Kana ba Pagdayeg o Pag-ulog-ulog?

ADUNAY moingon kanimo, “Nindot kaayo ang imong bag-ong estilo sa buhok!” Kana ba pagdayeg o pag-ulog-ulog? “Angayan kaayo ka nianang sininaa!” Pagdayeg o pag-ulog-ulog? “Mao ni ang kinalamiang pagkaon nga akong natilawan!” Kana ba pagdayeg o pag-ulog-ulog? Sa dihang madawat nato kanang maong mga komplimento, kita maghunahuna tingali kon kana ba gayod sinsero ug matinud-anon o kon kana gituyo lamang aron sa pagpahimuot kanato nga wala magpasabot nga gituohan kana sa nagsulti.

Unsaon nato pagkahibalo kon ang giingon sa usa ka tawo kanato maoy pagdayeg o pag-ulog-ulog? Hinungdanon ba kana? Dili ba mahimong dawaton na lang kon unsay gisulti nga dili hunahunaon kon unsa gayod kana ug magpahimulos sa kalipay nga gihatag niana kanato? Komosta kon kita modayeg sa uban? Gisusi ba nato sukad ang atong mga motibo? Ang paghunahuna sa maong mga pangutana makatabang kanato nga mahimong masinaboton ug gamiton ang atong dila sa paagi nga maghatag ug pagdayeg kang Jehova nga Diyos.

Pagdayeg ug Pag-ulog-ulog Gihubit

Ang pagdayeg gihubit sa Webster’s Dictionary ingong usa ka ekspresyon sa pag-uyon o komendasyon, ug ang pulong mahimong magkahulogag pagsimba o paghatag ug himaya. Tin-aw nga ang naulahing duha ka kahulogan nagtumong lamang sa pagdayeg nga para kang Jehova nga Diyos. Kini maoy hinungdanong bahin sa matuod nga pagsimba, ingon sa gitambag sa inspiradong salmista: “Kay kana maayo man . . . , kana matahom​—angay ang pagdayeg.” “Ang tagsatagsa nga adunay gininhawa​—padayega kana kang Jehova.”​—Salmo 147:​1; 150:6.

Bisan pa niana, wala kini magpasabot nga ang pagdayeg dili ikahatag ngadto sa mga tawo. Ikahatag kana, sa diwa sa komendasyon, pag-uyon, o paborableng paghukom. Sa usa ka sambingay nga gihatag ni Jesus, miingon ang usa ka agalon sa iyang alagad: “Maayong pagkabuhat, maayo ug kasaligan nga ulipon!”​—Mateo 25:21.

Sa laing bahin, ang pag-ulog-ulog gihubit ingong bakak, dili-sinsero o naghingaping pagdayeg, diin ang nag-ulog-ulog kasagarang adunay motibo sa kaugalingong kaayohan. Ang pagpadungogdungog nga komendasyon o panglana gihatag aron sa pagbaton ug pabor o materyal nga mga kaayohan gikan sa lain o aron sa pagpatunghag pagbati sa obligasyon ngadto sa nag-ulog-ulog. Busa ang mga tig-ulog-ulog gipalihok sa kahakog. Sumala sa Judas 16, sila “andam sa pag-ulog-ulog sa laing mga tawo sa dihang makita nila ang bentaha niana.”​—The Jerusalem Bible.

Ang Kasulatanhong Panglantaw

Unsa ang Kasulatanhong panglantaw sa pagdayeg sa isigkatawo? Si Jehova nagpakita ug sumbanan nga atong sundon niining bahina. Giingnan kita sa Bibliya nga kita dayegon kon buhaton nato ang kabubut-on ni Jehova. Si apostol Pablo nag-ingon nga “sa matag usa ang iyang pagdayeg moabot nganha kaniya gikan sa Diyos.” Giingnan kita ni Pedro nga ang sinulayang kalidad sa atong pagtuo “makaplagan nga usa ka hinungdan sa pagdayeg.” Busa ang kamatuoran nga si Jehova magdayeg sa mga tawo nagpakita kanato nga ang paghatag ug tinuoray nga pagdayeg maoy maluloton, mahigugmaon, ug mapuslanong buhat, usa nga dili sayloan.​—1 Corinto 4:​5; 1 Pedro 1:7.

Ang laing tinubdan diin ang pagdayeg modangat kanato, sumala sa Bibliya, mao ang mga awtoridad sa kagamhanan nga naniid sa atong maayong panggawi ug matinud-anong nagdayeg kanato. “Padayon sa pagbuhat ug maayo,” kita giingnan, “ug ikaw makabatog pagdayeg gikan niini.” (Roma 13:3) Mahimong madawat usab nato ang pagdayeg gikan sa mga tawo nga sinserong nagtuo sa ilang ginaingon ug kinsa walay nagpahiping motibo sa pagdayeg kanato. Ang inspiradong Kasulatan nag-ingon sa Proverbio 27:​2: “Hinaot ang langyaw, ug dili ang imong kaugalingong baba, ang magadayeg kanimo.” Kini nagpakita nga ang pagdawat ug pagdayeg gikan sa mga tawo nahiangay.

