Yuta—Nganong Kini Ania Dinhi?
Adunay pangutana nga angay nimong palandongon: Ang ato bang planetang yuta gipatungha sa usa ka intelihenteng Maglalalang nga dunay katuyoan alang sa yuta ug sa mga tawo diha niana? Ang pagsulbad sa maong isyu alang sa imong katagbawan makatabang kanimo sa pagsabot kon unsay anaa sa umaabot alang sa atong planeta.
DAGHANG siyentipiko nga nagtuon pag-ayo sa uniberso ug sa atong yuta nakakita ug mga pamatuod nga mopunting sa paglungtad sa usa ka Maglalalang, nga ang Diyos maoy nagsuportar niini. Tagda ang mga komento gikan sa usa lamang kanila:
Si Propesor Paul Davies misulat diha sa The Mind of God: “Ang paglungtad sa usa ka hapsay, maayong pagkahan-ayng uniberso nga dunay lig-on, organisado, komplikadong mga gambalay nagkinahanglag mga balaod ug mga kahimtang nga linain kaayo ang matang.”
Human maghisgot ug ubay-ubayng “mga pagkaatol” nga giingon sa mga astropisiko ug uban pa, si Propesor Davies midugang: “Kon palandongon kining tanan, kini magtagana ug makapahinganghang pamatuod nga ang kinabuhi ingon sa pagkahibalo nato niini nagdepende pag-ayo sa kinaiya sa mga balaod sa pisiko, ug sa pipila ka morag sulagmang mga aksidente diha sa aktuwal nga mga sukod nga gipili sa kinaiyahan alang sa lainlaing mga gibug-aton sa partikulo, mga gikusgon sa puwersa, ug uban pa. . . . Igo na ang pag-ingon nga, kon kita pay Diyos, ug mopili ug mga numero alang niining mga sukora sumala sa kon unsay mahunahunaan pinaagi sa paglisoliso sa usa ka hugpong sa mga lisoanan, makaplagan nato nga halos ang tanang posisyon sa lisoanan maghimo sa uniberso nga dili-kapuy-an. Sa pipila ka kaso morag ang lainlaing mga lisoanan kinahanglang pasiboon ngadto sa hilabihang katakdo aron kapuy-an ang uniberso. . . . Ang kamatuoran nga bisan ang gagmayng mga kausaban sa mga balaod lagmit maghimo sa uniberso nga dili-makita tinong usa ka kamatuoran nga hinungdanon kaayo.”
Ang gipasabot niini alang sa daghan mao nga ang atong yuta, lakip sa ubang bahin sa uniberso, gipatungha sa usa ka may-katuyoan nga Maglalalang. Kon mao, kinahanglang susihon nato kon nganong iyang giumol ang yuta sa sinugdan. Kinahanglang tinoon usab nato, kon mahimo nato, kon unsay iyang katuyoan alang sa yuta. Niining bahina ang talagsaong kalainan mopatim-aw. Bisan pa sa pagkapopular kaayo sa ateyismo, ang makapatingalang gidaghanon sa mga tawo nagtuo gihapon sa usa ka intelihenteng Maglalalang. Kadaghanang iglesya sa Kakristiyanohan sa ngalan lamang naghisgot bahin sa usa ka labing gamhanang Diyos ug Maglalalang sa atong uniberso. Bisan pa niana, talagsa rang magsulti kining mga relihiyona uban ang pagsalig ug pagtuo bahin sa umaabot sa yuta diha sa katuyoan sa Diyos.
Unsay Giingon sa Bibliya?
Makataronganon nga molantaw sa usa ka tuboran sa impormasyon nga kaylap nga gidawat nga naggikan sa Maglalalang. Kanang maong tuboran mao ang Bibliya. Usa sa labing yano ug labing tin-aw nga mga pamulong diha niana mahitungod sa umaabot sa atong yuta makaplagan diha sa Ecclesiastes 1:4. Atong mabasa: “Usa ka kaliwatan ang moagi, ug laing kaliwatan ang moabot: apan ang yuta magpabilin sa walay kataposan.” (King James Version) Ang Bibliya prangkang nagsaysay kon nganong si Jehova nga Diyos naglalang sa yuta. Nagpakita usab kini nga iyang gibutang kini diha gayod sa hustong posisyon sa uniberso ug gilay-on sa atong adlaw aron sa pagsustento sa kinabuhi diha niana. Ang labing gamhanang Diyos nagdasig sa karaang propetang Isaias sa pagsulat: “Mao kini ang giingon ni Jehova, ang Maglalalang sa mga langit, Siya nga matuod nga Diyos, ang Mag-uumol sa yuta ug ang Magbubuhat niini, Siya ang Usa nga lig-ong nagtukod niini, kinsa wala maglalang niini nga walay kapuslanan, nga nag-umol niini aron pagapuy-an: ‘Ako mao si Jehova, ug wala nay lain.’”—Isaias 45:18.
Apan komosta ang pag-ugmad sa tawo sa mga paagi sa paglaglag sa tanang kinabuhi dinhi sa yuta? Sa iyang walay ikatanding kaalam, ang Diyos nag-ingon nga mobalda siya sa dili pa malaglag sa katawhan ang tanang kinabuhi sa atong planeta. Matikdi kining makapasalig nga saad diha sa kataposang basahon sa Bibliya, ang Pinadayag: “Ang kanasoran nangapungot, ug ang imo mismong kapungot miabot, ug ang tinudlong panahon nga hukman ang mga patay, ug sa paghatag sa ilang ganti ngadto sa imong mga ulipon nga mga propeta ug sa mga balaan ug sa mga nangahadlok sa imong ngalan, ang gagmay ug ang dagko, ug sa pagdala ngadto sa kagun-oban niadtong mga nagagun-ob sa yuta.”—Pinadayag 11:18.
