Kinsay Maluwas “sa Adlaw ni Jehova”?

“Unsa gayong matanga sa mga tawo angay nga kamo mao diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug kanunayng ginahuptan nga duol sa hunahuna ang pagkaanaa sa adlaw ni Jehova!”​—2 PEDRO 3:11, 12.

1. Kinsay nakaalagad uban sa espiritu ug gahom ni Elias?

SI Jehova nga Diyos nagpili gikan sa taliwala sa katawhan ug mga indibiduwal nga mahimong kaubang mga manununod sa iyang Anak, si Jesu-Kristo, sa langitnong Gingharian. (Roma 8:16, 17) Samtang dinhi pa sila sa yuta, ang dinihogang mga Kristohanon nag-alagad uban sa espiritu ug gahom ni Elias. (Lucas 1:17) Diha sa nag-unang artikulo, atong nahibaloan ang pipila ka kaamgiran tali sa ilang mga buluhaton ug niadtong buluhaton sa manalagnang Elias. Apan unsay ikasulti bahin sa buluhaton sa manununod ni Elias, ang manalagnang Eliseo?​—1 Hari 19:15, 16.

2. (a) Unsa ang kataposang milagro ni Elias, ug unsa ang unang milagro ni Eliseo? (b) Unsay pamatuod nga si Elias wala mokayab sa langit?

² Ang kataposang milagro nga gihimo ni Elias mao kadtong pagbahin sa mga tubig sa Subang Jordan pinaagi sa pagbunal niini uban sa iyang opisyal nga sapot. Tungod niini si Elias ug Eliseo nakatabok sa mala nga yuta. Samtang nanglakaw sila sa sidlakang tampi sa suba, gidala si Elias sa usa ka alimpulos ngadto sa laing lugar sa yuta. (Tan-awa ang kahon sa panid 15 nga nag-ulohang “Hain nga Langit Mikayab si Elias?”) Nabilin ang opisyal nga sapot ni Elias. Sa dihang gigamit kini ni Eliseo sa paghampak sa Jordan, ang mga tubig niini nabahin pag-usab, nga nakapabalik kaniya sa mala nga yuta. Natin-aw niining milagroha nga si Eliseo nahimong manunod ni Elias sa pagpalambo sa matuod nga pagsimba sa Israel.​—2 Hari 2:6-15.

Diyosnong mga Hiyas Hinungdanon

3. Unsay giingon ni Pablo ug Pedro bahin sa presensiya ni Jesus ug “sa adlaw ni Jehova”?

³ Mga siglo human sa mga adlaw ni Elias ug Eliseo, gilangkit sa mga apostoles nga si Pablo ug Pedro ang umaabot nga “adlaw ni Jehova” uban sa presensiya ni Jesu-Kristo ug unya sa umaabot-niadto nga “bag-ong mga langit ug usa ka bag-ong yuta.” (2 Tesalonica 2:1, 2; 2 Pedro 3:10-13) Aron maluwas sa dakong adlaw ni Jehova​—sa dihang laglagon sa Diyos ang iyang mga kaaway ug luwason ang iyang katawhan​—kinahanglan natong pangitaon si Jehova ug magpakitag pagkamaaghop ug pagkamatarong. (Sofonias 2:1-3) Apan ang ubang dugang mga hiyas madayag samtang atong susihon ang mga hitabo labot kang manalagnang Elias.

4. Unsay bahin sa kadasig diha sa pag-alagad kang Jehova?

⁴ Ang kadasig sa pag-alagad sa Diyos hinungdanon aron kita maluwas “sa adlaw ni Jehova.” Si Elias ug Eliseo madasigon sa pag-alagad kang Jehova. Nga adunay samang kadasig, ang nahibilin sa dinihogang mga Kristohanon karong adlawa naghatag ug balaang pag-alagad kang Jehova ug nagapanguna sa pagsangyaw sa maayong balita.a Sukad sa tungatunga sa katuigang 1930, ilang nadasig ang tanan niadtong midawat sa mensahe sa Gingharian ug naglaom nga mabuhi sa walay kataposan sa yuta sa pagpahinungod sa ilang kaugalingon kang Jehova ug nagpabawtismo. (Marcos 8:34; 1 Pedro 3:21) Minilyon ang mauyonong misanong niini nga pagdasig. Kaniadto sila anaa sa espirituwal nga kangitngit ug patay diha sa sala, apan karon sila nakakat-on sa kamatuoran sa Diyos, midawat sa paglaom sa kinabuhing dayon diha sa usa ka yutan-ong paraiso, ug nagmadasigon sa pag-alagad kang Jehova. (Salmo 37:29; Pinadayag 21:3-5) Pinaagi sa ilang kadasig, kooperasyon, pagkamaabiabihon, ug ubang maayong mga binuhatan, sila naghatag ug dakong kalagsik sa espirituwal nga mga igsoon ni Kristo nga ania pa sa yuta.​—Mateo 25:31-46.