Apan dili kini matuod bahin sa paghatag o pagdawat ug pag-ulog-ulog. Nganong ang sinultihang maulog-ulogon dili gayod makapahimuot kang Jehova? Ang usa ka katarongan, kana dili sinsero, ug si Jehova nagsaway sa pagkadili-sinsero. (Itandi ang Proverbio 23:​6, 7.) Dugang pa, dili kana matinud-anon. Naghubit sa mga tawo nga takos sa dili-pag-uyon sa Diyos, ang salmista nag-ingon: “Ang ila lamang gibuhat mao ang pagpamakak sa usag usa, ang maulog-ulogong mga ngabil, nagasulti gikan sa dobleng kasingkasing. Hinaot si Yahweh maghiwa sa matag maulog-ulogong ngabil.”​—Salmo 12:​2, 3, JB.

Labaw sa tanan, ang pag-ulog-ulog dili mahigugmaon. Gipalihok kana sa kahakog. Human maghisgot bahin sa mga tig-ulog-ulog, ang salmistang David mikutlo kanila nga nag-ingon: “Uban sa atong mga dila kita magmadaogon. Ang atong mga ngabil anaa kanato. Kinsay mahimong agalon kanato?” Si Jehova naghubit sa maong mga hakog ingong ‘tiglaglag sa mga sinakit.’ Ang ilang maulog-ulogong mga dila gigamit, dili sa pagpalig-on sa uban, kondili sa paglaglag kanila ug pagsakit kanila.​—Salmo 12:​4, 5.

Pag-ulog-ulog​—Usa ka Lit-ag

“Ang usa ka tawo nga nag-ulog-ulog sa iyang kauban nagabukhad ug usa ka pukot sa iyang mga lakang.” Mao kanay giingon sa maalamong Haring Solomon, ug pagkatinuod niana! (Proverbio 29:5) Ang mga Pariseo naningkamot sa pagbukhad ug usa ka lit-ag alang kang Jesus pinaagig pag-ulog-ulog. Sila miingon: “Magtutudlo, nahibalo kami nga ikaw matinud-anon ug nagatudlo sa dalan sa Diyos subay sa kamatuoran, ug wala kay pagsapayan kang bisan kinsa, kay wala man ikaw magtan-aw sa panggawas nga panagway sa mga tawo.” Pagkamakapapuypoy kanang paminawon! Apan si Jesus wala madala sa ilang palana. Siya nasayod nga wala sila motuo sa iyang tinuod nga pagtulon-an apan naningkamot lamang sa paglit-ag kaniya sa iyang sinultihan bahin sa isyu sa pagbayad ug buhis ngadto kang Cesar.​—Mateo 22:​15-22.

Kasukwahi kaayo kang Jesus ang unang-siglong Haring Herodes. Sa dihang nagpakigpulong siya sa lungsod sa Cesarea, ang mga tawo mitubag: “Tingog sa usa ka diyos, ug dili sa tawo!” Inay badlongon ang mga tawo tungod sa maong walay-ulaw, bakak nga pagdayeg, gidawat ni Herodes ang pag-ulog-ulog. Ang manulonda ni Jehova nagpahinabo ug hinanaling panimalos sanglit si Herodes gihampak sa pagdagsang sa mga ulod nga misangpot sa iyang kamatayon.​—Buhat 12:​21-23.

Ang hamtong nga Kristohanon magmaalisto sa pag-ila kon unsa gayod ang pag-ulog-ulog. Ang mga ansiyano sa kongregasyon kinahanglan nga ilabinang magmabinantayon sa dihang ang usa ka tawo nga nalangkit sa hudisyal nga kaso hilabihang modayeg, tingali bisan sa punto nga itandi ang usa ka ansiyano sa lain ug moingon nga mas maluloton ug masinaboton ang usa nga gisumbongan.

Ang Bibliya tin-awng nagpakita sa laing laang nga ipahinabo sa pag-ulog-ulog sa dihang gibatbat niini kon sa unsang paagi ang usa ka batan-ong lalaki nahaylo sa imoralidad pinaagi sa usa ka manenental. (Proverbio 7:​5, 21) Kining maong pasidaan may kalabotan sa kahimtang karon. Taliwala niadtong napalagpot gikan sa Kristohanong kongregasyon matag tuig, daghan ang napalagpot tungod sa imoral nga panggawi. Ang mao bang pagkahulog ngadto sa grabeng sala nagsugod sa pag-ulog-ulog? Sanglit ang katawhan gusto kaayo ug mga komplimento ug pagdayeg, ang gilanahang sinultihan gikan sa maulog-ulogong mga ngabil makapamenos sa pagpakigbisog sa usa ka Kristohanon sa dili-hustong panggawi. Sa dihang kana dili bantayan, mahimong motultol kana sa grabeng mga sangpotanan.

