Magmatinumanon Ka ba Sama Kang Elias?

“Akong ipadala kaninyo si Elias nga manalagna sa dili pa moabot ang dako ug makalilisang nga adlaw ni Jehova.”​—MALAQUIAS 4:5.

1. Unsang kalisod ang nahitabo human nakasulod ang Israel sa Yutang Saad sa mga 500 ka tuig?

“USA ka yuta nga nagaagay sa gatas ug dugos.” (Exodo 3:​7, 8) Mao kanay gihatag ni Jehovah nga Diyos sa mga Israelinhon human nga gihatagan sila ug kagawasan gikan sa pagkaulipon sa Ehipto sa ika-16 nga siglo W.K.P. Apan tan-awa! Lima ka siglo na ang milabay, ug karon ang napulo-ka-tribo nga gingharian sa Israel gihakop sa grabeng kagutom. Lisod makita ang lunhawng sagbot. Ang mga mananap nagakamatay, ug wala gayod makaulan sulod sa tulo ug tunga ka tuig. (1 Hari 18:​5; Lucas 4:25) Unsay nakaingon niini nga katalagman?

2. Unsay hinungdan sa kalisod sa nasod sa Israel?

² Ang apostasya maoy hinungdan niini nga kalisod. Naglapas sa Kasugoan sa Diyos, si Haring Ahab nagminyo sa Canaanhong prinsesa nga si Jezebel ug nagtugot kaniya sa pagpasulod sa pagsimba kang Baal diha sa Israel. Mas grabe pa, siya nagtukod ug templo alang niining bakak nga diyos sa Samaria, ang kaulohang siyudad. Ngani, nadala ang mga Israelinhon sa pagtuo nga ang pagsimba kang Baal makahatag kanilag dagayang ani! Apan, sama sa gipasidaan ni Jehova, sila karon nameligro nga ‘mangawala sa ilang maayong yuta.’​—Deuteronomio 7:​3, 4; 11:​16, 17; 1 Hari 16:​30-​33.

Usa ka Madulaong Pagsulay sa Pagka-Diyos

3. Sa unsang paagi gihatagag pagtagad ni manalagnang Elias ang tinuod nga suliran sa Israel?

³ Sa dihang nagsugod ang kagutom, gisultihan sa matinumanong manalagna sa Diyos nga si Elias si Haring Ahab: “Ingon nga buhi si Jehova nga Diyos sa Israel sa kang kinsang atubangan ako nagtindog, walay yamog ni ulan niining mga tuiga, gawas kon isugo sumala sa akong pulong!” (1 Hari 17:1) Human nakaagom ug makalilisang nga katumanan niining mga pulonga, gibasol sa hari si Elias sa pagkahimo sa Israel nga sinalikway. Apan si Elias mitubag nga si Ahab ug ang iyang panimalay mao ang mabasol tungod sa ilang apostasya ingong mga magsisimba ni Baal. Aron mahusay ang isyu, giawhag sa manalagna ni Jehova si Haring Ahab sa pagtigom sa tibuok Israel ngadto sa Bukid sa Carmelo uban sa 450 ka manalagna ni Baal ug 400 ka manalagna sa sagradong haligi. Si Ahab ug ang iyang mga sakop nagtigom didto, tingali naglaom nga ang maong okasyon magtapos sa hulaw. Apan gihatagag pagtagad ni Elias ang mas dagkong isyu. “Hangtod kanus-a ba,” siya nangutana, “nga magsusapinday kamo taliwala sa duha ka lahi nga mga hunahuna? Kon si Jehova mao ang matuod nga Diyos, sunda siya; apan kon si Baal man, sunda siya.” Ang mga Israelinhon wala mahibalo kon unsay isulti.​—1 Hari 18:​18-21.

4. Aron mahusay ang isyu sa pagka-Diyos, unsay gisugyot ni Elias?

⁴ Sa daghang tuig ang mga Israelinhon misulay sa pagsagol sa pagsimba kang Jehova uban sa Baalismo. Aron mahusay ang isyu sa pagka-Diyos, si Elias karon nagsugyot ug usa ka bangga. Siya mag-andam ug usa ka nati nga laking baka alang sa halad, ug ang lain pa pagaandamon sa mga manalagna ni Baal. Dayon si Elias miingon: “Tawga ninyo ang ngalan sa inyong diyos, ug ako, sa akong bahin, magtawag sa ngalan ni Jehova; ug ang matuod nga Diyos nga magatubag pinaagig kalayo mao ang matuod nga Diyos.” (1 Hari 18:​23, 24) Hunahunaa ang kalayo nga mogula gikan sa langit sa pagtubag sa usa ka pag-ampo!

