Nahinumdom Ka Ba?

Nakaplagan ba nimo ang dili pa dugayng mga isyu sa Ang Bantayanang Torre nga dunay praktikal nga bili kanimo? Nan nganong dili sulayan ang imong panumdoman sa mosunod nga mga pangutana?

◻ Unsay kalainan tali sa “adlaw sa Ginoo” ug “ang adlaw ni Jehova”? (Pinadayag 1:​10; Joel 2:11)

Ang “adlaw sa Ginoo” naglakip sa katumanan sa 16 ka panan-awon nga gihubit sa Pinadayag mga kapitulo 1 hangtod sa 22 ug sa paninugdang mga hitabo nga gitagna ni Jesus ingong tubag sa pangutana sa iyang mga tinun-an mahitungod sa ilhanan sa iyang presensiya. Ingong kinapungkayan sa adlaw sa Ginoo, ang makalilisang nga adlaw ni Jehova mobuto sa dihang iyang ipahamtang ang paghukom sa dunot nga kalibotan ni Satanas. (Mateo 24:​3-14; Lucas 21:11)​—12/15, panid 11.

◻ Unsa ang pipila ka talagsaong mga hiyas sa Makarios nga Bibliya?

Ang ngalang Jehova makita kapin sa 3,500 ka beses sa Makarios nga Bibliya. Usa ka eskolar sa relihiyosong literatura sa Rusya miingon: “[Ang] hubad nagsunod sa Hebreohanong teksto, ug ang pinulongan sa hubad maoy putli ug angayan sa ulohan.”​—12/15, panid 27.

◻ Unsa “ang kamatuoran” nga giingon ni Jesus nga magpagawas kanato? (Juan 8:32)

Sa “kamatuoran,” ang gipasabot ni Jesus mao ang dinasig sa Diyos nga impormasyon​—ilabina ang impormasyon bahin sa kabubut-on sa Diyos​—nga gipreserbar diha sa Bibliya.​—1/1, panid 3.

◻ Kinsa ang modernong-adlaw nga Jehu ug Jonadab?

Si Jehu naghulagway kang Jesu-Kristo, nga gihawasan sa yuta pinaagi “sa Israel sa Diyos,” ang dinihogang mga Kristohanon. (Galacia 6:​16; Pinadayag 12:17) Ingon nga si Jonadab migula aron mosugat kang Jehu, usa ka “dakong panon” gikan sa mga nasod nanggula aron paluyohan ang yutan-ong mga hawas ni Jesus. (Pinadayag 7:​9, 10; 2 Hari 10:15)​—1/1, panid 13.

◻ Unsay gipasabot sa ‘paglakaw uban sa Diyos’? (Genesis 5:​24; 6:9)

Kini nagpasabot nga kadtong nagabuhat sa ingon, sama ni Enoc ug Noe, naggawi sa paaging naghatag ug ebidensiya sa lig-ong pagtuo sa Diyos. Gibuhat nila kon unsay gisugo ni Jehova kanila ug gipaigo ang ilang mga kinabuhi uyon sa ilang nasayran mahitungod kaniya gikan sa iyang mga pagpakiglabot sa mga tawo.​—1/15, panid 13.

◻ Nganong ang usa ka tawo magplanong daan sa posibilidad nga mamatay siya?

Sa usa ka diwa, ang paghimo sa maong mga kahikayan maoy gasa ngadto sa pamilya sa usa. Kini nagpasundayag ug gugma. Kana nagpamatuod sa tinguha nga ‘magtagana alang kanila nga mga membro sa panimalay sa usa’ bisan pag wala na siya uban kanila. (1 Timoteo 5:8)​—1/15, panid 22.

◻ Unsa ang nalampos sa “daang pakigsaad”? (2 Corinto 3:14)

Kadto mitaganag pasiunang hulagway sa bag-ong pakigsaad ug, uban sa balikbalik nga mga paghalad niadto, nagpasundayag sa dakong panginahanglan sa tawo nga matubos gikan sa sala ug kamatayon. Kadto maoy “magtutudlo nga nagatultol ngadto kang Kristo.” (Galacia 3:24)​—2/1, panid 14.

