Seguroa nga Unahon ang mga Butang nga Angayng Unahon!
Gabii nga dunay tigom, apan duna kay buhatonon. Unsay imong unahon?
IKAW usa ka bana ug amahan. Samtang ang dugay, kapoy nga adlaw sa trabaho talitapos na, gihunahuna nimo ang tigom sa kongregasyon nga gieskedyul alang sa maong gabii. Kon mobiya ka dayon sa trabaho, may igo ka pang panahon sa pagkaligo, pag-ilis sa imong mga sinina, ug pagkaon ug dalidali una pa moadto sa tigom. Sa kalit lang, ang imong amo miduol ug mihangyo nga paobertaymon ka. Misaad siya nga suweldohan ka ug dako. Gikinahanglan nimo ang salapi.
O ikaw usa ka asawa ug inahan. Samtang naghikay ka sa panihapon, nakita nimo ang usa ka pundok sa wala pa maplantsa nga sinina, nga ang uban niana gamiton pagkaugma. Imong gipangutana ang imong kaugalingon, ‘Kon motambong ko ug tigom karong gabii, kanus-a pa ko makahigayon sa pagpamalantsa?’ Sanglit di pa dugayng nakasulod ug bug-os-panahong trabaho, nahibaloan nimo kon unsa ka lisod ang pag-atiman sa mga buhatbuhaton sa balay samtang nanginabuhi.
O ikaw usa ka estudyante. Sa imong lawak, nagtipun-og ang homwork diha sa lamesa. Kasagaran niana dugaydugay nang giasayn, apan nag-unya-unya ka lang, ug karon ubay-ubay nang asaynment ang kinahanglang taposon dihadiha. Naaghat ka sa pagpananghid sa imong mga ginikanan nga dili motambong sa tigom aron humanon ang imong homwork.
Unsay imong unahon: ang dugang sekular nga trabaho, ang pagpamalantsa, ang homwork, o ang tigom sa kongregasyon? Unsay kahulogan, sa espirituwal nga pagkasulti, sa pag-una sa mga butang nga angayng unahon? Unsay panglantaw ni Jehova?
Unsay Angayng Unahon?
Wala madugay human ang mga Israelinhon nakadawat sa Napulo ka Sugo, usa ka tawo ang nadiskobrehan nga nangahoy panahon sa Igpapahulay. Kini estriktong gidili sa Balaod. (Numeros 15:32-34; Deuteronomio 5:12-15) Unsaon kaha nimo paghukom ang maong kaso? Imo kahang pasayloon ang maong tawo, nga mangatarongan nga, total, wala man siya magtrabaho aron sa pagmentinar ug luho nga estilo sa pagkinabuhi kondili aron sa pagtagana sa mga kinahanglanon sa iyang pamilya? Mangatarongan ka kaha nga duna pa bitaw ing daghang okasyon sa tibuok tuig sa pagsaulog sa Igpapahulay ug kanang gipaltahan nga kahigayonan, tingali tungod sa kapakyasan sa maong tawo sa pagplanong daan, dali rang pasayloon?
Mas ugdang ang pag-isip ni Jehova sa maong kaso. “Ngadtongadto,” ang Bibliya nag-ingon, “si Jehova miingon kang Moises: ‘Ang maong tawo kinahanglang pagapatyon gayod.’” (Numeros 15:35) Nganong nasuko kaayo si Jehova sa gibuhat sa maong tawo?
Ang mga tawo may unom ka adlaw sa pagpangahoy maingon man sa pag-atiman sa ilang mga panginahanglan maylabot sa pagkaon, pamesti, ug puy-anan. Ang ikapitong adlaw kinahanglang ideboto sa ilang espirituwal nga mga panginahanglan. Bisan tuod dili sayop ang pagpangahoy, sayop ang paggamit sa panahon nga angay untang igahin sa pagsimba kang Jehova sa paghimo niana. Bisan tuod ang mga Kristohanon wala mailalom sa Moisesnong Balaod, dili ba kining maong hitabo nagtudlo kanato ug leksiyon sa hustong paghikay sa atong mga prioridad karong adlawa?—Filipos 1:10.
Human mogugol ug 40 ka tuig sa kamingawan, ang mga Israelinhon nangandam nga mosulod sa Yutang Saad. Ang uban gipul-an na sa pagkinaon sa hinatag sa Diyos nga mana diha sa kamingawan ug sa walay duhaduha nangandoy ug laing pagkaon. Aron matabangan sila nga mahuptan ang hustong panglantaw samtang misulod sila sa yuta “nga nagapaagay sa gatas ug dugos,” gipahinumdoman sila ni Jehova: “Ang tawo dili mabuhi sa tinapay lamang kondili sa tagsatagsa ka pulong nga magagula sa baba ni Jehova nga mabuhi ang tawo.”—Exodo 3:8; Deuteronomio 8:3.