5. Sa unsang paagi ang pagkawalay-kapuslanan sa pagsimba kang Baal giyagyag?

⁵ Gidapit ni Elias ang mga manalagna ni Baal sa pagsugod. Sila nag-andam ug laking baka alang sa halad ug gibutang kini ibabaw sa halaran. Dayon nagsusapinday sila nga naglibotlibot sa halaran, nga nag-ampo: “Oh Baal, tubaga kami!” Kini nagpadayon “gikan sa buntag hangtod sa udto.” “Kusga ninyo pagsinggit,” si Elias nagbiaybiay. Tingalig okupado kaayo si Baal sa usa ka dinaliang butang, o “tingalig natulog siya ug kinahanglang pukawon!” Ngadtongadto ang mga manalagna ni Baal nangatarantar. Tan-awa! Gisamaran nila ang ilang kaugalingon pinaagig mga kutsilyo, ug ang dugo miagay gikan sa ilang mga samad. Ug pagkagahob gayod sa dihang ang tanang 450 misinggit sa makusog! Apan walay tubag.​—1 Hari 18:​26-29.

6. Unsang pagpangandam ang gihimo ni Elias alang sa pagsulay sa pagka-Diyos?

⁶ Karon turno na ni Elias. Gitukod niya pag-usab ang halaran ni Jehova, nagkalot libot niana, ug naghikay sa halad. Dayon gipabuboan niyag tubig ang kahoy ug ang halad. Napulog duha ka tadyaw sa tubig ang gibubo ibabaw sa halaran hangtod nga napuno ang kanalkanal niini. Handurawa ang kakulba samtang nag-ampo si Elias: “Oh Jehova, ang Diyos ni Abraham, Isaac ug Israel, ipaila niining adlawa nga ikaw ang Diyos sa Israel ug ako ang imong alagad ug pinaagi sa imong pulong nga gihimo ko kining tanang butanga. Tubaga ako, Oh Jehova, tubaga ako, aron kining mga tawhana makahibalo nga ikaw, Jehova, mao ang matuod nga Diyos ug nga gipabalik mo pag-usab ang ilang kasingkasing.”​—1 Hari 18:​30-37.

7, 8. (a) Sa unsang paagi gitubag ni Jehova ang pag-ampo ni Elias? (b) Unsay nahimo sa mga hitabo diha sa Bukid sa Carmelo?

⁷ Sa pagtubag sa pag-ampo ni Elias, ‘ang kalayo ni Jehova nahulog gikan sa langit ug misunog sa iyang halad, sa kahoy, sa mga bato, ug sa abog, ug gitilap ang tubig diha sa kanalkanal.’ Giduko sa mga tawo ang ilang mga nawong ug nanag-ingon: “Si Jehova mao ang matuod nga Diyos! Si Jehova mao ang matuod nga Diyos!” (1 Hari 18:​38, 39) Karon si Elias milihok nga mahukmanon. Siya nagsugo: “Dakpa ang mga manalagna ni Baal! Ayaw tugoting adunay makaikyas kanila!” Human nga sila gipamatay sa walog sa Kison, midulom ang panganod. Sa kataposan, mibundak ang ulan nga nagtapos sa hulaw!​—1 Hari 18:​40-45; itandi ang Deuteronomio 13:​1-5.

⁸ Pagkadako nga adlaw! Si Jehova madaogon niining talagsaong pagsulay sa pagka-Diyos. Dugang pa, kining hitaboa nagliso sa mga kasingkasing sa daghang Israelinhon balik sa Diyos. Niini ug sa ubang mga paagi, si Elias napamatud-ang matinumanong manalagna, ug siya mismo ang nagdula sa usa ka matagnaong papel.

“Si Elias nga Manalagna” Umaabot Pa?

