Paghulat nga Mapailobon

ANG magbalantay sa hayop nga nagsige ug singgit “Lobo!” bisag walay lobo nakakaplag nga ang iyang sunod nga pagpangayog tabang wala pamatia. Sa susama karon, daghan ang wala magtagad sa pagkaduol sa adlaw ni Jehova tungod kay sila nakadungog na ug daghan kaayong mga pasidaan nga napamatud-ang bakak nga mga alarma. Ang mismong kamatuoran nga daghan kaayo ang napakyas sa pagsabot kon hain nga pasidaan ang matuod ug busa angay pamation pahimuslan sa dakong kaaway sa Diyos, si Satanas, kanang mini nga “anghel sa kahayag.”​—2 Corinto 11:14.

Ang espiritu sa pagkawalay-pagtagad mahimong peligroso bisan alang niadtong nag-alagad kang Jehova sa dugaydugay nang panahon. Ngano? Tagda ang pasidaan ni apostol Pedro sa unang siglo.

Paghunahunang Matin-aw

Ang ikaduhang dinasig nga sulat ni Pedro maoy usa ka pahinumdom sa unang mga Kristohanon, ug alang usab kini kanato. “Mga hinigugma,” siya nagsulat, “ikaduhang sulat na kini karon nga akong gisulat kaninyo, diin, sama sa akong nauna, ginapukaw ko ang tin-aw ninyong mga kagahom sa panghunahuna agig pagpahinumdom.” (2 Pedro 3:1) Unsay gibasehan ni Pedro alang niining butanga? Gipasiugda ni Pedro ang presensiya sa mga mabiaybiayon kansang mga pagbiaybiay nagpaluya sa gikinahanglang pagbati sa pagkadinalian labot sa panahon nga gikinabuhian sa mga alagad sa Diyos. Karon na ang panahon nga magbantay nga malingla sa mga mayubiton. Mao nga giawhag ni Pedro ang iyang mga magbabasa ‘sa paghinumdom sa mga pulong nga kanhi gisulti sa balaang mga propeta.’ (2 Pedro 3:2; Buhat 3:​22, 23) Unsay giingon sa mga propeta?

Ang matinumanong mga alagad sa Diyos sa daghang okasyon nagpasiugda kon sa unsang paagi pagataposon sa mga paghukom sa Diyos ang pagkadaotan. Gipahinumdoman ni Pedro ang iyang mga magbabasa bahin sa Lunop sa adlaw ni Noe nga gigamit sa Diyos ingong kasangkapan sa pagpangilabot sa dihang ang yuta napuno sa pagkadaotan. Kadtong dakong Lunop nagtapos gayod sa kalibotan niadtong panahona. Apan giluwas sa Diyos si Noe ug ang iyang pamilya diha sa usa ka arka uban sa hawas sa buhing mga linalang nga “gikan sa tanang matang sa unod.” Ang mga sugilambong sa tibuok kalibotan nagpamatuod sa pagkatinuod sa asoy sa Bibliya.a​—Genesis 6:​19; 2 Pedro 3:​5, 6.

Gitawag ni Pedro kadto nga pagpangilabot sa Diyos ingong ‘usa ka hitabo nga wala matikdi’ sa pipila ka tawo. Sa ulahi nalimbongan ang uban sa mga mabiaybiayon sa maong panahon sa pagkahimong di-mabinantayon. Kita, hinunoa, kinahanglang dili gayod mawad-an sa panan-aw nianang nahimo na ni Jehova. Gisultihan kita ni Pedro: “Pinaagi sa mao ra nga pulong ang mga langit ug ang yuta nga mao karon gikatagana alang sa kalayo ug gikagahin sa adlaw sa paghukom ug sa kalaglagan sa mga tawong dili-diyosnon.” (2 Pedro 3:7) Oo, ang pagpangilabot sa Diyos mahitabo pag-usab.

Ang Diyos Dili Langaylangayan

Daghang milenyo nang panahon ang miagi. Nganong ang Diyos naghulat ug dugay kaayo sa pagsulbad sa mga problema sa tawo? Sa makausa pa, gihatagag pagtagad ni Pedro ang laing kamatuoran. Siya nag-ingon: “Ayaw sayloi sa pagmatikod kining butanga, mga hinigugma, nga ang usa ka adlaw kang Jehova maoy ingon sa usa ka libo ka tuig ug ang usa ka libo ka tuig ingon sa usa ka adlaw.” (2 Pedro 3:8) Ang hunahuna ni Jehova sa panahon lahi gikan sa atoa. Alang sa walay kataposang Diyos, ang yugto gikan sa paglalang kang Adan hangtod karon wala pa gani moabot ug usa ka semana. Apan kon unsa may atong hunahuna bahin sa panahon, ang matag milenyo ug matag adlaw nga moagi nagdala kanato nga mas duol pa sa katumanan sa katuyoan ni Jehova.