5. Nganong hinungdanon kaayo ang paghimog maayong mga butang alang sa “mga igsoon” ni Jesus, ug unsay atong panig-ingnan gikan sa mga adlaw ni Eliseo?

⁵ Kadtong nagahimog maayong mga butang alang sa “mga igsoon” ni Jesus tungod kay kining mga dinihogan maoy iyang mga sumusunod adunay paglaom nga maluwas “sa adlaw ni Jehova.” Usa ka magtiayon sa balangay sa Shunem gipanalanginan ug maayo tungod sa pagkamaluloton ug pagkamaabiabihon kang Eliseo ug sa iyang katabang. Kini nga magtiayon walay anak, ug tigulang na ang bana. Apan gisaaran ni Eliseo ang babayeng Shunamihanon nga siya manganak ug usa ka anak nga lalaki, ug kini nahitabo. Sa dihang kining bugtong anak namatay sa milabay ang pipila ka tuig, si Eliseo miadto sa Shunem ug gibanhaw siya. (2 Hari 4:8-17, 32-37) Pagkadakong ganti sa pagpakitag pagkamaabiabihon kang Eliseo!

6, 7. Unsang panig-ingnan ang gihatag ni Naaman, ug unsay kalabotan niini sa pagkaluwas “sa adlaw ni Jehova”?

⁶ Ang pagkamapainubsanon gikinahanglan sa pagdawat sa pinasukad-sa-Bibliya nga pagtultol gikan sa “mga igsoon” ni Kristo uban sa paglaom nga maluwas sa adlaw ni Jehova. Ang sanlahong hepe sa kasundalohang Siryanhon nga si Naaman kinahanglang magpakitag pagkamapainubsanon sa pagsunod sa sugyot sa usa ka binihag nga Israelinhong batang babaye ug magpatambal pinaagi sa pag-adto sa Israel sa pagpangita kang Eliseo. Imbes mogawas sa iyang balay sa pagsugat kang Naaman, gipadad-an siya ni Eliseo niini nga mensahe: “Maligo ka pito ka higayon sa Jordan aron maulian ang imong unod; ug mamahinlo.” (2 Hari 5:10) Ang garbo ni Naaman natandog, ug siya nasuko, apan human nga siya mapainubsanong miadto ug milusbog sa Jordan pito ka higayon, ang “iyang unod naulian sama sa unod sa gamayng bata ug siya nahinlo.” (2 Hari 5:14) Sa wala pa mopauli, si Naaman mibiyahe ug balik sa Samaria sa pagpasalamat sa manalagna ni Jehova. Determinado nga dili pahimuslan sa materyal nga paagi ang hinatag-sa-Diyos nga gahom, gitagbo ni Eliseo si Naaman apan dili modawat ug bisan unsang mga gasa. Mapainubsanong gisultihan ni Naaman si Eliseo: “Ang imong alagad dili na magahalad ug mga halad nga sinunog o mohalad pa sa laing diyos apan kang Jehova.”​—2 Hari 5:17.

⁷ Pinaagi sa mapainubsanong pagsunod sa Kasulatanhong tambag sa mga dinihogan, minilyon ang dagayang gipanalanginan karon. Dugang pa, pinaagi sa pagpasundayag ug pagtuo sa halad lukat ni Jesus, kining mga matinud-anon-ug-kasingkasing nahinloan sa espirituwal. Ilang gipahimuslan karon ang pribilehiyo sa pagkahimong mga higala ni Jehova nga Diyos ug ni Jesu-Kristo. (Salmo 15:1, 2; Lucas 16:9) Ug ang ilang debosyon ngadto sa Diyos ug sa pag-alagad kaniya pagagantihan sa ilang pagkanaluwas gikan sa walay kataposang kalaglagan nga hapit nang modangat sa mapahitas-on, dili-mahinulsolong mga makasasala sa kusog nga nagkaduol nga “adlaw ni Jehova.”​—Lucas 13:24; 1 Juan 1:7.