9. Unsay gitagna diha sa Malaquias 4:​5, 6?

⁹ Sa ulahi, pinaagi kang Malaquias, ang Diyos nagtagna: “Tan-awa! Akong ipadala kaninyo si Elias nga manalagna sa dili pa moabot ang dako ug makalilisang nga adlaw ni Jehova. Ug kinahanglang iyang pabalikon ang kasingkasing sa mga amahan ngadto sa mga anak, ug ang mga kasingkasing sa mga anak ngadto sa mga amahan; aron ako dili unya moanhi ug hampakon gayod ang yuta pinaagi sa paglaglag niini.” (Malaquias 4:​5, 6) Si Elias nabuhi duolan sa 500 ka tuig una pa gibungat kadtong mga pulonga. Sanglit usa kini ka tagna, ang mga Hudiyo sa unang siglo K.P. nagpaabot sa pag-abot ni Elias sa pagtuman niana.​—Mateo 17:10.

10. Kinsa ang gitagnang Elias, ug sa unsang paagi kita nahibalo?

¹⁰ Nan, kinsa kining umaabot nga Elias? Napadayag kon kinsa kini siya sa dihang si Jesu-Kristo miingon: “Sukad sa mga adlaw ni Juan nga Bawtista hangtod karon ang gingharian sa mga langit mao ang tumong nga paingon niana nagapakigbisog ang mga tawo, ug ang mga nagapakigbisog ngadto niana nanagpangsakgaw niini. Kay tanan, ang mga Propeta ug ang Balaod, nagpropesiya hangtod kang Juan; ug kon buot ninyong modawat niini, Siya mismo mao ‘si Elias kinsa gikatino nga moabot.’” Oo, si Juan Bawtista mao ang gitagnang katugbang ni Elias. (Mateo 11:​12-14; Marcos 9:​11-13) Gisultihan sa usa ka manulonda ang amahan ni Juan, si Zacarias, nga si Juan makabaton sa “espiritu ug gahom ni Elias” ug “andamon alang kang Jehova ang usa ka inandam nga katawhan.” (Lucas 1:17) Ang bawtismo nga gihimo ni Juan maoy publikong simbolo sa paghinulsol sa usa ka tawo sa iyang mga sala batok sa Kasugoan, nga mag-agak sa mga Hudiyo ngadto kang Kristo. (Lucas 3:​3-6; Galacia 3:24) Sa ingon ang buluhaton ni Juan ‘nag-andam alang kang Jehova ug usa ka inandam nga katawhan.’

11. Sa Pentekostes, unsay giingon ni Pedro bahin sa “adlaw ni Jehova,” ug kanus-a kini nahitabo?

¹¹ Ang buluhaton ni Juan Bawtista ingong “Elias” nagpakita nga ang “adlaw ni Jehova” haduol na. Ang pagkaduol nianang adlawa sa dihang molihok ang Diyos batok sa iyang mga kaaway ug sa pagluwas sa iyang katawhan gipadayag usab ni apostol Pedro. Siya nag-ingon nga ang milagrosong mga hitabo nga nahitabo sa Pentekostes 33 K.P. maoy katumanan sa tagna ni Joel mahitungod sa pagbubo sa espiritu sa Diyos. Si Pedro nagpakita nga kini mahitabo una pa sa “dako ug mabantogong adlaw ni Jehova.” (Buhat 2:​16-21; Joel 2:​28-32) Maoy sa 70 K.P. nga gituman ni Jehova ang iyang Pulong pinaagi sa pagpahinabo sa Romanong kasundalohan sa pagpakanaog sa paghukom sa Diyos diha sa nasod nga wala modawat sa iyang Anak.​—Daniel 9:​24-27; Juan 19:15.

12. (a) Unsay giingon ni Pablo ug Pedro bahin sa umaabot nga “adlaw ni Jehova”? (b) Nganong tino nga adunay mahitabo ingon sa gihawasan sa buluhaton ni Elias?

¹² Apan, duna pay laing butang nga mahitabo human sa 70 K.P. Gilangkit ni apostol Pablo ang umaabot nga “adlaw ni Jehova” uban sa presensiya ni Jesu-Kristo. Dugang pa, naghisgot si apostol Pedro bahin nianang adlawa may kalabotan sa umaabot pa nga “bag-ong mga langit ug usa ka bag-ong yuta.” (2 Tesalonica 2:​1, 2; 2 Pedro 3:​10-13) Hinumdomi nga si Juan Bawtista mihimo ug samag-Elias nga buluhaton una pa moabot ang “adlaw ni Jehova” sa 70 K.P. Kining tanan nagpaila nga aduna pay laing butang nga mahitabo ingon sa gihawasan sa buluhaton nga gihimo ni Elias. Unsa man kana?