◻ Sa unsang mga paagi nga ang bag-ong pakigsaad walay kataposan? (Hebreohanon 13:20)

Una, lahi sa pakigsaad sa Balaod, kini dili gayod pulihan. Ikaduha, ang mga resulta sa paglihok niini maoy permanente. Ug ikatulo, ang yutan-ong mga sakop sa Gingharian sa Diyos nagpadayon sa pagbatog kaayohan gikan sa kahikayan sa bag-ong pakigsaad hangtod sa Milenyo.​—2/1, panid 22.

◻ Unsang mga kaayohan ang moresulta gikan sa pagkahimong mapasalamaton?

Ang kainit nga mabati sa usa ka tawo tungod sa pagkamapasalamaton nakadugang sa iyang kalipay ug kalinaw. (Itandi ang Proverbio 15:​13, 15.) Kay usa ka positibong hiyas, ang pagkamapasalamaton manalipod sa usa gikan sa negatibong mga pagbati sama sa kasuko, kasina, ug kayugot.​—2/15, panid 4.

◻ Ngadto sa unsang mga pakigsaad nga ang mga gianak-sa-espiritu gipasalmot?

Ang bag-ong pakigsaad, nga gihimo ni Jehova uban sa mga membro sa espirituwal nga Israel, ug ang pakigsaad alang sa Gingharian, nga gihimo ni Jesus uban sa dinihogang mga sumusunod sa iyang lakang. (Lucas 22:​20, 28-​30)​—2/15, panid 16.

◻ Unsang tulo ka dagkong pangilin nga gisugo ang mga Israelinhon sa pagtambong?

Ang Pista sa mga Tinapay nga Walay Lebadura, nga nagsunod dayon sa Paskuwa sa Nisan 14; ang Pista sa mga Semana, sa ika-50 ka adlaw gikan sa Nisan 16; ug ang Pista sa Panagkatigom, o Pista sa mga Balongbalong, sa ikapito nga bulan. (Deuteronomio 16:​1-​15)​—3/1, panid 8, 9.

◻ Nganong usa ka pribilehiyo ang pagtambong sa Kristohanong mga panagkatigom?

Si Jesus miingon: “Diin gani may duha o tulo nga nagkatigom sa akong ngalan, anaa ako sa ilang taliwala.” (Mateo 18:​20; 28:20) Usab, usa ka hinungdanong paagi nga mahitabo ang espirituwal nga pagpakaon maoy pinaagi sa mga tigom sa kongregasyon ug sa mas dagko pang panagkatigom. (Mateo 24:45)​—3/1, panid 14.

◻ Unsa ang gigikanan sa ngalang Nimrod?

Daghang eskolar ang samag opinyon nga ang ngalang Nimrod dili mao ang ngalang gihatag sa pagkatawo. Hinuon, ilang giisip kini nga usa ka ngalang gihatag sa ulahi aron mohaom sa iyang rebelyosong kinaiya human nga kana nadayag.​—3/15, panid 25.

◻ Unsa ka hinungdanon ang pamilya sa tawhanong katilingban?

Ang pamilya usa ka kinahanglanon sa tawo. Ang kasaysayan nagpakita nga samtang nagkaanam ka daot ang kahikayan sa pamilya, ang mga komunidad ug mga nasod nagkahuyang. Busa ang pamilya adunay direktang epekto sa kalig-on sa katilingban ug sa kaayohan sa kabataan ug sa umaabot nga mga kaliwatan.​—4/1, panid 6.

◻ Unsa ang tulo ka pamatuod nga ang Bibliya mao ang Pulong sa Diyos?

(1) Kini tukma sa siyentipikanhong paagi; (2) kini naundan sa walay kataposang mga prinsipyo nga praktikal alang sa modernong pagkinabuhi; (3) kini naundan sa espesipikong mga tagnang nangatuman, ingon sa gipamatud-an sa nanghitabo sa kasaysayan.​—4/1, panid 15.