Kristiyanidad nga Nagalihok—Taliwala sa Kasamok

KINING tanan kalit nga nagsugod sa usa ka adlaw niadtong Abril 1994. Usa ka nahagsang ayroplano nagpatay sa mga presidente sa Burundi ug Rwanda. Mga oras lang ang kapintasan nga may makalilisang nga gilapdon naglimin sa Rwanda. Sulod lamang sa kapin ug diyutay sa tulo ka bulan, kapin sa 500,000 ka taga-Rwanda​—mga lalaki, mga babaye, ug kabataan​—ang nangamatay. Gipunting sa ubang mga tawo kanang panahona ingong “ang pagpuo sa kaliwat.”

Katunga sa 7.5 ka milyong molupyo sa Rwanda ang kinahanglang mokalagiw. Kini naglakip sa 2.4 ka milyon nga midangop sa silingang mga nasod. Kadto mao ang kinadak-an ug kinadalian nga mga pagbakwet sa kagiw sa modernong kasaysayan. Ang mga kampo sa kagiw dihadiha gitukod sa Zaire (karon Demokratikanhong Republika sa Congo), Tanzania, ug Burundi. Usa niini nga mga kampo​—ang kinadak-an sa kalibotan​—nagpapuyo sa 200,000 ka tawo.

Lakip sa mga kagiw mao ang daghang Saksi ni Jehova, usa ka katawhang mahigugmaon sa kalinaw nga nagpadapat sa mga prinsipyo sa Bibliya diha sa ilang mga kinabuhi. Diha sa bisan unsang nasod nga ilang gipuy-an, gihuptan nila ang hugot nga neyutralidad ug nagpadapat sa prinsipyo nga nalakip niining mga pulonga sa Isaias 2:​4: “Ilang pagahimoon ang ilang mga espada nga mga punta sa daro ug ang ilang mga bangkaw nga mga galab. Ang nasod dili na mobakyaw ug espada batok sa laing nasod, ni makakat-on pa sila sa gubat.” Ang mga Saksi ni Jehova kaylap nga giila ingong usa ka relihiyosong pundok nga wala mag-apil-apil sa pagpuo sa kaliwat sa Rwanda.

Si Jesu-Kristo nag-ingon nga ang iyang mga sumusunod “dili bahin sa kalibotan.” Tungod kay sila “ania sa kalibotan,” hinunoa, sila dili kanunayng makalingkawas sa kasamok sa mga nasod. (Juan 17:​11, 14) Panahon sa pagpuo sa kaliwat sa Rwanda, mga 400 ka Saksi ang nangamatay. Duolan sa 2,000 ka Saksi ug mga tawong interesado sa mensahe sa Gingharian ang nahimong mga kagiw.

Ang pagkahimong dili bahin sa kalibotan nagkahulogan ba nga ang mga Saksi ni Jehova walay himoon sa dihang mohampak ang mga kalamidad? Dili. Ang Pulong sa Diyos nag-ingon: “Kon ang usa ka igsoong lalaki o usa ka igsoong babaye anaa sa hubo nga kahimtang ug walay pagkaong igo alang sa maong adlaw, apan usa kaninyo moingon kanila: ‘Lumakaw nga malinawon, pagpainit ug pagpabusog,’ apan wala ninyo sila hatagi sa mga kinahanglanon alang sa ilang lawas, unsa may kapuslanan niini? Sa ingon usab, ang pagtuo, kon kini walay mga buhat, patay sa kaugalingon niini.” (Santiago 2:​15-17) Ang gugma sa silingan usab nagpalihok sa mga Saksi sa pagtabang niadtong kinsa wala makig-ambit sa ilang relihiyosong mga hunahuna.​—Mateo 22:​37-​40.

