Mga Magmamantala sa Gingharian Nagtaho

Usa ka Kanhing Magsusupak Nakakat-on sa Kamatuoran

DAGHAN na kaayo ang gikabalita bahin sa sibil nga gubat sa Liberia. Tinagpulo ka libo ang nawad-an sa ilang kinabuhi, ug mas daghan pa ang gipapahawa sa nasod. Luyo niining mga kalisod, ang matinud-anon-ug-kasingkasing nga mga tawo nagpadayon sa pagsagop sa kamatuoran, segun sa gipakita sa mosunod nga kasinatian.

Sukad pa sa diyes anyos, si James naedukar na sa Luteranong Iglesya. Human mahimong editor sa usa ka mantalaan sa simbahan, gigamit niya ang iyang katungdanan sa pagsulat batok sa mga Saksi ni Jehova. Kini maoy luyo sa kamatuoran nga wala pa siya sukad makahimamat ug usa kanila.

Miabot ang panahon, miluwat si James sa pagkaeditor sa mantalaan sa simbahan ug nahimong malamposong tag-iya ug motel. Usa ka adlaw niana samtang siya naglingkod sa dawatanag bisita diha sa iyang motel, duha ka hapsayg pamesting mga sister ang miduol kaniya. Sa pagkakita sa ilang hinlong panapot, iya silang gipasulod. Apan sa dihang ilang gisaysay ang katuyoan sa ilang pagduaw, siya miingon, “Puliki kaayo ko aron makig-estorya.” Ang mga Saksi mitanyag kaniyag mga suskrisyon sa mga magasing Bantayanang Torre ug Pagmata!, ug iyang gidawat aron lamang sila manglakaw. Sulod sa 12 ka bulan ang mga magasin midangat sa iyang balay, apan iyang gibutang kini sa usa ka bag nga plastik nga wala gani kuhaa ang mga putos niini.

Gisangka ang usa ka sibil nga gubat, busa giempake ni James ang usa ka bag nga salapi ug bililhong mga butang aron mokalagiw sa unang ilhanan sa pag-atake. Usa ka buntag niana may mibutong granada sa luyo sa iyang pultahan sa likod, ug sa iyang kalisang iyang gisignit ang iyang bag ug miikyas. Miipon sa linibong nanagan nga mga sibilyan, siya kinahanglang moagig daghang checkpoint. Didto, ang inosenteng mga sibilyan kasagarang gitulis ug gipatay sa way klarong hinungdan.

Sa unang checkpoint, gisukitsukit si James ug dayon giingnang ablihan ang iyang bag. Sa iyang pag-abli, iyang gitan-aw ang iyang bag ug wala makatuo sa iyang nakita. Nahadlok siya sa pagkakita nga ang bag nga iyang nadala dili mao ang nasudlan sa iyang bililhong mga butang. Sa iyang kalisang, napunit niya ang bag nga maoy gisudlan sa tanang wala maablihing mga magasin nga Bantayanang Torre ug Pagmata! Apan, sa dihang nakita sa sundalo ang mga magasin ug nabasa ang iyang ngalan diha sa mga marka, siya miingon: “Aw, usa ka diay sa mga Saksi ni Jehova. Wala kami mangita ninyo, nasayod kaming dili mo mamakak.” Human mokuhag pipila ka magasin gikan sa bag, gipalakaw sa sundalo si James.

Mao gihapon ang nahitabo sa siyam ka nagkalainlaing mga checkpoint, sanglit ang tanang komander naghunahuna nga si James maoy usa sa mga Saksi ni Jehova ug gipaagi siya nga wala unsaa. Mapasalamaton niadtong tungora si James nga wala niya madala ang iyang bililhong mga butang tungod kay sa iyang nakita, napatay na unta siya gumikan sa iyang mga kabtangan.

Dihang nakaabot na siya sa kataposan ug labing gikahadlokang checkpoint, gingilngigan siya sa pagkakita sa daghang patayng lawas nga nanghay-ad. Nakuyawan, siya misangpit sa ngalan ni Jehova. Siya nag-ampo nga kon ang Diyos motabang kaniyang makasagubang niining patyanang lugar, siya moalagad kaniya sa nahibiling bahin sa iyang kinabuhi.

Gipakita ni James ang iyang bag ngadto sa mga sundalo, ug sa makausa pa sila miingon: “Wala ta mangita ning mga tawhana.” Miliso kaniya, sila midugang: “Usa sa imong mga igsoon nagpuyo sa ubos ning bungtora. Adto ug kuyog kaniya.” Niining higayona ang panglantaw ni James bahin sa mga Saksi bug-os nga nausab. Nakontak dayon niya ang igsoon, ug ang mga kahikayan gihimo alang sa pagtuon sa Bibliya sa libro nga Ikaw Mabuhing Walay Kataposan sa Paraiso sa Yuta.a

Pipila ka adlaw sa ulahi, ang pag-atake nagpugos kaniya sa pagkalagiw gikan sa maong dapit. Niining higayona, midagan si James ngadto sa kalibonan nga nagdala lamang sa iyang Mabuhing Walay Kataposan nga libro! Sulod sa 11 ka bulan nga nahilain sa mga Saksi, natun-an niya ang enterong libro sulod sa lima ka beses. Sa dihang sa kataposan nakabalik siya sa siyudad, gisugdan niya pag-usab ang iyang pagtuon sa Bibliya uban sa mga Saksi ug kusog nga miuswag. Wala madugay sa ulahi, siya nabawtismohan, ug karon siya nag-alagad nga matinumanon duyog sa iyang espirituwal nga mga igsoon.

[Mga footnote]