Nganong Magmapasalamaton?
TUNGOD sa operasyon ni Harley sa taludtod siya napugos sa pagbag-o sa iyang karera gikan sa pagkamakinista ngadto sa pagkaklerk sa opisina. Sa dihang gipangutana kon unsay iyang gibati niini nga kausaban, si Harley miingon: “Gimingaw ako sa pagtrabaho sa makina. Apan, sa pagkatinuod, mas malipayon ako sa akong trabaho karon kay sa akong miaging trabaho.”
Naghatag sa hinungdan sa iyang gibating katagbawan, si Harley miasoy: “Kini mao ang tinamdan sa mga tawo nga kauban ko sa pagtrabaho. Lahi niadtong akong trabahoan sa miagi, ang akong superbisor karon ug kaubang mga trabahante mapabilhon sa akong ginahimo, ug sila dili magpugong sa paghatag ug komendasyon. Kini ang nakahatag ug dakong kalainan.” Mibating mapuslanon ug gikinahanglan, si Harley karon maoy usa ka malipayong trabahante.
Ang mga pulong sa komendasyon o pagpasalamat, kon angayan, tinuod gayod nga makalipay sa kasingkasing. Ang epekto sa pagkaingrato, sa laing bahin, mahimong sama ka bugnaw sa gipamulong ni Shakespeare: “Huros, huros, Oh hanging matugnaw, dili ka kay walay-kaluoy sama sa pagkaingrato sa tawo.” Ikasubo, daghan ang tagdawat niana nga kawalay-kaluoy.
Pagbantay Batok sa Pagkaingrato
Sa kalibotan karon ang tim-os nga mga pulong sa pagpasalamat nagkahanaw. Usa ka magsusulat, pananglitan, nangutana: “Kon nakakitag panahon ang pangasaw-onon sa pagbutang ug adres sa 200 ka imbitasyon sa kasal, nganong dili siya makakitag panahon sa pagpadalag mubong sulat sa pagpasalamat alang sa 163 ka regalo?” Kasagaran bisan ang yanong pulong nga “salamat” molabay nga dili ikabungat. Ang pagkamapasalamaton dugang nga gipulihan sa ako-una nga tinamdan. Kining kahimtanga maoy usa sa ilhanan sa kataposang mga adlaw. Si apostol Pablo nagpasidaan: “Imong timan-an nga sa kataposang mga adlaw ang mga panahon maoy puno sa kapeligrohan. Ang mga tawo mahimong tuman ka makiako . . . Sila mahimong tuman ka walay utang-kabubut-on.”—2 Timoteo 3:1, 2, Phillips.
Sa ubang mga kahimtang, ang pagkamapasalamaton gipulihan sa pag-ulog-ulog. Ang mga ekspresyon sa pagpasalamat nagatubod sa kasingkasing nga walay paghunahunag personal nga bentaha. Apan, ang pag-ulog-ulog, nga kasagaran dili-tinuod ug pinasobrahan, tingali naggikan sa tagong mga motibo nga gustong makauna o makabaton ug pipila ka personal nga mga bentaha. (Judas 16) Gawas nga nanglingla sa tagdawat, ang ingon niana nga bulatik daw maoy bunga sa garbo ug pagkamapahitas-on. Nan, kinsa ang buot nga mahimong biktima sa dili-tinuod nga pag-ulog-ulog? Apan ang tiunayng pagkamapasalamaton makapahupay gayod.
Ang tawong nagapasalamat makabaton ug kaayohan sa pagpasalamat. Ang kainit nga iyang bation tungod sa pagkahimong mapasalamaton makadugang sa iyang kalipay ug kalinaw. (Itandi ang Proverbio 15:13, 15.) Ug kay usa ka positibong hiyas, ang pagkamapasalamaton magpanalipod kaniya batok sa maong negatibong mga pagbati sama sa kasuko, kasina, ug kayugot.
“Ipakita ang Inyong Kaugalingon nga Mapasalamaton”
Ang Bibliya nag-awhag kanato sa pag-ugmad sa espiritu sa pagkamapasalamaton. Si Pablo nagsulat: “May kalabotan sa tanang butang pagpasalamat. Kay kini mao ang kabubut-on sa Diyos kahiusa kang Kristo Jesus maylabot kaninyo.” (1 Tesalonica 5:18) Ug gitambagan ni Pablo ang mga taga-Colosas: “Pagamha ang kalinaw sa Kristo diha sa inyong mga kasingkasing . . . Ug ipakita ang inyong kaugalingon nga mapasalamaton.” (Colosas 3:15) Daghang salmo nasudlan ug mga ekspresyon sa pagpasalamat, nga nagpakita nga ang kinasingkasing nga pagkamapasalamaton maoy usa ka diyosnong hiyas. (Salmo 27:4; 75:1) Tin-aw, si Jehova nga Diyos malipay kon kita magpakitag pagkamapasalamaton sa adlaw-adlawng mga butang sa kinabuhi.
Apan unsang mga butanga niining dili-mapasalamatong kalibotan ang nagpalisod kanato sa pag-ugmad sa espiritu sa pagkamapasalamaton? Sa unsang paagi atong ikapasundayag ang mapasalamatong tinamdan diha sa adlaw-adlawng kinabuhi? Kining mga pangutanaha pagahisgotan sa sunod nga artikulo.