa pagreport sa tawo ngadto sa mga may kaakohan diha sa Kristohanong kongregasyon.—Levitico 5:1.
Gipanalipdan sa Tukmang Kahibalo
21-23. (a) Unsay mga sangpotanan sa pagkapakyas sa pagpadapat sa tukmang kahibalo? (b) Unsang dugang suliran ang hisgotan ni Pedro nga maoy sunod nga pagakonsiderahon?
21 Gitapos ni Pedro kining seksiyona sa iyang sulat pinaagi sa pagbatbat sa mga sangpotanan sa pagkapakyas sa pagpadapat sa kahibalo nga iyang gipamulong sayosayo nga hinungdanon sa “kinabuhi ug sa diyosnong pagkamahinalaron.” (2 Pedro 1:2, 3, 8) Siya nagsulat: “Tino nga kon, human makaikyas gikan sa mga kahugawan sa kalibotan pinaagig tukmang kahibalo sa Ginoo ug Manluluwas nga si Jesu-Kristo, sila malambigit pag-usab niini mismong mga butanga ug mabuntog, ang kataposang kahimtang mahimong mas pang daotan alang kanila kay sa nauna.” (2 Pedro 2:20) Pagkamakapasubo! Kining mga tawhana sa panahon ni Pedro naglabay sa bililhong paglaom sa dili-madunotong kinabuhi sa langit alang sa lakbit nga mga yugto sa pagtagbaw sa sekso.
22 Busa si Pedro nag-ingon: “Mas maayo pa unta alang kanila kon wala nila sa tukma mahibaloi ang dalan sa pagkamatarong kay sa human kini sa tukma mahibaloi mopahilayo gikan sa balaan nga sugo nga gitugyan kanila. Ang mga pulong sa matuod nga panultihon nahitabo kanila: ‘Mibalik ang iro sa kaugalingong suka niini, ug ang naligoan nga anay ngadto sa pagligid sa lapok.’”—2 Pedro 2:21, 22; Proverbio 26:11.
23 Ang laing suliran nga dayag nga nagsugod sa pagkaapektar sa unang mga Kristohanon maoy susama nianang nagaapektar sa uban karong adlawa. Balik niadto, ang uban dayag nga nagreklamo bahin sa daw wala moabot nga gisaad nga presensiya ni Kristo. Atong susihon kon giunsa pagpakiglabot ni Pedro kining butanga.
Nakahinumdom Ka Ba?
◻ Unsang tulo ka pasidaang mga panig-ingnan ang gikutlo ni Pedro?
◻ Sa unsang paagi ang bakak nga mga magtutudlo ‘nagpakaubos sa pagkaginoo’?
◻ Unsa ang dalan ni Balaam, ug sa unsang paagi kadtong nagasubay niini naningkamot sa pagdaldal sa uban?
◻ Unsa ang mga sangpotanan sa pagkapakyas sa pagpadapat sa tukmang kahibalo?
[Hulagway sa panid 17]
Si Balaam nagsilbing usa ka pasidaang panig-ingnan