Nabatonan Nila ang Espiritu ni Elias

13, 14. (a) Unsay kaamgiran tali sa mga buluhaton ni Elias ug niadtong sa presenteng-adlawng dinihogang mga Kristohanon? (b) Unsay nahimo sa mga apostata sa Kakristiyanohan?

¹³ Ang buluhaton ni Elias dili lamang adunay kaamgiran diha sa mga kalihokan ni Juan Bawtista kondili usab adunay kaamgiran diha niadtong dinihogang mga Kristohanon niining kritikal nga panahon nga motultol ngadto sa umaabot nga “adlaw ni Jehova.” (2 Timoteo 3:​1-5) Uban sa espiritu ug gahom ni Elias, sila maoy maunongong mga tigpaluyo sa matuod nga pagsimba. Ug pagkahinungdanon niini! Human nangamatay ang mga apostoles ni Kristo, dihay apostasya gikan sa matuod nga Kristiyanidad, maingon nga milambo ang pagsimba kang Baal sa Israel sa panahon ni Elias. (2 Pedro 2:1) Ang nag-angkong mga Kristohanon nagsugod sa pagsagol sa Kristiyanidad uban sa bakak nga relihiyosong mga doktrina ug mga batasan. Pananglitan, ilang gisagop ang pagano ug dili-kasulatanhong pagtulon-an nga ang tawo adunay usa ka kalag nga dili mamatay. (Ecclesiastes 9:​5, 10; Ezequiel 18:4) Ang mga apostata sa Kakristiyanohan mihunong sa paggamit sa ngalan sa bugtong matuod nga Diyos, si Jehova. Hinunoa, sila nagasimba sa Trinidad. Ilang gisagop usab ang samag-Baal nga batasan sa pagyukbo sa mga imahen ni Jesus ug sa iyang inahan, si Maria. (Roma 1:​23; 1 Juan 5:21) Apan dili pa kana mao.

¹⁴ Gikan sa ika-19ng siglo paunahan, ang mga lider sa mga iglesya sa Kakristiyanohan nagsugod sa pagpahayag ug mga pagduhaduha sa daghang bahin sa Bibliya. Pananglitan, sila dili motuo sa asoy sa Genesis bahin sa paglalang ug midawat sa teoriya sa ebolusyon, nga nagtawag niini nga “siyentipikanhon.” Kini nagkasumpaki gayod sa mga pagtulon-an ni Jesu-Kristo ug sa iyang mga apostoles. (Mateo 19:​4, 5; 1 Corinto 15:47) Hinunoa, sama kang Jesus ug sa iyang unang mga sumusunod, ang dinihogan-sa-espiritu nga mga Kristohanon karong adlawa nagpasidungog sa asoy sa Bibliya bahin sa paglalang.​—Genesis 1:27.

15, 16. Sukwahi sa Kakristiyanohan, kinsay nagpahimulos sa regular nga mga tagana sa espirituwal nga pagkaon, ug pinaagi sa unsa?

¹⁵ Samtang ang kalibotan misulod sa “panahon sa kataposan,” usa ka espirituwal nga kagutom ang mihakop sa Kakristiyanohan. (Daniel 12:​4; Amos 8:​11, 12) Apan gipahimuslan sa gamayng pundok sa dinihogang mga Kristohanon ang regular nga mga tagana sa hinatag-sa-Diyos nga espirituwal nga pagkaon “sa hustong panahon,” sama nga gitino ni Jehova nga si Elias makakaon sa panahon sa kagutom sa iyang adlaw. (Mateo 24:45; 1 Hari 17:​6, 13-16) Nailhan niadto ingong International Bible Students, kining matinumanong mga alagad sa Diyos sa ulahi midawat sa Kasulatanhong ngalang Mga Saksi ni Jehova.​—Isaias 43:10.