Bisag ang mga Saksi ni Jehova sa tibuok-yuta nangandoy sa pagtabang sa ilang mga isigkamagtutuo nga nagaatubang sa malisod nga kahimtang sa Rwanda, ang koordinasyon sa paningkamot sa pagtabang gitudlo sa Kasadpang Uropa. Sa ting-init sa 1994, usa ka tem sa boluntaryong mga Saksi gikan sa Uropa nagdalidali sa pagtabang sa ilang Kristohanong mga igsoong lalaki ug babaye sa Aprika. Ang maayong pagkaorganisar nga mga kampo ug temporaryong mga ospital gitukod alang sa mga kagiw nga taga-Rwanda. Daghan kaayong sinina, habol, pagkaon, ug literatura sa Bibliya ang gipadala pinaagig ayroplano o gipadala kanila sa ubang paagi. Kapin sa 7,000 ka tawo ang naapektohan​—duolan sa tulo ka pilong gidaghanon sa mga Saksi ni Jehova sa Rwanda nianang panahona​—ang nakabenepisyo sa paningkamot sa pagtabang. Sa Disyembre nianang tuiga, libolibo sa mga kagiw, lakip sa kadaghanan niadtong kinsa mga Saksi ni Jehova, mibalik sa Rwanda sa pagpasig-uli sa ilang mga kinabuhi.

Gubat sa Congo

Sa 1996, ang gubat mibuto sa sidlakang rehiyon sa Demokratikanhong Republika sa Congo. Kining lugara maoy utlanan sa Rwanda ug Burundi. Sa makausa pa dihay paglugos ug pagpatay. Taliwala sa naghagiyos nga mga bala ug nasunog nga mga balangay, ang mga tawo nangalagiw alang sa ilang mga kinabuhi. Ang mga Saksi ni Jehova naatlan sa kasamok, ug mga 50 ang nangamatay. Ang uban nangamatay sa saag nga mga bala. Ang uban gipatay tungod kay sila sakop sa usa ka partikular nga etnikong pundok o nasaypan ingong mga kaaway. Usa ka balangay diin 150 ka Saksi ang nagpuyo ang giut-ot sa kalayo. Sa ubang mga balangay dinosena sa mga balay ug pipila ka mga Kingdom Hall ang gisunog. Gihikawan sa mga balay ug mga kabtangan, ang mga Saksi mikalagiw ngadto sa ubang mga dapit ug gitabangan sa kaubang mga magsisimba didto.

Ang kagutmanan nagsunod sa gubat, samtang nadaot ang mga tanom, gipangawat ang pondong pagkaon, ug giputol ang pag-agi sa suplay. Mahal ang mabatonang pagkaon. Sa Kisangani, sa pagsugod sa Mayo 1997, ang usa ka kilo sa patatas mokantidad ug mga tulo ka dolyar, nga dili mapalit sa kadaghanang tawo. Ang kinabag-an makapalit lamang ug usa ka kan-anan sa usa ka adlaw. Siyempre, ang sakit mosunod sa mga kanihit sa pagkaon. Ang malnutrisyon nagpaluya sa katakos sa lawas nga mosukol sa malarya, mga sakit nga kalibang, ug mga sakit sa tiyan. Ang kabataan ilabina ang nag-antos ug nangamatay.

Pagtasar sa Panginahanglan

Ang mga Saksi ni Jehova sa Uropa sa makausa pa misanong dayon sa panginahanglan. Sa pagka-Abril 1997 usa ka tem sa pagtabang nga mga Saksi nga naglakip sa duha ka medikal nga mga doktor ang milupad nga nagdalag medisina ug kuwarta. Sa Goma ang lokal nga mga Saksi nakaorganisar na ug mga komite sa pagtabang sa pagtasar sa kahimtang aron ang dihadihang tabang ikahatag. Gisusi sa tem ang siyudad ug ang palibot nga mga dapit. Gipadala ang mga mensahero sa pagkuhag mga taho gikan sa mas lagyong mga dapit. Nabatonan usab ang impormasyon gikan sa Kisangani, nga nahimutang sa kapin ug 1,000 ka kilometros kasadpan sa Goma. Ang lokal nga mga igsoon mitabang sa pag-organisar sa mga paningkamot sa pagtabang sa Goma, diin nagpuyo ang mga 700 ka Saksi.

