Pagpalig-on sa Atong Pagtuo sa Pulong sa Diyos
MAS daghang tawo ang nakabasa sa Bibliya kay sa bisan unsang ubang basahon. Apan unsa ka daghan ang nagpasundayag ug pagtuo sa mensahe niini? Ang Bibliya mismo nagpatin-aw nga “ang pagtuo dili man panag-iya sa tanang katawhan.” (2 Tesalonica 3:2) Tin-aw, wala kita matawo uban ang pagtuo. Kinahanglang ugmaron kini. Bisan kadtong adunay usa ka sukod sa pagtuo angayng dili magpakamenos niana. Ang pagtuo mahimong madaot ug mamatay. Busa, ang paningkamot gikinahanglan aron magpabiling “mahimsog sa pagtuo.”—Tito 2:2.
Nan, uban ang maayong katarongan ang Nagamandong Lawas sa mga Saksi ni Jehova mipili sa temang “Pagtuo sa Pulong sa Diyos” alang sa ilang 1997/98 nga serye sa distritong mga kombensiyon. Minilyong Saksi ug uban pa ang sa ingon nakapribilehiyo sa pagtigom aron sa pagpalig-on sa ilang pagtuo sa Pulong sa Diyos.
Ang Pulong sa Diyos Kamatuoran—Ang Pasukaranan sa Atong Pagtuo
Mao kini ang tema sa unang adlaw sa kombensiyon. Nagsugod kini sa mga pulong sa pagdayeg sa tanang nanambong. Ang pagtambong sa kombensiyon maoy pamatuod sa pagtahod sa Bibliya. Bisan pa niana, ang makapukaw-sa-hunahunang mga pangutana gipatungha mahitungod sa kalidad sa atong pagtuo: ‘Makapanalipod ba kita sa atong mga gituohan, ginamit ang Pulong sa Diyos ingong awtoridad? Giapresyar ba nato ang espirituwal nga pagkaon, nga dili-pakamenoson ang Bibliya, mga miting sa kongregasyon, ug binase sa Bibliya nga mga publikasyon? Kita ba nagauswag sa gugma, tukmang kahibalo, ug pagsabot?’ Ang mamumulong nagdasig sa tanan nga maminaw pag-ayo, nga nag-ingon nga “kining ‘Pagtuo sa Pulong sa Diyos’ nga Distritong Kombensiyon giandam aron sa pagtabang kanato sa pag-usisa sa atong kaugalingon ug pagsusi sa gidak-on ug kalidad sa pagtuo nga nabatonan sa matag usa kanato.”
Ang keynote address nag-ulohang “Paglakaw Pinaagi sa Pagtuo, Dili Pinaagi sa Makita.” (2 Corinto 5:7) “Ang pagtuo niadtong nahimong mga Saksi ni Jehova dili pagkamatuotuohon,” matod sa mamumulong. Pagkatinuod gayod niini! Ang tinuod nga pagtuo dili buta. Gipasikad kini sa mga katinuoran. Ang Hebreohanon 11:1 nag-ingon: “Ang pagtuo mao ang may katinoan nga pagdahom sa mga butang nga gilaoman, ang tataw nga pagpanghimatuod sa mga katinuoran bisan tuod wala makita.” Ang mamumulong miingon: “Kon kita tinuoray nga magalakaw pinaagi sa pagtuo, gikinahanglan nato ang pagtuo nga maayog-patukoranan.” Tungod kay kita magalakaw pinaagi sa pagtuo, dili pinaagi sa makita, dili nato kinahanglanon ang mga detalye mahitungod sa kon unsaon ug kanus-a tumanon ni Jehova ang tanang bahin sa iyang katuyoan. Ang ato nang nahibaloan mahitungod kaniya maghatag kanato ug bug-os nga pagsalig sa iyang gahom sa pagtuman sa iyang mga saad sa mahigugmaon ug matarong nga paagi.