¹⁶ Si Elias nagkinabuhi sumala sa iyang ngalan, nga nagkahulogang “Si Jehova ang Akong Diyos.” Ingong opisyal nga basahon sa yutan-ong mga alagad ni Jehova, Ang Bantayanang Torre kanunayng nagagamit sa ngalan sa Diyos. Sa pagkatinuod, ang ikaduhang gula niini (Agosto 1879) nagpahayag ug pagsalig nga si Jehova mao ang tigpaluyo niining magasina. Kining basahona ug ang ubang mga publikasyon sa Watch Tower Society nagyagyag sa dili-kasulatanhong mga pagtulon-an sa Kakristiyanohan ug sa nahibilin sa Dakong Babilonya, ang kalibotanong imperyo sa bakak nga relihiyon, samtang nagapasidungog sa pagkatinuod sa Pulong sa Diyos, ang Bibliya.​—2 Timoteo 3:​16, 17; Pinadayag 18:​1-5.

Matinumanon Ubos sa Pagsulay

17, 18. Unsay reaksiyon ni Jezebel sa pagpamatay sa mga manalagna ni Baal, apan sa unsang paagi natabangan si Elias?

¹⁷ Ang reaksiyon sa mga klero sa pagyagyag kaamgid nianang kang Jezebel sa dihang nakahibalo nga gipapatay ni Elias ang mga manalagna ni Baal. Siya nagpadala ug mensahe ngadto sa matinumanong manalagna ni Jehova, nanganti nga ipapatay niya si Elias. Tinuod kini nga hulga, kay si Jezebel nakapatay na ug daghang manalagna sa Diyos. Tungod sa kahadlok, si Elias mikalagiw pahabagatan-kasadpan ngadto sa Ber-sheba. Gibilin ang iyang sulugoon didto, siya miadto pa sa layo, ngadto sa kamingawan, nga nag-ampo nga mamatay. Apan wala pasagdi ni Jehova ang iyang manalagna. Usa ka manulonda nagpakita kang Elias sa pagpaandam kaniya alang sa dugayng panaw ngadto sa Bukid sa Horeb. Tungod niana siya nakadawat ug kalan-on alang sa 40-ka-adlaw nga panaw nga kapin sa 300 ka kilometros. Sa Horeb, nakigsulti kaniya ang Diyos human sa usa ka katingalahan kaayong pasundayag sa gahom pinaagi sa usa ka dakong hangin, usa ka linog, ug kalayo. Si Jehova wala diha niini nga mga pagpasundayag. Kini maoy mga ekspresyon sa iyang balaang espiritu, o aktibong gahom. Dayon si Jehova nakigsulti sa iyang manalagna. Hunahunaa kon unsa ka makapalig-on kining hitaboa kang Elias. (1 Hari 19:​1-12) Komosta kon kita, sama kang Elias, daw mahadlok kon hulgaon sa mga kaaway sa matuod nga pagsimba? Ang iyang kasinatian angayng motabang kanato sa pagkaamgo nga si Jehova dili gayod mobiya sa iyang katawhan.​—1 Samuel 12:22.

¹⁸ Gitin-aw ug maayo sa Diyos nga si Elias aduna pay buluhaton nga pagahimoon ingong manalagna. Dugang pa, bisan tuod naghunahuna si Elias nga siya lamang ang magsisimba sa matuod nga Diyos sa Israel, gipakitaan siya ni Jehova nga adunay 7,000 nga wala magsimba kang Baal. Dayon gipabalik sa Diyos si Elias sa iyang asaynment. (1 Hari 19:​13-18) Sama kang Elias, kita tingali gukdon sa mga kaaway sa matuod nga pagsimba. Kita tingali mahimong tumong sa grabeng paglutos, ingon sa gitagna ni Jesus. (Juan 15:​17-20) Usahay, kita tingali magpanuko. Apan, kita mahimong sama ni Elias, kinsa nakadawat ug mga pasalig sa Diyos ug dayon matinumanong milahutay sa pag-alagad kang Jehova.

19. Unsay naagoman sa dinihogang mga Kristohanon sa panahon sa Gubat sa Kalibotan I?

¹⁹ Tungod sa grabeng paglutos panahon sa Gubat sa Kalibotan I, ang ubang dinihogang mga Kristohanon nagpadaog sa kahadlok ug mihunong sa pagsangyaw. Sila nasayop sa paghunahuna nga ang ilang buluhaton sa yuta natapos na. Apan wala sila isalikway sa Diyos. Hinunoa, siya maluluy-ong naglig-on kanila, sama sa iyang pagtaganag pagkaon alang kang Elias. Sama kang Elias, ang matinumanong mga dinihogan midawat sa pagtul-id sa Diyos ug naulian gikan sa pagkawalay-buhat. Ang ilang mga mata nabuksan sa dakong pribilehiyo sa pagsangyaw sa mensahe sa Gingharian.