“Kinsay Dapig Kanako? Kinsa?”

8. (a) Kadtong mangaluwas “sa adlaw ni Jehova” adunay unsang tinamdan sa pagtuman sa kabubut-on sa Diyos? (b) Unsang sugo ang gihatag kang Jehu? (c) Unsay nahitabo kang Jezebel?

⁸ Kadtong nagalaom nga maluwas “sa adlaw ni Jehova” kinahanglan usab nga determinado sa pagtuman sa kabubut-on sa Diyos. Maisogong gitagna ni Elias ang kalaglagan sa mamumuno, nagasimba-kang-Baal nga pamilya ni Haring Ahab. (1 Hari 21:17-26) Apan, sa wala pa ipakanaog kini nga silot nga kamatayon, kinahanglang taposon sa manununod ni Elias nga si Eliseo ang usa ka wala pa matapos nga buluhaton. (1 Hari 19:15-17) Sa dihang miabot ang tinudlo nga panahon ni Jehova, gisugo ni Eliseo ang usa ka katabang sa pag-adto ug sa pagdihog sa hepe sa kasundalohan nga si Jehu ingong bag-ong hari sa Israel. Human gibuboan ug lana ang ulo ni Jehu, giingnan siya sa mensahero: “Kini ang gipamulong ni Jehova nga Diyos sa Israel, ‘Dihogan ko ikaw ingong hari ibabaw sa katawhan ni Jehova, sa ato pa, ibabaw sa Israel. Ug kinahanglang pagalaglagon mo ang balay ni Ahab nga imong agalon, ug kinahanglang panimaslan ko ang dugo sa akong mga alagad nga mga manalagna ug ang dugo sa tanang alagad ni Jehova diha sa kamot ni Jezebel. Ug ang tibuok panimalay ni Ahab kinahanglang mahanaw.’” Ang daotang Raynang Jezebel igalabog ngadto sa mga iro ug walay tarong nga paglubong.​—2 Hari 9:1-10.

9, 10. Sa unsang paagi ang mga pulong ni Elias natuman sa kahimtang ni Jezebel?

⁹ Ang kasundalohan ni Jehu midawat nga tinuod gayod ang pagdihog kaniya ug giproklamar siya nga bag-ong hari sa Israel. Milihok dihadiha, dalidaling mipaingon si Jehu sa Jezreel sa pagsugod sa iyang buluhaton sa pagpatay sa apostatang mga dakodako sa pagsimba kang Baal. Ang una nga naigo sa pana ni Jehu sa pagpatay mao ang anak nga lalaki ni Ahab, si Haring Joram. Siya nagkabayo pagawas sa siyudad sa pagpangutana kon si Jehu miabot alang sa usa ka misyon sa pakigdait. “Unsa nga pakigdait ang maanaa samtang nagapadayon ang mga pagpakighilawas sa imong inahan nga si Jezebel ug sa iyang daghang diwatahan?” mitubag si Jehu. Niana, ang pana ni Jehu mitaop sa kasingkasing ni Joram.​—2 Hari 9:22-24.

¹⁰ Ang diyosnong mga babaye maglikay nga mahisama kang Jezebel o kang bisan kinsa nga sama kaniya. (Pinadayag 2:18-23) Sa dihang miabot si Jehu sa Jezreel, siya nagpaanyag ug maayo. Mitambo gikan sa bentana, iyang gisugat siya nga dalang panghulga. Iyang gipangutana ang iyang mga sulugoon: “Kinsay dapig kanako? Kinsa?” Dihadiha, duha o tulo ka opisyales sa palasyo nanambo. Dapig ba sila kang Jehu? “Ihulog siya!” si Jehu miawhag. Niana, sila milihok dihadiha, gihulog ang daotang Jezebel sa bentana. Siya gitamaktamakan, lagmit sa mga tiil sa kabayo. Sa dihang ang mga tawo miabot sa paglubong kaniya, ‘sila walay nakit-an gawas sa iyang bagolbagol ug mga tiil ug mga palad sa iyang mga kamot.’ Pagkamakapaukyab nga katumanan sa pulong ni Elias: “Kaonon sa mga iro ang unod ni Jezebel”!​—2 Hari 9:30-37.