Ang mga Israelinhon kinahanglang maghago alang sa ilang “gatas ug dugos.” Dihay mga kasundalohan nga pagapildihon, mga balay nga pagatukoron, mga umahan nga pagatamnan. Bisan pa niana, gisugo ni Jehova ang katawhan sa paggahin ug panahon kada adlaw sa pagpamalandong sa espirituwal nga mga butang. Sila kinahanglang mogugol usab ug panahon sa pagtudlo sa mga dalan sa Diyos ngadto sa ilang mga anak. Si Jehova miingon: “Kinahanglang igatudlo mo usab [ang akong mga sugo] sa imong mga anak, aron magasulti kanila kon magalingkod ikaw sa imong balay ug kon molakaw ikaw sa dalan ug kon mohigda ikaw ug kon ikaw mobangon.”—Deuteronomio 11:19.
Katulo sa usa ka tuig ang matag lalaki nga Israelinhon ug proselita diha sa maong nasod gisugo sa pag-atubang kang Jehova. Kay nakaamgo nga ang tibuok pamilya makabenepisyo sa espirituwal gikan sa maong mga okasyon, daghang ulo sa pamilya ang naghikay nga mouban kanila ang ilang asawa ug mga anak. Apan kinsay manalipod sa ilang mga balay ug sa ilang mga uma batok sa pagsulong sa kaaway samtang milakaw ang pamilya? Si Jehova misaad: “Walay bisan kinsa nga magtinguha sa imong yuta kon ikaw motungas sa pagpakita sa atubangan ni Jehova nga imong Diyos katulo sa usa ka tuig.” (Exodo 34:24) Nagkinahanglag pagtuo alang sa mga Israelinhon sa pagtuo nga kon unahon nila ang espirituwal nga mga intereses, dili sila mawad-an sa materyal nga paagi. Gituman ba ni Jehova ang iyang pulong? Gituman gayod!
Padayona Pagpangita Pag-una ang Gingharian
Gitudloan ni Jesus ang iyang mga sumusunod sa pag-una sa espirituwal nga mga prinsipyo kay sa bisan unsa. Sa Wali sa Bukid, gitambagan niya ang iyang mga mamiminaw: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ . . . Padayong pangitaa nga una ang gingharian ug ang iyang pagkamatarong, ug kining tanang [kinahanglanong materyal nga] mga butang idugang kaninyo.” (Mateo 6:31, 33) Wala magdugay human sa kamatayon ni Jesus, ang bag-ong nabawtismohang mga Kristohanon misunod sa maong tambag. Daghang Hudiyo o mga Hudiyong proselita ang mibiyahe paingon sa Jerusalem alang sa pagsaulog sa pista sa Pentekostes sa 33 K.P. Samtang atua didto, usa ka butang nga wala damha ang nahitabo. Ilang nadungog ug gidawat ang maayong balita mahitungod kang Jesu-Kristo. Naghinamhinam sa pagkat-on ug dugang bahin sa ilang bag-ong-kaplag nga pagtuo, nagpabilin sila sa Jerusalem. Nagkadiyutay ang ilang pagkaon, apan ang materyal nga kaharuhay maoy segundaryo lamang. Nakaplagan nila ang Mesiyas! Ang ilang Kristohanong mga igsoon nagpaambit kon unsang materyal nga mga butang nga ilang nabatonan aron ang tanan makapadayon sa ‘pagdeboto sa ilang kaugalingon sa ginatudlo sa mga apostol ug . . . sa mga pag-ampo.’—Buhat 2:42.
Paglabay sa panahon, ang ubang mga Kristohanon nagpasagad sa panginahanglan sa regular nga pagpakig-uban diha sa mga tigom. (Hebreohanon 10:23-25) Tingali nahimo silang materyalistiko, nga nagpasagad sa espirituwal nga mga butang samtang naningkamot sa pagtino nga sila ug ang ilang pamilya makabaton ug pinansiyal nga kasegurohan. Human awhaga ang iyang mga igsoon nga dili talikdan ang mga panagkatigom, si apostol Pablo misulat: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa mga butang nga anaa karon. Kay siya nag-ingon: ‘Dili ko gayod ikaw pagabiyaan ni sa bisan unsa mang paagi magatalikod kanimo.’”—Hebreohanon 13:5.