Usa sa Kristohanong mga ansiyano sa Goma miingon: “Kami natandog gayod nga makitang ang among mga igsoon gikan sa halayong lugar miabot sa pagtabang kanamo. Sa wala pa sila moabot, kami nagtinabangay sa usag usa. Ang mga igsoon kinahanglang mokalagiw gikan sa kabanikanhan ngadto sa Goma. Ang uban nawad-an sa ilang mga balay, ug gibiyaan nila ang ilang mga umahan. Gipasaka namo sila sa among mga balay ug nagpaambit sa among sinina ug sa among diyutayng pagkaon. Ang mahimo namo sa lokal gamay ra. Ang pipila kanamo nag-antos sa malnutrisyon.

“Apan, ang mga igsoon gikan sa Uropa nagdalag salapi nga nagpaarang kanamo sa pagpalit ug pagkaon, nga nihit ug mahal kaayo. Ang pagkaon miabot sa tukma nga panahon, sanglit daghan ang walay makaon sa ilang mga balay. Giapod-apod namo ang pagkaon sa mga Saksi ug sa dili mga Saksi. Kon ang tabang wala pa moabot unta sa dihang kini miabot, daghan ang dugang mangamatay, ilabina ang kabataan. Giluwas ni Jehova ang iyang katawhan. Nakadayeg pag-ayo ang dili mga Saksi. Daghan ang mikomento bahin sa atong panaghiusa ug gugma. Ang uban miadmitir nga ang atong relihiyon maoy matuod nga relihiyon.”

Bisag ang pagkaon gipalit sa lokal ug gidapat ang medisina, dugang pa ang gikinahanglan. Dihay panginahanglan alang sa sinina ug mga habol, ingon man sa mas dakong abiyo sa pagkaon ug medisina. Gikinahanglan usab ang tabang sa pagtukod pag-usab sa mga balay nga naguba.

Katawhan Mihatag nga Madagayaon

Ang mga igsoon sa Uropa sa makausa pa andam sa pagtabang. Ang buhatan sa mga Saksi ni Jehova sa Louviers, Pransiya, nagpahibalo sa panginahanglan sa mga kongregasyon sa Rhône Valley ingon man usab sa Normandy, ug pipila ka kongregasyon sa Paris. Dinhi ang laing prinsipyo sa Kasulatan gipadapat: “Siya nga nagapugas nga tagidiyot magaani usab nga tagidiyot; ug siya nga nagapugas nga madagayaon magaani usab nga madagayaon. Ipabuhat sa matag usa ang sumala sa iyang gikahukom diha sa iyang kasingkasing, dili nga kontragusto o pinugos, kay gihigugma sa Diyos ang usa ka masayahong maghahatag.”​—2 Corinto 9:​6, 7.

Libolibo ang malipayong nagpahimulos sa kahigayonan sa paghatag. Mga kahon ug mga bag sa sinina, sapatos, ug ubang mga butang gidala sa mga Kingdom Hall ug dayon gidala ngadto sa buhatan sa sanga sa mga Saksi ni Jehova sa Pransiya. Dihay 400 ka boluntaryo nga andam nga makigbahin sa sunod nga lakang sa operasyon nga “Tabang sa Zaire.” Sa dihang nangabot ang mga donasyon, kini nga mga boluntaryo naglain, nagpilo, ug nag-empake sa mga sinina diha sa mga kahon nga gipundok sa tag-30 sa usa ka paleta. Ang mga kabataan naghunahuna bahin sa ilang batan-ong mga igsoong lalaki ug babaye sa Aprika ug nagpadalag mga dulaan​—sinawong mga dulaang kotse, mga kasing, mga monyeka, ug mga teddy bear. Kini giputos uban sa mga butang nga kinahanglanon sa kinabuhi. Tanantanan, napuno ang siyam ka 12-metros nga mga kontiner ug gipadala sa Congo.

Unsa ka daghang tabang ang gipadala ngadto sa Sentral Aprika pinaagi sa tabang sa libolibong mga Saksi sa Belgium, Pransiya, ug Switzerland? Sa pagka-Hunyo 1997 ang total nga gidaghanon maoy 500 ka kilos nga medisina, 10 ka toniladang daghag-protina nga mga biskutso, 20 ka tonilada sa ubang pagkaon, 90 ka toniladang sinina, 18,500 ka paris nga sapatos, ug 1,000 ka habol. Gipadala usab pinaagig ayroplano ang mga literatura sa Bibliya. Kining tanan gipabilhan pag-ayo, nga naghupay sa mga kagiw ug nagtabang nila nga antoson ang ilang mga pagsulay. Ang kantidad sa mga suplay mitotal sa duolag $1,000,000, T.B. Ang maong mga amot maoy pamatuod sa panag-igsoonay ug gugma taliwala niadtong kinsa nag-alagad kang Jehova.

