Mahimong Ikapasig-uli ang Pagsalig!
BISAN pag ang naglungtad karon nga krisis sa pagsalig maoy usa ka ilhanan sa “kataposang mga adlaw,” ang kakulang ug pagsalig nadayag usab linibo ka tuig kanhi. (2 Timoteo 3:1) Una kining mitungha sa wala gayod damha nga dapit—diha sa paraiso. Ang Bibliya naghisgot bahin sa maong dapit: “Ang Diyos nagbuhat ug usa ka tanaman sa Eden, dapit sa silangan, ug gibutang niya didto ang tawo nga iyang giumol. Busa nagpaturok si Jehova nga Diyos gikan sa yuta sa tanan nga kahoy nga makapahimuot sa igtatan-aw ug maayo nga kan-on ug ang kahoy usab sa kinabuhi diha sa taliwala sa tanaman ug ang kahoy sa pag-ila sa maayo ug sa daotan.”—Genesis 2:8, 9.
Ang sunod nga mga bersikulo naglamdag kanato kon unsay kalabotan niini sa modernong-adlawng krisis sa pagsalig. Atong mabasa: “Si Jehova nga Diyos nagsugo usab sa tawo: ‘Makakaon ka nga may katagbawan sa tanan nga kahoy sa tanaman. Apan sa kahoy sa pag-ila sa maayo ug sa daotan dili ka magkaon niini, kay sa adlaw nga mokaon ka niini mamatay ka gayod.’” (Genesis 2:16, 17) Duna bay katarongan si Adan nga magduhaduha sa gisulti ni Jehova?
Padayon natong mabasa: “Karon ang bitin malalangon labi pa kay sa ngatanan nga mga mananap sa kapatagan nga gibuhat ni Jehova nga Diyos. Ug miingon siya sa babaye: ‘Nag-ingon ba gayod ang Diyos nga dili kamo makakaon sa tanan nga mga kahoy sa tanaman?’ Ug ang babaye mitubag sa bitin: ‘Makakaon kami sa bunga sa mga kahoy sa tanaman. Apan sa bunga sa kahoy nga anaa sa taliwala sa tanaman, miingon ang Diyos, “Dili kamo magkaon niana, dili, bisan maghikap niana, aron kamo dili mamatay.”’ Ug ang bitin miingon sa babaye: ‘Dili gayod kamo mamatay. Kay nahibaloan sa Diyos nga sa adlaw nga kamo mokaon niini mangabuka ang inyong mga mata ug mahimo kamo nga sama sa Diyos, nga mahibalo sa maayo ug sa daotan.’ Ug nakita sa babaye nga ang kahoy maayo nga kan-on ug nga kini makalipay sa mga mata, oo, ang kahoy tilinguhaon nga tan-awon. Busa mikuha siya sa bunga niini ug mikaon. Pagkahuman niana gihatagan usab niya ang iyang bana sa nakauban niya siya ug mikaon siya.”—Genesis 3:1-6.
Kay wala manumbaling sa tin-awng pasidaan sa Diyos, si Adan ug Eva nagpasundayag ug kakulang ug pagsalig kang Jehova. Sila kaamgid sa kaaway sa Diyos nga si Satanas, nga nakigsulti kang Eva pinaagi sa tinuod nga bitin. Si Satanas kulang ug pagsalig sa paagi ni Jehova sa pagmando. Tungod niini ug sa mapahitas-on ug ambisyosong kasingkasing, mirebelde siya batok sa Diyos ug nagpahisalaag sa katawhan aron himoon usab kini. Iyang giimpluwensiyahan sila sa pagtuo nga ang Diyos dili kasaligan.
Ang Resulta? Nadaot nga mga Relasyon
Imo tingaling napanid-an nga ang mga indibiduwal nga walay pagsalig sa uban nalisdan sa paghupot ug panaghigalaay. Si Publilius Syrus, usa ka Latino nga manunulat sa unang siglo W.K.P., nagsulat: “Ang pagsalig mao lamang ang bugkos sa panaghigalaay.” Tungod sa ilang pagrebelde, gipakita ni Adan ug Eva nga wala silay pagsalig sa Diyos. Busa, wala gayoy katarongan ang Diyos nga mosalig kanila. Ingong resulta sa pagkahugno sa pagsalig, o kompiyansa, nawala sa unang mga tawo ang panaghigalaay uban sa Diyos. Walay timailhan nga nakigsulti pa pag-usab si Jehova kanila human niya sila gihukman tungod sa ilang pagrebelde.
Ang relasyon tali kang Adan ug Eva nadaot usab. Gipasidan-an ni Jehova si Eva: “May kasakit ikaw nga magapanganak ug mga anak, ug ang imong tinguha mao ang pagpangandoy sa imong bana, ug siya magabuot kanimo.” (Genesis 3:16) Ang The Jerusalem Bible nag-ingon: “Siya maghinawod ibabaw kanimo.” Inay nga ipasundayag ang mahigugmaong pagkaulo diha sa iyang asawa, sumala sa buot unta sa Diyos, si Adan niadtong tungora nahimo na nga iyang agalon, nga nagharihari ibabaw niya.