Ang pakigpulong nga “Kristohanong mga Batan-on—Usa ka Hinungdanong Bahin sa Kongregasyon” nagpahinumdom sa mga batan-on kon unsa ka bililhon sila kang Jehova. Sila gidasig nga mouswag sa espirituwal pinaagi sa pagtinguha sa mga tumong sama sa pagbasa sa tibuok Bibliya ug pagkab-ot sa mga kinahanglanon sa pagpahinungod ug bawtismo. Ang pagpangagpas sa dugang nga edukasyon maoy personal nga butang nga angayng desisyonan sa mga ginikanan sa usa, apan kon kini himoon, ang tumong kanunay gayod nga aron masangkapan sa pag-alagad sa Diyos nga mas epektibo. Ang sekular nga edukasyon magsilbig mapuslanong katuyoan sa dihang atong “matino ang mas hinungdanong mga butang” nga may kalabotan sa atong pagtuo.—Filipos 1:9, 10.
Misunod ang simposyum sa tulo ka pakigpulong bahin sa temang “Kang Kansang mga Sukdanan ang Imong Ginatuman?” Ang pagtuo sa Pulong sa Diyos magpalihok kanato sa pagsunod sa mga sukdanan sa Bibliya. Ang mga Kristohanon nagatuman sa mga balaod ug mga prinsipyo ni Jehova. Pananglitan, ang Kasulatan nagtambag kanato nga dili mogamit ug law-ay ug maabusohong sinultihan. (Efeso 4:31, 32) Ang mamumulong nangutana: “Sa dihang mapikal o maglagot, mosinggit ka ba ug mga balikas sa imong kapikas o sa imong mga anak?” Siyempre, kana dili Kristohanon. Ang Diyos aduna usab ing mga sukdanan mahitungod sa atong personal nga panagway. Kinahanglang sul-oban sa mga Kristohanon ang ilang kaugalingon sa “mahapsay nga sinina, uban ang kaligdong.” (1 Timoteo 2:9, 10) Ang pulong nga “kaligdong” adunay ideya sa pagtahod sa kaugalingon, usa ka diwa sa pagkadungganon, kaugdang, ug pagkamakasaranganon. Gipalihok kita sa gugma alang sa uban ug gigiyahan sa mga prinsipyo sa Bibliya ug sa pagbati sa kon unsay angayan.
Ang misunod nga duha ka pakigpulong naglakip sa bersikulo-por-bersikulo nga pagkonsiderar sa Hebreohanon 3:7-15 ug 4:1-16. Kining maong mga teksto sa Bibliya nagpasidaan kanato batok sa kapeligrohan nga “motig-a pinaagi sa malimbongong gahom sa sala.” (Hebreohanon 3:13) Sa unsang paagi molampos kita sa atong pakigbisog batok sa sala? Si Jehova motabang kanato pinaagi sa iyang Pulong. Sa pagkatinuod, “ang pulong sa Diyos buhi ug gamhanang nagalihok ug . . . arang makaila sa mga hunahuna ug mga tuyo sa kasingkasing.”—Hebreohanon 4:12.
Ang kataposang pakigpulong sa unang adlaw sa kombensiyon mao ang “Usa ka Basahon Alang sa Tanang Tawo.” Nagpasiugda kini sa pagkatinuod, pagkatukma, ug praktikal nga bili sa Bibliya. Pagkamakalilipay nga nadungog ang mamumulong nga nagpahibalo sa pagluwat sa usa ka bag-ong 32-panid nga brosyur nga nag-ulohang Usa ka Basahon Alang sa Tanang Tawo! Kining bag-ong publikasyon gisulat ilabina alang sa mga tawo kinsa, bisan tuod edukado, diyutay rag nahibaloan bahin sa Bibliya. Ang pakigpulong natapos sa mga pulong: “Ang mga tawo kinahanglang magsusi sa Pulong sa Diyos sa ilang kaugalingon. Kita masaligon nga kon sila mismo mao ang magsusi, ilang maamgohan nga kining talagsaong libro, ang Bibliya, sa pagkatinuod maoy usa ka basahon alang sa tanang tawo!”
