Mga Magmamantala sa Gingharian
Nagtaho “Matag Adlaw Diha sa Tiyanggihan”
GIPAHIMUSLAN ni apostol Pablo ang matag kahigayonan sa pagpakaylap sa mensahe sa Gingharian. Aron makaplagan ang mga tawong takos, siya nangatarongan “sa mga Judio diha sa sinagoga . . . ug sa matag adlaw diha sa tiyanggihan ngadto kanilang nahitabong atua didto.”—Buhat 17:17.
Ang maong kasibot maoy ilhanan sa matuod nga mga magsisimba ni Jehova sukad sa unang siglo K.P. (Mateo 28:19, 20) Karong adlawa, ang mga Saksi ni Jehova sa susama naggamit ug nagkalainlaing mga paagi samtang sila masibotong nagtabang sa matinud-anog-kasingkasing nga mga tawo nga makadangat sa tukmang kahibalo sa kamatuoran. (1 Timoteo 2:3, 4) Ang mosunod nga kasinatian gikan sa Australia naghulagway niini.
Lima ka adlaw matag semana, si Sid ug Harold nagpulihay sa pagbantay sa gamay nga displeyhanan sa literatura sa Bibliya diha sa usa ka estasyon sa tren sa Sydney. Sila nagapaambit sa maayong balita sa Gingharian sa Diyos niining paagiha sulod na sa mga lima ka tuig. Si Sid, kinsa 95 anyos, nagbatbat: “Sa dihang ako nag-edad ug 87, dili na ako makahimo sa pagmaneho ug kotse. Kana nagpahigawad kanako tungod kay gikalipay ko ang publikong pagpamatuod nga kalihokan. Usa ka adlaw samtang duol sa usa ka iladong duawanan sa turista nga gitawag ug Echo Point sa Katoomba, akong nakita ang usa ka dibuhista nga nagbaligya ug mga dinibuhong talan-awon. Akong gisud-ong ang mga dibuho ug miingon sa akong kaugalingon, ‘Ako adunay mas maanindot nga mga hulagway kay niana dinhi sa akong bag—ug mas barato pa kay niana!’ Busa mihukom ako sa pagtukod ug usa ka gamayng displeyhanan, gipahiluna kana sa dapit nga adunay daghang turista, ug nagtanyag sa mga lumalabay sa maanindot nga pagkahulagwayng literatura sa Bibliya nga giapod-apod sa mga Saksi ni Jehova.
“Upat ka tuig kanhi, akong gibalhin ang displeyhanan sa Sydney, ug si Harold miduyog kanako. Kami magpulihay sa pagbantay sa displeyhanan ug sa pagtabang sa among lokal nga mga kongregasyon.” Si Harold, nga karon 83, nag-ingon: “Gikan sa Lunes hangtod sa Biyernes diyutay ra kaayong mga tawo ang anaa sa balay. Busa ang pagpaambit sa mensahe sa Gingharian niining paagiha nagpahiluna kanamo kon asa ang mga tawo. Kasagaran, kami nakabaton ug mas maayong mga resulta. Ang among napahilunang mga literatura talagsaon kaayo alang niining nasora.”
“Bisan pag kami nagbalhinbalhin sa upat o lima ka lainlaing mga dapit sulod sa katuigan,” nag-ingon si Sid, “wala madugay nailado kami. Ang pipila ka tawo moduol kanamo alang sa literatura. Ang uban adunay mga pangutana nga buot nilang matubag. Ug ang pipila buot lang nga makighinabi sa pipila ka minuto. Mao lamang kini ang panahon nga ang akong mga balikduaw moduol kanako,” siya mikatawa.
“Daghang tawo ang tinuorayng interesado sa Bibliya,” midugang si Harold. “Sa usa ka bulan upat ka tawo ang misugod sa pagtuon sa Bibliya uban sa mga Saksi ingong resulta sa literatura nga ilang nadawat gikan kanamo ug tungod sa mga pangutana nga among gitubag gikan sa Bibliya. Ang mga kasinatiang sama niana nagdasig pag-ayo kanamo.”
Sama ni Sid ug Harold—ug sama ni apostol Pablo—ang mga Saksi ni Jehova bisan diin naggamit sa tanang paaging posible sa pagpakaylap sa ilang hinungdanong mensahe. Busa, ang “maayong balita” padayong giwali “sa tibuok gipuy-ang yuta.”—Mateo 24:14.