“Ang binantayang linung-ag dili hinuon mobukal” maoy usa ka panultihon nga nagpasabot nga ang paghulat lamang sa usa ka hitabo daw dugay kaayong moabot. Apan, si Pedro nagsugyot nga ‘magpaabot ug kanunayng huptan nga duol sa hunahuna ang pagkaanaa sa adlaw ni Jehova.’ (2 Pedro 3:12) Sa unsang paagi atong maugmad ang panghunahuna nga magpabantay kanato kanunay sa pagkaduol sa pagpangilabot sa Diyos?

Mga Aksiyon Mas Dayag kay sa mga Pulong

Gihatagag pasiugda ni Pedro ang mga binuhatan ug mga aksiyon. Gipunting niya ang “balaang mga buhat sa panggawi” maingon man “mga buhat sa diyosnong pagkamahinalaron.” (2 Pedro 3:11) Unsay nalangkit niini?

Ang tinuod nga alagad sa Diyos molihok sa usa ka paagi nga makapahimuot Kaniya. Ang pagtuo sa maong matuod nga magsisimba makita diha sa iyang paggawi. Kini magpaila kaniya gikan niadtong kinsa nagsulti lamang nga nagtuo sa Diyos ug sa iyang mga saad. Tingali nakamatikod ka nga ang publikong pag-alagad sa mga Saksi ni Jehova naghimo kanila nga lahi. Sila moduaw sa imong balay nga maghisgot sa mga saad sa Diyos nga gilatid diha sa Bibliya. Apan sila usab nagpamatuod sa ilang mga paglaom ug mga pagtuo matag higayong makahibalag sila ug mga tawo.

Ang Saksi nga nagmaokupado sa pagpadayag sa iyang pagtuo ngadto sa uban nagpalig-on pag-usab sa iyang pagtuo. Ang pagpadayag magpalalom sa impresyon ug sa samang higayon mohatag ug kalipay ug katagbawan sa kahiladman. Sa dihang imantala nato ang maayong balita sa Gingharian sa Diyos, atong gipahimut-an usab si Jehova. Kita nahibalo nga siya ‘dili usang dili-matarong nga kalimtan ang atong buhat ug ang gugma nga atong gipakita alang sa iyang ngalan,’ ingon sa gipadayag ni Pablo nga kaubang apostol ni Pedro.​—Hebreohanon 6:10; Roma 10:​9, 10.

Unsay resulta niining gikalingahang pagpakaylap sa maayong balita sa Gingharian sa panahon sa himalatyong mga adlaw niining presenteng daotang sistema? Ginatos ka linibong tawong matinud-anon-ug-kasingkasing nagpakakat-on na karon kon unsaon sa pagkabaton ug suod nga relasyon uban kang Jehova, sa pagpahimulos sa iyang dili-takos nga kalulot ug pagkaplag ug matuod nga kalipay diha sa palaabotong kinabuhing walay kataposan diha sa paraiso nga yuta.

Abante nga Kahibalo

Bisag nahibalo kita gikan sa Bibliya nga mangilabot si Jehova nga Diyos sa iyang hustong panahon, kinahanglan patalinghogan nato ang dugang pasidaan nga gihatag ni Pedro. “Kay nakabaton man niining nahiuna nga kahibalo, pagbantay kamo nga dili kamo madala palayo uban kanila pinaagi sa sayop sa mga masupilon-balaod nga katawhan ug mangahulog gikan sa kaugalingon ninyong kalig-on.”​—2 Pedro 3:17.

Si Jehova nahibalo na gayod daan nga ang uban nga kulang ug malig-ong pagtuo maluya sa morag pagkalangan sa diyosnong pagpangilabot. Siya usab nahibalo nga ang impluwensiya sa mga tawong dili-diyosnon makadaot sa iyang matuod nga mga alagad o, sa labing menos, makadaot sa ilang pagtuo nga ang pagbalaan sa ngalan sa Diyos haduol na. Pagkamakapasubo nga mahulog gikan sa pagkamalig-on niining kataposang mga adlaw!