Sundoga ang “Maghihingpit sa Atong Pagtuo”
Kining tema sa ikaduhang adlaw sa kombensiyon nagdani sa pagtagad ngadto kang Jesu-Kristo, ang “Maghihingpit sa atong pagtuo.” Kinahanglang atong “sundon pag-ayo ang iyang mga tunob.” (Hebreohanon 12:2; 1 Pedro 2:21) Daghan sa Kakristiyanohan ang giingnan: ‘Tuo kang Ginoong Jesus, ug ikaw maluwas!’ Apan mao ba lamang kanay nalangkit sa pagtuo? Ang Bibliya nagpahayag nga ang “pagtuo nga walay mga buhat patay.” (Santiago 2:26) Busa, gawas pa sa pagtuo kang Jesus, kinahanglang buhaton nato ang mga buhat nga iyang gihimo, ilabina pinaagi sa pagsangyaw sa maayong balita sa Gingharian sa Diyos.
Ang programa sa buntag nasentro sa pag-ebanghelyong buluhaton. Sama kang Pablo, kinahanglang matinguhaon kita sa pagpahayag sa maayong balita sa kaluwasan. (Roma 1:14-16) Si Jesus misangyaw sa mga tawo bisan asa. Bisan tuod ang atong regular nga balay-sa-balay nga ministeryo nagpatunghag mga resulta, dugang ug dugang katawhan ang wala sa balay sa dihang moduaw kita. (Buhat 20:20) Daghan ang anaa sa tunghaan, nagtrabaho, namalit, o nagbiyahe. Busa, kinahanglan usab nato nga mosangyaw sa publikong mga dapit ug bisan asa nga makaplagan ang mga tawo.
Ang pakigpulong nga “Himoang Mogamot ug Molig-on sa Kamatuoran” nagpahinumdom kanato sa daghan kaayong bag-ong mga tinun-an nga gibawtismohan—sa aberids nga kapin sa 1,000 kada adlaw! Hinungdanon nga kining mga bag-ohan mahimong mogamot pag-ayo ug molig-on sa pagtuo. (Colosas 2:6, 7) Ang mamumulong nagpatin-aw nga ang literal nga mga gamot mosuyop ug tubig ug mga sustansiya samtang nagtagana usab ug usa ka angkla o suportar alang sa tanom. Sa susama, pinaagi sa maayong mga batasan sa pagtuon ug maayong pakig-uban, ang bag-ong mga tinun-an mahimong molig-on diha sa kamatuoran.
Kining tambaga ilabinang haom alang sa mga kandidato sa bawtismo. Oo, sa ikaduhang adlaw sa kombensiyon, ang dagkong mga pundok sa bag-ong mga tinun-an nabawtismohan, nga nagsunod sa panig-ingnan ni Jesus. Ang pakigpulong nga “Pagtuo sa Pulong sa Diyos Motultol sa Bawtismo” nagpahinumdom sa mga kandidato nga ang bug-os nga pagkalusbog sa tubig maoy haom nga simbolo sa ilang pagkamatay sa ilang kanhing matinguhaon sa kaugalingong intereses nga paagi sa pagkinabuhi. Ang ilang paghaw-as sa tubig naghulagway sa pagbanhaw kanila aron sa pagbuhat sa kabubut-on sa Diyos.
Ang pakigpulong nga “Pakigbisog Alang sa Pagtuo” gipasukad sa basahon sa Bibliya sa Judas. Gidasig kita sa pagpanalipod sa atong pagtuo pinaagi sa pagsukol sa makadaot nga mga impluwensiya, sama sa imoralidad, pagkarebelyoso, ug apostasya. Sunod, ang mga ginikanan—ilabina ang mga amahan—nakadawat ug linaing pagtagad sa pakigpulong nga “Tagan-i ang Imong Panimalay.” Ang pagtagana sa espirituwal, pisikal, ug emosyonal nga mga panginahanglan sa pamilya maoy Kasulatanhong obligasyon. (1 Timoteo 5:8) Nagkinahanglan kini ug panahon, komunikasyon, ug kasuod. Si Jehova nga Diyos tinong nahimuot sa tanang paghago sa Kristohanong mga ginikanan sa pagmatuto sa ilang mga anak diha sa kamatuoran.