Human sa ilang pagpakasala, gisulayan ni Adan nga ipasa ang pagbasol ngadto sa iyang asawa. Sa iyang hunahuna ang gihimo sa iyang asawa maoy hinungdan nga sila gipalagpot gikan sa usa ka hingpit nga tanaman ngadto sa wala matikad nga yuta, nga tinunglo nga maghago ilalom sa dili hingpit nga mga kahimtang una pa mobalik sa abog. (Genesis 3:17-19) Mahanduraw nato pag-ayo nga kini mao ang hinungdan sa panagbingkil tali sa duha. Tingalig misobra ang reaksiyon ni Adan, nga misulti nga dili na gayod siya maminaw pag-usab kang Eva. Posibleng mibati siya nga may katarongan sa pagsulti kaniya, nga mora bag miingon, ‘Sukad karon, ako na ang matuman!’ Sa pikas nga bahin, mahimong nakita ni Eva nga napakyas si Adan sa iyang papel ingong ulo sa pamilya, nga nagpahinabog pagkawala sa iyang pagsalig kaniya. Bisan pa niana, tungod sa pagpahayag ug kakulang ug pagsalig sa Diyos, nawad-an ang katawhan sa ilang panaghigalaay uban kaniya ug nagdaot sa ilang relasyon sa usag usa.
Kang Kinsa Kita Makasalig?
Dili tanan ang takos sa atong pagsalig, ingon sa panig-ingnan nga gipakita ni Adan ug Eva. Unsaon nato pagkahibalo kon kinsa ang takos ug dili takos sa atong pagsalig?
Ang Salmo 146:3 nagtambag kanato: “Ayaw ibutang ang inyong pagsalig diha sa mga halangdon, ni sa anak sa tawo, nga kaniya walay kaluwasan.” Ug sa Jeremias 17:5-7, atong mabasa: “Tinunglo ang tawo nga nagbutang sa iyang pagsalig sa tawo ug naghimo gayod sa tawo nga iyang kusog, ug kansang kasingkasing nagbiya kang Jehova mismo.” Sa laing bahin, “bulahan ang tawo nga nagbutang sa iyang pagsalig kang Jehova, ug gihimo si Jehova nga iyang pagsalig.”
Tinuod, ang pagbutang ug pagsalig sa tawo dili kanunayng sayop. Kadto nga mga teksto yano lamang nga nagpasiugda nga ang pagsalig sa Diyos dili masayop, apan ang pagbutang ug pagsalig sa dili hingpit nga mga tawo motultol usahay ug kadaot. Pananglitan, ang katawhan nga mosalig sa mga tawo nga maoy makahimo sa butang nga Diyos lamang ang makahimo—pagtagana ug kaluwasan ug pagpahinabo ug bug-os nga kalinaw uban ang kasegurohan—nagpadulong sa kahigawad.—Salmo 46:9; 1 Tesalonica 5:3.
Sa pagkatinuod, ang mga tawo ug ang tawhanong mga institusyon takos sa pagsalig kutob lamang sa sukod nga sila naggawi uyon sa mga katuyoan sa Diyos ug nagpasundayag ug diyosnong mga prinsipyo. Busa, kon buot natong dasigon ang uban nga mosalig kanato, kinahanglan kitang mosulti sa tinuod, nga magmatinud-anon ug kapiyalan. (Proverbio 12:19; Efeso 4:25; Hebreohanon 13:18) Pinaagi lamang sa ato mismong paggawi nga nahiuyon sa mga prinsipyo sa Bibliya nga mahimong makataronganon ang pagsalig sa uban kanato ug mapamatud-ang usa ka tuboran sa kalig-on ug kadasig sa usag usa.
Pagpasig-uli sa Pagsalig
Ang mga Saksi ni Jehova dunay lig-ong pasukaranan sa pagbutang sa pagsalig diha sa Diyos ug nagdasig sa uban nga mohimo usab sa ingon. Si Jehova kasaligan ug maunongon, usa nga kanunayng kapiyalan nga motuman sa iyang gisulti, tungod kay “imposible sa Diyos nga mamakak.” Ang pagsalig nga ibutang diha sa Diyos sa gugma dili gayod motultol sa kahigawad.—Hebreohanon 6:18; Salmo 94:14; Isaias 46:9-11; 1 Juan 4:8.
Ang katawhan nga nahiusa sa pagbaton ug pagsalig kang Jehova ug nagkinabuhi uyon sa iyang mga prinsipyo kusganong natukmod sa pagpasundayag ug pagsalig sa usag usa. Diha sa usa ka kalibotan nga nag-antos ug krisis sa pagsalig, usa gayod ka kalipay nga makakaplag ug mga tawong kasaligan! Handurawa kon unsa ka lahi unta ang kalibotan kon duna kitay bug-os nga pagsalig sa kon unsay isulti o himoon ni bisan kinsa! Sa umaabot nga bag-ong kalibotan nga gisaad sa Diyos mahimong ingon niini ang kahimtang. Wala na gayod unyay krisis sa pagsalig!
Buot mo bang magkinabuhi nianang panahona? Kon buot mo, ang mga Saksi ni Jehova nagdapit kanimo nga lig-onon ang imong pagsalig sa Diyos ug sa iyang mga saad pinaagi sa pagtuon ug dugang maylabot sa iyang mga kinahanglanon alang sa kinabuhi. Ang pagtuon sa Bibliya mohatag ug pamatuod nga adunay Diyos, nga siya interesado sa kaayohan sa katawhan, ug nga hapit na siyang molihok aron tul-iron ang mga suliran sa kalibotan pinaagi sa iyang Gingharian. Minilyon ang nakatuon sa pagbutang sa ilang pagsalig sa Diyos ug sa iyang Pulong, ang Bibliya. Ang mga Saksi ni Jehova malipay nga ipasundayag kanimo ang serbisyo publiko nga pagtuon sa Bibliya nga kurso nga ilang ginatanyag nga walay bayad. O pagsulat sa mga magpapatik niini nga magasin alang sa dugang nga impormasyon.
[Blurb sa panid 5]
Ang kakulang ug pagsalig sa Diyos mosangpot sa nadaot nga tawhanong mga relasyon
[Blurb sa panid 6]
Ang mga tawo takos sa pagsalig kutob lamang sa sukod nga sila naggawi nga uyon sa diyosnong mga prinsipyo