Gipadayag ni Jehova kanato kon unsa ang iyang orihinal nga katuyoan sa paglalang sa yuta, kining mutya sa kawanangan, sumala sa paghubit niini sa usa ka astronot nga naglibot sa yuta. Katuyoan sa Diyos nga mahimo kining globonhong paraiso, haruhay nga puy-an sa mga tawo—mga lalaki ug babaye—ang tanan nanagpuyo diha sa kalinaw ug kaharmonya. Iyang gihikay nga papuy-an ang planeta nga inanay pinaagi sa pagtugot sa unang tawhanong magtiayon sa pagpatunghag liwat. Alang sa kahimuot ug kalipay sa unang tawhanong magtiayon, si Jehova naghimo sa usa ka bahin sa yuta ngadto sa usa ka paraisonhong kahimtang. Samtang ang pagpasanay sa tawhanong mga pamilya magpadayon latas sa katuigan ug kasiglohan, ang tanaman sa Eden inanay nga ipalukop hangtod nga ang Genesis 1:28 matuman: “Ang Diyos miingon kanila: ‘Magmabungahon ug dumaghan kamo ug pun-a ang yuta ug gamhi kini.’”
Samtang makita nato karon ang makapasubong kahimtang sa yuta ug sa mga molupyo niini, nagkahulogan ba kini nga ang orihinal nga katuyoan sa Diyos alang sa yuta napakyas? O giusab ba niya ang iyang katuyoan ug mihukom nga tungod sa pagkabaliko sa katawhan, tugotan niya nga ang planeta magun-ob sa bug-os ug magsugod na usab, ingnon ta? Dili, makaseguro kita nga walay usa niining kahimtanga ang matuod. Ang Bibliya nagtug-an kanato nga bisan unsay katuyoan ni Jehova kinahanglang sa ngadtongadto mahitabo, nga bisan unsay iyang nahukman dili mababagan ni bisan kinsang indibiduwal o bisan sa usa ka wala-damhang kaugmaran. Siya nagpasalig kanato: “Busa ang akong pulong nga magagula gikan sa akong baba mamatuman gayod. Kini dili mobalik kanako nga walay sangpotanan, kondili kini magatuman sa akong gikahimut-an, ug kini tino nga molampos nga tungod niana kini akong gipadala.”—Isaias 55:11.
Ang Katuyoan sa Diyos Nabalda, Wala Mausab
Sa pagtalikod ni Adan ug Eva ug sa pagpapahawa kanila gikan sa tanaman sa Eden, dayag nga ang katuyoan sa Diyos alang sa usa ka paraisong yuta matuman nga wala sila. Bisan pa niana, gipakita ni Jehova niadtong tungora mismo nga pipila sa ilang kaliwat magtuman sa iyang orihinal nga sugo. Tinuod, nagkinahanglan kini ug panahon, bisan daghang siglo, apan walay timailhan kon unsa ka taas nga panahon ang malangkit sa pagtuman sa orihinal nga sugo bisan pag sila si Adan ug Eva nagpadayon sa pagpuyo sa kahingpitan. Ang kamatuoran mao nga pagkatapos sa Milenyal nga Pagmando ni Kristo Jesus—kapin lag diyutay sa usa ka libo ka tuig gikan karon—ang Paraisonhong mga kahimtang sa Eden molukop sa tibuok yuta ug ang planetang Yuta pagapuy-an sa malinawon ug malipayong mga kaliwat sa unang tawhanong magtiayon. Sa pagkatinuod, ang katakos ni Jehova ingong dili-masayop nga Tigpahinabo mabindikar sa walay kataposan!
Dayon matuman ang kulbahinam nga mga tagna nga gidasig sa Diyos dugay na kaayo kanhi. Ang mga teksto sama sa Isaias 11:6-9 mahimayaong matuman: “Ang lobo mopuyo gayod sa makadiyot uban sa laking karnero, ug uban sa nating kanding ang leopardo mismo mohigda, ug ang nating baka ug ang lambungayan nga nating leyon ug ang maayong pagkapakaon nga mananap manag-ipon; ug ang gamay nga batang lalaki mao lamay magmando kanila. Ug ang baka ug ang oso mismo managsibsib; ang ilang mga nati manag-ipon sa paglubog. Ug bisan ang leyon mokaon ug uhot sama gayod sa torong baka. Ug ang bata nga masuso magadula gayod sa lungag sa kobra; ug ang bata nga linutas mokuot sa lungag sa halas nga bahion. Dili gayod nila pagadaoton o pagagun-obon ang tibuok ko nga bukid nga balaan; tungod kay ang yuta mapuno gayod sa kahibalo kang Jehova ingon sa mga tubig nga nagatabon sa dagat.”
Ang dili-maayong panglawas ug makamatay nga mga balatian mahimo unyang mga butang sa nangagi, maingon man ang kamatayon mismo. Duna bay mas tin-aw pa niining yanong mga pulong nga makaplagan diha sa kataposang basahon sa Bibliya? “Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:3, 4.
Oo, makasalig kita—ang atong maanindot nga planetang Yuta magpabilin. Hinaot nga imong pribilehiyo nga molabang-buhi sa kataposan niining daotang sistema sa mga butang, uban sa tanang makadaot-sa-yuta nga mga batasan niini. Ang hinlo nga bag-ong kalibotan nga ipahinabo sa Diyos haduol na. Ug daghang minahal ang mahigmata gikan sa kamatayon pinaagi sa milagro sa pagkabanhaw. (Juan 5:28, 29) Sa pagkatinuod, ang atong yuta magpabilin, ug kita makapabilin uban niana ug magpahimulos niana.