Ang misunod nga simposyum, “Sa Balay ni Jehova Kita Mangadto,” nagtukod ug apresasyon alang sa Kristohanong mga tigom. Kini nagtagana ug kapahulayan gikan sa mga kabalaka niining kalibotana. Diha sa mga tigom aduna kitay kahigayonan sa pagbayloay ug pagdasig, ug ikapasundayag nato ang atong gugma alang sa atong kaubang mga magtutuo. (Hebreohanon 10:24, 25) Ang mga tigom motabang usab kanato sa pagbaid sa atong mga katakos ingong mga magtutudlo, ug kini magpalalom sa atong pagsabot sa katuyoan sa Diyos. (Proverbio 27:17) Hinaot nga dili nato ipalain ang atong kaugalingon gikan sa kongregasyon, ug hinumdoman nato ang mga pulong ni Jesus: “Diin gani may duha o tulo nga nagkatigom sa akong ngalan, anaa ako sa ilang taliwala.”—Mateo 18:20.
Ang kataposang pakigpulong sa maong adlaw mao “Ang Kalidad sa Imong Pagtuo—Gisulayan Karon.” Ang pagtuo nga wala masulayi walay napamatud-ang bili, ug ang kalidad niana nagpabiling wala masayri. Sama kini sa usa ka tseke nga wala pa mailisig salapi. Ang bili ba niana mao ang kantidad nga makita diha niana? Sa susama, ang atong pagtuo kinahanglang sulayan aron sa pagpamatuod nga kana adunay kahulogan ug tinuod nga kalidad. (1 Pedro 1:6, 7) Ang mamumulong nag-ingon: “Usahay, ang palaumagian sa balita maingon man ang mga awtoridad nalimbongan sa mga klerigo ug mga apostata sa paghimog bakak nga mga sumbong batok kanato, nga nagtuis sa atong Kristohanong mga pagtulon-an ug paagi sa pagkinabuhi. . . . Tugotan ba nato kadtong nabutaan ni Satanas sa paghadlok ug pagpaluya kanato ug pagpabati kanatong maulaw sa maayong balita? Tugotan ba nato ang mga bakak mahitungod sa kamatuoran nga moapektar sa atong regular nga pagtambong sa tigom ug sa atong kalihokan sa pagsangyaw? O mobarog ba kitang malig-on ug magmaisogon ug labi pang determinado sukad masukad nga mopadayon sa pagpahayag sa kamatuoran mahitungod kang Jehova ug sa iyang Gingharian?”
Mabuhi Tungod sa Pagtuo
Ang tema sa ikatulong adlaw sa kombensiyon gibase sa mga pulong ni Pablo: “Tataw nga sa Diyos walay usa nga mapahayag nga matarong pinaagi sa balaod, tungod kay ‘ang usa nga matarong mabuhi tungod sa pagtuo.’” (Galacia 3:11) Ang simposyum, “Matagnaong mga Pulong ni Joel Alang sa Atong Adlaw,” maoy usa sa gipasiugda sa buntag. Ang basahon ni Joel nagpunting sa atong panahon ug nag-ingon uban ang pagkadinalian: “Alaot ang adlaw; kay ang adlaw ni Jehova haduol na, ug ingon sa usa ka paglaglag gikan sa Makagagahom sa Tanan moabot kini!” (Joel 1:15) Sa paagi nga susama nianang sa walay-paglungang mga dulon, ang dinihogang mga Kristohanon wala magtugot sa bisan unsa nga mobabag sa pagmantala sa Gingharian niining panahon sa kataposan.
Ang basahon ni Joel naghatag usab ug paglaom, nga nag-ingon: “Ang tanan nga magatawag sa ngalan ni Jehova mamaluwas.” (Joel 2:32) Kini nagkahulogan ug labaw pa kay sa paggamit lamang sa ngalan ni Jehova. Ang kinasingkasing nga paghinulsol gikinahanglan, ug kini naglakip sa pagtalikod sa sayop nga binuhatan. (Joel 2:12, 13) Wala nay panahon sa paglanganlangan tungod kay si Jehova sa dili madugay magpahamtang ug paghukom sa mga nasod, ingon sa gibuhat niya sa Moab, Ammon, ug sa bukirong rehiyon sa Seir sa mga adlaw ni Haring Jehosafat sa Juda.—2 Cronicas 20:1-30; Joel 3:2, 12.