Pag-apod-apod sa Congo

Samtang nangabot na ang mga hinabang alang sa Congo, duha ka igsoong lalaki ug usa ka sister ang miabot gikan sa Pransiya aron motabang sa lokal nga mga komite sa pagtabang. Bahin sa pasalamat nga gipakita sa mga Saksi nga taga-Congo, si Joseline, miingon: “Nadawat namo ang daghang sulat sa pagpasalamat. Usa ka kabos nga sister naghatag kanako ug usa ka malachite nga dayandayan. Ang uban naghatag kanamo sa ilang mga letrato mismo. Samtang kami talibiya na, ang mga sister mihalok kanako, migakos kanako, ug nanghilak. Mihilak usab ako. Daghan ang mikomento sama sa, ‘Si Jehova maayo. Si Jehova naghunahuna bahin kanamo.’ Busa giila nila nga ang dungog niini nga pagtabang iya sa Diyos. Sa dihang giapod-apod namo ang pagkaon, gidayeg sa mga igsoong lalaki ug babaye si Jehova pinaagi sa mga awit sa Gingharian. Kadto makapatandog gayod.”

Usa ka medikal nga doktor nga ginganlag Loic maoy usa ka membro sa tem. Daghan ang mihugop sa Kingdom Hall ug nagpaabot nga mapailobon alang sa ilang turno aron magpahiling kaniya. Aron adunay mahimo usab, usa ka sister nga taga-Congo naghimo ug miamot ug mga 40 ka doughnut alang niadtong nagpaabot nga magpakonsulta sa doktor. Sanglit duolan sa 80 ka tawo ang nagpaabot, ang matag usa nakadawat ug tunga sa doughnut.

Tabang sa mga Dili-Saksi

Kining makitawhanong tabang wala ihatag lamang ngadto sa mga Saksi ni Jehova. Ang uban nakabenepisyo usab, sama sa daghan niadtong 1994. Kini uyon sa Galacia 6:​10, nga nag-ingon: “Nan, sa pagkatinuod, samtang kita may panahong paborable alang niini, buhaton nato ang maayo ngadto sa tanan, apan ilabina kanilang iglabot nato sa pagtuo.”

Ang mga Saksi miapod-apod ug medisina ug sinina ngadto sa daghang tunghaang elementarya ug balay sa mga ilo duol sa Goma. Ang balay sa mga ilo gipuy-an sa 85 ka kabataan. Sa mas nag-unang biyahe sa pagtasar sa kahimtang, giduaw sa tem sa pagtabang ang balay sa mga ilo ug misaad nga mohatag kanila ug 50 ka kahon sa daghag-protina nga mga biskutso, mga kahon sa sinina, 100 ka habol, medisina, ug mga dulaan. Ang kabataan naglinya sa nataran ug miawit alang sa mga bisita. Sunod sila mihimog linaing hangyo​—posible ba silang makabaton ug bola aron makadulag saker?

Daghang semana sa ulahi ang tem sa pagtabang nagtuman sa ilang saad sa pagdala sa mga suplay. Nakadayeg sa pagkamahinatagon ug sa iyang nabasa sa literatura sa Bibliya nga gihatag kaniya, ang direktor sa balay sa mga ilo miingon nga siya hapit nang mahimong usa sa mga Saksi ni Jehova. Ug nahatagan ba ug bola ang mga kabataan? “Wala,” mitubag si Claude, ang koordinetor sa tem sa pagtabang gikan sa Pransiya. “Gihatagan namo silag duha ka bola.”