Ang tambag ni Pablo tukma gayod diay sa panahon. Mga lima ka tuig human sulata ni Pablo ang iyang sulat ngadto sa mga Hebreohanon, ang Romanong kasundalohan ni Cestio Gallo milikos sa Jerusalem. Ang matinumanong mga Kristohanon nahinumdom sa pasidaan ni Jesus: “Sa dihang inyong malantawan [kini] . . . , ang tawong anaa sa atop ayaw na pakanaoga, ni pasudlon man aron mokuhag bisan unsa gikan sa iyang balay; ug ang tawo nga anaa sa uma ayaw na pabalika sa mga butang sa likoran aron kuhaon ang iyang panggawas nga besti.” (Marcos 13:14-16) Sila nahibalo nga ang ilang kaluwasan nagdepende, dili sa kamalungtaron sa ilang trabaho o sa kantidad sa ilang materyal nga mga kabtangan, kondili sa ilang pagkamasinugtanon sa mga instruksiyon ni Jesus. Kadtong misanong sa tambag ni Pablo ug nag-una sa espirituwal nga mga intereses sa walay duhaduha wala malisdi sa pagtalikod sa balay, trabaho, mga sinina, ug gimahal nga personal nga mga kabtangan ug pagkalagiw ngadto sa kabukiran kay ni bisan kinsa nga wala mahigawas sa gugma sa salapi.
Kon Giunsa sa Pipila Pag-una ang mga Butang nga Angayng Unahon Karong Adlawa
Ang matinumanong mga Kristohanon karong adlawa nagpabili sa regular nga pagpakig-uban sa ilang mga igsoon, ug daghan ang naghimog mga sakripisyo aron makatambong sa mga tigom. Sa pipila ka dapit, ang bugtong trabahong mabatonan naglangkit ug pagrelibohay sa trabaho. Usa ka igsoong lalaki mitanyag nga ilisan ang iyang mga kauban sa trabaho sa mga gabii sa Sabado, nga mas gustong gamiton sa kadaghanang tawo sa iyang komunidad alang sa lulinghayaw, kon sila sa baylo motrabaho sa iyang relibo sa mga gabii nga dunay tigom. Ang ubang mga igsoon nga nagrelibohay sa trabaho motambong sa mga tigom sa duol nga kongregasyon kon ang ilang trabaho magpugong kanila sa pagtambong sa ilang kaugalingong tigom. Niining paagiha, halos wala gayod sila makapalta ug tigom. Usa ka bag-ong interesadong babaye sa Canada nakaamgo dayon sa kahinungdanon sa Tunghaan sa Teokratikanhong Ministeryo ug sa Tigom sa Pag-alagad, apan ang iyang eskedyul sa trabaho nagpugong kaniya sa pagtambong. Busa, gisuholan niya ang kaubang trabahador sa pagtrabaho sa iyang relibo aron makatambong siya niining hinungdanong mga tigom.
Daghang nag-antos sa laygay nga mga sakit ang panagsa rang mopalta ug tigom. Mamati sila sa programa diha sa balay pinaagi sa telepono o sa teyp rekording kon dili sila makatambong sa Kingdom Hall. Gipakita nila ang dalayegong pagpabili alang sa espirituwal nga mga tagana ni Jehova pinaagi sa iyang “kasaligan ug mabuot nga ulipon”! (Mateo 24:45) Ang mga Kristohanon nga nagsilbing mga tig-atiman sa ilang tigulang nga mga ginikanan magpabili gayod sa dihang ang usa ka igsoong lalaki o babaye motanyag nga magpabilin uban sa ginikanan aron ang tig-atiman makatambong sa tigom sa kongregasyon.
Planohang Daan!
Ang mga ginikanan nga mahunahunaon sa ilang kaugalingong espirituwal nga mga panginahanglan motabang sa ilang mga anak nga magpabili sa Kristohanong mga tigom. Kasagaran, dahomon nila nga ang ilang mga anak mohimo sa ilang homwork sa dihang giasayn kini inay tugotan nga magtipun-og ang mga asaynment. Sa mga gabii nga dunay tigom ang mga anak maghimo dayon sa ilang homwork inig-uli nila sa balay gikan sa tunghaan. Ang mga pasatiempo ug ubang mga kalihokan dili tugotan nga mopugong sa pagtambong sa mga tigom sa kongregasyon.
Ingong bana ug amahan, prioridad ba nimo ang pagtambong sa tigom? Ingong usa ka asawa ug inahan, naningkamot ka ba sa pagplano sa imong mga kaakohan aron makatambong sa mga tigom? Ingong tin-edyer, giisip mo ba ang mga tigom nga mas hinungdanon kay sa homwork o giisip ang homwork nga mas hinungdanon kay sa mga tigom?
Ang tigom sa kongregasyon maoy mahigugmaong tagana ni Jehova. Kinahanglang maningkamot pag-ayo aron makig-ambit nianang kahikayan. Si Jehova dagayang magapanalangin kanimo kon unahon nimo ang mga butang nga angayng unahon!