Ang tanan nadasig sa pakigpulong nga “Ipakita ang Pagtuo Pinaagig Paghulat Kang Jehova.” Karon sa naghinapos na ang panahon sa kataposan, kita makapamalandong sa pagkatuman sa daghang saad ni Jehova, ug kita interesado kaayo sa mga butang nga mahitabo pa. Ang katawhan ni Jehova kinahanglang magpadayon sa pagpailob, nga maghinumdom nga ang tanan nga gisaad sa Diyos mahitabo.—Tito 2:13; 2 Pedro 3:9, 10.
Ang programa sa buntag natapos pinaagig drama nga “Hupting Yano ang Imong Mata.” Kining realistikong pagdrama nagdasig kanato sa pagsusi sa atong tinamdan maylabot sa materyal nga mga pangagpas. Bisan asa kita magpuyo, kon buot nato nga ang atong kinabuhi mahimong luwas sa mga kabalaka, kinahanglang sundon nato ang tambag ni Jesus nga himoong yano ang atong mata, nga tin-awng nagsentro sa Gingharian sa Diyos.—Mateo 6:22.
Ang pakigpulong publiko may makaiikag nga ulohang “Ang Pagtuo ug ang Imong Kaugmaon.” Nagtanyag kini ug pamatuod sa kawalay-katakos sa tawhanong mga lider sa pagsulbad sa mga suliran sa kalibotan. (Jeremias 10:23) Ang kasaysayan sa tawo kanunayng nagsublisubli—sa mas dako ug mas makadaot nga gilapdon. Unsay hunahuna sa mga Saksi ni Jehova bahin sa umaabot? Kami nagtuo nga ang matinumanong katawhan adunay masanag nga kaugmaon ubos sa Gingharian sa Diyos. (Mateo 5:5) Ang Diyos magtuman sa iyang mga saad alang sa kaayohan sa tanan nga adunay pagtuo sa iyang Pulong, nga nag-awhag: “Pangitaa si Jehova, kamong katawhan, samtang makaplagan pa siya. Sangpita siya samtang anaa pa siya sa duol.”—Isaias 55:6.
Gipatungha ni Jesus ang hinungdanong pangutana nga naghunahuna sa atong adlaw. Siya nangutana: “Sa dihang ang Anak sa tawo moabot, makaplagan ba gayod niya ang pagtuo dinhi sa yuta?” (Lucas 18:8) Ang kataposang pakigpulong nagsubli sa programa sa kombensiyon ug nagpakita kon sa unsang paagi nagtagana kini ug kaylap nga pamatuod nga ang pagtuo sa Pulong sa Diyos nagalungtad, bisan tuod nagkinabuhi kita sa usa ka dili-matinuohon ug sekularisadong kalibotan.
Sa gihapon, kita sa indibiduwal makapangutana sa atong kaugalingon, ‘Nalakip ba ako niadtong adunay dili-matarog nga pagtuo sa Diyos ug sa iyang Pulong?’ Ang “Pagtuo sa Pulong sa Diyos” nga Distritong Kombensiyon angayng motabang kanato sa pagtubag nga oo sa maong pangutana. Ug pagkamapasalamaton nato kang Jehova sa pagpalig-on sa atong pagtuo kaniya ug sa iyang inspiradong Pulong, ang Bibliya!
[Hulagway sa panid 24]
Daghang boluntaryo ang malipayong nagtrabaho aron sa pagpasaka sa linibong delegado
[Hulagway sa panid 25]
Ang dagkong mga estadyum sama niini gigamit sa tibuok kalibotan
[Hulagway sa panid 25]
Si L. A. Swingle sa Nagamandong Lawas nagluwat sa bag-ong brosyur
[Hulagway sa panid 26]
Daghan ang nabawtismohan ingong simbolo sa ilang pagpahinungod kang Jehova
[Hulagway sa panid 27]
Ang mga kombensiyonista malipayong miawit ug mga alawiton sa Gingharian. Pasukip: ang dramang “Hupting Yano ang Imong Mata”