20. Karon, unsang pribilehiyo ang gihatag ngadto sa mga matinumanon nga sama kang Elias?

²⁰ Diha sa iyang tagna bahin sa iyang presensiya, gilatid ni Jesus ang tibuok-kalibotan nga buluhaton nga pagataposon una pa matapos kining daotang sistema sa mga butang. (Mateo 24:14) Karon, kini nga buluhaton ginahimo sa dinihogang mga Kristohanon ug sa ilang minilyong kauban nga nagapaabot ug kinabuhi diha sa usa ka paraisong yuta. Ang pagtuman niining buluhaton sa pagsangyaw sa Gingharian hangtod kini matapos maoy usa ka pribilehiyo nga gihatag lamang ngadto sa mga matinumanon sama kang Elias.

Magmatinumanon Sama Kang Elias

21, 22. (a) Unsang buluhaton sa dinihogang mga Kristohanon ang ginahimo karon? (b) Pinaagi sa unsang tabang ginahimo ang buluhatong pagsangyaw, ug nganong gikinahanglan kini?

²¹ May kadasig nga sama kang Elias, ang gamayng nahibilin sa matuod nga dinihogang mga Kristohanon nakatuman sa ilang responsibilidad sa pag-atiman sa yutan-ong mga intereses sa naentronong Hari, si Jesu-Kristo. (Mateo 24:47) Ug kapin sa 60 na ka tuig karon, gigamit sa Diyos kining mga dinihogan sa pagpanguna sa buluhaton sa paghimog mga tinun-an sa katawhan nga kanila iyang gihatag ang katingalahang paglaom sa kinabuhing dayon diha sa usa ka paraisong yuta. (Mateo 28:​19, 20) Pagkamapasalamaton niining minilyon nga ang diyutay na lang nga nahibiling mga dinihogan madasigon ug matinumanong nagatuman sa ilang mga responsibilidad!

²² Kining buluhaton sa pagsangyaw sa Gingharian ginahimo sa mga tawong dili-hingpit ug diha lamang sa kusog nga ihatag ni Jehova ngadto sa mainampoong mosalig kaniya. “Si Elias usa ka tawo nga may mga pagbating sama sa atoa,” miingon ang tinun-ang Santiago sa dihang nagkutlo sa panig-ingnan sa pag-ampo sa manalagna sa pagpakita sa gahom sa pag-ampo sa usa ka tawong matarong. (Santiago 5:​16-18) Si Elias wala sa tanang panahon nanagna o naghimog mga milagro. Siya adunay samang tawhanong mga pagbati ug mga kahuyangan sa atoa, apan siya matinumanong nag-alagad sa Diyos. Sanglit kita usab adunay tabang sa Diyos ug siya maglig-on kanato, kita mahimong magmatinumanon sama kang Elias.

23. Nganong may maayo kitang katarongan sa pagkamatinumanon ug pagkamalaomon?

²³ Kita adunay maayong katarongan sa pagkamatinumanon ug pagkamalaomon. Hinumdomi nga gihimo ni Juan Bawtista ang samag-Elias nga buluhaton una pa miabot ang “adlaw ni Jehova” sa 70 K.P. Uban sa espiritu ug gahom ni Elias, ang dinihogang mga Kristohanon nakahimo sa samang hinatag-sa-Diyos nga buluhaton sa tibuok yuta. Kini tin-awng nagpamatuod nga ang dakong “adlaw ni Jehova” haduol na.

Unsay Imong Tubag?

◻ Sa unsang paagi ang pagka-Diyos ni Jehova napamatud-an sa Bukid sa Carmelo?

◻ Kinsa ang ‘umaabot nga Elias,’ ug unsay iyang gihimo?

◻ Sa unsang paagi ang presenteng-adlawng dinihogang mga Kristohanon nagpakita nga sila nakabaton sa espiritu ni Elias?

◻ Nganong posible nga kita mahimong magmatinumanon sama kang Elias?