Gituman Nila ang Kabubut-on ni Jehova

Usa ka Panig-ingnan sa Pagsakripisyo-sa-Kaugalingon ug Pagkamaunongon

ALANG sa usa ka batan-ong mag-uuma nga ginganlag Eliseo, ang nagsugod nga rutinang adlaw sa pagdaro nahimong ang labing makahuloganong adlaw sa iyang kinabuhi. Samtang nagtrabaho siya sa umahan, si Eliseo wala damha nga giduaw ni Elias, ang pangunang propeta sa Israel. ‘Unsa kahay iyang tuyo kanako?’ mahimong natingala si Eliseo. Dili siya kinahanglang maghulat ug dugay alang sa tubag. Gitabon ni Elias ang iyang opisyal nga besti kang Eliseo, nga nagpailang moabot ang adlaw nga si Eliseo maoy mahimong iyang manununod. Dili ingon nga wala tagda ni Eliseo kini nga pagtawag. Dihadiha, iyang gibiyaan ang iyang umahan aron mahimong alagad ni Elias.​—1 Hari 19:19-21.

Mga unom ka tuig sa ulahi, miabot ang panahon sa pagbiya ni Elias. Ang asoy bahin sa iyang pagbiya gikaingon nga “usa sa labing talagsaong mga sugilanon” sa Hebreohanong Kasulatan.

Si Elias Nangandam sa Pagbiya

Tinguha ni Elias nga mohimog kataposan nga pagduaw sa Bethel, Jerico, ug sa Jordan. Kini maglakip ug pagbaklay sa daghang kilometros, ang pipila niini latas sa gansangon nga kabukiran. Sa matag hugna sa pagpanaw, gidasig ni Elias si Eliseo nga magpabilin. Apan miinsistir si Eliseo sa pag-unong sa iyang agalon hangtod sa kataposan.​—2 Hari 2:1, 2, 4, 6.

Samtang tua didto sa Bethel ug Jerico, “ang mga anak nga lalaki sa mga manalagna” miduol kang Eliseo.a “Nahibalo ka ba nga kuhaon ni Jehova ang pagkaulo sa imong agalon gikan kanimo niining adlawa?” nangutana sila kaniya. “Ako nahibalo gayod niini,” mitubag siya. “Hilom mo.”​—2 Hari 2:3, 5.

Dayon si Elias ug Eliseo mipaingon sa Suba sa Jordan. Sa pag-abot nila sa Jordan, naghimog milagro si Elias samtang mga 50 ka anak nga lalaki sa mga manalagna ang nagsud-ong gikan sa halayo. “Gikuha ni Elias ang iyang opisyal nga besti ug gilimin kini ug gibunalan ang katubigan, ug sila anam-anam nga nangabahin dinhi ug didto, mao nga silang duha nanabok sa mamala nga yuta.”​—2 Hari 2:8.

Sa dihang nakatabok na sila, si Elias miingon kang Eliseo: “Pangayo kon unsay akong buhaton alang kanimo sa dili pa ako kuhaon gikan kanimo.” Si Eliseo nangayo sa “pinilo nga pahat” sa espiritu ni Elias​—nga sa ato pa, ang dobleng bahin nga sa naandan maoy nahiangay sa panganayng anak nga lalaki. Sa pagkatinuod, gipasidunggan ni Eliseo si Elias sama sa pagpasidungog sa usa ka panganayng anak nga lalaki sa iyang amahan. Dugang pa, gidihogan siya nga mahimong manununod ni Elias ingong propeta ni Jehova sa Israel. Busa ang iyang hangyo dili hinakog ug nahiangay. Bisan pa niana, tungod kay nasayod nga si Jehova lamang ang makahatag niini nga hangyo, si Elias sa pagkamakasaranganon mitubag: “Ikaw nagahangyo sa usa ka malisod nga butang.” Unya siya midugang: “Kon ikaw makakita kanako sa diha nga ako kuhaon na gikan kanimo, mahimo kini kanimo; apan kon dili, kini dili mamahimo.”​—2 Hari 2:9, 10; Deuteronomio 21:17.

Walay duhaduha nga nahimong labi pang determinado karon si Eliseo nga mounong sa iyang agalon. Dayon, nagpakita ang “usa ka karo nga nagkalayo ug mga kabayo nga nagkalayo.” Nakita mismo sa nakurat nga Eliseo, si Elias gipadpad pataas sa usa ka unos​—nga milagrosong gilalin sa laing dapit.b Gipunit ni Eliseo ang opisyal nga besti ni Elias ug milakawg balik sa tampi sa Suba sa Jordan. Iyang gihampak ang katubigan, nga nag-ingon: “Hain man si Jehova nga Diyos ni Elias?” Nabahin ang katubigan, nga naghatag ug tataw nga ebidensiya nga si Eliseo dunay balaang pagpaluyo ingon nga manununod ni Elias.​—2 Hari 2:11-14.

Mga Leksiyon Alang Kanato

Sa dihang gidapit para sa linaing pag-alagad uban ni Elias, dihadihang gibiyaan ni Eliseo ang iyang umahan aron alagaran ang pangunang propeta sa Israel. Walay duhaduha, ubos ang pipila sa iyang mga katungdanan, tungod kay nailhan siya ingong ang usa nga “mibubo sa tubig sa mga kamot ni Elias.”c (2 Hari 3:11) Bisan pa niana, gilantaw ni Eliseo ang iyang trabaho ingong usa ka pribilehiyo, ug maunongon siyang nagpabilin sa kiliran ni Elias.

Daghan sa mga alagad sa Diyos karon ang nagpasundayag sa susamang espiritu sa pagsakripisyo-sa-kaugalingon. Ang pipila nagbiya sa ilang “mga umahan,” ilang mga pangabuhian, aron sa pagsangyaw sa maayong balita sa lagyong mga teritoryo o sa pag-alagad ingong mga membro sa pamilyang Bethel. Ang uban namiyahe ngadto sa langyawng kayutaan aron sa pagtrabaho sa mga proyekto sa konstruksiyon sa Sosyedad. Daghan ang midawat sa mahimong isipong ubos nga mga trabaho. Apan, walay usa nga nagpaulipon kang Jehova ang nagahimog dili hinungdanong pag-alagad. Nagpabili si Jehova sa tanang nag-alagad kaniya nga kinabubut-on, ug panalanginan niya ang ilang espiritu sa pagsakripisyo-sa-kaugalingon.​—Marcos 10:29, 30.

Miunong si Eliseo kang Elias hangtod sa kataposan. Midumili siya sa pagbiya sa mas tigulang nga propeta bisan ug gitanyagan sa higayon. Walay duhaduha, ang suod nga relasyon nga iyang naugmad uban kang Elias naghimo sa maong maunongong gugma nga usa ka kalipay. Karon, ang mga alagad sa Diyos naningkamot nga lig-onon ang ilang relasyon uban sa Diyos ug labi pang mosuod sa ilang kaubang mga magtutuo. Ang hugot nga bugkos sa panaghiusa panalanginan, tungod kay nag-ingon ang Bibliya maylabot kang Jehova: “Uban sa maunongon ikaw magapakita sa imong kaugalingon nga maunongon.”​—2 Samuel 22:26.

[Mga footnote]