Kinasingkasing nga Pagpaluyo sa Matuod nga Pagsimba

11. Kinsa si Jehonadab, ug sa unsang paagi iyang gipakita ang iyang pagpaluyo sa matuod nga pagsimba?

¹¹ Kadtong naglaom nga maluwas “sa adlaw ni Jehova” ug mabuhing walay kataposan sa yuta kinahanglang bug-os-kasingkasing nga magapaluyo sa matuod nga pagsimba. Sila kinahanglang mahisama kang Jehonadab, o Jonadab, usa ka dili-Israelinhong magsisimba ni Jehova. Samtang nagpadayon si Jehu sa pagtuman sa iyang sugo uban ang kadasig, buot ipakita ni Jehonadab ang iyang pag-uyon ug pagpaluyo. Busa siya miadto sa pagsugat sa bag-ong hari sa Israel, kinsa mipaingon sa Samaria sa pagpatay sa mga nahibilin sa panimalay ni Ahab. Sa pagkakita kang Jehonadab, si Jehu nangutana: “Matarong ba ang imong kasingkasing uban kanako, ingon sa akong kasingkasing uban sa imong kasingkasing?” Ang positibong tubag ni Jehonadab nagpalihok kang Jehu sa pagtunol sa iyang kamot ug sa pagdapit kang Jehonadab sa iyang karo nga iggugubat, nga nag-ingon: “Dali uban kanako ug tan-awa ang akong dili-pagtugot nga si Jehova adunay kaparang.” Sa walay langan, gidawat ni Jehonadab ang pribilehiyo sa pagpakita sa iyang pagpaluyo alang sa dinihogang maglalaglag ni Jehova.​—2 Hari 10:15-17.

12. Nganong si Jehova may katungod sa pagpangayo ug bug-os nga debosyon?

¹² Ang kinasingkasing nga pagpaluyo sa matuod nga pagsimba angay gayod, kay si Jehova mao ang Maglalalang ug Soberano sa Uniberso, nga may katungod sa pagpangayo ug takos sa atong bug-os nga debosyon. Iyang gisugo ang mga Israelinhon: “Dili ka gayod magbuhat ug usa ka larawan nga linilok o usa ka dagway sa bisan unsang butang nga atua sa mga langit sa itaas o kanang ania dinhi sa ilalom sa yuta o kanang anaa sa katubigan sa ilalom sa yuta. Dili ka gayod moyukbo kanila ni mag-alagad kanila, tungod kay ako si Jehova nga imong Diyos mao ang Diyos nga nagapangayo ug bug-os nga debosyon.” (Exodo 20:4, 5) Kadtong nagalaom nga maluwas “sa adlaw ni Jehova” kinahanglang mosimba kaniya lamang, nga magasimba pinaagi “sa espiritu ug kamatuoran.” (Juan 4:23, 24) Sila kinahanglang malig-on alang sa matuod nga pagsimba, sama kang Elias, Eliseo, ug Jehonadab.

13. Maingon nga ang kasingkasing ni Jehonadab anaa uban kang Jehu, kinsa kadtong nagadawat sa Mesiyanikong Hari, ug sa unsang paagi gipasundayag nila kini?

¹³ Human sa paglaglag sa panimalay ni Ahab, si Haring Jehu mihimog laing mga lakang aron mailhan ang mga magsisimba ni Baal ug sa pagwagtang niining bakak nga relihiyon sa Israel. (2 Hari 10:18-28) Karon, ang langitnong Hari nga si Jesu-Kristo gitudlo sa pagpatay sa mga kaaway ni Jehova ug sa pagbindikar sa Iyang pagkasoberano. Maingon nga ang kasingkasing ni Jehonadab anaa uban kang Jehu, ang “dakong panon” sa “ubang mga karnero” ni Jesus karong adlawa bug-os-kasingkasing nga nagadawat kang Kristo ingong Mesiyanikong Hari ug nakigkooperar sa iyang espirituwal nga mga igsoon sa yuta. (Pinadayag 7:9, 10; Juan 10:16) Sila naghatag ug pamatuod niini pinaagi sa pagtuman sa matuod nga relihiyon ug madasigong makigbahin sa Kristohanong ministeryo, nga pasidan-an ang mga kaaway sa Diyos sa hapit nang moabot nga “adlaw ni Jehova.”​—Mateo 10:32, 33; Roma 10:9, 10.

Madulaong mga Hitabo nga Anaa Lamang sa Unahan!