Dili karon panahon nga magbaton ug pagduhaduha o kalibog kon unsay buhaton ni Jehova. (Hebreohanon 12:1) Hinunoa, karon na ang panahon sa pagpalambo sa pagpabili kon unsay nahatag sa pailob ni Jehova​—ang palaabotong kaluwasan sa minilyon nga mahimong bahin sa internasyonal nga dakong panon ug paglaom nga maluwas sa umaabot nga dakong kasakitan. (Pinadayag 7:​9, 14) Si Pedro nagtambag: “Padayon kamo sa pagtubo diha sa dili-takos nga kalulot ug sa kahibalo sa atong Ginoo ug Manluluwas nga si Jesu-Kristo. Ngadto kaniya ang himaya karon ug hangtod sa adlawng dayon.”​—2 Pedro 3:18.

“Ipabilin ang Inyong Kaugalingon Diha sa Gugma sa Diyos”

Ang pagkahimong okupado sa pagsangyaw sa Gingharian ug regular nga pagtambong sa Kristohanong mga tigom sa pagsimba ug pagtuon sa Pulong sa Diyos maghatag kanato ug panalipod. Sa ingon, wala kitay panahon sa pagkabalaka pag-ayo sa nagkadaot nga mga kahimtang sa daotang sistema karong adlawa. Ang mga kahadlok ug mga kabalaka dili angay mangibabaw sa kinabuhi sa matuod nga mga Kristohanon. (1 Corinto 15:58) Kon mas okupado kita sa pag-alagad kang Jehova, mas dali rang molabay ang panahon.

Si Judas, nga katalirongan ni Pedro ug igsoon ni Jesus sa inahan, nagtambag kanato: “Kamo, mga hinigugma, pinaagi sa pagpalig-on sa inyong kaugalingon diha sa inyong labing balaan nga pagtuo, ug sa pag-ampo uban sa balaang espiritu, ipabilin ang inyong kaugalingon diha sa gugma sa Diyos, samtang kamo nagapaabot sa kaluoy sa atong Ginoong Jesu-Kristo nga nagalantaw sa kinabuhing walay-kataposan.” (Judas 20, 21) Matikdi ang bili sa usa ka positibong tinamdan nga mapatungha sa pagkamalahutayon diha sa pag-ampo. (1 Tesalonica 5:17) Dayon si Judas nagdugang: “Padayon kamo sa pagpakitag kaluoy sa pipila nga adunay mga pagduhaduha; luwasa sila pinaagi sa pagsakmit kanila gikan sa kalayo. Apan padayon sa pagpakitag kaluoy sa uban, nga magabuhat sa ingon uban ang kahadlok, samtang kamo nagadumot bisan gani sa pang-ilalom nga besti nga namansahan sa unod.” (Judas 22, 23) Pagkahinungdanong maglig-onay ang usag usa niining malisod nga mga panahon! Ug pagkahinungdanon nga dili mahulog sa panulay, nga gamiton kining gilugwayan nga “adlaw sa kaluwasan” ingong usa ka pasumangil sa “haluag nga paggawi,” nga kaylap kaayo sa dunot-ug-moral nga kalibotan karon.​—Judas 4; 2 Corinto 6:​1, 2.

Pinaagi sa pagpatalinghog sa mahigugmaong tambag ni Pedro, Pablo, ug Judas ug pinaagi sa pagpabiling okupado ug aktibo sa pag-alagad sa Diyos, ikaw makahulat nga mapailobon sa pagpangilabot ni Jehova. Apan makahimo ka kaha?

Ayaw pagpanuko sa pagkontak sa mga Saksi sa inyong duol alang sa tabang sa paglig-on sa imong pagtuo sa saad sa Maglalalang nga kinabuhing dayon. Sayra kon unsay gikinahanglan aron mahimong takos sa pagpakigbahin niining dili na gayod masubli nga globonhong buluhatong pagsangyaw nga matapos sa nagsingabot nga dakong kasakitan. (Marcos 13:10) Sa ingon mabatonan mo ang palaaboton nga mabuhi diha sa bag-ong kalibotan sa pagkamatarong nga gisaad ni Jehova. (2 Pedro 3:13) Patalinghogi ang iyang mga pahinumdom! Paghulat nga mapailobon! Magmaokupado!

[Mga footnote]

[Kapsiyon sa panid 7]

Sayra karon ang bahin sa saad sa Diyos nga Paraiso

[Picture Credit Line sa panid 5]

Wolf: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.