Mga Kampo sa Kagiw

Ang tabang dili lamang sa Congo. Libolibo sa mga kagiw mikalagiw gikan sa natad panggubatan ngadto sa silingang nasod diin tulo ka kampo sa kagiw ang gidalidali pagtukod. Ang mga Saksi miadto usab didto, aron susihon kon unsay mahimong buhaton. Sa dihang giandam kini nga taho, ang mga kampo gipuy-an sa 211,000 ka kagiw, nga ang kadaghanan gikan sa Congo. Duolag 800 ang Saksi ug ilang kabataan ug mga indibiduwal nga interesado sa maayong balita sa Gingharian. Ang dihadihang problema sa mga kampo mao ang kakulang sa pagkaon. Sa usa ka kampo, dihay igong pagkaon sulod lamang sa tulo ka adlaw, ug naglakip kini sa tulo na ka tuig nga mga liso sa utanon.

Bisan pa niana, ang mga Saksi madasigon. Bisag diyutay lamang ang ilang literatura sa Bibliya, sila nagdumalag regular sa mga miting sa gawas aron mapalig-on sila sa espirituwal. Sila puliki usab sa pagsangyaw sa maayong balita sa Gingharian sa Diyos ngadto sa uban diha sa mga kampo.​—Mateo 24:​14; Hebreohanon 10:​24, 25.

Ang nagpakisayod nga tem sa mga Saksi naglakip ug usa ka medikal nga doktor. Bisag gitugotan sila sa mga awtoridad nga mogugol ug pipila ka adlaw lamang diha sa matag kampo, sila mihimog medikal nga mga pagkonsulta. Nagbilin silag tambal ug kuwarta uban sa Kristohanong mga ansiyano. Sa ingon, ang mga igsoon nakalahutay. Sila naglaom usab nga ang mga Saksi diha sa mga kampo makabalik sa dili madugay sa ilang nasod.

Komosta sa umaabot? Gitagna ni Jesu-Kristo nga ang atong adlaw mahimong usa ka adlaw sa dakong kasamok, usa ka panahon nga gitiman-an sa mga gubat ug mga kanihit sa pagkaon. (Mateo 24:7) Ang mga Saksi ni Jehova nahibalo nga ang Gingharian sa Diyos lamang ang magtapos sa pag-antos nga karon naglungtad sa yuta. Ubos sa pagmando niini, ang atong gipuy-ang yuta mahimong usa ka paraiso sa pakigdait, kadagaya, ug walay-kataposang kalipay alang sa masinugtanong katawhan. (Salmo 72:1, 3, 16) Kasamtangan, ang mga Saksi magamantala sa maayong balita nianang langitnong Gingharian ug magpadayon usab sa pagtabang sa mga isigkamagsisimba ug sa uban sa mga panahon sa panginahanglan.

[Blurb sa panid 4]

Sukad sa 1994, ang mga Saksi ni Jehova sa Uropa lamang nakapadalag kapin sa 190 ka toniladang pagkaon, sinina, medisina, ug ubang mga suplay sa hinabang sa rehiyon sa Great Lakes sa Aprika

[Kahon sa panid 6]

Kristohanong Gugma Ginabatasan

Lakip niadtong kinsa madasigong nakigbahin sa proyekto nga “Tabang sa Zaire” sa Pransiya mao si Ruth Danner. Sa bata pa, siya nabilanggo sa mga kampo konsentrasyon sa Nazi tungod sa iyang Kristohanong pagtuo. Siya mikomento: “Kami malipayon kaayo nga may mabuhat alang sa among mga igsoong lalaki ug babaye sa Aprika! Apan may butang nga ilabinang nakapalipay kanako. Niadtong 1945, sa dihang nahibalik kami sa among pinuy-anan gikan sa Alemanya, kami wala gayoy bisan unsa. Bisan ang sinina nga among gisul-ob hinulaman. Apan, wala madugay nadawat namo ang materyal nga tabang gikan sa among espirituwal nga mga igsoon sa Amerika. Busa kining paningkamot sa pagtabang nagtugot kanako nga ibalik ang kalulot nga gipakita kanamo sa dugay nang panahon. Pagkadakong pribilehiyo nga mahimong bahin sa maong dakong pamilya sa mga igsoon nga nagbatasan sa Kristohanong gugma!”​—Juan 13:​34, 35.

[Hulagway sa panid 7]

Sa dili madugay​—usa ka yutan-ong paraiso nga may kadagaya alang sa tanan