14. Unsay anaa sa unahan alang sa bakak nga relihiyon?

¹⁴ Si Jehu milihok sa pagtapos sa pagsimba kang Baal sa Israel. Sa atong adlaw, pinaagi sa Dakong Jehu, si Jesu-Kristo, ipadangat sa Diyos ang kalaglagan sa Dakong Babilonya, ang kalibotanong imperyo sa bakak nga relihiyon. Makita unya nato sa dili madugay ang katumanan sa mga pulong sa usa ka manulonda ngadto kang apostol Juan: “Ang napulo ka sungay nga imong nakita, ug ang mapintas nga mananap, kini sila magadumot sa bigaon [Dakong Babilonya] ug magahimo kaniya nga pinayhag ug hubo, ug magakaon sa iyang unod nga mga bahin ug magaugdaw kaniya pinaagi sa kalayo. Kay gibutang kini sa Diyos sa ilang mga kasingkasing aron buhaton ang iyang hunahuna, gani aron buhaton ang ilang usa ka hunahuna pinaagi sa paghatag sa ilang gingharian ngadto sa mapintas nga mananap, hangtod nga ang mga pulong sa Diyos matuman na.” (Pinadayag 17:16, 17; 18:2-5) “Ang napulo ka sungay” naglarawan sa militarisadong politikanhong mga gahom nga nagmando sa yuta. Bisag sila karon adunay mananapawon nga relasyon sa espirituwal nga paagi uban sa Dakong Babilonya, ang iyang panahon mubo na. Laglagon sa politikal nga elemento niining kalibotana ang bakak nga relihiyon, ug “ang mapintas nga mananap”​—ang Hiniusang Kanasoran​—adunay dakong papel uban sa “napulo ka sungay” sa paglaglag kaniya.b Pagkatalagsaong higayon sa pagdayeg kang Jehova!​—Pinadayag 19:1-6.

15. Unsay mahitabo kon may pagsulay sa paglaglag sa yutan-ong organisasyon sa Diyos?

¹⁵ Human giatake ni Haring Jehu ang pagsimba kang Baal, ang iyang harianong panimalay mibali sa pagtagad ngadto sa politikanhong mga kaaway sa Israel. Ang Haring Jesu-Kristo mohimo ug samang lihok. Ang politikanhong mga gahom magpabilin human sa pagkalaglag sa samag-Baal nga bakak nga relihiyon. Ilalom sa impluwensiya ni Satanas nga Yawa, kining maong mga kaaway sa pagkasoberano ni Jehova mohimog bug-os nga pag-atake diha sa usa ka pagsulay sa paglaglag sa yutan-ong organisasyon sa Diyos. (Ezequiel 38:14-16) Apan sugoon ni Jehova ang Haring Jesu-Kristo sa pag-atake kanila pinaagi sa paglaglag kanila diha sa Har–​Magedon, ang “gubat sa dakong adlaw sa Diyos nga Labing-Gamhanan,” nga maghingpit sa pagbindikar sa pagkasoberano ni Jehova.​—Pinadayag 16:14, 16; 19:11-21; Ezequiel 38:18-23.

Nagaalagad nga May Kadasig Sama Kang Eliseo

16, 17. (a) Sa unsang paagi nahibalo kita nga si Eliseo madasigon hangtod sa kataposan sa iyang kinabuhi? (b) Unsay angay natong himoon sa mga pana sa kamatuoran?

¹⁶ Hangtod pagataposon “sa adlaw ni Jehova” ang bug-os nga daotang sistema sa mga butang ni Satanas, ang mga alagad sa Diyos mahimong sama ka maisogon ug madasigon kang Eliseo. Gawas sa iyang buluhaton ingong katabang ni Elias, si Eliseo nag-inusarang nag-alagad ingong manalagna ni Jehova kapin sa 50 ka tuig! Ug si Eliseo madasigon hangtod sa kataposan sa iyang taas nga kinabuhi. Sa wala pa siya mamatay, giduaw siya sa apo ni Jehu, si Haring Joas. Gisugo siya ni Eliseo sa pagtiro sa pana gawas sa bentana. Ang pana mihagiyos ngadto sa puntirya niini, ug si Eliseo miingon: “Ang pana sa kadaogan ni Jehova, bisan ang pana sa kadaogan batok sa Sirya! Ug imo gayod nga pukanon ang Sirya sa Apek hangtod sa pagkatibawas.” Sumala sa hangyo ni Eliseo, gibunalan sunod ni Joas ang yuta pinaagi sa iyang mga pana. Apan iyang gibunal kini nga walay kadasig, nga nagbunal tulo ka higayon lamang. Dayon si Eliseo miingon nga, tungod niini, si Joas hatagan lamang ug tulo ka kadaogan batok sa Sirya, ug mao kanay nahitabo. (2 Hari 13:14-19, 25) Wala gayod bug-os nga mapukan ni Haring Joas ang mga Siryanhon, “hangtod sa pagkatibawas.”