Mga Panalipod Batok sa Pag-ulog-ulog

Ang pag-ulog-ulog nagtagbaw sa gugma sa kaugalingon o garbo sa usa nga giulog-ulogan. Mokiling kana sa paghatag sa usa ka tawo ug gipadakong panglantaw sa iyang kaugalingong katakos, nga mopabati kaniyang labaw sa uban sa usa ka paagi. Ang pilosopo nga si François de La Rochefoucauld nagpakasama sa pag-ulog-ulog sa mini nga kuwarta, “nga kon dili pa tungod sa garbo dili ipasapasa.” Busa, ang paagi sa pagpanalipod sa kaugalingon mao ang pagsunod sa prangkang tambag ni apostol Pablo: “Ako magasulti sa tanan dinha taliwala kaninyo nga dili maghunahunag labaw bahin sa iyang kaugalingon kay sa gikinahanglan nga pagahunahunaon; apan sa paghunahuna sa paaging batonan ang mabuot nga panghunahuna, ang matag usa sumala sa giapod sa Diyos ngadto kaniya nga sukod sa pagtuo.”​—Roma 12:3.

Bisan tuod ang atong kinaiyanhong kiling mao ang tinguha nga makadungog kon unsay makapahimuot sa atong mga dalunggan, ang tinuod natong gikinahanglan sa kadaghanang panahon mao ang binase sa Bibliya nga tambag ug disiplina. (Proverbio 16:25) Si Haring Ahab buot makadungog sa kon unsay makapahimuot lamang kaniya; ang iyang mga alagad nangutana gani kang propetang Micaias nga himoon ang iyang pulong nga “sama sa pulong sa usa kanila [maulog-ulogong mga propeta ni Ahab], ug kinahanglang magsulti ka ug maayo.” (1 Hari 22:13) Kon andam pa si Ahab sa pagpamati sa madayganong pamulong ug nag-usab sa iyang rebelyosong mga paagi, masanta unta niya ang ngilngig nga mga kapildihan sa gubat sa Israel ug usab ang iyang kaugalingong kamatayon. Alang sa atong kaugalingong espirituwal nga kaayohan, kinahanglang mosanong dayon kita sa lig-on, apan mahigugmaon, nga tambag sa tinudlong Kristohanong mga ansiyano, nga buot motabang kanato nga magpabilin sa tul-id nga dalan sa kamatuoran, inay kay mangitag mga tawo nga magsigeg sulti kanato kon unsa kita ka maayo kaayo, nga maggitik sa atong mga dalunggan pinaagig maulog-ulogong sinultihan!​—Itandi ang 2 Timoteo 4:3.

Ang mga Kristohanon dili gayod, sa bisan unsang katarongan, modangop sa pag-ulog-ulog. Sama sa matinumanong Elihu, sila determinadong moampo: “Hinaot nga dili ako mapihigon ngadto kang bisan kinsa, ni moulog-ulog ni bisan kinsang tawo; kay dili ako makamaong moulog-ulog, basig kuhaon ako dayon sa akong Magbubuhat.” Unya, sama kang Pablo, sila makaingon: “Wala kami sukad makaplagi nga may mga sulting maulog-ulogon . . . o nga may pagminaot alang sa hakog nga pangibog.”​—Job 32:​21, 22, An American Translation; 1 Tesalonica 2:​5, 6.

Pagdayeg Diin Kana Angay

Ang dinasig nga proverbio nagpakita nga ang pagdayeg mahimong magsilbing sukdanan, nga nag-ingon: “Ang tunawanan nga kulon maoy alang sa plata ug ang hasohasan maoy alang sa bulawan, apan ang pagdayeg mao ang pagsulay sa kinaiya.” (Proverbio 27:​21, The New English Bible) Oo, ang pagdayeg mahimong magpalambo sa mga pagbati sa pagkalabaw o garbo, nga motultol sa pagkahulog sa usa ka tawo. Sa laing bahin, mahimong magpadayag kini sa iyang pagkamakasaranganon ug pagkamapainubsanon kon iyang ilhon ang iyang pagkautangan kang Jehova sa bisan unsa nga iyang nahimo nga nagdala kaniyag pagdayeg.

Ang sinserong pagdayeg alang sa maayong panggawi o mga kalamposan nagpalig-on sa naghatag ug sa nagdawat. Makaamot kini sa mainit ug maayong pag-apresyar sa usag usa. Nagdasig kini sa pagpaningkamot alang sa dalayegong mga tumong. Ang angayang pagdayeg nga gihatag ngadto sa mga batan-on mahimong magpalihok kanila nga motrabaho pag-ayo. Mahimong motabang kini sa paghulma sa ilang kinaiya samtang maoy ilang tumong nga magkinabuhi sumala sa mga sukdanan nga gidahom kanila.

Busa, likayan nato ang pag-ulog-ulog​—kita man ang nagahatag o ang nagadawat niana. Magmapainubsanon kita samtang dawaton ang pagdayeg. Ug magmadagayaon ug magmabug-os-kalag sa paghatag ug pagdayeg​—sa regular nga paagi ngadto kang Jehova diha sa atong pagsimba ug sa sinserong paagi ngadto sa uban sa matang sa maayong komendasyon ug apresasyon, nga nahinumdom nga “Oh pagkamaayo ang usa ka pulong sa hustong panahon!”​—Proverbio 15:23.