¹⁷ Apan, uban sa kadasig nga sama nianang kang Eliseo, ang dinihogang nahibilin nagpadayon sa pag-atake batok sa bakak nga pagsimba. Ang ilang mga kauban nga may yutan-ong mga paglaom nagahimo sa samang butang. Dugang pa, maayong ibutang sa hunahuna sa tanang naglaom nga maluwas “sa adlaw ni Jehova” ang madasigong mga pulong ni Eliseo bahin sa pagbunal sa yuta. Atong dalhon ang mga pana sa kamatuoran ug madasigong ipana kana​—sa makadaghan​—oo, hangtod moingon si Jehova nga ang atong buluhaton uban kanila natapos na.

18. Unsay angay natong pagsanong sa mga pulong sa 2 Pedro 3:11, 12?

¹⁸ Pagataposon “sa adlaw ni Jehova” sa dili madugay ang presenteng daotang sistema sa mga butang. Busa tugotan nato ang atong kaugalingon nga mapukaw sa makapadasig nga mga pulong ni apostol Pedro. “Sanglit kining tanang butanga pagatunawon man,” matod pa ni Pedro, “unsa gayong matanga sa mga tawo angay nga kamo mao diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug kanunayng ginahuptan nga duol sa hunahuna ang pagkaanaa sa adlaw ni Jehova!” (2 Pedro 3:11, 12) Sa dihang ang tanang bahin niining sistemaha matunaw sa kalayo sa pagpasundayag sa kasuko sa Diyos pinaagi ni Jesu-Kristo, kadto lamang adunay rekord sa maayong paggawi ug diyosnong debosyon ang makaikyas. Ang moral ug espirituwal nga kaputli hinungdanon. Maingon man ang gugma alang sa isigkatawo, nga ipakita pinaagi sa pagsanong sa ilang mga panginahanglan, ilabina sa espirituwal nga paagi pinaagi sa atong Kristohanong ministeryo.

19. Unsay atong kinahanglang himoon aron maluwas “sa adlaw ni Jehova”?

¹⁹ Ang imo bang mga pulong ug mga binuhatan magpaila kanimo ingong usa ka matinumanon ug madasigong alagad sa Diyos? Kon mao, maabiabi nimo ang paglaom nga maluwas “sa adlaw ni Jehova” ngadto sa gisaad sa Diyos nga bag-ong kalibotan. Oo, ang pagkaluwas mahimong imong masinati kon mohimo ka ug maayo ngadto sa espirituwal nga mga igsoon ni Kristo tungod kay sila maoy iyang mga sumusunod, sama sa magtiayong Shunamihanon nga nagmaabiabihon kang Eliseo. Aron maluwas kinahanglang ikaw usab mahisama kang Naaman, nga mapainubsanong midawat sa instruksiyon sa Diyos ug nahimong magsisimba ni Jehova. Kon nangandoy ka nga mabuhi sa walay kataposan diha sa usa ka yutan-ong paraiso, kinahanglang imong ipakita ang kinasingkasing nga pagpaluyo sa matuod nga pagsimba, sama sa gihimo ni Jehonadab. Unya ikaw mahimong usa sa matinumanong mga alagad ni Jehova, kinsa sa dili madugay makasinati sa katumanan sa mga pulong ni Jesus: “Umari, kamong mga gipanalanginan sa akong Amahan, panunda ang gingharian nga giandam alang kaninyo sukad sa pagkatukod sa kalibotan.”​—Mateo 25:34.

[Mga footnote]

Unsay Imong Tubag?

◻ Unsa ang pipila ka mga hiyas nga gikinahanglan aron maluwas “sa adlaw ni Jehova”?

◻ Unsang panig-ingnan ang gihatag sa magtiayong Shunamihanon sa mga adlaw ni Eliseo?

◻ Unsang pagtulon-an ang makat-onan gikan kang Naaman?

◻ Sa unsang paagi atong masundog ang panig-ingnan ni Jehonadab?

◻ Sa unsang paagi ang 2 Pedro 3:11, 12 angayng mag-apektar kanato?